Nlotte Ekhweeli ya Mbiibiliyani Mooreera Nrima ni Okathi Wooreerela

1. Eseeni ninreerela nhu opaka wiira niirele mphantta emudhi ya Yehova?

OKHALA WENE, evaara yoopacera nindhuwelana nhu ni munna aahiidho nrokora, ninnipakelena nikoho nkhama nna: “Nhudhe dhai ekhweeli?” Anna ni arokora akina annaakhula yiiraka “ahudhihiwe ekhweeli ni anaan’yari-ya.” Woonawene akina pooti olotta wiira “ahudhenre ekhweeli” naanaano. Eseeni enniiriha waakhula dhiidho? Okhala wiira ekhweeli ya Nuulumo na Muluku enneettiha ekumi nhu yootheene. Ni ninnidhuwela wiira ninoowerya wiirela mphantta emudhi ya Yehova akhala wiira ninoopheta ekhweeli ni okhala moovarihana ni elo. Elo enhela mpuwa okhala oororomeleya ni moolumo vamodha ni miteko dhihu.—Esal. 15:1-3.

2. (a) Eseeni atthu akina yaadhuwela awa voohima dha Yeesu? (b) Atthu akina yaaya woonela dhai ikhweeli Yeesu aahudhiha iye?

² Okathi wootheene Yeesu aanilotta ekhweeli, hata moolumo-ye yaahadhivela atthu ootheene. Ni awanani-ye yaanidhuwela elo. (Math. 22:16) Yeesu aahaaleela ahudheri-ye voohima dha etthu enkhumelela mwaha wa ekhweeli aahudhiha iye, airaka: Miyo kiruuhale ohiiwanana nlopwana ni apaapaye, mwaana a nthiyana ni amaamaye ni nthiyana ootheliwa ni apiyanhanoye.’ (Math. 10:35) Yeesu khaatthuna wiira atthu ekhalena moonelo woohiloka voohima dha nhupi aalaleya iye vamodha ni ahudheri-ye, masi aanidhuwela wiira elo yaamwiireya. (Math. 23:37) Owo aanidhuwela wiira nhupi aalaleya iye waankhumihera okawanyeya moolumwinkuni, atthu akina yaamoonihera opheta ekhweeli ya mbiibiliyani, masi akina yaannyokha ekhweeli elo.—2 aTes. 2:9-11.

3. Eseeni nin’ya nhu othokorerya yoosoma ela?

³ Nkhama Yeesu, hiyo ninniilipihera okhala oororomeleya nilottaka ekhweeli okathi wootheene, hata elo ehaadhivelaka atthu akina. Ohiya-vo, ninniilipihera ohudhiha ekhweeli ya mbiibiliyani, hata atthu akina edhiveliwaka ni nhupi ninlaleya nhu. Niire elo entaphulela wiira khanintthuneya wuupuwelela moopora woolotta ni okathi wooreerela opaka elo? Naari! Yoosoma ela, ninaawaakhula nikoho nna ninttharelana: Nin’ya ophwanya owi ekhweeli? Moottharelana, ninoothokorerya seeni ninlotta nhu ekhweeli, moopora woolotta ni okathi wooreerela opaka elo. Elo enoonikhalihera olotta ekhweeli ya mbiibiliyani mooreera nrima ni okathi wooreerela.

NIN’YA OPHWANYA OWI EKHWEELI?

4. Seeni ninlotta nhu wiira Yehova Maphattuwelo a ekhweeli?

⁴ Yehova tori Maphattuwelo eekhweeli. Itthu dhootheene Yehova onlotta iye ti dheekhweeli. Mwa ntakihero, vaavo owo onlotta iye wiira etthu emodha ti yooreera aahiidho yoonanara, onlotta ekhweeli. (Esal. 19:9; 119:142, 151) Itthu dhootheene onlaihera iye wiiraneya nhoolo, dhinnaakhwanela. (Yes. 55:10, 11) Owo khankhala-khala alaiheraka etthu ehiiraneya. (Moth. 23:19) Biibiliya onlotta wiira Muluku khanootha! (aHeb. 6:18) Tivondho Yehova ondhuweliwa iye okhala ‘Muluku eekhweeli.’—Esal. 31:5.

5. Seeni ninlotta nhu wiira kahi etthu yoolipa ondhuwela ‘Muluku eekhweeli’? Ntthokihere. (Miteko 17:27)

⁵ Moovirikana ni ele atthu akina anuupuwela awa, kahi etthu yoolipa ondhuwela Yehova, ‘Muluku eekhweeli.’ Vaavo ninlipela nhu itthu inirukurenrye, ninniwerya woona itthu dhinnikhupaliha wiira Muluku ookhala. (aRoma 1:20) Okathi nrummwa Paaulu aavaanela iye ni ekhurupu ya asomi a wAateena, owo aalontte wiira Muluku ontthuna wiira ‘nimphwanye’ okhala wiira ‘owo ori vakhiviru wa khuta mmodha a hiyo.’ (Nsome Miteko 17:27.) Yehova onnaakhalihera atthu awiiyeviha yaawo antthuna odhuwela ekhweeli.—Yohani 6:44.

6. Ikhweeli seeni iri mbiibiliyani, ni seeni munxukhurela nnyu mwaha wa odhuwela ikhweeli idho?

⁶ Nitho enamuna ekina en’ya onikhalihera ondhuwela Yehova, ori onsoma Biibiliya. Alopwana amwaatinkhe Biibiliya, yuupuseriwa ni munepa wawaarya wa Muluku. (2 Ped. 1:20, 21) Tivondho nikhupali wiira itthu dhootheene iri mbiibiliyani, ti dheekhweeli. Mwa ntakihero, nikhupali ele onlotta iye voohima dha maphatthuwelo a olumwinku ni ekumi valaponi. (Maph. 1:1, 26) Nitho nikhupali ele onlotta iye voohima dha moopora epacenre awa etampi, ohaawa ni okhwa. (aRoma 5:12; 6:23) Ndho nikhupali ni nrima wootheene vaavo Yehova onlotta iye wiira anrumeelaka Mwane, Yeesu, onoomaliha mixankiho dhootheene ikhumiheriwe ni Satana, yoowo ori ‘tiithi a wootha.’ (Yohani 8:44; aRoma 16:20) Ohiya-vo, nikhupali ele onlaihera iye wiira Yeesu onawaapwetesa atakhali, waahihimusa atthu akhwiye, wiiriha elapo okhala eparayiisu ni waakhalihera apinaatamu otthikhela okhalana erutthu yoomalela. (Yohani 11:25, 26; 1 Yoh. 3:8) Voohaakanyera, Yehova oonivaha eparakha yuulupale: Owo onihudhiha ekhweeli ni oonivaha eparakha ya waaleela atthu akina ekhweeli elo.—Math. 28:19, 20.

SEENI NINLOTTA NHU EKHWEELI?

7-8. Seeni olotta pahi ekhweeli ohimphiyera awa? Nvahe ntakihero. (Marko 3:11, 12) (Moone-tho ifootu.)

⁷ Nkhama noonne nhu ottuli, wiira niwerye wiirela mphantta emudhi ya Yehova, nihaana olotta ekhweeli. Ndho wiira ninhakalalihe Yehova, khomphiyera pahi olotta ekhweeli. Masi etthu yootepa otthuneya wa Yehova nthowa ninniiriha olotta ekhweeli elo. Moone ele yaakhumelenle okathi wa nteko woolaleerya wa Yeesu ari valaponi. (Munsome Marko 3:11, 12.) Okathi Yeesu aalaleerya iye waattamela nlima na Okalileya, nttitthi wa atthu waahithukumana onrukurerya wiira onwiriyane. Eriyari ya nttitthi owo, yaahikhalavo atthu yaavoloiwe malaikha ootakhala, yaawo yaakokhora ohoolo wa Yeesu ni yaakhuwela yiiraka: “Nyuwo mwa Mwaana a Muluku.” Seeni malaikha ootakhala yaawiiriha awa atthu ale olotta ekhweeli voohima dha Yeesu? Woonawene yaahipaka elo ni yoolakela ya otthuna wiiriha nttitthi ole wa atthu waakhupali, wiira nuuvira okathi ewiirihe atthu ale ohiya onrumeela Yehova. Malaikha ale yaalotta ekhweeli, masi ni moonelo woohiloka. Ndho Yeesu khaadhiveliwa okhala wiira aanidhuwela yoolakela-ya. Tivondho aahilopola malaikha awo ootakhala wiira ehimulaleye.

⁸ Eseeni ninhudha nhu ni yawiiraneya ela? Yawiiraneya ela enninihudhiha wiira Yehova onnoona okhala nootepa otthuneya nthowa ninniiriha olotta ekhweeli. Tivondho, vaavo ninaahudhiha nhu atthu akina ekhweeli, nihaana wiilipihera opaka elo ni mathowa ooreera. Ohiya-vo, akhala wiira atthu akina anoonittottopela mwaha wa nhupi ninlaleya nhu, nihaana onvaha Yehova ovuwa wootheene.—Math. 5:16; moone-tho Miteko 14:12-15.

9. Eseeni nintthuneya nhu oxaka, ni mwaha wa eseeni?

⁹ Nirowe noone mwaha nkina ninreerela nhu oxaka wiivuhiwa naadhinene. Nkahaya muupuwelele wiira mooleeliwa exiiri ni munna orina okhulupale ni moottharelana nyuwo mwaaleela exiiri elo atthu akina. Nuumala atthu awo odhuwela wiira etthu naaleenle nhu yaari ekhweeli, woonawene awo pooti otikiniheya yuupuwelaka wiira ninnidhuwela ixiiri dhawaatta. Ndho elo pooti oniiriha okhala atthu ootthuneya vamaithoni va atthu, masi ohiya vamaithoni va Yehova. (Mir. 11:13) Mwaha wa eseeni? Okhala wiira ohiya pahi olaleya exiiri, masi nipanke elo ni moonelo woohiloka.

MOOPORA SEENI MUN’YA NNYU OLOTTA EKHWEELI?

10. Ontaphulelani olotta moolumo “ooreera”? (aKolosi 4:6)

¹⁰ Munsome aKolosi 4:6. Nrummwa Paaulu aahiwuupusera makristau a oKolosi wiira okathi wootheene moolumo-ya yaahaana ‘okhala ooreera.’ Elo entaphulelani? Ni elottelo ya ekereku, elo entaphulela wiira moolumo nhu ahaana woonihera oreera nrima ni waaphara nrima atthu anniwiriyana.

11-12. Seeni nintthuneya nhu okhalana ephoole moopora ninhudhiha nhu ekhweeli? Nvahe nlikanyiho. (Moone-tho ifootu.)

¹¹ Nihaana ovarihela nteko miruku dha Paaulu vaavo ninaahudhiha nhu atthu akina ikhweeli dha mbiibiliyani. Biibiliya onnilikanyiha ikhweeli idho ni ekatana eneethya nno-ninno yeelo enwerya woonihera nkhalelo nhu wa mpuwa ni ota. Ni moolumo makina, elo entaphulela wiira ikhweeli idho inoowerya woonihera mikhalelo dhihu ni ontthu nhu weekhweeli. (aHeb. 4:12) Masi naahidhuwele onrumeela saana Biibiliya, pooti owiiriha atthu akina onanariwa aahiidho okhumihera onyakulihana. Elo eniiraneya dhai?

¹² Nkahaya muupuwele wiira nlaleeryaka moomphwanya nlopwana mmodha oonihenre odhiveliwa yoowo orina yoolema ya okokhorela ilatarato ni oca efeesta ya Nataale ni Paaskowa vamodha ni emudhi-ye. Hiyo naanwerya onrumeela Biibiliya wiira nimoonihere ntthu owo wiira tivoololo okokhorela ilatarato ihaana ekumi, ni oca efeesta ya Nataale ni Paaskowa, yoolema ya epakawu. (Yes. 44:14-20; 2 aKor. 6:14-17) Akhala wiira naampaka elo ekwaha yoopacera ovaanela ni ntthu owo, hata nilontte ekhweeli, khinaare noonihere odhuwela onrumeela saana Biibiliya.

13. Ontaphulelani oluka moolumo nhu ni maakha?

¹³ Nitho Paaulu olontte wiira moolumo nhu ahaana okhala ooreera nkhama eyooca elukiwe saana. Niire elo entaphulela wiira nihaana orukunsa aahiidho ovitha ekhweeli? Naari! Paaulu aatthuna olotta wiira nihaana ‘oluka’ moolumo nhu wiira nilotte ekhweeli mwa enamuna en’ya ‘waadhivela’ atthu anniwiriyana. (Yobi 12:11) Elo pooti okhala etthu yooxankiha. Nkahaya muupuwele ntthunaka owaapela eyooca atthu akina. Hiyo pooti wuupuwela wiira eyooca elo enawaadhivela atthu awo akhala wiira ninawaapeya ni oluka mwa enamuna ninoona nhu wiira enoonidhivela. Mwa enamuna emodharu, hiyo pooti wuupuwela wiira moopora ninlotta nhu pooti waadhivela atthu akina. Masi wuupuwela dhiidho khiyaaya okhala etthu yookhalela. Mwa ntakihero, ilapo dhikina atthu pooti olotta moonelo-ya mooluluwanya, hata elottaka ni atthu uulupale. Masi ilapo dhikina, opaka elo pooti okhala etthu yoohiloka aahiidho woonihera ohisuluheya. Elo entaphulela wiira nihaana othanlela moolumo ohiya annidhivela aahiidho anvarihana ni yoolema ya elapo nhu, masi an’ya waadhivela ni waaphara nrima atthu anniwiriyana.

OKATHI SEENI MUNREERELA NNYU OLOTTA EKHWEELI?

14. Niire Yeesu aanaaleela atthareli-ye itthu dhootheene aadhuwela iye? Mwaha wa eseeni?

¹⁴ Okathi wootheene Yeesu aalotta mwa enamuna yooreera ni aanaahudhiha itthu dhawaatta atthareli-ye. (Mar. 6:34) Ni dhaahikhala itthu dhawaatta yaatthuneya awa ohudhera. Masi Yeesu kheehererya waaleela itthu dhootheene aadhuwela iye. Owo aanidhuwela wiira yaari atthu oohimalela ni ole khiwaari okathi wooreerela wiira edhuwele ikhweeli dhikina. Yeesu aalontte wiira khiyaare ewerye wiiwasasa itthu dhikina. (Yohani 16:12) Elo ennihudhihani?

15. Niire nihaana waahudhiha anaskola nhu a Biibiliya itthu dhootheene nindhuwela nhu okathi omodharu? Ntthokihere. (Miruku 25:11) (Moone-tho efootu.)

¹⁵ Ntakihero na Yeesu ninoonihera wiira odhuwela ekhweeli ya mbiibiliyani khontaphulela wiira nihaana ohudhiha itthu dhootheene nindhuwela nhu okathi omodharu. Ndho nin’ya owerya dhai otthara ntakihero na Yeesu? Nihaana odhuwela makhalelo a atthu ninaalaleerya nhu. Nkahaya mmuupuwele-tho nlopwana yoole orina yoolema ya onca Nataale ni Paaskowa vamodha ni emudhi-ye. Hiyo noodhuwela wiira ifeesta idho ipacenre opaka ni mapakawu aahiidho atthu yaakokhorela Muluku ni khainindhivela Yehova. Masi nkahaya muupuwele wiira moopacera onsoma Biibiliya ni ntthu owo ehalaka esumana emodha aahiidho piili wiira niphiye nihiku na Nataale. Voohima dha mwaha owo, khimwaare moonihere olotta mwa enamuna yooreera akhala wiira mwaammoonihera ele Biibiliya onlotta iye voohima dha ifeesta idho ni onleela wiira owo khaareerela wiirela mphantta efeesta elo ya Nataale. Ekhweeli wiira anaskola akina a Biibiliya annivarihela nteko mwawaakuveya ele anhudhera awa. Masi akina onnivira okathi. Ndho wiira niwerye waakhalihera anaskola nhu a Biibiliya, nihaana waaleela ele anreerela awa odhuwela ni okathi ninoona nhu wiira anoowerya wiiwasasa saana.—Nsome Miruku 25:11.

16. Nin’ya waakhalihera dhai anaskola nhu a Biibiliya ohihiya ‘weettela ekhweeli’?

¹⁶ Hiyo ninnihakalala vawaatta vaavo ninaahudhiha nhu atthu ekhweeli voohima dha Yehova, hata ikhalaka itthu vakhaani. Nitho wiira niwerye waakhalihera ohihiya ‘weettela ekhweeli,’ nihaana waavaha ntakihero nooreera. (3 Yoh. 3, 4) Ndho nihaana ovarerya mweettelo wa ekumi nhu akhala wiira onnoonihera wiira ninnikhupali dhoolaihera dha Nuulumo na Muluku. Nitho nihaana olotta ekhweeli ni mathowa ooreera ni mwa enamuna yooreera nirumeelaka moolumo annoonihera oreera nrima wiira nihudhihe ekhweeli eri mbiibiliyani okathi wooreerela. Ni ninvahe ovuwa Yehova vaavo ninttottopeliwa nhu. Napaka elo, ninawoonihera wiira nininrumeela Yehova, Muluku eekhweeli.