Mun’ya Owerya Dhai Ovaha Miruku Dhooreera?

1. Taani anreerela ovaha miruku? Ntthokihere.

NIIRE nyuwo onnoodhivelani ovaha miruku? Woonawene atthu akina pooti waakhweela opaka elo. Masi atthu akina annoovelela ovaha miruku okhala wiira khanwerya opaka elo mwa enamuna yoohakalaliha. Ndho moohixikha akhala wiira onninikhweela ovaha miruku aahiidho naari, ootheene nihaana ivaara dhikina ovaha miruku. Mwaha wa seeni? Okhala wiira Yeesu aalontte wiira atthareli-ye eekhweeli yaandhuweliwa mwaha wa woonihera ophetana nkina ni nkhwe. (Yohani 13:35) Ndho enamuna emodha ninoonihera nhu wiira ninnaapheta anna ni arokora, ori waavaha miruku okathi anramela awa. Nitho nkhama Nuulumo na Muluku ninlotta awa ‘oxirikha wooloka onnikhumelela mwaha wa miruku dheekhweeli.’—Mir. 27:9.

2. Eseeni asitokweene anreerela awa opaka, ni mwaha wa seeni? (Moone-tho ekwaaturu eni: “Moopora Woovaha Miruku Okathi wa Mithukumano dha Eriyari ya Esumana.”)

² Mwaha ola ti wootepa otthuneya saasaasa wa asitokweene, okhala wiira awo ahaana odhuwela saana waavaha miruku dhooreera atthu akina. Ndho Yehova anrumeelaka Yeesu, ohaathanla alopwana awo wiira ekhapelele muloko. (1 Ped. 5:2, 3) Enamuna emodha asitokweene ampaka awa elo, ovaha miruku dhinkhuma mbiibiliyani vaavo anlotta awa miyaha onthukumanoni. Nitho awo anninivaha miruku okathi ninramela nhu ni annaakhalihera ale ahin’ye onrumeela Yehova otthikela mmulokoni. Ndho ootheene nhu waahela mpuwa asitokweene, nin’ya owerya dhai ovaha miruku dhooreera?

3. (a) Eseeni en’ya onikhalihera owerya ovaha miruku dhooreera? (Yesaya 9:6; moone-tho ekwaaturu eni: “Muntakihe Yeesu Vaavo Munvaha Nnyu Miruku.”) (b) Eseeni nin’ya nhu woona yoosoma ela?

³ Ninoowerya ohudha ovaha miruku dhooreeera nittharaka matakihero a atthu anromoliwa mbiibiliyani, saasaasa ntakihero na Yeesu. Biibiliya onnimwiitthana Yeesu okhala ‘Namavaha Miruku Oothamaliwa.’ [(Munsome Yesaya 9:6) 9:5, Biblia Solempwa Sowarya.] Yoosoma ela, nin’ya woona etthu ninreerela nhu opaka okathi ninvekeliwa nhu miruku ni vaavo ninoona nhu wiira ninnireerela ovaha miruku hata nihivekeliwe. Nitho ninawoona otthuneya-wa ovaha miruku okathi wooreerela ni mwa enamuna yooreera.

MOOPORA WOOVAHA MIRUKU VAAVO NINVEKELIWA NHU

4-5. Nikoho seeni ninreerela nhu wiikoha nihinatthi onvaha ntthu miruku? Nvahe ntakihero.

⁴ Noonele dhai vaavo ntthu onnivekela iye miruku? Woonawene okathi owo, ninnihakalala vawaatta mwaha wa odhuwela wiira ntthu owo onniniroromela. Nitho vaavo enniraneya awa elo, ninnitthuna opaka etthu mwawaakuveya wiira ninkhalihere. Masi nihinatthi opaka elo nihaana wiikoha wiira: ‘Niire ka ntthu oophwanelela ovaha miruku mwaha ola?’ Ivaara dhikina, enamuna yooreerela onkhalihera ntthu kahi onvaha miruku, masi omoonihera ntthu oophwanelela okhanle onkhalihera mwaha owo.

⁵ Mwa ntakihero, nkahaya muupuwele wiira nxirikha nnyu onniwereiwa eretta yuulupale. Owo onnooleelani wiira oothokodha inamuna dhoovirikana dhoolooliwa ni onnoovekelani wiira munleele enamuna yooreerela. Woonawene nyuwo pooti woona enamuna emodha okhala yooreerela oxira dhikina, masi nhiliyale wiira kahi mameetiku aahiidho khamumpanke kuursu ooloola eretta elo. Ndho mwaha ola, etthu yooreerela opaka ori onkhalihera nxirikha nnyu omphwanya ntthu oophwanelela okhanle onkhalihera.

6. Seeni eri awa etthu yooreera olipelela okathi vakhaani nihinatthi omwaakhula ntthu onivekenle miruku?

⁶ Hata noonaka wiira ninoowerya ovaha miruku voohima dha mwaha mmodha, woonawene nihaana olipelela okathi vakhaani nihinatthi omwaakhula ntthu onivekenle miruku. Mwaha wa seeni? Miruku 15:28 enlotta wiira: ‘Anaxariya annuupuwelela ehinatthi waakhula.’ Masi ankhi akhala ninidhuwela waakhula mwaha owo? Hata eri dhiidho, nihaana waadhya okathi wooreerela wiira nithokodhe, ovekela ni wuupuwelela. Ndho napaka elo, nikhupali wiira miruku nin’ya ovaha voohima dha mwaha owo dhinnivarihana ni moonelo wa Yehova. Vano, nirowe nithokorerye ntakihero na profeeta Nataani.

7. Eseeni nhudha nnyu ni ntakihero na Nataani?

⁷ Mwene Davidi aahinleela profeeta Nataani wiira aatthuna ontekela etempulu ya Yehova. Mwawaakuveya profeeta Nataani aahinvaha miruku antumereryaka opaka elo. Masi owo aanireerela toko-toko onkoha Yehova ahinatthi ovaha miruku. Mwaha wa seeni? Okhala wiira Yehova khaatthunne wiira etempulu etekiwe ni Davidi. (1 Wah. 17:1-4) Nkhama nnoonihera awa ntakihero nna, vaavo ninvekeliwa nhu miruku, nihaana owoonihera aakhili ‘nilekelaka olotta.’—Yak. 1:19.

8. Nthowa seeni nikina ninreerela nhu okhalana ephoole vaavo ninvaha nhu miruku?

⁸ Nookhala nthowa nikina nireerela nhu okhalana ephoole vaavo ninvaha nhu miruku. Nthowa-na ti nna: Akhala wiira ninoonvaha ntthu miruku dhikhanle omwiiriha opaka yoothanla nuumala dhinkhumelela mixankiho, ninookhala nthowa mwaha wa etthu ekhumelenle. Voohaakanyera, nna nthowa ninniiriha wuupuwelela ni ephoole nihinatthi ovaha miruku.

MOOPORA WOOVAHA MIRUKU HATA NIHIVEKELIWE

9. Eseeni asitokweene anreerela awa odhuwela ehinatthi ovaha miruku? (aGalasia 6:1)

⁹ Ivaara dhikina, asitokweene pooti otthuneya ovaha miruku hata ehivekiwe vaavo anoona awa wiira munna mmodha aahiidho nrokora ‘onnirowa ephuro yootakhala.’ (Munsome aGalasia 6:1.) Moolumo a eveesu ela antaphulela wiira “ntthu pooti opaka dhoothanla dhoohiloka ahidhuwelaka, nuuvira okathi dhikhanle omwiiriha opaka etampi yuulupale.” Ndho yoolakela ya asitokweene, onkhalihera ntthu owo wiira ahihiye weetta ephuro emphwanyiha ekumi yoohimala. (Yak. 5:19, 20) Masi wiira miruku an’ya awa onvaha dhiwerye onkhalihera, asitokweene ahaana woona toko-toko akhala wiira tthiri ntthu owo oopacera weetta ephuro yootakhala. Asitokweene annidhuwela wiira vaavo ntthu mmodha ompaka iye yoothanla attharaka yawuupusera ya nrima-ye, owo khampaka etthu yootakhala vamaithoni va Yehova. (aRoma 14:1-4) Masi ankhi akhala wiira asitokweene annoona wiira munna mmodha aahiidho nrokora opaka etthu ekhanle ohonona waataana-we ni Yehova, an’ya owerya dhai onvaha miruku?

10-12. Vaavo asitokweene anvaha awa miruku ehivekeliwe, eseeni anreerela awa opaka? Nvahe nlikanyiho. (Moone-tho efootu.)

¹⁰ Ivaara dhikina pooti waaxankiha asitokweene ovaha miruku ehivekeliwe. Mwaha wa seeni? Nrummwa Paaulu olontte wiira ntthu pooti opacera weetta ephuro yootakhala moohidhuwela. Ndho ehinatthi asitokweene onvaha miruku, ahaana toko opaka itthu wiira enkhalihera ntthu owo waakhulela mwawaakuveya miruku an’ya awa onvaha.

¹¹ Ntthu onvaha miruku ahivekeliwe onlikana ni nlimi onaala etthaka opuro wawuuma. Ahinatthi opacera waala, owo onnilima ni okocihera opuro owo. Opaka elo enikhalihera etthaya woolowa ni okhala yoolikaneene wiira yaaliwevo etthu. Wookhidherani nuumala waala, owo onnirekari etthaka elo wiira emele ni yinnuwe saana. Mwa enamuna emodharu, ahinatthi ntokweene ovaha ahivekeliwe, ohaana olima ni okocihera opuro owo, niire dho, opaka itthu wiira ankhalihere ntthu owo waakhulela mwawaakuveya miruku on’ya iye onvaha. Mwa ntakihero, owo onoopaka elo alipelelaka okathi wooreerela, anleelaka wiira oninvaha efaita ni alottaka wiira onnitthuna ovaanela nuuwo. Ndho akhala wiira ntthu onvaha miruku onoodhuweliwa okhala oopheta ni ooreera nrima, elo enoowiiriha atthu onaavaha iye miruku waakhulela.

¹² Vaavo ntokweene ovaanela iye nuuwo, ohaana ohihiye woolowiha etthaya amuupuseraka wiira ootheene nhu ninnivonya ni ivaara dhikina ninnitthuneya ovahiwa miruku. (aRoma 3:23) Ndho alottaka moomaaleleya ni mwanttittimiho, ntokweene ohaana onrumeela Biibiliya wiira amoonihere moopora owo opacenre iye orowa ephuro yootakhala. Vaavo munna aahiidho nrokora owo onaakhulela iye wiira opaka etthu yoohiloka, ntokweene “onnaala etthaka” anleelaka ni moolumo ookhweya etthu onreerela iye opaka wiira alokihere mwaha owo. Wookhidherani ntokweene “onnirekari” etthaka, anttottopelaka munna aahiidho nrokora owo mwaha wa itthu dhooreera ompaka iye ni avekelaka nuuwo.—Yak. 5:15.

13. Eseeni asitokweene anreerela awa opaka wiira edhuwele akhala wiira ntthu anvanha awa miruku ohiiwasasa saana?

¹³ Ivaara dhikina, ntthu onvaha miruku pooti olotta etthu masi ole oninvaha iye miruku idho ahiwerye wiiwasasa saana. Ndho, eseeni asitokweene anreerela awa opaka wiira edhuwele akhala wiira ntthu anvanha awa miruku ohiiwasasa saana? Mooreera nrima, asitokweene pooti ottittimihera itthu athokorerya awa nuuwo empakelaka makoho wiira yoone akhala wiira ohiiwasasa saana. (Mus. 12:11) Ndho moopora owo onaakhula iye pooti okhalihera ntthu onvaha miruku woona akhala wiira ohiiwasasa saana miruku onvanhe iye.

OVAHA MIRUKU OKATHI WOOREERELA NI MWA ENAMUNA YOOREERA

14. Seeni ninreerela nhu oxaka ovaha miruku ninanariwe? Ntthokihere.

¹⁴ Mwaha wa okhala atthu oohimalalela, ivaara dhikina pooti olotta aahiidho opaka etthu ekhanle waananara atthu akina. (aKol. 3:13) Nitho Biibiliya onnoonihera wiira hiyo pooti opaka etthu ekhanle omwiiriha ntthu nkina onanariwa. (aEefe. 4:26) Tivondho nihaana oxaka otthuna ovaha miruku ninanariwe. Mwaha wa seeni? Okhala wiira ‘onanariwa wa ntthu khonkhumihera exariya ya Muluku.’ (Yak. 1:20) Ohiya-vo, akhala wiira ninoovaha miruku ninanariwe, hiyo pooti otepiha nxankiho owo. Elo khentaphulela wiira khaninreerela onleela ntthu owo etthu eninananre ni moopora ninoonela nhu mwaha owo. Masi nihaana olipelela omala onanariwa iwo wiira niwerye olotta ni ntthu owo moomaaleleya. Hiyo ninoowerya opaka elo nittharaka ntakihero na Elihu, yoowo anvanhe miruku dhooreera Yoobi.

15. Eseeni ninhudha nhu ni ntakihero na Elihu? (Moone-tho efootu.)

¹⁵ Elihu aahiviriha mahiku awaatta anwiriyanaka Yoobi okathi aaidhaakiha iye mwaha wa moolumo ootheriwa iye ni alopwana araru yaarenle ommaaliha. Elihu aahimmorela ikharari Yoobi. Masi owo aahinanariwa vawaatta okathi Yoobi aalontte iye moolumo oohiloka voohima dha Yehova atthunaka wiidhaakiha. Hata eri dhiidho, Elihu aahilipelela ophiya ekwaha-ye ni aahilotta moomaleleya ni mwanttittimiho vaavo anvaha iye miruku Yoobi. (Yobi 32:2; 33:1-7) Ntakihero na Elihu ninninihudhiha etthu yootepa otthuneya: Miruku inoowerya okhala dhootepa oreera akhala wiira ninoovaha okathi wooreerela, mwa enamuna yooreera, mwanttittimiho ni moopheta.—Mus. 3:1, 7.

NHIHIYE OVAHA MIRUKU NI WAAKHULELA OVAHIWA

16. Eseeni ninhudha nhu ni Esalimo 32:8?

¹⁶ Yawaatikhiwa ya muru wa yoosoma ela enlotta wiira ‘Yehova onninivaha miruku anilipelaka.’ (Nsome Esalimo 32:8, Tradução do Novo Mundo da Bíblia Sagrada PT.) Elo entaphulela wiira owo onninikhalihera voohihiyerera. Ndho ohiya pahi Yehova onivaha miruku, owo onninikhalihera ovarihela nteko. Nna ntakihero nootepa oreera ninreerela nhu otthara! Vaavo ninkhalana nhu eparakha ya onvaha ntthu miruku, nihaana otthara ntakihero na Yehova nihihiyaka onlipela ni opaka itthu dhootheene ninwerya wiira ninkhalihe opaka dhoothanla dhooreera dhikhanle okhumela saana.

17. Asitokweene anvaha miruku dhooluluwanya dhinkhuma mBiibiliyani anlikana ni eseeni? Ntthokihere. (Yesaya 32:1, 2)

¹⁷ Olelo-va oxira khalai, tivootepa otthuneya ovaha miruku ni waakhulela ovahiwa. (2 Tim. 3:1) Asitokweene anvaha miruku dhooluluwanya dhinkhuma mbiibiliyani ari nkhama ‘maadhi anvira nipuro nawuuma.’ (Munsome Yesaya 32:1, 2.) Ndho vaavo axirikha nhu andhuwela awa etthu nintthuna nhu wiiwa, masi hata eri dhiidho, ekanileele etthu nintthuneya nhu wiiwa, awo aninninivaha etthu ya efaita yuulupale nkhama ‘masa a ewooru aheliwe ntixelani ya eparatha.’ (Mir. 25:11) Tivondho, ootheene nhu nihihiye owunnuwihera akhili akhanle onikhalihera ovaha miruku dhooreera ni waakhulela ovahiwa.