YOOSOMA YA MWAHA 31
NCIPO 111 Itthu Sinniiriha Ohakalala
‘Nhudhe Exiiri’ ya Okhala Oohakalala ni Itthu Nrinnyuna
“Kihiixutta ohakalala ni makhalelo aka.”—AFIL. 4:11.
ETTHU NIN’YA NHU OHUDHA
Nin’ya woona moopora oxukhuru, oluttuweliwa ni wiiyeviha, ni wuupuwelela nlipelelo nihu na nhoolo on’ya awa onikhalihera okhala atthu oohakalala ni itthu nirinhuna.
1. Ontaphulelani okhala oohakalala ni itthu nirinhuna, ni eseeni ehintaphulela awa?
NIIRE nyuwo munnihakalala ni itthu nrinnyuna? Ntthu onhakalala ni itthu oriiyene onniphwanya otteeliwa nrima ni nrettele vaavo onuupuwelela itthu dhooreera Yehova oninvaha iye. Owo khanriipiwa nrima aahiidho okhulumuwa mwaha wa itthu dhininhalela. Ohiya-vo, ohakalala ni itthu nirinhuna khontaphulela ohixankiheya ni makhalelo a ekumi nhu. Mwa ntakihero, kahi etthu yootthekeya nkiristau waadhya inamuna dhoovirikana wiira aacerere nteko oninvarela iye Yehova. (aRoma 12:1; 1 Tim. 3:1) Masi ntthu onhakalala ni itthu oriiyena, khanhiya okhala ootteeliwa nrima, hata avirihaka okathi wawaatta ahaakhenle iparakha onramala iye.
2. Mixankiho seeni dhikhanle onikhumelela akhala wiira ninoohiya ohakalala ni itthu nirinhuna?
2 Ohihakalala ni itthu nirinhuna pooti onikhumihera mixankiho dhuulupale. Mwa ntakihero, ale ahinhakalala ni itthu araawana anniviriha okathi wawaatta evaraka nteko wiira ethuma itthu dha efaita vakhaani. Mooriipiha nrima, elo yoowiiriha makiristau makina wiiya nsurukhu ni itthu dhikina yaaramela awa. Woonawene ehinatthi opaka elo, yaahuupuwela yiiraka: ‘Ela ekiphwanenle miyo’, koolipelela kilamwa’ aahiidho ‘miyo pooti wiipaciha nsurukhu ola nuumala kinooliveryavo okathi nkina.’ Masi inamuna idha dhootheene dha wiiya dhinninnanara Yehova ni dhinnoonihera ohinttittimiha. (Mir. 30:9) Nitho atthu akina mwaha wa ohaakhela iparakha yaalipelela awa, yoowiiriha onyoonyiheya mpakha elo owiiriha ohiya onrumeela Yehova. (aGal. 6:9) Eseeni ekhanle omwiiriha nrumeyi ororomeleya a Yehova opaka elo? Elo pooti wiiraneya akhala onoopacera vakhaani-vakhaani ohihakalala ni itthu oriiyena.
3. Eseeni ninhudha nhu ni aFilipi 4:11, 12?
3 Ootheene nhu ninoowerya ohudha okhala oohakalala ni itthu nirinhuna. Nrummwa Paaulu aatinkhe wiira ‘aahihudha ohakalala ni makhalelo-ye.’ (Munsome aFilipi 4:11, 12.) Owo aatinkhe moolumo ala okathi ari iye nkateya. Masi hata eri dhiidho, owo khaahin’ye okhala ooteeliwa nrima. Owo ‘aahihudha exiiri’ ya okhala oohakalala ni itthu aariiyena. Ndho akhala wiira ninawiilipihera ohihiya okhala ootteliwa nrima, moolumo ni yawiiraneya ya Paaulu enoonikhalihera ohudha okhala oohakalala ni itthu nirinhuna. Masi ivaara dhikina pooti ohikhweya ohakalala ni itthu nirinhuna. Tivondho tivootthuneya wiilipihera ohudha okhala atthu oohakalala ni itthu nirinhuna. Nin’ya owerya dhai opaka elo? Nirowe noone mikhalelo dhin’ya onikhalihera ohudha exiiri ya okhala oohakalala ni itthu nirinhuna.
NKHALE NTTHU OOXUKHURU
4. Okhala atthu ooxukhuru onnikhalihera dhai okhala oohakalala? (1 aTesaloonika 5:18)
4 Okhalawene ntthu ooxukhuru toohakalala. (Munsome 1 aTesaloonika 5:18.) Mwa ntakihero, okhala atthu ooxukhuru ni itthu nirinhuna, oninikhalihera ohitepa oxanka mwaha wa itthu nihinwerya nhu okhalana. Vaavo ninoonihera nhu onxukhurela Yehova mwaha wa yoothanleliwa nirinhuna nenna-va, elo eninikhalihera wiilipihera waakhwanihera yoothanleliwa nhu. Ohiya-vo, elo eninikhalihera oxaka wuupuwelela wiira fataari naakhenle yoothanleliwa ekina. Tivondho Biibiliya onninitumererya onxukhurela Yehova okathi nininvekela nhu! Vaavo ninkhala nhu atthu ooxukhuru elo enninikhalihera okhalana ‘nrettele wa Muluku yoowo onxira odhuwela wootheene wa apinaatamu.’—aFil. 4:6, 7.
5. Mathowa seeni aisarayeeli yaaraawana yaakhanle owiiriha okhala atthu ooxukhuru? (Moone-tho efootu.)
5 Vano, nirowe nithokorerye ele yaakhumelenle aisarayeeli. Ivaara dhawaatta, awo yaaniidhinliha wa Yehova yiiraka yaahiwunkhela oca eyooca yaalamalenla awa Weexiitu. (Moth. 11:4-6) Ekhweeli wiira okhala moothakoni khiyaari etthu yookhweya. Masi eseeni yaaya waakhalihera aisarayeeli okhala oohakalala? Awo yaanireerela wuupuwelela ni oxukhurela itthu dhootheene Yehova aapakenle iye. Okathi aisarayeeli yaari awa ipottha Weexiitu yaahihadhuliwa vawaatta, masi Yehova aahirumeela ihukhumu 10 wiira awoopole. Nitho ekhaliheriwaka ni Yehova vaavo aisarayeeli yaakhuma awa Weexiitu, yaahikusa mireerelo dhawaatta nkhama eparatha, ewooru ni ikuwo. (Okh. 12:35, 36) Okathi aisarayeeli yaaikariwa awa ni anakhotto a Farawu mpakha Nlima Nooseera, Yehova aahipaka mwiiriirya muulupale akawanyaka nlima variyari wiira ewerye olapuwela ekopela ekina. Vaavo yaari awa moothakoni, Yehova aanaavaha khuta nihiku emana nkhama eyooca. Ndho eseeni yaawiiriha wiidhinliha? Etthu yaawiiriha aisarayeeli wiidhinliha, khiwaari mwaha woohikhalana eyooca yaaphiyera, masi okhala wiira khiyaaxukhurela itthu yaaraawana.
Eseeni yaawiirinhe aisarayeeli ohiya okhala oohakalala? (Moone ettima 5)
6. Itthu seeni dhin’ya onikhalihera okhala atthu ooxukhuru?
6 Eseeni en’ya wookhaliherani okhala ntthu ooxukhuru? Yoopacera, mwiivahe okathi khuta nihiku wiira muupuwelele itthu dhinwiirihani ohakalala. Nuumala mweehererye waatikha itthu piili aahiidho tthaaru munxukhurela nnyu. (Wikh. 3:22, 23) Yanaaili, moonihere ni moolumo wiira munnixukhurela. Moonihere waaxukhurela atthu akina mwaha wa itthu dhooreera anoopakelaawani. Ohiya-vo, nhiliyale oxukhurela Yehova khuta nihiku. (Esal. 75:1) Yaneeraru, mpake oxirikha na atthu ooxukhuru. Ndho akhala wiira axirikha nhu atthu oohixukhuru, vakhaani-vakhaani hiyo pooti opacera okhalana nkhalelo owo. Masi akhala wiira atthu ooxukhuru, owo pooti oniraviha mweettelo-ya wooreera wa okhala ntthu ooxukhuru. (Otum. 1:26-28; 2 Tim. 3:1, 2, 5) Vaavo niniilipihera nhu waadhya inamuna wiira noonihera oxukhurela, hiyo khaninhiya okhala oohakalala moohixikha mixankiho dhihu.
7. Eseeni enkhalihenre nrokora Aci okhala ntthu ooxukhuru, ni nreerelo seeni ophwannye iye?
7 Nirowe noone ele enkhumelenle nrokora Aci yoowo onkhala wIndonésia. Owo onlotta wiira: “Okathi wa eretta ya koronaviiru kaahipacera olikanyiha makhalelo aka ni makhalelo a anna ni arokora akina. Ndho opaka elo, yaahikiiriha ohihakalala.” (aGal. 6:4) Ndho eseeni yaakhalihere nrokora Aci orukunusa muupuwelo-ye? Owo olotta wiira: “Miyo kaahipacera ovaha ephoole itthu dhootheene dhooreera Yehova aakivaha iye khuta nihiku ni mareeliho kimphwanya aka mwaha wa wiirela mphantta ntthenkeso wa Yehova. Nuumala-vo, kaaninxukhurela Yehova mwaha wa itthu idho dhootheene. Ndho opaka elo yookikhalihera otthikela okhala ntthu oohakalala.” Nkhama Aci, vaavo nnoona nnyu wiira makhalelo nnyu awiirihaawani ohiya okhala ntthu oohakalala, nhaana opaka itthu dhootheene munwerya nnyu wiira ntthikele okhala ntthu ooxukhuru.
NHIHIYE OKHALA OOLUTTUWELIWA NI AWIIYEVIHA
8. Eseeni yaankhumelenle Baruukhi?
8 Profeeta Yeremiiya ahikhala ntthu ankhalihera yoowo aarumeela nkhama nlipa awaatikha aaitthaniwa Baruukhi, evaara emodha owo ahihiya ohakalala ni itthu aariiyene. Baruukhi aahikhalana nteko wooxankiha. Owo aahinkhalihera Yeremiiya olaleya nhupi woolipa voohima dha ele yaaya waakhumelela aisarayeeli mwaha wa ohiya omwiiwelela Yehova. Masi nuuvira okathi Baruukhi aahihiya okhala ooluttuweliwa. Ohiya oluttuweliwa opaka ele Yehova anrumme iye, owo aahipacera wiidhuupuwelela meekhe ni itthu aatthuna iye opaka. Anrumeelaka Yeremiiya, Yehova aahinleela Baruukhi airaka: ‘Nyuwo munnidhyaadhyerya itthu dhuulupale. Nhiye waadhya itthu idho.’ (Yer. 45:3-5; Tradução do Novo Mundo da Bíblia Sagrada PT) Ndho ni moolumo makina vaamala nkhama Yehova aanleela Baruukhi wiira: “Nhakalale ni makhalelo nrinnyuna okathi ola.” Nuumala Baruukhi aahaakhulela ottarusiwa iwe ni aahitthikela okhala nxirikha a Yehova.
9. Yawaatikhiwa ya 1 aKorinto 4:6, 7, ennikhalihera dhai okhala moonelo wooreera voohima dha iparakha? (Moone-tho efootu.)
9 Ivaara dhikina, nkiristau pooti opacera wuupuwelela wiira onnireerela waakhela eparakha emodha mmutekoni wa Yehova. Woonawene owo pooti wuupuwela dhiidho okhala wiira onnidhuwela itthu dhawaatta, oniluttuweliwa ovara miteko aahiidho opacenre khalai onrumeela Yehova. Ohiya-vo, pooti atthu akina ovahiwa eparakha aatthuna iye vawaatta okhalana. Eseeni en’ya onkhalihera akhala wiira onyoonyiheya? Vaavo eniiraneya awa elo, ohaana wuupuwelela ele nrummwa Paaulu aatinkhe iye 1 aKorinto 4:6, 7. (Munsome.) Iparakha dhootheene ninaakhela nhu ni itthu dhootheene nindhuwela nhu dhinkhuma wa Yehova. Ndho vaavo Yehova onnivaha iye itthu idho, elo khentaphulela wiira na atthu ootepa otthuneya waaxira atthu akina. Ohiya-vo, itthu idho dhinnoonihera oreera nrima wuulupale wa Yehova.—aRoma 12:3, 6; aEefe. 2:8, 9.
Iparakha dhootheene ninwerya nhu okhalana dhinoonihera oreera nrima wa Yehova (Moone ettima 9)b
10. Nin’ya owerya dhai okhala wiiyeviha?
10 Wuupuwelela ntakihero na Yeesu ni wiilipihera otthara, pooti onikhalihera okhala atthu awiiyeviha. Yeesu aahirapiha manawu aahudheri-ye hata aadhuwela wiira ari Mwaana a Muluku ni aarina owerya wuulupale. Nrummwa Yoohaani aatinkhe wiira: ‘Yeesu aanidhuwela wiira Tiithi aahinvaha itthu dhootheene mmatatani-mwe. Annidhuwela-tho wiira aakhuma wa Muluku ni aantthikela wa Muluku,’ masi Yeesu aahirowa ohoolo ‘apacera orapiha manawu aahudheri-ye.’ (Yohani 13:3-5) Woonawene Yeesu anwerya wuupuwelela wiira arummwa-ye yaanireerela onrapiha manawu-ye. Nitho okathi Yeesu aari iye valaponi, khanatanke wuupuwela othaaciri ni okhalana ekumi yooreera. (Luka 9:58) Yeesu aari ntthu awiiyeviha ni oohakalala. Owo oonivaha ntakihero noomalela ninreerela nhu otthara.—Yohani 13:15.
11. Wiiyeviha waankhalihenre dhai Dennis okhala ntthu oohakalala?
11 Munna oniitthaniwa Dennis yoowo onkhala elapo ya Holanda, olontte wiira onniilipihera okhala ntthu awiiyeviha attharaka ntakihero na Yeesu. Owo onlotta wiira: “Okathi munna onvahiwa iye yoothanleliwa kinrameela aka, kinninyoonyiheya kikapacera wuupuwelaka wiira miyo kaaphwanelela ovahiwa eparakha elo.” Vaavo eniiraneya awa elo, kinnisoma mwaha mmodha onlotta voohima dha okhala ntthu awiyeviha. Va apilikatiivu JW Library®, koopintari dhawaatikhiwa dhinlotta voohima dha wiiyeviha wiira kikawerya ophwanya mwawaakuveya ni osoma. Nitho ntelefoonini mwaka dhookhalamo miyaha dhinlotta voohima dha okhala ntthu awiiyeviha ni kinniwiriyana ivaara dhawaatta.a Koohudha wiira nihaana opaka itthu dhootheene wiira ninvuwihe Yehova, ohiya otthuna wiivuwiha. Mooreera nrima Yehova onninivaha ootheene nhu miteko dhoovara, masi owo toniiriha miteko idho okhumela saana.” Vaavo mumpacera nnyu oriipiwa nrima mwaha wa ohaakhela eparakha mwaaramela nnyu, mpake itthu dhootheene wiira nkhale ntthu awiiyeviha. Ndho mwapaka elo, enawookhaliherani olipiha waataana winyu ni Yehova ni okhala ntthu oohakalala.—Yak. 4:6, 8.
MUUPUWELELE NLIPELELO NINYU NA NHOOLO
12. Nlipelelo seeni na nhoolo ninnikhalihera okhala oohakalala? (Yesaya 65:21-25)
12 Hiyo ninnihakalala vawaatta vaavo ninuupuwelela nhu nlipelelo nihu na nhoolo. Yesaaya ohaatikha moolumo annivaha nlipelelo ni anoonihera wiira Yehova onnoona mixankiho ninviriha nhu olelo-va. Masi-tho Yehova onnilaihera omaliha mixankiho idho dhootheene. (Munsome Yesaya 65:21-25.) Yoolaihera elo enhela mpuwa oteka mampa oolipa ni ooreera, okhalana nteko woohakalaliha ni oca eyooca yooreera ni yoodhiva. Nitho okathi owo, khaninrowa woova onikhumelela etthu yootakhala aahiidho waakhumelela aninhu. (Yes. 32:17, 18; Ezek. 34:25) Nikhupali ni nrima wootheene wiira dhoolaihera idha dhootheene inawaakhwanela!
13. Okathi seeni nintthuneya nhu wuupuwelela nlipelelo nihu na nhoolo?
13 Olelo-va oxira khalai, tivootepa otthuneya wuupuwelela nlipelelo nihu na nhoolo. Mwaha wa seeni? Okhala wiira ninkhala ‘mahiku ookhidhera’ ni ootheene nhu dhinniniphwanya mixankiho dhuulupale. (2 Tim. 3:1) Masi hata eri dhiidho, Yehova onninikhalihera khuta nihiku anivahaka itthu ninramela nhu nkhama miruku ni ikuru wiira niwerye ovilela. (Esal. 145:14) Ohiya-vo, nlipelelo na nhoolo ninninikhalihera vawaatta saasaasa vaavo ninviriha nhu mixankiho dhuulupale mweekumini mwihu. Woonawene nyuwo munniilipihera vawaatta ovara nteko wiira nwerye waavaha itthu inaathowa atthu a etthekoni nnyu. Niire elo entaphulela wiira nkaanviriha nxankiho owo mwa mahiku ootheene? Naari! Yehova oolaihera nhoolo woovahani itthu dhawaatta oxira idhe nnuupuwela nnyu omphwanya Mparayiisu. (Esal. 9:18; 72:12-14) Ankhi akhala wiira munwereiwa eretta ehimpenuiwa aahiidho enwooceelihani ovara miteko dhikina, niire elo entaphulela wiira nkaanviriha nxankiho owo ekumi nnyu yootheene woohikhalana nlipelelo? Naari. Okhala wiira elapo epheya, khadhinre ikhalewo iretta vamodha ni okhwa. (Wiis. 21:3, 4) Nlipelelo nna, ninninikhalihera oxaka oriipiwa nrima ni okhulumuwa vaavo ninviriha nhu mixankiho. Nitho ninoowerya onikhalihera ohihiya okhala atthu oohakalala hata nivirihaka mixankiho dhuulupale nkhama othokoreriwa moohixariya, okhweliwa ntthu naampheta nhu aahiidho okathi ninwereiwa nhu. Mwaha wa seeni? Okhala wiira moohixikha mixankiho ninviriha nhu nenna-va, ninnidhuwela wiira ti dha ‘okathi vakhaani’ ni itthu dhootepa ooreera ninlipelela nhu waakhela elapo epheya, ti dha mahiku ootheene.—2 aKor. 4:17, 18.
14. Nin’ya owerya dhai olipiha nlipelelo nihu na nhoolo?
14 Okhala wiira nlipelelo nihu na nhoolo ninninikhalihera okhala atthu oohakalala, ndho nin’ya owerya dhai olipiha? Nkhama dhiidhale atthu akina antthuneya awa onwara ookulu wiira ewerye woona saana itthu iri ottaiwene, ni hiyo-tho nihaana waadhya inamuna wiira nilipihe nlipelelo nihu na nhoolo. Nlipelelo nihu na nhoolo ninoowerya onikhalihera wuupuwelela moopora ekumi en’ya awa okhala Mparayiisu. Mwa ntakihero, vaavo ninxaka nhu mwaha wa ohikhalana nsurukhu wiira niwerye othuma itthu dhinnithowa, nihaana wuupuwelela moopora ekumi en’ya awa okhala yoohakalaliha nhoolo. Okathi owo khaavo ntthu on’ya okhala masikhini mwaha wa wiira khokatthuneya okhalana nsurukhu wiira nithume itthu dhinnithowa. Akhala wiira ninnikhulumuwa mwaha wa ohaakhela eparakha naalipelela nhu, nihaana wuupuwelela ekumi yoomalela ni eparakha nin’ya nhu okhalana ya onrumeela Yehova okathi wootheene. (1 Tim. 6:19) Woopacerani, pooti okhala etthu yooxankiha wuupuwelela nlipelelo nihu na nhoolo mwaha wa mixankiho ninviriha nhu nenna-va. Masi vaavo niniilipihera nhu wuupuwelela nlipelelo nihu, nno pooti wunnuwa vanrimani vihu ni onikhalihera ohitepa oriipiwa nrima mwaha wa mixankiho dhihu.
15. Eseeni nhudhenre nnyu ni yawiiraneya ya Christa?
15 Moone moopora nlipelelo na nhoolo ninkhalihenre awa nrokora Christa, yoowo otheliwe ni Dennis ninlontte nhu ottuli. Owo onlotta wiira: “Miyo kinniwereiwa eretta yuulupale. Eretta elo ennikiiriha ohikhalana ikuru, oviriha okathi wawaatta kirupaka ni kineetta ni ekhatera ya maroota. Elo enniiraneya khuta nihiku. Nitho mooriipiha nrima naanaano meetiku aka okileenle wiira nkinre kipenuwe. Ndho nuumala wiiwa elo, mwawaakuveya kaahuupuwela kiiraka: ‘Owo khandhuwela wiira miyo kinnilipelela itthu dhooreera nhoolo.’ Miyo kinnuupuwelela nlipelelo naka na nhoolo nenno ninkikhalihera okhalana nrettele wa mmuupuweloni. Nlelo kikhalaka olumwinku ola wootakhala kinooviriha mixakiho dhawaatta, masi kinnilipelela okhalana ekumi yoohakalaliha elapo epheya!”
‘ALE AMMOOVA YEHOVA KHIYAAVO ETTHU ENAATHOWA’
16. Eseeni yaamwiirinhe mwene Davidi waatikha wiira ‘atthu ale aninrumeela Yehova khiyaavo etthu enaathowa?’
16 Hata niilipiheraka wiira nikhale atthu oohakalala, pooti oniphwanya mixankiho. Muupuwele ntakihero na mwene Davidi. Owo aahiviriha mixankiho dhuulupale mweekumini-mwe nkhama okhweliwa ane araru, othokoreriwa moohixariya, orukunuweliwa ni axirikha-ye ni otthawa mwa iyaakha dhawaata ovaka wiiphiwa ni awanani-ye. Nnaamwi aaviriha mixankiho idha dhootheene, Davidi khaahin’ye okhala oohakalala. Owo aahilotta voohima dha Yehova airaka: ‘Ale ammoova Yehova khiyaavo etthu enaathowa.’ (Esal. 34:9, 10) Eseeni yaamwiirinhe Davidi olotta moolumo ala? Okhala wiira nnaamwi Yehova ahaakhoottihera onkhumelela mixankiho, aanikhupali wiira Yehova aammuvaha itthu aaramela iye. (Esal. 145:16) Ndho, nkhama Davidi nikhupali ni nrima wootheene wiira moohixikha makhalelo nhu, Yehova khanhiya onikhalihera wiira niwerye onrumeela moohakalala.
17. Eseeni munreerela nnyu opaka wiira nkhale ntthu oohakalala?
17 Yehova ontthuna wiira nkhale ntthu oohakalala. (Esal. 131:1, 2) Tivondho mpake itthu dhootheene munwerya nnyu wiira nhudhe exiiri ya okhala ntthu oohakalala. Akhala wiira nnawiilipihera okhala ntthu ooxukhuru, ooluttuweliwa, awiiyeviha ni ohihiya olipiha nlipelelo ninyu, nnoowerya olotta wiira: “Aayo, kinnihakalala.”—Esal. 16:5, 6.
NCIPO 118 “Muncererye Wamini Wahu”
a Mwa ntakihero, moone iviidiyu dha Onkokhorela Muluku Ohiihiyu va jw.org dhinlotta wiira: Jeová Cuida dos Humildes ni O Orgulho Vem Antes da Queda.
b OLEELIHERIWA WA EFOOTU: Munna mmodha akociheraka empa mmodha ya nthenkeso, nrokora mmodha ohundhe elottelo ya matata akohiwaka ni waakhula wa asembeleiyani esirkwiitu ni munna mmodha onlotta mwaha wa atthu ootheene.