YOOSOMA 15
Yesu Kiristu Taani?
Yesu ntthu oodhuweliwa moolumwinkuni. Masi hata eri dhiidho, atthu awaatta andhuwela itthu vakhaani voohima dha Yesu ni aakhalana miyoonelo dhoovirikana voohima dha ontthu iye. Masi Biibiliya onlotta eseeni voohima dha Yesu?
1. Yesu taani?
Yesu nlaikha noowerya ninkhala wiirimu. Ahinatake opattusa itthu dhikina, Yehova ampattunse Yesu. Tivondho, Yesu onihimmwa iye okhala ‘topacenre [aahiidho tori nraci] opattusiwa mwa itthu dhootheene’. (aKolosi 1:15) Nitho Biibiliya onlotta wiira Yesu ‘mwaana mmodheene’ a Muluku. Elo enoonihera wiira yeene meekhe topattusiwe ni Yehova ahikhaliheriwaka ni ntthu. (Yohani 3:16) Yesu aanivara vamodha ni Tiithi-ye, Yehova. Ohiya elo, owo aahinkhalihera Yehova opattusa itthu dhootheene dhikhanle. Ophetana araawana Yehova ni Yesu ti woolipa ni ti wuulupale. Nitho, Yesu nanhupi oororomeleya a Muluku, niire dho, owo onnilaleya mihupi ni malakihero a Yehova. Tivondho Biibiliya onimwiitthana iye ‘Ndhu’.—Yohani 1:14.
2. Eseeni yaamwiirinhe Yesu ora valaponi?
Iyaakha 2.000 dhivinre ottuli, Yehova aahipaka mwiiriirya. Owo aahirumeela nnepa-ye woottela wiira athaamihe ekumi ya Yesu wiirimu aroihaka mmirimani wa nthiyana mmodha aitthaniwa Maria. Tivondho, Yesu aayariwe iye nkhama pinaatamu. (Munsome Luka 1:34, 35.) Yehova aahinruma Yesu ora valaponi wiira akhale Mesiya aalaiheriwe aahiidho Kiristu ni wiira awoopole apinaatamu.a (Moone enoota.) Yesu aahakhwanihera iprofesiya dhootheene dhanlotta Mesiya. Elo yaahaakhalihera atthu odhuwela wiira Yesu ari “Kristu, Mwaana a Muluku mukumi.”—Matheyo 16:16.
3. Nenna-va Yesu ori owi?
Noomala Yesu okhwa, owo aahihihimusiwa nkhama nlaikha atthikela wiirimu. Noomala ophiya wiirimu, ‘Muluku oonvuwiha vawaatta Yesu’ (aFilipi 2:9) Nenna-va, Yesu nlaikha noowerya wiirimu. Khaavo nkina orina owerya onxira Yesu ahikhanle pahi Yehova.
NHUDHE ITTHU DHIKINA
Mundhuwele taani tthiri ari Yesu ni seeni varaawa vootthuneya ondhuwela Yesu.
4. Yesu kahiyo Muluku Oowerya Dhootheene
Biibiliya onhudhiha wiira Yesu nlaikha noowerya wiirimu. Hata eri dhiidho, yeene onimwiiwelela Muluku-ye ni Tiithi-ye, Yehova. Nindhuwela dhai elo? Moone EVIIDIYU enoonihera moopora Yesu ovirikanne iye ni Muluku Nanwerya Dhootheene, moovarihana ni Biibiliya.
Dhawaatikhiwa dhinttharelana dhinninikhalihera wiiwasasa wiira Yehova ni Yesu atthu oovirikana. Nsome khuta yawaatikhiwa, nuuvinya mwaakhule makoho anttharelana.
Munsome Luka 1:30-32.
Moolumo a nlaikha anoonihera dhai wiira Yesu ni Yehova, Muluku ‘Muulupalesa’ kahiyo ntthu mmodharu?
Munsome Matheyo 3:16, 17.
Okathi Yesu aapatisiwa iye, ndhu naakhumme wiirimu naalontteni?
Nyuwo nnoona wiira ndhu nne naari nawani?
Munsome Yohani 14:28.
Taani orina okhulupale vatthekoni, Tiithi aahiidho mwaana?
Yesu aahimwiitthana Yehova okhala Tiithi-ye. Ndho elo ennihudhihani?
Munsome Yohani 12:49.
Niire Yesu oniidhoona wiira onoolikana ni Atithi-ye? Khi nyuwo nnoonela dhai? Niire Yehova ni Yesu anoolikana?
5. Itthu dhinoonihera wiira Yesu aari Mesiya
Biibiliya ookhalana iprofesiya dhawaatta dhaakhalihenre atthu ondhuwela Mesiya aalaiheriwe, niire dho, ondhuwela ole Muluku onthanlale iye wiira owoopole apinaatamu. Moone EVIIDIYU enoonihera iprofesiya Yesu aakhwanihenra iye okathi aari iye valaponi.
Nsome iprofesiya idha, nuuvinya mwaakhule makoho anttharelana:
Munsome Mikeya 5:2 wiira moone opuro aaya iye oyariwa Mesiya.b —Moone enoota.
Niire eprofesiya ela ehaakhwanela? —Matheyo 2:1.
Biibiliya aahilotta khalayiru itthu dhootheene dha moopora Mesiya aaya iye okhwa. Nsome Esalimo 34:21 ni Zakariya 12:10 wiira moone iprofesiya idho.
Niire iprofesiya idha dhihaakhwanela? —Yohani 19:33-37.
Atthu aakinaku anlotta wiira Yesu aahipaka itthu moolakela wiira aakhwanihere iprofesiya. Nyuwo nnoona wiira elo ekhweeli?
Mwa moonelo nnyu, waakhwanela wa iprofesiya onooniherani voohima dha Yesu?
6. Ohudha voohima dha Yesu onniniphwaniha itthu dhawaatta dhooreera
Biibiliya onlotta wiira tivootthuneya ondhuwela Yesu ni odhuwela ele Muluku onrumme iye opaka. Munsome Yohani 14:6 ni 17:3, nuuvinya mwaakhule nikoho ninttharelana:
Seeni oraawa vootthuneya ondhuwela Yesu?
Yesu oohula ephuro wiira niwerye okhala axirikha a Muluku. Owo oohudhiha ekhweeli voohima dha Yehova, ndho mwaha wa Yesu, hiyo nookhalana nlipelelo na ophwanya ekumi yoohimala
ATTHU AKINAKU ANLOTTA WIIRA: “Anamoona a Yehova khanimwaamini Yesu.”
Nyuwo mun’ya waakhula dhai?
WUULUULA
Yesu nlaikha noowerya. Owo mwaana a Muluku ni Mesiya.
Ipontu dhuulupale
Seeni Yesu onihimmwa iye okhala ‘topacenre opattusiwa mwa itthu dhootheene’?
Yesu airani ahinatthi ora valaponi?
Nindhuwela dhai wiira Yesu Mesiya?
NTHOKODHE ITTHU DHIKINA
Moone itthu dhikina dhinoonihera wiira Yesu aari Mesiya.
“Niire Iprofesiya dha mBiibiliyani Dhinnoonihera Wiira Yesu Aari Mesiya?” (Mwaha ori nsaaitini jw.org)
Moone ele Biibiliya onlotta iye voohima dha moopora Yesu ori iye Mwaana a Muluku.
“Seeni Yesu Oniiriwa iye Mwaana a Muluku?” (Mwaha ori nsaaitini jw.org)
Moone itthu dhinoonihera wiira yoohudhiha ya amuluku araru khenkhuma mBiibiliyani.
“Niire Yesu Muluku?” (A Sentinela, 1 de Abril de 2009)
Moone moopora odhuwela ele Biibiliya onlotta iye voohima dha Yesu erukununsa awa ekumi ya nthiyana mmodha.
“Nthiyana Mmodha Muyuuda Onnilotta Etthu Yaamwiirinhe Ovarerya Waamini iwe” (Despertai!, Maio de 2013)
a Yoosoma 26 ni 27 nin’ya woona seeni apinaatamu antthuneya awa woopoliwa ni moopora Yesu onooponle iye.