მეს

პირველ საუკუნეშ ქრისტიანეფქ სირთულეშ წოხოლე ქიგედირთეს, მუჟამსით „მთელ ქიანას“ შქირენაქ იჸუ. მუშო ოკო რაგად, ოჯახიშ დუდეფ თიშე წუხენდესკონ იჸიდ, მუჭო ეიჯუმუესკო ოჯახ. თეს გეძინელ, თი ახალგაზრდეფ, მიდგას მსახურებაშ გაფართოებაშ სურვილ უღდეს, ალბათ ფიქრენდესკონ იჸიდ, ნამდა ასე თეშ დრო ვა რდჷ დო მუნეფიშ გეგმეფ ოკო გეგნოდვესკო. მუჭოდგა ვა რდუკონ, პირველ საუკუნეშ ქრისტიანეფქ ქუდუხუჯუეს თე სიტუაციას. თინეფ მუნეფიშ შესაძლებლობეფიშ მაქსიმუმს ორთუდეს — აგრძელენდეს ქადაგებას დო მუთ შეულებდეს, ირფელით ოხვარდეს იუდეას მახორუ და დო ჯიმალეფს (საქ. 11:29, 30). თი თანაქრისტიანეფქ, მიდგაქ და დო ჯიმალეფშე მოხვარა მიღეს, თე ირფელს იეჰოვაშ ხე ქოძირეს (მათ. 6:31—33). თინეფ, მუშო ოკო რაგად, უმოსო დეახლოებდეს თი და დო ჯიმალეფს, მიდგაქ გაჭირებაშ დროს ელუდირთეს. თი ქრისტიანეფ, მიდგაქ გაჭირებას რდესინ ფერ თანამორწმუნეეფს, მუთ უღდესინ თინა გუნაწილეს ვარდა შხვანერო მეხვარეს, მუნეფიშ დუდშე გეგმოცადეს თი ხიოლ, ნამუთ „შხვაშა ჯგირიშ კეთებას“ მოჸუნს (საქ. 20:35). w23.04 16 ¶12, 13

მინშა, იეჰოვა მუშ ხალხიშ ლოცვეფს თი კათაშ საშვალებათ პასუხენს, მით ვა მსახურ თის დო თინეფს მუშ მსახურეფიშ მახვარებელო ირინუანს. მაგალთო, ბიბლიურ დროს იეჰოვაქ მეფე არტაქსერქსე აღძრჷ, ნამდა ნეემიას უფლება ქიმეჩკო, დირთკო იერუსალიმშა დო აღადგინკო ქალაქ (ნეემ. 2:3—6). ამდღა ხოლო, ჩქინ მახვარებელო შილებე იეჰოვაქ თი კათა აღძრას, მით ვამსახურნა თის. ჩქინ ლოცვეფიშ პასუხეფ შილებე ირიათო არგამათ ვეძირედას, მარა პასუხეფ, ნამდგას იეჰოვაშე ბღებულენთ რე თინა, მუთ მოსაჭირნა, ქუდოფსქიდათ თიშ ართგურეფქ. ათეშენ საჭირო რე, ირიათო ქიდვეკვირათ, მუჭო პასუხენს ღორონთ ჩქინ ლოცვეფს. კანკალეშა ჩქი ხოლო ოკო დეფიფქრათ, მუჭო პასუხენს იეჰოვა ჩქინ ლოცვეფს (ფსალმ. 66:19, 20). რწმენას ხვალე თიმწკუმა ვეგმიფრჩქინანთ, მუჟამსით ბლოცულენთ დო იეჰოვას მუდგაინს ფთხინთ, რწმენას გიმიფრჩქინანთ თიმწკუმა ხოლო, მუჟამსით დოპჸუნთ იეჰოვაშე მეღებულ პასუხის (ებრ. 11:6). w23.05 11 ¶13; 12 ¶15, 16

მუჟამსით დუდ მეუძღვინით იეჰოვას, პირობა მეფჩით, ნამდა ირო თის ვემსახურებუდით დო თიშ ნებას შევასრულენდით. ჩქი ოკო შევასრულათ ჩქინ დოდვალირ სიტყვა. მეძღვინუაშ თანახმას ცხოვრება მუშო ოკო რაგად, ტვირთო ვეგებჯანნა, მუშენდა იეჰოვაქ მუშ ნებაშ შეიოსრულებერო გუმოჭყეს (გამოცხ. 4:11). ღორონთიქ მუშ ამნახანტო დო თიშ სურვილით გუმოჭყეს, ნამდა გეფჩინებაფუათ დო თაყვან ქოფცათ თის. ათეშენ, ვეახლოებუთ ჩქინ ზეციერ მუმას დო ხიოლს ბგინაფლენთ თიშ ნებაშ შესრულებათ. თეს გეძინელ, ღორონთიშ ნებაშ შესრულება დო თიშ სქუაშ ნაკვალუშ მეჸუნა ძალეფით ემოფშანა (მათ. 11:28—30). თაშ ნამდა, იეჰოვაშ მიმართ ჸოროფას გემანგარენთ, მუჟამსით დეფიქრებუთ ირფელ ჯგირშე, მუთ იეჰოვას თქვანო ულირს უკეთებ დო თი კურთხევეფშე ხოლო, ნამუთ წიმი გელუნა. მუთ უმოსო ქიჸოროფუანთ იეჰოვას, თით უმოს ადვილ გაჸინა, დემორჩილათ თის (1 იოან. 5:3). იესო ირიათო ასრულენდჷ ღორონთიშ ნებას, მუშენდა იეჰოვას ლოცვას მოხვარას თხინდჷ დო მთელ ყურადღება თი ჯილდოშა აფუდ გინოღალირ, ნამუთ წიმი ელუდ (ებრ. 5:7; 12:2). იესოცალო, თქვა ხოლო ლოცვას ქოთხით ღორონთის, გუგამანგარან დო ირიათო თოლშა ეწირინეთ მომავალიშ იმენდ. w23.08 27, 28 ¶4, 5

არძას მოსიამოვნუნა თიცალ ადამიანეფწკუმა ურთიერთობა, მით მოთვინებას გიმირჩქინანა. მაგალთო, ჩქი ვაფასენთ თი ადამიანეფს, მით მოთვინებათ იჯინენა დო თინეფს ხოლო, მით ჩქინ მიმართ თე თვისებას გიმირჩქინანა, მუჟამსით შეცდომა მუმალენა. მარდულ ვორეთ ჩქინ ბიბლიაშ მასწავლებერიშ ხოლო, მით მოთვინებას გიმირჩქინანდჷ, მუჟამსით მიჭირდეს ნამდგაინ ბიბლიურ საკითხიშ გაგება, გათვალისწინება დო ცხოვრებას გიმორნაფა. მარა არძაშ უმოს მარდულ იეჰოვას ვაფუთ, მუშენდა კაცობრიობაშ ისტორიაშე მოჸუნაფილ მოთვინებას გიმირჩქინანს ჩქინ მიმართ. მართალ რე, არძას მობწონა, მუჟამსით შხვეფ მოთვინებას გიმირჩქინანა, მარა პირადო ჩქი შილებე ირიათო ადვილ ვა მაფუდან თე თვისებაშ გიმორჩქინა. მაგალთო, შილებე გამჭირდან მიფთვინათ დო ვორდათ მშვიდას, მუჟამსით შარა მანგარ გინოხარგელ რე, წოხოლე ქიანაშ მანქანა ეწომრენა დო ავრე სოდგარენ მოჩქარნა. ვარდა შილებე ვამმათვინებუან, მუჟამსით მიდგაინ თიცალ მუდგარენს თქუანს ვარდა გაკეთენს, მუდგათ გუმაღიზიანენა. თეს გეძინელ, მინშა შილებე ჩქინო რთულ რდასჷ, მოთვინებათ უჯინათ იეჰოვაშ დუნაპირებ ახალ ქვეყნიერებას. თაშ, ნამდა თაქ გიმოკოროცხილ არძა სიტუაციას მოსაჭირუნა მოთვინებაშ გიმორჩქინა. w23.08 20 ¶1, 2

იეჰოვაშ მითითებათ გედეონქ ჯარიშკოჩეფიშ 99 პროცენტშე მეტ ჸუდეშა გოუტუ. შილებე თინა ფიქრენდკო: „ქორენო თეშ კეთება მართალო აუცილებერ? მაჸუნუნო თეს ჯგირ შედეგ?“. მარა არგამა რე, გედეონქ დემორჩილ იეჰოვას. ამდღა უხუცესეფ მეჸუნა თიშ მაგალითის დო მორჩილებას გიმირჩქინანა, მუჟამსით ორგანიზაცია მუდგარენეფს თირანს (ებრ. 13:17). მუჟამსით გედეონქ იეჰოვაშე ოშქურანჯ დავალება მიღჷ, შიშიშ გრძნობაქ გურჩქინდჷ, მარა მიაჸუნ იეჰოვაშ მითითებას დო დემორჩილ თის (მსაჯ. 9:17). იეჰოვაქ დარწმუნ გედეონ, ნამდა ელუდირთუდ თე დავალებაშ შესრულებაშ დროს. ათეშენ, თის ჯერდჷ, ნამდა ზუსტას ღორონთიშ მოხვარათ შეიალებედ დეცვუკო თიშ ხალხ. თიცალ ქიანეფს, სოდეთ ჩქინ საქმიანობა ვარიებულ რე, უხუცესეფ მეჸუნა გედეონიშ მაგალითის. თიშ უმკუჯინუო, ნამდა თინეფ შილებე ოჭოფან, დაკითხვაშა მიდეჸონან, სამუშა მიოდინუან ვარდა ფიზიკურ შეურაცხყოფა მიორინუან, გაბედულებას გიმირჩქინანა დო ირფელს ორთნა, ნამდა კრებაშ შეხვალამეფქ ვა გოჩირთას დო მსახურებაქ ხოლო ვა გაჩერდას. განსაკუთრებულო „დიდ გაჭირებაშ“ დროს დესაჭირებნა უხუცესეფს გაბედულებაშ გიმორჩქინა, ნამდა საფრთხეეფიშ უმკუჯინუო, მიაჸუნან იეჰოვაშე მეღებულ მითითებეფს. w23.06 5, 6 ¶12, 13

იეჰოვაქ მღვდელმთავარ იეჰოიადაშ კეთებულ ჯგირ საქმეეფ ბიბლიას ქენაჭარაფუ, ნამდა ქიდიბგურეთკო თიშე (რომ. 15:4). მუჟამსით იეჰოიადაქ დოღურ განსაკუთრებულ პატიქ ქიგიადვჷ, „თინა დავითიშ ქალაქის მეფეეფიშ ხასლას დონთხორეს, მუშენდა ჯგირს ორთუდ ისრაელს, ღორონთშო დო თიშ ტაძარშო“ (2 მატ. 24:15, 16). იეჰოიადაშ შემთხვევა მოხვარნა არძას, გუვავითარათ ღორონთიშ მიმართ შიშ. უხუცესეფს შეულებნა მიაჸუნან იეჰოიადაშ მაგალითის თით, ნამდა დოთხილუან ღორონთიშ შხურეფ დო იზრუნან თინეფშე (საქ. 20:28). ხანშამიშულირეფს ხოლო შეულებნა მიაჸუნან იეჰოიადაშ მაგალითის თით, ნამდა ვადინუან იეჰოვაშ მიმართ შიშ დო ართგურობა. თეშნერ მოქციებათ საშვალებას არზენა ღორონთის, გეგმირინუას თინეფ მუშ ნებაშ შეიოსრულებერო. ახალგაზრდეფს ხოლო ბრელ მუდგარენიშ გურაფა შეულებნა თიშე, მუჭო ოქცუდ იეჰოვა ხანშამიშულირ იეჰოიადას. მუჟამსით თინეფ პატიცემათ ოქცუნა ხანშამიშულირეფს, განსაკუთრებულო თი და დო ჯიმალეფს, მით წანეფ რე ომსახურ იეჰოვას, თეშნერო მეჸუნა ღორონთიშ მაგალითის (იგავ. 16:31). მორთ თინეფცალო ჩქი ხოლო დევემორჩილათ თინეფს, მიდგას ჩქინ შქას ხემძღვანელობა ოვალ დო თეშნერო ხუჯ ქუდუკინათ (ებრ. 13:17). w23.06 17 ¶14, 15

გონიერება ოკო გიმიფრჩქინათ, მუჟამსით გინობჭყვიდუნთ მუზმათ ხშირას ებჭოფუნთ ხეს კომენტარიშ ოკეთებელო. ირიათო ჩქი ქუმაფნა ხე ეჭოფილ-და, ჩამტარებელქ შილებე დუდ ვალდებულო იგინას, ჩქი ქუმორაგადაფუან კომენტარ, თიმწკუმა ხოლო, მუჟამსით შხვეფს დიო ხოლო ვა ნოღვენა თეშ შესაძლებლობა. თექ შილებე ჩქინ და დო ჯიმალეფს გურ გუტახას დო კომენტარიშ კეთებაშ სურვილქ გვალო მეუდინან (ეკლ. 3:7). მუჟამსით გარჩიებაშ დროს ბრელ მაუწყებელ ეთმოჭოფუნს ხეს, შილებე თიზმათ ხშირას ვამოპასუხებაფუან, მუზმათ მოკონა. მინშა შილებე გარჩიებაქ თეშ გეთუას, ნამდა ჩამტარებელს ვეშიალებუას ქობკითხან კომენტარ. მართალ რე, თენა იშენდოიშენ სასიამოვნო გრძნობა ვა რე, მარა ოკო ვეფიფქრათ, ნამდა ჩამტარებელს თოლშა ვამუხეთ დო სპეციალურო ვა მოკითხნა კომენტარს (ეკლ. 7:9). თიმწკუმა ხოლო, მუჟამსით თიზმა კომენტარს ვა მორაგადაფუანა, მუზმათ მოკოდეს, შემლებნა ყურადღებათ ქურჩქილათ და დო ჯიმალეფიშ კომენტარეფს დო შეხვალამაშ უკულ ქუვოცქუათ თინეფს. ჩქინ ცქვაფაქ ხოლო შილებე თიშნერო ელუკინას თინეფს გურშა, მუჭოთ კომენტარქ, ნამდგაშ კეთებაშ საშვალებაქ ვამმაჩეს. w23.04 23, 24 ¶14—16

გეგმირკვით ღორონთიშ სიტყვა დო იფიქრით თიშე. მუჟამსით ჯა ირდუ, თიშ ჩხვიჩხვეფ დიხაშა უმოს ტომბაშო ენურს დო უმოსო იფაჩუ. თეშნერო, მუჟამსით გეგმიბრკვიენთ ღორონთიშ სიტყვას დო იფიფქრენთ თიშე, რწმენა გემემანგარებნა დო უმოსო იპჸით დარწმუნებულ, ნამდა ღორონთიშ შარა არძაშ უჯგუშ რე დო მუთუნ ვა რე თიშმადარა (კოლ. 2:6, 7). დეფიქრით, მუჭო მეხვარ ჯვეშ დროს მახორუ ღორონთიშ მსახურეფს თიქ, ნამდა იეჰოვა ხემძღვანელენდჷ დო თხილანდჷ თინეფს. მაგალთო, დეფიქრით ეზეკიელიშ შემთხვევაშე. თიქ ხილუას ძირჷ ანგელოზ, მით კილ-კილშა ზიმუნდჷ ტაძარს დო ყურადღებათ დეკვირ თი ირფელს, მუდგას ანგელოზ ორთუდ. თე ხილუაქ ეზეკიელიშ რწმენა გამანგარ დო ჩქი ხოლო მოხვარნა თიშ გაგებას, მუჭო დეფცვათ წმინდა თაყვანიშმცემლობაშო დოდგინელ ღორონთიშ ნორმეფ (ეზეკ. 40:1—4; 43:10—12). ჩქი ხოლო რწმენა გემემანგარებნა, მუჟამსით დროს გეგმურთუნთ ღორონთიშ სიტყვაშ სიტომბეეფიშ გიმორკვიებას დო თიშე დაფიქრებას. მუჟამსით იეჰოვას ბოლოშა ვონდუთ შემლებნა მიღდან მანგარ გურ (ფსალმ. 112:7). w23.07 18 ¶15, 16

ბიბლია ეფშა რე ღორონთიშ ართგურ ქომოლკათაშ ისტორიეფით, მიდგაშეთ ახალგაზრდეფს ბრელ მუდგარენიშ გურაფა შეულებნა. თინეფს უჸორდეს იეჰოვა დო ჯგირო ასრულენდეს მუნეფშა მენდებულ პასუხიშმგებლობას, ნამდა იზრუნესკო ღორონთიშ ხალხშე. თეს გეძინელ, შილებე თქვან ოჯახის ვარდა კრებას რდას სულიერო მოწიფულ ქომოლკოჩ, მიდგაშ მაგალითის შეილებნა მიაჸუნათ (ებრ. 13:7). დო მუთ არძაშ უმოს მთავარ რე, რჸუნა სრულყოფილ მაგალით, იესო ქრისტე (1 პეტ. 2:21). თე ქომოლკათაშ მაგალითეფშე დაფიქრებაშ დროს ქიდეკვირით თინეფიშ თვისებეფს დო დეფიქრით, თქვა მუჭო შეილებნა მიაჸუნათ თინეფიშ მაგალითის (ებრ. 12:1, 2). ჭკვერ კოჩ ხეთეშე ვა მოქმედენს დო ონდო მუდგაინიშ კეთებას გინოჭყვიდუნდას, ჯგირო ფიქრენს. თეშ კეთება ქიდიჭყით ბიბლიურ პრინციპეფიშ გიმორკვიებათ დო თიშე დაფიქრებათ, მუ ჯგირობუა მოუღ თინეფს თქვანდა. თეშ უკულ, ეცადით, გეგმირინუათ თე ბიბლიურ პრინციპეფ, მუთ მიგეხვარებნა თიცალ გადაწყვეტილებეფიშ მეღებას, ნამუთ განადიდენს იეჰოვას (ფსალმ. 119:9). თენა რე მნიშვნელოვან ნაბიჯეფ, ნამუთ მიგეხვარებნა რდათჷ სულიერო მოწიფულ ქომოლკოჩ (იგავ. 2:11, 12; ებრ. 5:14). w23.12 24, 25 ¶4, 5

მშობლეფს შეულებნა დაგურუან მუნეფიშ სქუალეფს, მუჭო უპასუხან მშვიდას დო გემუანო თინეფს, მით მუნეფიშ მრწამსის ეჭვიშ თუდო გიორინუანს (იაკ. 3:13). ნამთინე მშობელ ოჯახურ თაყვანიშცემაშ დროს თეცალ სიტუაციეფშო წინასწარ ამზადენს სქუალეფს. მაგალთო, თინეფ ართო არჩიენა თი სიტუაციეფს, მუდგას შილებე სკოლას მუნეფიშ სქუალეფქ შეხვადან. უკულ ართო მსჯელენა, მუჭო შეულებნა უპასუხან სკოლას მუნეფშა დოსუმალირ კითხვეფს დო ორთნა ინსცენირებას. თეს გეძინელ, თე მშობლეფ მუნეფიშ სქუალეფს ოგურუანა, მუჭო ეჩუან გემუანო დო მშვიდას შხვეფს მუნეფიშ რწმენაშ გურშენ. წინასწარ მომზადება ახალგაზრდეფს ოხვარ, საფუძვლიანო გეუნწყან შხვეფს მუნეფიშ რწმენაშ გურშენ. თეწკუმა ართო, თეცალ მომზადება მუნეფს ხოლო მეხვარებ, ხოლო უმოსო დერწმუნან, ნამდა მუთ წანან ჭეშმარიტება რე. ოჯახურ თაყვანიშცემაშ დროს შეილებნა ძირათ ვებგვერდ jw.org-ის მოჩამილ განყოფილება „ახალგაზრდები“, სოდეთ მოჩამილ რე ბრელ სტატია დო ომუშებელ ფურცელ ახალგაზრდეფშო [ქორთ.]. თექ მოჩამილ მასალაშ გარჩიება თქვან სქუალეფს მეხვარებ, გემანგარან რწმენა დო შეიალებუან მუნეფიშ სიტყვეფით გეუნწყან შხვეფს თინა, მუდგაშ წანა. თე განყოფილებას მოჩამილ მასალას ოჯახწკუმა ართო გუვარჩიენთ-და, ხვალე ჩქინ სქუალეფს ვარინ არძას მიმეხვარებნა, ჩქინ პოზიციაშ დაცვებაშ დროს გეგმიფრჩქინათ ლიბ ხასიათ დო სიმშვიდე. w23.09 17 ¶10; 18 ¶15, 16

დღას ქუნორღვენანო თიცალ სულიერ მიზან, ნამდგაშ მენჭირნაფაქ მანგარო გაიჭირდეს? თაშ ქორენ-და, ვეფიქრათ, ნამდა ხვალე თქვა გაღოლეს თექ. ართ ჯიმას, ფილიპის, მიზანო უღუდ, გაუჯგუშკო ლოცვეფ დო უმოს ხშირას ილოცკო, მარა უჭირდჷ, დრო გეგმურთუკო თეს. ართ დას, ერიკას, მიზანო უღუდ, უმოს ადრე ქიმერთკო სამქადაგებლო შეხვალამეფშა, მარა იშენით ხშირას ოგვიანუანდჷ. მუდგარენ მიზან ქოიღნა დო თიშა დიო ხოლო ვემგაჭირინეს-და, გურ ვეგიტახათ. რშუდან, არძაშ უმოს მარტივ მიზანიშ მენჭირნაფა ხოლო ხანდას დო დროს ითხინს. თი ფაქტ, ნამდა დუდის ვა დვანთ დო ირნერო ოცადუთ მიზანიშ მენჭირნაფას, ოძირანს, ნამდა იეჰოვაწკუმა ურთიერთობა თქვანო ძვირფას რე დო გოკონა, არძაშ უჯგუშ აკეთათ თიშო. დღას ვაგგოჭყორდან, იეჰოვა აფასენს თქვან მონდომას. მუშო ოკო რაგად, თინა თქვანდე თიშე უმოსის ველჷ, ვინემ შეილებნა (ფსალმ. 103:14; მიქ. 6:8). თაშ ნამდა, დესახით რეალურ მიზან. w23.05 26 ¶1, 2

გაბედულ პიროვნებას ხოლო შილებე მუდგარენშა აშქურნას, მარა შიშის დღას ვემეჩანს უფლებას, ეცილას სწორიშ კეთებას. დანიელ მართალო მანგარ გაბედულ ახალგაზრდა რდჷ. თინა გურგედვალირო ირკვიენდჷ ღორონთიშ წინასწარმეტყველეფიშ ნაჭარეფს, თინეფს შქას იერემიაშ წინასწარმეტყველებეფს ხოლო. თეშ ჭყოლოფათ დანიელქ ქიმეხვად, ნამდა იუდეველეფ მალას საბოლათ გეთავისფალებდეს ბაბილონიშ ტყვეობაშე (დან. 9:2). ბიბლიურ წინასწარმეტყველებეფიშ შესრულება დანიელს იეჰოვაშ მიმართ ნდობას უმანგარენდჷ დო მუშო ოკო რაგად, თი პიროვნება, მით მანგარო ონდჷ ღორონთის, სასწაულ გაბედულებას გიმირჩქინანს (ქეშუდარით რომაელეფიშ 8:32, 37—39). მუთ არძაშ უმოს მნიშვნელოვან რე, დანიელ ხშირას ურაგადუდ იეჰოვას ლოცვათ (დან. 6:10). თინა აღიარენდჷ ცოდეფს იეჰოვაშ წოხოლე, ეჩიებუდ მუშ გრძნობეფიშ გურშენ დო მოხვარას თხინდჷ თის (დან. 9:4, 5, 19). თე ართგურ კოჩ ჩქინცალ ადამიან რდჷ დო გაბედულება ბაღანობაშე ვეთოჸუნდჷ. თიქ გევითარ თე თვისება, მუდგას წმინდა წერილეფიშ გურგედვალირ გიმორკვიებაქ, ლოცვაქ დო იეჰოვაშა მენდებაქ მეხვარ. w23.08 3 ¶4; 4 ¶7

მუჟამსით ვომორჩილუთ მთავრობას თენა ჯგირობუაშ მუმაღალარ რე, მუჭოთ ჩქინო, თეშ შხვეფშო ხოლო. მუშენ იფჩიებუთ თეს? მაგალთო, მუჟამსით გიმიფრჩქინანთ მორჩილებას თეთ ეიფჩილითუანთ თი გლახა შედეგეფს, მუთ კანონიშ დაუმორჩილებლობას მოჸუნს (რომ. 13:1, 4). მუჟამსით მთავრობას ვომორჩილუთ თეთ ხეს ვუნწყუნთ, ნამდა მთავრობაშ წარმომადგენელეფს ჯგირ წარმოდგენაქ დასქიდან იეჰოვაშ მოწმეეფიშ გურშენ. მაგალთო, ნიგერიას, წანეფიშ წოხოლე, ჯარიშკოჩეფქ შქა შეხვალამაშ დროს დარბაზშა გენიჭკირეს დო გორუნდეს აბუნტებულეფს, მით ვარიას იჩიებუდეს გინაგაფალეფიშ გაფაშე. მარა ჯარიშკოჩეფიშ უნჩაშიქ უზოჯ თინეფს, ქიდიტუესკო თექიანობა დო უწუ: „იეჰოვაშ მოწმეეფ ირიათო გაფულენა ოგაფურეფს“. თაშ ნამდა, ირო, მუჟამსით ვომორჩილუთ მთავრობაშ დოდგინელ კანონეფს, თეშნერო ხეს ვუნწყუნთ, ნამდა ღორონთიშ ხალხის ჯგირ რეპუტაცია უღდას შხვეფიშ თოლს. მის უჩქჷ, ართ დღასით ჯგირ რეპუტაციაქ შილებე დეცვას ჩქინ და დო ჯიმალეფ. w23.10 9 ¶13

ნამთინე იეჰოვაშ მსახურ ბრელ ხან რე ელჷ, მუჟამ მისპუ თე ქვეყნიერება. კოჩიშ გინაჯინუშე შილებე თეშ იძირედას, ნამდა იეჰოვა ვა ჩქარენს მუშ დუნაპირებუშ შესრულებას. მარა თის ჯგირო არჩქილე მუშ მსახურეფიშ გრძნობეფ, მუთ წინასწარმეტყველ აბაკუმშა რაგადებულ თიშ სიტყვეფშე იძირე: „დრო რე მერჩქინელ თე ხილუაშ შეიოსრულებერო. შესრულებაშა ინჭუაფ დო ვეგემტყუნებ. ჭეხანს ვა მორთასინ ხოლო, ქუჯინ, მუშენდა აუცილებერო შისრულებ, ვედეგვიანებ!“ (აბაკ. 2:3). ხვალე აბაკუმ დარწმუნუო იეჰოვაქ თე სიტყვეფით, დოვარ თე სიტყვეფს ამდღა ჩქინო ხოლო უღჷ მნიშვნელობა? ღორონთიშ შთაგონებათ პავლე მოციქულქ იეჰოვაშ თე სიტყვეფ თი ქრისტიანეფს ხოლო უწუ, მიდგას შურ ოლნა ღორონთიშ დღაშ მოულაშა დო ელნა თის (ებრ. 10:37). თაშ ნამდა, თიმწკუმა ხოლო, მუჟამსით ფიფქრენთ, იეჰოვა ოგვიანუანს მუშ დუნაპირებუშ შესრულებას, შემლებნა დარწმუნებულ ვორდათ, „თინა აუცილებერო შისრულებ, ვედეგვიანებ!“ w23.04 30 ¶16

ისრაელეფიშ უმენტაშის იშენ ვა ჯერდჷ, ნამდა მოსე იეჰოვაშე რდჷ დორინაფილ, მუდგას მუნეფიშ სიტყვეფით დო საქმეეფით ირიათო ოძირანდეს (რიცხ. 14:10, 11). შედეგო, ისრაელეფიშ თე თაობას ვემნართინ დუნაპირებ დიხაშა (რიცხ. 14:30). მარა ისრაელეფ შქას რდესჷ თიცალეფ ხოლო, მით მეჸუნდეს იეჰოვაშ ხემძღვანელობას. მაგალთო, ქალებ იეფუნეშ სქუა, მიდგაშეთ იეჰოვაქ თქუ: „ღურაშახ ჩქიმ ართგურ რდჷ“ (რიცხ. 14:24). ღორონთიქ აკურთხჷ თინა დო თიშ პატი ხოლო მეჩჷ, ნამდა დუნაპირებ დიხას მუშით გეგშეგორუკო ოცხოვრებელ ადგილ (იეს. 14:12—14). თი თაობა ხოლო, ნამდგას დუნაპირებ დიხაშა მინულაშ ნებაქ მიაჩ, მეჸუნდჷ იეჰოვაშ ხემძღვანელობას. თიშ უკულ, მუთ მოსეშ მანგიორო იესო ნავეშ სქუაქ გაგრძელ ისრაელ ერიშ ხემძღვანელობა, თინეფ ღურაშახ მანგარ პატის ცენდეს თის (იეს. 4:14). შედეგო იეჰოვაქ აკურთხჷ თინეფ დო გემნიჸუნ დუნაპირებ დიხაშა (იეს. 21:43, 44). w24.02 21 ¶6, 7

მუჭოთ ექიმ პულსიშ სინჯებათ გებულენს გურიშ მდგომარეობას, თეშ ჩქი ხოლო თიშე დაფიქრებათ, მუსხით ძალიერ რე შხვეფიშ მიმართ ჩქინ ჸოროფა, შემლებნა გებგათ, მუსხით მანგარო მიჸორა იეჰოვა. ჩქინ დუდიშ გიმორკვიებაშ დროს ქობძირით, ნამდა და დო ჯიმალეფიშ მიმართ მიღდესინ თიცალ ძალიერ ჸოროფა ვა მიღნან-და, თენა შილებე თის ნიშნენდას, ნამდა ღორონთიშ მიმართ ჩქინ ჸოროფა ხოლო ისუსტებ. მარა თეშ გინაწონს, თანაქრისტიანეფიშ მიმართ ძალიერ ჸოროფას ირიათო გიმიფრჩქინანთ-და, გიშურს, ნამდა ღორონთ ხოლო მანგარო მიჸორა. და დო ჯიმალეფიშ მიმართ ჩქინ ჸოროფა დროშ მიკულაწკუმა ართო უმოსო დო უმოსო ისუსტებ დო ისხით ძალიერ ვა რენ-და, თე ფაქტ უყურადღებოთ ოკო ვედიბტუათ. მუშენდა თენა შილებე ნიშნენდას, ნამდა საფრთხეშ თუდო ვორეთ, შხვა სიტყვეფით ქოფთქუათინ, იეჰოვაწკუმა ჩქინ ურთიერთობა გილმელებ. თეს მოციქულ იოანე ხოლო აარგამენს, მუჟამსით გუმოშინანა: „მიდგას მუშ ჯიმა ვა უჸორს, ნამდგას ორწყე, ვეშიალებე უჸორდას ღორონთ, ნამდგას ვარწყე“ (1 იოან. 4:20). მუს ბგურაფლენთ თავრეშე? იეჰოვაშო მოსაწონეფ ხვალე თიმწკუმა იპჸუაფუთ, მუჟამსით ართიანიშ მიმართ ჸოროფა მაღვენუნა (1 იოან. 4:7—9, 11). w23.11 8 ¶3; 9 ¶5, 6

მეფე იეჰოაშ გვალო ბაღანა რდჷ, მუჟამსით მუმაქ უღურ. თეშ უკულ, თის, ღორონთიშ ართგურ მღვდელმთავარ იეჰოიადა რდუნდჷ. თის იეჰოაშ სქუაცალო ჸუნდჷ, ბრელ მუდგარენს ოგურუანდჷ იეჰოვაშ გურშენ დო გიოწურუანდჷ. იეჰოაშ ირიათო მეჸუნდჷ იეჰოიადაშე მეღებულ რჩევეფს დო მითითებეფს. თიშო იეჰოიადა ღორონთიშ ართგურო მსახურებაშ ჯგირ მაგალით რდჷ, ათეშენ თიქ ბრძნულ გადაწყვეტილება მიღჷ დო გეგნოჭყვიდ, მუქ ხოლო ემსახურკო იეჰოვას დო ხალხის ხოლო ქიმეხვარკო თეშ კეთებას. თეს გეძინელ, იეჰოაშიქ ირფელ გაკეთ, ნამდა აღადგინკო იეჰოვაშ დიდებულ ტაძარ (2 მატ. 24:1, 2, 4, 13, 14). ბაღანობას იეჰოვა ქოიჸოროფუეს დო თიშ ნორმეფით ცხოვრება ქუდგოგურეს-და, ძვირფას ძღვინ მეიღებნა (იგავ. 2:1, 10—12). მშობლეფს მართალო ბრელ მუდგარენიშ დოგურაფა შეულებნა თქვანდა. მუჟამსით გეგმირინუანთ თი რჩევეფს, ნამდგას მშობლეფ ბიბლიაშე გარზენა, თინეფიშ გურს გახარენთ დო მუთ არძაშ უმოს მნიშვნელოვან რე, გურს გუხარენთ თქვან ზეციერ მუმას იეჰოვას დო ხოლო უმოსო გამანგარენთ თიწკუმა მეგობრობას (იგავ. 22:6; 23:15, 24). თაშ ნამდა, მუჭოთ ბძირით, ახალგაზრდა იეჰოაშიშ მაგალითიშ მეჸუნა ჯგირობუას მოიღანა. w23.09 8, 9 ¶3—5

იეჰოვა მოპირნა, ნამდა ქიმირჩქილუანს ჩქინ ლოცვეფს. ღორონთის უჸორს მუშ ართგურ მსახურეფ, ათეშენ უყურადღებოთ დღას ვეტენს თინეფიშ ლოცვეფს (ფსალმ. 10:17; 37:28). მარა თენა თის ვა ნიშნენს, ნამდა იეჰოვა ირფელს შემსრულენა, მუდგას ფთხინთჷ. ნამთინე ჩქინ ოთხუალს იეჰოვა ხვალე ახალ ქვეყნიერებას შემსრულენა, ათეშენ, შილებე თი დროშახ მაჸუან ოჯინექ. იეჰოვა ოკვირ, მუჭო ოკავშირ ჩქინ ოთხუალ მუშ განზრახვას (ეს. 55:8, 9). იეჰოვაშ განზრახვაშა მიშურს, ნამდა დედამიწაქ ეიფშას თიცალ ადამიანეფით, მით ხუჯის უკინენა ღორონთიშ მართველობას დო განადიდენა თის. მარა სატანა ამტკიცენს, ნამდა ადამიანეფ უმოს ბედნერეფ დო წარმატებულეფ იჸუაფუნა, მუჟამსით თეშ იცხოვრენა, მუჭოთ მუნეფს ოკონა დო ვართ ხოლო ღორონთის (დაბ. 3:1—5). თიშ დამტკიცებელო, ნამდა სატანა მეტყურე რე, იეჰოვაქ უფლება ქიმეჩ ადამიანეფს, ქიმართველესკო. მარა ამდღა ჯგირო ვორწყეთ, მუ გლახა შედეგეფქ მაჸუნ თინეფიშ მართველობას (ეკლ. 8:9). ჩქი ჯგირო მარჩქილენა, ნამდა იეჰოვა ამდღა ვა მუღენს ბოლოს თი არძა პრობლემას, მუთ ადამიანურ მართველობაშ შედეგ რე. w23.11 21 ¶4, 5

იეჰოვაქ აბრაამს დეპირ, ნამდა თიშით იჸუაფუდ კურთხეულ „ბრელ ხალხ“. მარა დრო მიკიშ, თინა უკვე 100 წანერ რდჷ, სარა — 90, დო დუნაპირებ სქუა დიო ხოლო ვა ჸუნდეს. კოჩიშ გინაჯინუშე თეშ იძირედ, ნამდა შეიოლებერ ვა რდჷ აბრაამ დო სარას სქუა ჸუნდესკო. თენა აბრაამშო რწმენაშ გამოცდა იჸუაფუდ. მარა მუჭოთ ბიბლიაშე ბგებულენთ, თის „იშენით იმენდ უღუდ დო წანდჷ, ნამდა ანაყუ კათაშ მუმათ გინირთუდ“ (რომ. 4:18, 19). ქოთ თაშ ქუმოხვად! აბრაამიშ იმენდ ვა გამტყუნებე დო ქეშეძინ ისაკიქ, სქუაქ, ნამდგას ქიანაშ ხანს ნატრენდჷ (რომ. 4:20—22). მუჭოთ გებგით, აბრაამცალო ჩქი ხოლო შემლებნა მიბღათ ღორონთშე მოწონა, გინიფრთათ თიშ მეგობრეფო დო მართალეფო იპჸუათ მერჩქინელქ. პავლექ ხოლო ზუსტას თეს გუსვჷ ხაზ, მუჟამსით თქუ: «სიტყვეფ „მართალო იჸუ მერჩქინელქ“, ხვალე თიშო [აბრაამშო] ვა ჭარენ, ჩქინო ხოლო იჭარ, მით მართალეფო იპჸუაფუთ მერჩქინელ, მუშენდა ბწანა თინა, მიდგაქ გათელ იესო» (რომ. 4:23, 24). საჭირო რე, მიღდან რწმენა, თინა საქმეეფით ვოძირათ დო ვა ვოდინუათ იმენდ, მუჭოთ თენა აბრაამქ აკეთ. w23.12 7 ¶16, 17

მუჟამსით განსაცდელიშ ვარდა სირთულეშ გურშენ შქურნაფილ რეთ, რშუდან, ნამდა იეჰოვა ორწყე თქვან სირთულეს დო თის ხოლო, მუჭო მოქმედენს თინა თქვან გრძნობეფშა. მაგალთო, მუჟამსით ისრაელეფ ეგვიპტეს მონეფ რდეს, იეჰოვას ხვალე თინა ვა უძირ, მუჭო ოქცუდეს ეგვიპტელეფ მუშ ხალხის, თინა ხოლო ქოძირ, მუ ჭუას გინაფლენდეს თინეფ (გამ. 3:7). ასე განსაცდელიშ წოხოლე ქიგერეთ დო თეშ გურშენ შქურნაფილ ქორეთ-და, შილებე გაიჭირდან თიშ ძირაფაქ, მუჭო ელაირენა დო გოხვარუნა იეჰოვა. თეცალ დროს შეილებუნა იეჰოვას ქოთხუათ, ქიმგეხვარან, ნამდა ქოძირათ თიშ ხე თქვან ცხოვრებას (2 მეფ. 6:15—17). უკულ დეფიქრით: კრებაშ შეხვალამას თიცალ კომენტარ ვარდა მოხსენება ხომ ვა მოირჩქილუაფუნა, ნამდგაქ გუგამანგარეს? ნამდგაინ პუბლიკაციაქ, ვიდეოქ ვარდა მაუწყებლობაშ ობირეშიქ ხომ ველაიკინეს გურშა? მიდგაინქ თიცალ აზრ ვარდა ბიბლიურ მუხლ ხომ ვაიწუეს, ნამდგაქ გურს მოიჰამუეს? გვალო ადვილო შილებე გუმოჭყორდან, მუშმადიდა ჸოროფას დო მოხვარას ბღებულენთ მუჭოთ და დო ჯიმალეფშე, თეშ ღორონთიშ სიტყვაშე. ვარინ თე ირფელ იეჰოვაშ ჸოროფათ კეთებულ ძღვინ რე (ეს. 65:13; მარ. 10:29, 30). თე ირფელ ამტკიცენს, ნამდა იეჰოვა ზრუნენს ჩქინდე დო დასურო იმსახურენს ჩქინ ნდობას (ეს. 49:14—16). w24.01 4, 5 ¶9, 10

ონდო ზეცაშა დირთუდ, იესოქ მუშ მოწაფეეფს გაშინ, ნამდა თინეფქ ოკო დამოწმესკო ქრისტეშ გურშენ „იერუსალიმს, მთელ იუდეას, სამარიას დო დედამიწაშ არძა კუნთხუს“ (საქ. 1:8; ლუკ. 24:46—48). თეშ უკულ, ბრელ ხანს ვემკურთუმ, მუჟამსით იუდეველ წინამძღოლეფქ პეტრე დო იოანე ოჭოფეს დო სინედრიონიშ წოხოლე ქიგიორინეს. თინეფქ თე ართგურ მოციქულეფს ქადაგება უვარიეს დო დარცქინეს (საქ. 4:18, 21). პეტრე დო იოანექ უწის: „თქვანით ქიფიქრით, მუზმათ სწორ რე ღორონთიშ თოლს, თქვა მოირჩქილუათ დო ვართ ხოლო ღორონთის. ჩქი ვემმატებენა თიშე რაგად, მუთ ბძირით დო მიფრჩქილეთ“ (საქ. 4:19, 20). მუჟამსით პეტრე დო იოანე გათავისფალეს, თინეფქ შხვა მოციქულეფწკუმა ართო ხონარმაღალო ქილოცეს დო იეჰოვას მუშ ნებაშ შეიოსრულებერო ძალა ქოთხის. იეჰოვაქ ხეთეშე უპასუხ თინეფიშ ალალას რაგადებულ ლოცვას (საქ. 4:31). w23.05 5 ¶11, 12

თიზმახანიან ურთიერთობა, მუნერით იეჰოვა დო იესოს უღუნა, სამყაროს მითინს ვა ნოღვე. თინეფ ზეცას მილიარდობით წანას ართო ხანდენდეს, მუდგაშ შედეგო ძალიერ ჸოროფაქ დო ხოლოშიან ურთიერთობაქ გევითარეს. ამდღარ მუხლშე არგამათ ვორწყეთ, მუშმადიდა ჸოროფა უღჷ იეჰოვას იესოშ მიმართ. თის შეულებუდ იესოშ გურშენ უბრალოთ უთქუალუდუკო: „თინა მა მიბწონე“. მარა იეჰოვას ოკოდ, ქუმოძირუესკო, მუჭო უჸორდჷ იესო, ათეშენ დიო აწუჸუნუ: „თენა რე ჩქიმ საჸოროფო სქუა“. იეჰოვას ოამაყუდ იესო, განსაკუთრებულო თიშ გურშენ, ნამდა ართგურო ასრულენდჷ მუმაშ დავალებას დო მზათ რდჷ, სიცოცხლე ხოლო დათმუკო (ეფეს. 1:7). იეჰოვაშ ჸოროფა იესოშო თიცალ რეალურ რდჷ, ნამდა ართ წამით ხოლო ვემშუღალ თის ეჭვ იეჰოვაშ ჸოროფაშა დო ირიათო იჩიებუდ, ნამდა მუმას უჸორდჷ თინა (იოან. 3:35; 10:17; 17:24). w24.01 28 ¶8

წერმიდგინით, ნამდა მიდგარენ ტყურას ეგკაწამენა დო ბრელ იჯერენს თეს. ხვალე თენა ვარინ, შხვეფწკუმა ხოლო გილარაგადანა დო თე ტყურას ირიათო უმოს დო უმოს ადამიან იჯერს. მუჭო იგინანდით დუდის? ალბათ გურ მანგარო დორჭყორდუდეს. თეშ წარმოდგენა მიმეხვარებუნა, ქენვანჭათ, მუს გინაფლენდჷ იეჰოვა, მუჟამსით მუშ ართ-ართ ანგელოზიქ თის ტყურა ქეკაწამ. მუჭოთ მიჩქუნა, პირველ ოსურკოჩიქ, ევაქ, დეჯერ თე ტყურა, მუდგაშ გურშენ თიქ დო მუშ ქომონჯიქ ოჭიშ ქურთინუეს იეჰოვას. თევრეშე მოჸუნაფილ ცოდა დო ღურაქ მთელ კაცობრიობას მადვჷ (დაბ. 3:1—6; რომ. 5:12). თაშ ნამდა, არძა უბედრობა, მუთ ამდღა მსოფლიოს ხვადუ, ღურა, ომეფ დო ტანჯება, სატანაშ ტყურაშ შედეგ რე. მუჭო ფიქრენთ, გურს ვა უჭუანსო იეჰოვას თე ტყურა დო თი ირფელ, მუდგაქ თის მაჸუნ? მუშო ოკო რაგად, თაშ რე. მარა თეშ უმკუჯინუო, იეჰოვა გაჟღამებულ ვა რე დო გურ ვა გორგილაფ. პირიქით, ბიბლიას ჭარჷ, ნამდა თინა „ბედნერ ღორონთ“ რე (1 ტიმ. 1:11). w24.02 8 ¶1, 2

მუშ გურაფა შეილებ იოსებშე? ასეშე გეგნოჭყვიდ, მუჭო მიქციებუქ, მუჟამსით ცდუნებაშ წოხოლე ქიგედირთუქ. ქიდიგურე, ხეთეშე, ვედეფიქრენ თეშ, ქოთქუე ვარია თიშე, მუთ იეჰოვას ჯოგჷ (ფსალმ. 97:10; 119:165). თაშ გაკეთენქ-და, ცდუნებას ვეიაჸუნუქ. შილებე რჯერსჷ, ნამდა მუდგას გურაფლენქ, ჭეშმარიტება რე დო მთელ გურით გოკო, იეჰოვას ემსახურე. მარა მუდგარენ იშენით რჭოფუნს, გეგნოდგე ნაბიჯ, მეუძღვინე დუდ იეჰოვას დო დინათე. თაშ ქორენ-და, მეფე დავითცალო ქოთხი იეჰოვას: „ღორონთ, გეგმომრკვი დო ქოძირ ჩქიმ გურ. ქიდმეკვირ დო ქიგეგ, მუ მიდინუანს სიმშვიდეს; ქოძირ, გლახაშა ხომ ვა მაძახ გურ, დო ქეწმაჸუნ მარადიულობაშ შარას!“ (ფსალმ. 139:23, 24). იეჰოვა „აჯილდოვენს თინეფს, მით მთელ გურით გორუნს თის“. ზუსტას თეს ორთუქ, მუჟამსით მონდომას ვარკენქ, ნამდა ქიმიოჭირინუე მიზანს — მეუძღვინე დუდ იეჰოვას დო დინათე (ებრ. 11:6). w24.03 6 ¶13—15

მღვდელმთავარ ღორონთიშ წოხოლე ხალხიშ წარმომადგენელ რდჷ. იეჰოვაქ ისრაელიშ მღვდელმთავარო პირველო აარონ გიორინუ კარავიშ მეძღვინუაშ დროს. მარა, მუჭოთ მოციქულ პავლექ თქუ, „ართ მღვდელს მაჟია თირანდჷ, მუშენდა ღურაშ გურშენ ვეშულებუდეს მღვდელმსახურებაშ გაგრძელება“ (ებრ. 7:23—26). თეს გეძინელ, თე მღვდელეფ არასრულყოფილეფ რდესჷ დო ათეშენ, მუნეფიშ ცოდეფიშ გურშენ ხოლო ოკო შეწირესკო მსხვერპლ. არგამა რე, ისრაელიშ მღვდელმთავარეფს ხოლოშა ხოლო ვემიართედეს დიდებულ მღვდელმთავარ იესოშა. იესო ქრისტე „ჭეშმარიტ კარავიშ“ მღვდელმთავარ რე, „ნამუთ ადამიანქ ვარინ, იეჰოვაქ გედგჷ“ (ებრ. 8:1, 2). პავლექ თქუ, ნამდა „[იესოშ] მღვდლობა შხვას ვეგნაჩამუ, მუშენდა თინა მარადიულო ცოცხლენს“ დო თინა ხოლო გეუძინ, ნამდა ჩქინ დიდებულ მღვდელმთავარ „წაუბილწველ“ რე დო მუთუნ ცოდა ვა უღჷ. ათეშენ, ისრაელიშ მღვდელმთავრეფიშ გინაწონს, იესოს ვასაჭირ ირდღას მსხვერპლიშ შეწირუა მუშ ცოდეფიშ გურშენ. w23.10 26 ¶8, 9

„წოხოლენ ცას“ იგულისხმებნა პოლიტიკურ მთავრობეფ, მით სატანაშ დო დემონეფიშ გავლენაშ თუდო რენა (მათ. 4:8, 9; 1 იოან. 5:19). ბიბლიას გიმორნაფილ სიტყვას „დედამიწა“ მინშა ხვალე პლანეტა ვარინ, კაცობრიობა ხოლო იგულისხმებ (დაბ. 11:1; ფსალმ. 96:1). თაშ ნამდა, „წოხოლენ დედამიწას“ იგულისხმებნა ამდღა მახორუ უბადო ადამიანეფ. იეჰოვა „წოხოლენ ცას“ დო „წოხოლენ დედამიწას“ ვა გაუჯგუშენსინ, მოსპუნს დო „ახალ ცათ“ დო „ახალ დედამიწათ“ დოთირანს. თენა ნიშნენს, ნამდა დედამიწას მართალ ადამიანეფ იცხოვრენა დო აჸვენუნა ახალ მთავრობა, მით სამართლიანო იმართველენს. იეჰოვა ჩქი ხოლო გუმაახალენა თი გაგებათ, ნამდა სადღამუშოთ მოსპუნს თი ირფელს, მუთ ცოდაქ მომღეს. მუჭოთ ესაიაშ წინასწარმეტყველებაშე ბკითხულენთ, მთელ დედამიწა ედემიშ ბაღცალ სქვამ იჸუაფ. თი დროს „თოლს ვარწყენან თინეფს თოლსინთე ქუმაკათუნა დო ჸუჯის ვერჩქილენან თინეფ ქიგეგონენა . . . ქულა ირემცალო გილასხაპუნდას იჸი“ დო მუთ არძაშ უმოს მთავარ რე, ღურელეფ ხოლო გეთელებნა (ეს. 25:8; 35:1—7). w23.11 4 ¶9, 10

„დიდ გაჭირება“ მითინ ველუნ თეშ დიჭყაფუ (მათ. 24:21). მარა სტიქიურ უბედრობეფიშ გინაწონს, თე მოვლენა არძაშო ვეჸუაფ გასაკვირ. სოდგარენ 2 000 წანაშ წოხოლე იესოქ გაფრთხილ მუშ მიმაჸუნალეფ, ნამდა მზათ ჸოფედესკო თე დღაშო. თაშ ნამდა, წინასწარ ქიმვემზადებუთ-და, უმოს ადვილ მაჸინა, ქუგურზათ თე რთულ დროს დო შხვეფს ხოლო ქიმვეხვარათ გარზებას (ლუკ. 21:36). თე დროს მოთვინება დემესაჭირებნა, ნამდა დევემორჩილათ იეჰოვას დო ბჯერდან, თინა დოფთხილანა. მუს გუვაკეთენთ, ჩქინ საჸოროფო თანაქრისტიანეფ მატერიალურო დეზარალებნა ვარდა გვალო ირფელს მიოდინუანან-და? (აბაკ. 3:17, 18). თე დროს შხვეფიშ გაჭირებაშ გურშა მეღალა დემესაჭირებნა, ნამდა ქელუდირთათ დო ქიმვეხვარათ თინეფს. მუ რეაქცია მაღვენუნა, მუჟამსით ერეფიშ კოალიცია ღორონთიშ ხალხის დუდის ქიგიანთხუ დო თეშ გურშენ და დო ჯიმალეფწკუმა ჭიჭე სივრცეს ოცხოვრებელქ ქუმაჸის-და? (ეზეკ. 38:10—12). თე დროს თანაქრისტიანეფიშ მიმართ ძალიერ ჸოროფა დემესაჭირებნა, ნამდა ართო გეგნიბღათ თე რთულ დრო. w23.07 2 ¶2, 3

დაქორწინებულეფს ბრელ მუდგარენიშ გურაფა შეულებნა ქრისტიან წყვილშე, აკვილა დო პრისკილაშე, მით პირველ საუკუნეს ცხოვრენდეს დო და დო ჯიმალეფ მანგარო აფასენდეს (რომ. 16:3, 4). აკვილა დო პრისკილა ართო ქადაგენდეს, ართო მუშენდეს დო ართო ოხვარდეს შხვეფს (საქ. 18:2, 3, 24—26). არგამა რე, მუჟამსით ბიბლიას თინეფიშ გურშენ ბკითხულენთ, ირიათო ართო რენა მოშინაფილ დო ვართ ხოლო ცალ-ცალკე. მუჭო შეულებნა წყვილეფს, მიაჸუნან თინეფიშ მაგალითის? დეფიქრით, მუშ კეთება შეილებნა თქვა დო თქვან მეუღლეს ართო. მაგალთო, ხომ ვა რე თიცალ საქმეეფ, მუდგას ცალ-ცალკე ორთუთ, მარა შეილებნა ართო გაკეთათ? მუჭოთ მიფშინეთ, აკვილა დო პრისკილა ართო ქადაგენდეს. თქვა ქოქადაგენთო ართო რეგულარულო? თინეფ სამუშას ხოლო ართო რდეს. შილებე თქვა დო თქვან მეუღლე ართო ვა მუშენთ, მარა შეილებნანო ჸუდეშ საქმეეფ გაკეთათ ართო? (ეკლ. 4:9). მუჟამსით თე ირფელს გაკეთენთ, ართიანწკუმა ჩიებაშ შესაძლებლობა ქუმგაჩამნა დო უმოსო ქიგინანთ, ნამდა ართ გუნდ რეთ. w23.05 22, 23 ¶10—12

კანკალეშა არძას მირჩქინდუნა შიშიშ გრძნობა, მუჭოთ მიჩქუნა, დავითის მეფე საულ ოჸვილარო მოთხოზუდ. ათეშენ დავითიქ გინოჭყვიდ, თიშე დუდიშ დარსხებელო, ფილისტიმელეფიშ ქალაქ გათშა ინტუკო. გათიშ მეფეს, აქიშის, მსახურეფქ ხეთე ქუგაგებაფუეს, ნამდა დავით რდჷ თი ძალიერ მეომარ, მიდგაშ გურშენ ისრაელეფქ იბირეს, ვით ანთას ფილისტიმელ ჸვილუა. თე ამბექ დავითიშ ჸუჯშა ქიმერთუნ, „მანგარო აშქურინ“ (1 სამ. 21:10—12). თის სვანჯ მეუდინუ თიშე ფიქრიქ, მუს ღოლანდჷ მეფე აქიშ. მორთჷ ასე გუვარჩუათ, მუქ მეხვარ მეფე დავითის, გიორჯგინუკო შიშის. 56-ა ფსალმუნს დავით იჩიებ მუშ გრძნობეფიშ გურშენ, ნამუთ გათის რინაშ დროს უღუდ. თე ფსალმუნს თინა ეჭარუნს, მუშა ოშქურუდ, მარა თის ხოლო მოგებაფუანა, მუქ მეხვარ, გიორჯგინუკო შიშის. მუჭოთ თევრეშე ბგებულენთ, მუჟამსით დავითის ოშქურუდ, იეჰოვაშ რდჷ მენდებულ (ფსალმ. 56:1—3, 11). დავით ტყურათ ვანდუდ იეჰოვას, თის თეშო ქიანაშ მიზეზ უღუდ. იეჰოვაშ მოხვარათ დავითიქ ჭიჭე უცნაურ, მარა ჯგირ გეგმა ქუდარსხუ. თიქ მეფე აქიშის დუდ ხანგათ ქუმაძირუ. დავითიშ მოქმედებეფქ აქიშ თეშ გაღიზიან, ნამდა თიშ ჸვილუა ვარ, თოლშა მოძირაფა ხოლო ვაკოდ. თეცალ გეგმაშ ჭყოლოფათ დავითის შეიალებუ გათშე ნტებაქ დო დუდიშ დარსხებაქ (1 სამ. 21:13—22:1). w24.01 2 ¶1—3

მიშე მეურს ამდღარ მუხლის ჩიება? ზეციერ ცხოვრებაშო გათელებურ ცხებულეფ! ზეცაშა ულაშ უკულ თინეფიშ პირველ დავალება იჸუაფ ბრძოლა. ზეცაშა ულაშ უკულ თინეფ ქრისტეწკუმა დო ანგელოზეფწკუმა ართო ღორონთიშ ნტერეფიშ წინააღმდეგ საბოლა ომს, არმაგედონს, მიღენა მონაწილებას. ბრელ ცხებულ, ნამუთ ამდღა დედამიწას ცხოვრენს, მანგარ ხანშამიშულირ რე; ნამთინე გვალო მოტახილ რე. მარა, მუჟამსით ზეცას გეთელებუნა, იჸუაფუნა ძალიერ, უკვდავ სულიერ ქმნილებეფ დო მიღენა დავალებას, ნამდა ჩქინ მეფე, იესო ქრისტეწკუმა ართო იბრძოლან. არმაგედონიშ უკულ თინეფ ქრისტეწკუმა ართო უხემძღვანელენა კაცობრიობაშ გასრულყოფილებაშ საქმეს. არგამა რე, თინეფს შეიალებენა ბრელით უმოს გაკეთან დედამიწას მახორუ საჸოროფო და დო ჯიმალეფშო, ვინემ დღას აკეთებედეს, მუჭოთ არასრულყოფილ ადამიანეფს! w24.02 6, 7 ¶15, 16

ნამთინე, მით უკვე მზათ რე მეძღვინუა დო ნათუაშო, იშენით გინოდვანს თე ნაბიჯეფიშ გინოდგუმას. თინეფს შილებე ოშქურუდან, ნამდა ნათუაშ უკულ მეჩირთუნა დო გერიცხებუნა. ნათუას სი ხოლო თე მიზეზით გინოდვანქ-და, რჯერდას, იეჰოვა ირნერო მიგეხვარებ, თიშ „ღირსო გილართე დო ირფელს ასიამოვნე“ (კოლ. 1:10). თის ბრელშა მუხვარებ, ნამდა გაკეთესკო თინა, მუთ სწორ რე. ათეშენ რჯერდას, სი ხოლო მერჩანს ძალას, თაშ მიქცუე (1 კორ. 10:13). იეჰოვა ირნერო ოხვარ მუშ ხალხის, ვადინუან ართგურობა. ზუსტას ათეშენ რე, ნამდა გარიცხულეფიშ რაოდენობა დიდ ვა რე. არძა არასრულყოფილ ადამიან გედირთუ ცდუნებაშ წოხოლე, ნამდა გაკეთას თინა, მუთ გლახა რე (იაკ. 1:14). მარა ევაჸუნათ დო ვარ ცდუნებას, თენა ჩქინდა რე დამოკიდებულ. ნამთინე იჩიებ, ნამდა ადამიანეფს ვეშემლებუნა გუვაკონტროლათ ჩქინ სურვილეფ დო მოქმედებეფ. მარა სინამდვილეს, ჩქინდა რე დამოკიდებულ, მუჭო მიფქციებუთ. w24.03 5 ¶11, 12