Nhihiye Ohudha Itthu Ipheya Nrumeelaka Dhoohudhiha Dhoopacera dha Mbiibiliyani

1. Moonenle dhai nuumala odhuwela dhoohudhiha dhoopacera dha mbiibiliyani?

DHOOHUDHIHA dhoopacera dha mbiibiliyani dhoorukunsa ikumi nhu moomalela. Mwa ntakihero, okathi naahundhe nhu wiira ndhina na Muluku ti Yehova, elo yaahiniiriha opaka marukunso wiira nikhale axirikha-ye. (Yes. 42:8) Nuumala odhuwela etthu eniiraneya nuumala ntthu okhwa, noohiya wiikoha akhala wiira atthu naapheta nhu akhwiye anoohaasiwa. (Mus. 9:10) Nitho nuumala ohudha wiira Muluku onawiiriha elapo okhala eparayiisu, hiyo noohiya oxanka nuupuwelaka moopora ekumi nhu en’ya awa okhala nhoolo. Ohiya-vo, ninnikhupali ni nrima wootheene wiira nhoolo ninookhala mahiku awaatta, ohiya mwa iyaakha 70 aahiidho 80, masi mwa mahiku ootheene.—Esal. 37:29; 90:10.

2. Yawaatikhiwa ya 2 Pedru 1:12, 13 enoonihera dhai wiira makiristau oolipa mwa omunepani anoowerya ottottela nreerelo dhoohudhiha dhoopacera dha mbiibiliyani?

² Nihikhala-khale niliyalaka wiira dhoohudhiha dhoopacera dha mbiibiliyani ti dhootepa otthuneya. Pheeduru ahaatikha ewarakha ya naili, awaatikhelaka makiristau yaari ‘oolipa mweekhweelini’. (Munsome 2 Pedru 1:12, 13.) Masi okathi ole, yaahikhala mmulokoni anamavaanyiha ni atthu ootakhala, yaawo yeehererya waahapusa anna wiira ehiye weettela ekhweeli. (2 Ped. 2:1-3) Tivondho Pheeduru aanitthuna waalipiha anna ni arokora ale wiira aakhalihere okhootta dhoohudhiha dhawootha dhaahudhihiwa okathi ole. Ndho wiira apake elo, aahiwuupusera itthu yaahundha awa woopacerani. Dhoohudhiha idho dhanwerya waakhalihera ohihiya okhala oororomeleya mpakha wookhidherani.

3. Seeni makiristau ootheene anreerela awa ohihiya wuupuwelela dhoohudhiha dhoopacera dha mbiibiliyani? Nvahe nlikanyiho

³ Hata nipacenre khalai onrumeela Yehova, ninoowerya ohudha itthu ipheya ni dhoohudhiha dhoopacera dha mbiibiliyani. Mwa nlikanyiho, nkahaya nwuupuwele atthu aili anvara nteko wa waapheya: Mmodha opacenre khalai ni oodhuwela waapeya saana masi nkina onoohudha. Woonawene awo pooti orumeela inkeretiyenti dhimodharu wiira yaapeye eyooca. Masi nooviriha okathi, ole opacenre khalai ni odhuwela waapeya saana pooti ohudha orumeela saana inkeretiyenti idho mwa inamuna dhoovirikana wiira aapeye eyooca yootepa odhiva. Mwa enamuna emodharu, dhoohudhiha dhoopacera dha mbiibiliyani andhuwela awa ale apacenre khalai onrumeela Yehova, khaivirikanne ni idhe andhuwela awa ale apacenre onsoma Biibiliya naanaano. Ekhweeli wiira awo pooti woona dhoohudhiha idho mwa inamuna dhoovirikana. Woonawene okhuma nenne nipatisiwe nhu, aakhumelela marukunso awaatta mweekumini mwihu ni iparakha naakhele nhu mmutekoni mwa Yehova. Masi wuupuwelela ikhweeli nihundhe nhu khalai pooti onikhalihera ophwanya inamuna ipheya dhoovarihela nteko mweekumini mwihu moovarihana ni makhalelo nhu a naanaano. Vano, nirowe noone dhoohudhiha dhoopacera tthaaru dha mbiibiliyani ni ele makiristau oolipa mwa omunepani anhudha awa ni idho.

YEHOVA MPATTUSA

4. Nreerelo seeni niphwanye nhu mwaha woodhuwela wiira Yehova Mpattusa?

⁴ Hiyo noodhuwela wiira ookhala Mpattusa aakhili ni oowerya yoowo opanke elapo ohela mpuwa itthu dhootheene dhirina ekumi. Biibiliya onlotta wiira: ‘Muluku topattunse itthu dhootheene.’ (aHeb. 3:4) Hiyo ninoowerya ohudha itthu dhawaatta ni ekhweeli ela yoopacera ya Biibiliya. Okhala wiira nipattusiwe ni Yehova, owo onnidhuwela itthu dhootheene voohima dha hiyo. Nitho owo onninivaha efaita ni onnidhuwela ele eri yooreera wa hiyo. Ndho odhuwela wiira Yehova Mpattusa, woorukunsa ekumi nhu moomalela ni ohiiriha okhalana yoolakela.

5. Ekhweeli seeni ya mbiibiliyani ennihudhiha okhala awiiyeviha? (Yesaya 45:9-12)

⁵ Odhuwela wiira Yehova Mpattusa, onninihudhiha okhala awiiyeviha. Mwa ntakihero, ivaara emodha, Yoobi aahilotta moolumo ohiloka voohima dha Yehova. Owo aahiliya opaka etthu yootepa otthuneya, apacera wiidhuupuwelela meekhe ni wiidhakiha alotta wiira ahikhalana exariya. Nuumala Yehova ahinkhalihere Yoobi, amuupuseraka wiira Mpattusa Oowerya Dhootheene. (Yobi 38:1-4) Ndho elo yaahinkhalihera Yoobi woona wiira itthu dhootheene Yehova ompaka iye ti dhaxariya. Alottaka wiira apinaatamu ahaana oxaka wiidhoona okhala uulupale onxira Muluku, profeeta Yesaaya aatinke wiira: “Niire oloko onoowerya onkoha nlipa awuupa wiira: ‘Nkuupeleni dhiidha?’”—Munsome Yesaya 45:9-12.

6. Seeni ori awa vooreera owuupuwelela akhili ni owerya wa Mpattusa nhu? (Moone-tho efootu.)

⁶ Vaavo nkiristau onkhalanaiyena dhookumanana dhawaatta, owo pooti opacera wiiroromela mootepana, ohiya ororomela malakihero a Yehova ari mbiibiliyani. (Yobi 37:23, 24) Vaavo eniiraneya awa elo, ti vooreera nkiristau wuupuwelela moopora akhili ni owerya wa Mpattusa nhu ori awa wuulupalesa. (Yes. 40:22; 55:8, 9) Ndho odhuwela elo, enoonkhalihera ohihiya okhala ntthu awiiyeviha ni wiiwasasa wiira miyuupuwelo dha Yehova ti dhootepa otthuneya oxira miyuupuwelo-dhe.

7. Eseeni Rahela aapanke iye wiira aakhulele malakihero mapheya?

⁷ Wuupuwelela wiira Yehova Mpattusa waahinkhalihera Rahela yoowo onkhala wEslovênia, waakhulela malakihero mapheya a ntthenkeso. Owo onlotta wiira: “Okhalawene, ivaara dhikina khonkikhweela waakhulela dhoothanla dha anna anihoolela. Mwa ntakihero, hata kawenrye woona Yoohima ya Nikhuru Noolamulela N.º 8 ya 2023, kahinyoonyiheya ivaara yoopacera nuumala omoona munna mmodha aalotta mwaha ahunwe ereru. Tivondho kaahinvekela Yehova wiira akikhalihere waakhulela malakihero ale. Nuumala Rahela ahuupuwela wiira, okhala wiira Yehova topattunse erimu ni elapo, owo okhalana owerya wa weettiha saana ntthenkeso-ye mwa enamuna yooreera. Niire nyuwo ivaara dhikina onnooliperyani waakhulela wiiwasasa wa naanaano aahiidho malakihero mapheya? Akhala wiira ti dhiidho, etthu munreerela nnyu opaka ori okhala awiiyeviha ni waadhya okathi wiira nwuupuwele akhili ni owerya wa Mpattusa nhu.—aRoma 11:33-36.

MULUKU KHANKHUMIHERA OHAAWA

8. Odhuwela nthowa nimmwiiriha Muluku ohiya ohaawa okhumelelaka wookhalihenreni dhai?

⁸ Seeni Muluku onhiya iye ohaawa okhumelelaka? Atthu awaatta mwaha wa ohidhuwela waakhuliwa wa nikoho nna, anninanariwa ni Muluku, epacera wuupuwela wiira Muluku khakhanle! (Mir. 19:3) Masi moovirikana naawo, nyuwo moohudha wiira ohaawa onkhumiheriwa ni etampi ni ohimalela, ohiya ni Yehova. Nitho moohudha wiira opisa nrima wa Yehova, onnaavaha eparakha atthu imilyawu dhawaatta wiira ewerye ondhuwela ni edhuwele wiira onoomaliha moomalela ohaawa wootheene. (2 Ped. 3:9, 15) Voohaakanyera odhuwela ikhweeli idha ohoovahani nimaaliho ni woolipiha waataana winyu ni Yehova.

9. Okathi seeni ninreerela nhu wuupuwelela mathowa ammwiiriha Yehova ohiya ohaawa okhumelelaka?

⁹ Hiyo ninnidhuwela wiira tivootepa ootthuneya okhala oopisa nrima vaavo ninlipelela nhu Yehova omaliha ohaawa wootheene. Masi vaavo hiyo aahiidho ntthu ninimpheta nhu onviriha iye mixankiho, ohixariya aahiidho okhweliwa ntthu nampheta nhu, woonawene pooti opacera wiikoha wiira: ‘Seeni Yehova olekela iye omaliha ohaawa?’ (Hab. 1:2, 3) Vaavo ninviriha nhu mixankiho nkhama idho, etthu yooreera opaka ori wuupuwelela mathowa ammwiiriha Yehova waahiya anaxariya ehaawaka.a (Esal. 34:19) Nitho nihaana wuupuwelela yoolakela ya Yehova ya omaliha ohaawa wootheene.

10. Eseeni eninkhalihera Anne ovilela nxankiho wa okhweliwa amaamaye?

¹⁰ Odhuwela nthowa nimmwiiriha Muluku ohiya ohaawa okhumelelaka pooti onninikhalihera ovilela mixankiho. Anne yoowo onkhala elika ya oMaiote, mphantta wa wOceano Índico, onlotta wiira: “Nuumala amma okhwa miyaakha vakhaani ottuli, miyo kahiriipiha nrima vawaatta. Tivo okathi wootheene kaniilipihera wuupuwelela wiira Yehova khankhumihera ohaawa. Ohiya-vo, moohilokela, Yehova onoomaliha mixankiho dhootheene dhinniiriha ohaawa ni onaahihimusa atthu naapheta nhu akhwiye. Ndho wuupuwelela ikhweeli idho onninikikhalihera okhalana nrettele kihinweryaka olotta.”

11. Odhuwela mathowa ammwiiriha Yehova ohiya ohaawa okhumelelaka onnikhalihera dhai?

¹¹ Odhuwela nthowa nimmwiiriha Muluku ohiya ohaawa okhumelelaka, onninitumererya ohihiya ovara nteko woolaleerya. Nuumala nrummwa Pheeduru olontta wiira opisa nrima wa Yehova onnaavaha eparakha atthu awaatta wiira ettharuwe ni ephwanye woopowa, owo aahilotta moottharelana airaka: ‘Nthokorerye mweettelo nnyu ni etthu munreerela nnyu opaka. Nkhale atthu anvara miteko dhooreera ni mpake itthu dhinoonihera wiira munniroromeleya wa Muluku.’ (2 Ped. 3:11) Mmodha wa ‘miteko dhinoonihera ororomeleya wa Muluku’, ori olaleerya. Nintakihaka Yehova, hiyo ninnaapheta atthu ni nintthuna wiira ekhalena ekumi elapo epheya. Ndho moopisa nrima, Yehova nlelo onnaavaha eparakha atthu a nttetthe nnyu wiira ethanle onrumeela. Voohaakanyera nyuwo mookhalana eparakha yuulupale ya ovara ni Muluku mwaakhaliheraka atthu awaatta ondhuwela ohinatthi omala olumwinku ola!—1 aKor. 3:9.

HIYO NINKHALA ‘MAHIKU OOKHIDHERA’

12. Odhuwela wiira ninkhala ‘mahiku ookhidhera’, onniiriha okhupali eseeni?

¹² BiibiIiya aahilotta khalai moopora makhalelo atthu yaaya awa okhala ‘mahiku ookhidhera.’ (2 Tim. 3:1-5) Akhala wiira ninawoona moopora makhalelo atthu ari awa olelo-va, ninoowerya woona waakhwanela wa eprofesiiya ela. Ndho vaavo ninoona mweettelo wa atthu otepa otakhala, onniniiriha otepa okhupali wiira Nuulumo na Muluku tinoororomeleya.—2 Tim. 3:13-15.

13. Vaavo ninuupuwela nhu nlikanyiho na Yeesu niri Luka 12:15-21, makoho seeni ninreerela nhu wiikoha?

¹³ Odhuwela wiira ninkhala mahiku ookhidhera onniniiriha oluttuweliwa opweha nipuro noopacera itthu dhootepa otthuneya. Nirowe noone etthu ninhudha nhu voohima dha opweha nipuro noopacera itthu dhootepa otthuneya ni nlikanyiho na Yeesu niri Luka 12:15-21. (Munsome.) Seeni nlopwana ole oothaaciri aaitthaniwe iye wiira aari ‘nlolo’? Niire waari mwaha wa othaaciri? Naari, masi waari mwaha woopweha nipuro noopacera mihakhu dha veerutthuni. Owo ‘aniithukumanyera mihakhu, masi kaari tthaaciri vamaithoni va Muluku.’ Seeni opaka elo yaari awa etthu yootakhala? Muluku aahinleela nlopwana ole wiira: ‘Nyuwo nlolo ohiyu yoola nnookhwa.’ Eseeni ninhudha nhu ni nlikanyiho nna? Okathi ohanle wiira emale makhalelo a olumwinku ola ori vakhaani. Tivondho niikohe wiira: ‘Niire dhoolukama dhaka dhinnoonihera wiira kinniluttuweliwa opweha nipuro noopacera itthu dhootepa otthuneya? Dhoolukama seeni kinaatumererya aka anaaka okhalana? Niire moopora kinrumeelaka okathi aka, ikuru dhaka ni mireerelo dhaka onnoonihera wiira kinniithukumanyera mihakhu, ohiya wiithumanyera mihakhu dha wiirimu?’

14. Yawiiraneya ya Miki enoonihera dhai wiira tivootthuneya wuupuwelela wiira ninkhala mahiku ookhidhera?

¹⁴ Vaavo ninuupuwelela nhu itthu inoonihera wiira ninkhala mahiku ookhidhera, elo enninikhalihera orumeela saana ekumi nhu. Ti yeelo yaairanen’ye ni nrokora oniitthaniwa Miki. Owo onlotta wiira: “Nuumala omaliha osoma, miyo kaatthuna opacera ovara nteko wa othokodha ekumi ya asinama. Nitho kaahikhalana yoolukama ya okhala piyoneera ookilaatheya ni othamela opuro woothowa anamalaleerya. Masi axirikha aka oolipa mwa omunepani yaahikivaha miruku ekileelaka wiira kivarerye mwaha ole wiira koone akhala wiira kaanwerya ovara miteko dhoomili okathi omodharu. Nitho awo yaahikuupusera wiira omala wa olumwinku ola ori vakhiviru. Ohiya-vo, elapo epheya kinookhalana eparakha ya waadhuwela asinama oovirikana mahiku ootheene. Tivondho, kaahithanla waapaka akuursu a okathi vakhaani wiira kihudhe ovara itthu dhikina. Opaka elo, waahikikhalihera ohihiya nteko wa opiyoneera ookilaatheya, ni nuuvira okathi kaahithamela nttetthe woothowa anamalaleerya wEquador.” Nenna-va, Miki vamodha ni amamune yaawo ari ntokweene a esirkwiitu anrumeela wEquador wuuwu.

15. Ntakihero na Yakobu ninnikhalihera dhai ohihiya waalaleerya atthu ahinoonihera odhiveliwa ivaara yoopacera ni ihapari dhooreera? (Moone-tho efootu.)

¹⁵ Nhikhulumuwe vaavo atthu akina ankhootta awa waakhulela ihapari dhooreera evaara yoopacera. Woonawene nuuvira okathi awo pooti opaka marukunuso. Moone ntakihero na Yakobu, nhimaye Yeesu. Owo aahimoona Yeesu annuwaka, akhalaka Mesiya ni akhalaka nhudhihi muulupale. Hata eri dhiidho, waahivira okathi wawaatta wiira Yakobu akhale ntthareli a Yeesu. Masi nuumala Yeesu ohihimusiwa, owo aahikhala nhudheri ooluttuweliwa!b (Yohani 7:5; aGal. 2:9) Tivondho, nhihiye waalaleerya amudhi nnyu ni atthu a nttetthe nnyu yaawo nlelo ahoonihenre odhiveliwa ni nhupi wa Omwene. Nitho nhiliyale wiira nikhala mahiku ookhidhera ni nihaana ovara nteko woolaleerya ni nvayi. Woonawene etthu ninaaleela nhu nenna-va, enoowerya waakhalihera nhoolo nuumala opacera maxakha muulupale.c

NHIHIYE OVAHA EFAITA DHAWUUPUSERA DHA YEHOVA

16. Mireerelo seeni mphwannye nnyu mwaha wa dhawuupusera dha Yehova? (Moone-tho ekwaaturu eni: “Nrumeele Ikhweeli dha Mbiibiliyani Wiira Mwaakhalihere Atthu Akina.”)

¹⁶ Mphantta wawaatta wa eyooca ya omunepani ninaakhela nhu, anroiheliwa atthu ahindhuwela itthu dhawaatta dha mbiibiliya. Mwa ntakihero, mwaha wa atthu ootheene onlottiwa wuumalani wa esumana, ireviista ohela mpuwa miyaha ni iviidiyu dhiri va jw.org, dhimpakiwa saasaasa eroiheliwaka atthu ahikhanle Anamoona a Yehova. Masi hata eri dhiidho, dhawuupusera idho dha Yehova dhinninikhalihera vawaatta. Idho dhinnaacerera ompheta wihu Muluku, olipiha onroromela wihu Biibiiya ni onikhalihera odhuwela waahudhiha saana atthu akina ikhweeli dhoopacera dha mbiibiliyani.—Esal. 19:7.

17. Okathi seeni ninreerela nhu wuupuwelela dhoohudhiha dhoopacera dha mbiibiliyani?

¹⁷ Nkhama Anamoona a Yehova, hiyo ninnihakala vawaatta vaavo ninkhalana nhu wiiwasasa wa naanaano voohima dha ekhweeli emodha ya mbiibiliyani. Ohiya-vo, ninnixukhurela mwaha woodhuwela dhoohudhiha idho dhootepa otthuneya dha mbiibiliyani dheidho dhinikhalihenre opacera onrumeela Yehova. Nkhama noonne nhu yoosoma ela, dhoohudhiha dhoopacera dha mbiibiliyani nlelo dhinnivareleya nteko. Ndho vaavo ninvahiwa nhu malakihero ni ntthenkeso ninapacera waakanyera akhala wiira awo annivareleya nteko, nihaana mwawiiyeviha wuupuwelela wiira ntthekeso oneetthihiwa ni Mpattusa nhu aakhili ni oowerya dhootheene. Okathi hiyo aahiidho mmudhi nhu onviriha iye mixankiho, nihaana okhala oopisa nrima ni wuupuwelela etthu emmwiiriha Yehova ohiya ohaawa okhumelelaka. Nitho okathi nithanla nhu moopora woorumeela okathi ni mireerelo dhihu, nihaana oluttuweliwa opweha itthu dhootepa otthuneya nipuro noopacera ni ohiliya wiira ninkhala mahiku ookhidhera. Ndho napaka elo, nikhupali ni nrima wootheene wiira dhawuupusera dha Yehova inoonikhalihera okhala oolipa ni onitumererya okhala aakhili.