ივანობა

იეჰოვაქ აკურთხჷ პირველ საუკუნეშ ქრისტიანეფ, მუშენდა თინეფქ დუდ ვემუდვეს დო ქუდუხუჯუეს სიტუაციას. თინეფ ხშირას ხვადუდეს თხოზინს დო მინშა თენა ველდესინ თეშ ხვადუდ. ქიგიფშინათ მუქ მოხვად, მუჟამსით პავლე დო ბარნაბა ლისტრას ქადაგენდეს. თე ქალაქიშ მახორუეფქ თინეფს დუდშე ჯგირო დოხვადეს დო მსახურებას ხოლო ურჩქილედეს. მარა თე ხალხ პავლე დო ბარნაბაშ მოწინააღმდეგეეფქ ახნარეს დო მუჭოთ ბიბლიაშე ბგებულენთ, თინეფშე ნამთინექ „პავლეს ქუალეფ მოუნჭჷ დო ქალაქშე გეგშასერგელუ, მუშენდა ღურელ მიორჩქუდეს“ (საქ. 14:19). მარა თე ირფელიშ უმკუჯინუო პავლე დო ბარნაბაქ შხვადო გაგრძელეს ქადაგებაშ საქმე. მუქ მაჸუნ თეს შედეგო? თინეფქ „ბრელ გინართინეს მოწაფეთ“ დო მუნეფიშ სიტყვეფით დო საქმეეფით, გამანგარეს თანაქრისტიანეფ (საქ. 14:21, 22). ბრელშო ჯგირ მაგალითიქ იჸუ თიქ, ნამდა პავლე დო ბარნაბაქ თხოზინიშ უმკუჯინუო ქადაგება ვემიოტუეს. შემლებნა დარწმუნებულ ვორდათ, იეჰოვა ჩქი ხოლო ვამმარკენა კურთხევეფს, მუჟამსით სირთულეეფიშ უმკუჯინუო გუვაგრძელენთ თიშ კეთებას, მუთ დუმავალეს. w23.04 16, 17 ¶13, 14

მუშ სიცოცხლეს ბრელ ოშქურანჯ სიტუაციას შეხვად დო ქიანაშ ნტერ ჸუნდჷ. ათეშენ, ღორონთის ლოცვას ხშირას თხულენდჷ მოხვარას. ფსალმუნმაბირე დავით დარწმუნებულ რდჷ, ნამდა იეჰოვა ირჩქილედ დო პასუხენდჷ თიშ ლოცვეფს. თქვა ხოლო შეილებნა რჯერდან თეშ. მუჭოთ თე სტატიას გარჩიებულ მაგალითეფშე ბძირით, იეჰოვა ირიათო ქომჩანა სიბრძნეს დო ძალას, ნამუთ სირთულეეფიშ გარზებელო მოსაჭირნა. თეს გეძინელ, ჩქინ მახვარებელო, იეჰოვაქ შილებე ჩქინ და დო ჯიმალეფ ვარდა თინეფ გეგმირინუას, მით ვამსახურ თის. მართალ რე, იეჰოვაქ შილებე ჩქინ ლოცვეფშა თეშ ვამპასუხან, მუჭოთ ჩქი ველუთ, მარა ბჯერა, ნამდა თინა პასუხიშ უმშო დღას ვა დომტენა. ღორონთ ქომჩანა თის, მუთ მოსაჭირნა დო თეს ზუსტას საჭირო დროს გაკეთენს. ათეშენ, ვემიოტუათ ლოცვა დო რჯერდან, ნამდა იეჰოვა აუცილებერო იზრუნენს თქვანდე ამდღა დო ახალ ქვეყნიერებას „არძა ცოცხალ არსებაშ სურვილს დაკმაყოფილენს“ (ფსალმ. 145:16). w23.05 8 ¶4; 13 ¶17, 18

ჯგირ იჸუაფ ქიდეკვირათ, მუჭო გაკურთხეს იეჰოვაქ მიზანიშ მენჭირნაფაშ დროს. მუშე შეილებნა დეფიქრათ? მაგალთო, თქვან მიზან ბიბლიაშ კითხირიშ ვარდა ლოცვაშ გაუჯგუშება ქორენ-და, დეფიქრით, მუჭო გამანგარენს თე მიზანიშ მენჭირნაფა იეჰოვაწკუმა თქვან ურთიერთობას (ფსალმ. 145:18, 19). ვარდა თქვან მიზან ნამდგაინ ქრისტიანულ თვისებაშ გავითარება ქორენ-და, დეფიქრით, მუ ჯგირო იმოქმედენს თენა შხვეფწკუმა თქვან ურთიერთობაშა (კოლ. 3:14). ჯგირ იჸუაფ, გეგმოჭარათ თიშ მიზეზეფ, მუშენ გოკონა მიოჭირინუათ თქვან მიზანს დო უკულ ირიათო გეგნაჯინათ თის. თინეფწკუმა ართო გატარით დრო, მით მიზანიშ მენჭირნაფას მიგეხვარებნა (იგავ. 13:20). მინშა შილებე ვა მიღდან თიშ ძალიერ სურვილ, ნამდა ქიმვოჭირინუათ ჩქინ მიზანს. ნიშნენსო თენა თის, ნამდა მუთუნ ვა მაკეთებენა მიზანიშ მიოჭირნაფალო? მუშო ოკო რაგად, ვარ. ჩქი ხოლო ირფელ ოკო გუვაკეთათ მიზანიშ მიოჭირნაფალო, თიმწკუმა ხოლო, მუჟამსით შილებე თეშ სურვილ ვა მიღდან. მართალ რე, თეშ კეთება თვითდისციპლინას ითხინს, მარა თი შედეგეფ, ნამუთ თეს მოჸუნს, მონდომაშა ღირჷ. w23.05 27, 28 ¶5—8

თიშ რჩქინა, ნამდა არასწორ გადაწყვეტილებაშ შედეგეფშე პასუხიშმგებელ პირადო ჩქი ვორეთ, გინმოჭყვიდირაფუანა, ვაღიარათ ცოდეფ, გეგშვასწორათ შეცდომა დო ირფელ გუვაკეთათ, ნამდა კინ იგივექ ვა მაღოლან. თეცალ მოქმედება მიმეხვარებნა, გუვაგრძელათ სიცოცხლეშ შარას რულა. ვემკალუათ თქვან დრო დო ენერგია დუდიშ მართლებას დო გინობრალებას. თეშ მანგიორო, უჯგუშ იჸუაფ აღიარათ შეცდომა დო თი მომენტშო, მუდგაშ კეთება შეილებნა ირფელ გაკეთათ. დაშებულიშ გურშენ, დუდის გლახათ ქოგინაფლენთ დო გურ ბრალს ქიგერდვანან-და, ლოცვას ალალას ქუდურაგადეთ იეჰოვას, აღიარით შეცდომა თიშ წოხოლე დო ქოთხით პატიება (ფსალმ. 25:11; 51:3, 4). თი პიროვნებას ხოლო ქუწით ბოდიშ, მიდგას გურ უწყუნეთ დო საჭირო ქორენ-და, უხუცესეფს ხოლო ქოთხით მოხვარა (იაკ. 5:14, 15). შეცდომეფშე დიგურეთ დო ირნერო ეცადით კინ ვეგემეორათ თინეფ. თაშ ქიმიქციებუთ-და, შეილებნა დარწმუნებულ რდათ, ნამდა იეჰოვა ჭყოლოფას გეგმირჩქინანს თქვან მიმართ დო მუჭოთ საჭირო რენ თეშ ქიმგეხვარებნა (ფსალმ. 103:8—13). w23.08 28, 29 ¶8, 9

იეჰოიადა ირნერო ოხვარუდ იეჰოაშის, ჸოფედკო ჯგირ პიროვნება, მუდგაშ შედეგო თე ახალგაზრდა მეფე სწორას იქციებუდ იეჰოვაშ თოლს. მარა იეჰოიადაშ ღურაშ უკულ, იეჰოაშიქ ქუმურჩქილუ იუდაშ განდგომილ მთავრეფს, მით ვამსახურდეს იეჰოვას. (2 მატ. 24:4, 17, 18). იეჰოვას მანგარო უწყუნუ გურ თინეფიშ საქციელქ, ათეშენ „წინასწარმეტყველეფს მიაშქვანდჷ თინეფშა, ნამდა დართესკო თის, მარა მითინ ვა ურჩქილედ თინეფს“. ხალხიქ ვართ იეჰოიადაშ სქუას, ზაქარიას მურჩქილუ, მით ხვალე იეჰოვაშ წინასწარმეტყველ დო მღვდელ ვარინ, მეფე იეჰოაშიშ მამდასქუა ხოლო რდჷ. მეფე იეჰოაშიქ დოჸვილ ზაქარია (2 მატ. 22:11; 24:19—22). იეჰოაშიქ იეჰოვაშ მიმართ ჯანსაღ შიშ მიოდინუ. იეჰოვას ნარაგად აფუდ: „მით მუთუნო ვემემრჩქინანს, გოჯოგაფილ იჸუაფ“ (1 სამ. 2:30). თე სიტყვეფქ შისრულ თიმწკუმა, მუჟამსით სირიაშ ჭიჭე ჯარქ გეგშართჷ იეჰოაშიშ დიდ ჯარიშ წინააღმდეგ დო გიორჯგინ თის, დო ხვალე თენა ვარინ, იეჰოაშ ხოლო დონჭყოლეს (2 მატ. 24:24, 25). ბოლოს მეფე კინ მუშ მსახურეფქ დოჸვილეს, მუდგათ ზაქარიაშ ჸვილუაშენ მანგიორ გინუგეს. w23.06 18, 19 ¶16, 17

პავლე ძალამ ხანს რდჷ ეფესოს, სოდეთ ქადაგენდჷ სახიოლო ამბეს დო ოგურუანდჷ ხალხის (საქ. 19:1, 8—10; 20:20, 21). თის მანგარო უჸორს თექიან და დო ჯიმალეფ დო ოკო, ქიმეხვარას, იეჰოვაშ ართგურო ქუდოსქიდან. ეფესოელეფ ტყურა რელიგიეფიშ გურაფეფიშ დო ცრუ რწმენეფიშ მონობას რდესჷ. ეფესოს უკანასკნელშა გილალუაფირ დო უონჯღორე ხალხ ცხოვრენდჷ. თეატრეფს დოვარ რელიგიურ ღონისძიებეფს უწმაწურ ჩიება ჩვეულებრივ ამბე რდჷ (ეფეს. 5:3). ეფესოს ბრელ „ირნერო ზნეობა დინაფილ რდჷ“. თი ბერძნულ სიტყვა, ნამუთ პავლექ თაქ გიმირინუ, პირდაპირ გაგებათ ნიშნენს, „ვა გინაფლენდე მუთუნნერ ჭუას“ (ეფეს. 4:17—19). ჭეშმარიტებაშ გაგებაშახ ეფესოელეფ ვა გინაფლენდეს მუთუნნერ ვალდებულებას დო სინდის შურო ვაწუხენდეს მუნეფიშ საქმეეფიშ გურშენ. ათეშენ თქუ პავლექ თინეფშენ, ნამდა „გონება აფუდეს კილერ დო მოჩილათირ რდესჷ ღორონთშე მოურსუნ თი სიცოცხლეს“. მარა არძა ეფესოელ ვა დოსქილადე უკმელას. w24.03 20 ¶2, 4; 21 ¶5, 6

გედეონს მსაჯულო მსახურებაშ დროს ბრელ მუდგარენშა აჸუ ფიზიკურო გარზებელქ. მაგალთო, მუჟამსით შქა სერს მიდიანელეფქ ინტეს, თიქ ქეკათხოზ იზრეელიშ დიხაშე მალწყარ იორდანეშახ (მსაჯ. 7:22). ეცილუო თე დაბრკოლებაქ გედეონს? ვარ! შულადაშ უმკუჯინუო, თიქ დო მუშ 300 ჯარიშკოჩიქ გეგნოკვათეს მალწყარ დო ბოლოშა ქეკათხოზეს ნტებულ მიდიანელეფს. საბოლათ, ქეკაჭიშუეს დო ხეშა ქეშიჸოთეს თინეფ (მსაჯ. 8:4—12). გედეონ დარწმუნებულ რდჷ, ნამდა იეჰოვა ძალას ქიმეჩანდჷ თის. ღორონთიქ ქოთ ქიმიქცუ თაშ (მსაჯ. 6:14, 34). ართშა გედეონქ დო თიშ ჯარიშკოჩეფქ კუჩხით ქეკათხოზეს ჟირ მიდიანელ მეფეს, მით საეგებიოთ, აქლემეფს გიმახედეს დო თეშ მინტებდეს (მსაჯ. 8:12, 21). მარა ღორონთიშ მოხვარათ, ისრაელეფქ ოჭოფეს თინეფ დო მიგეს ბრძოლა. თინეფცალო უხუცესეფს ხოლო შეულებნა მიენდან იეჰოვას, მით „დღას ვა შურდუ დო ძალა ველიებ“. იეჰოვა ხოლო საჭირო დროს ქიმეჩანს თინეფს ძალას (ეს. 40:28, 29). w23.06 6 ¶14, 16

იეჰოვაშა ბოლოშა მენდებათ, მუდგა სირთულეს ვეშეფხვადათ ჩქი ხოლო შემლებნა მიღდან მტკიცე გურ. ქიგიფშინათ, მუ ჯგირობუა მოუღ ბარაკის იეჰოვაშა მენდებაქ დო თიშ ხემძღვანელობაშ მეჸუნაქ. თიშ უმკუჯინუო, ნამდა ისრაელეფ ბრძოლაშო მომზადებულ ვა რდეს დო ვართ ობრძოლებერ იარაღეფ უღდეს, იეჰოვაქ მითითება მეჩჷ ბარაკის, ნამდა გეგშართკო ქანაანელეფიშ მეთაურიშ, სისერაშ, წინააღმდეგ (მსაჯ. 5:8). წინასწარმეტყველ დებორაქ ბარაკის უწუ, ნამდა გეგმორთკო თაბორიშ გვალაშე დო კიშონიშ ხევწკუმა ქებრძოლკო სისერას, მით დიდ ჯარით, 900 ეტლით დო ქიანაშ იარაღით რდჷ გიშულირ. მართალ რე, ბარაკის უჩქუდ, ნამდა ტრიალ მინდორს სისერაშ ეტლეფს უმოს უპირატესობა აღვენუდ, მარა იშენით დემორჩილ იეჰოვას. ისრაელიშ ჯარ გვალაშე გიმიშუნ თეშ, იეჰოვაშ ძალათ გიმანტირე ჭვემაქ ქიგიაშქვჷ, მუდგაშ შედეგო სისერაშ ეტლეფქ ლეტას ქენინწყჷ დო თეშ ჭყოლოფათ, იეჰოვაქ ბარაკის დიდებულ გამარჯვება ქუმუღ (მსაჯ. 4:1—7, 10, 13—16). თეშნერო, მუჟამსით იეჰოვას დო თიშ ორგანიზაციაშე მეღებულ ხემძღვანელობას მივენდებუთ, ღორონთ ჩქი ხოლო დიდებულ გამარჯვებას ქუმომღანა. w23.07 19 ¶17, 18

მოთვინება მანგარ მნიშვნელოვან რე, მუშენდა თის რსხება მოუღ. ულირს მახორუ ართგურ მსახურეფცალო, საჭირო რე, ჩქი ხოლო მოთვინებათ ველდათ თი დროს, მუჟამსით ღორონთ მუშ არძა დუნაპირებუს შეასრულენს (ებრ. 6:11, 12). ბიბლია ჩქინ სიტუაციას უდარენს დიხაშ დუმამუშებელს (იაკ. 5:7, 8). დიხაშ დუმამუშებელ ხანდას ვარკენს თასუას დო თიშ წყარუას, თიშ უმკუჯინუო, ნამდა ზუსტას ვა უჩქჷ, მუჟამ ფალუნს ნათასა. თინა მოთვინებათ იჯინე დო ჯერს, ნამდა მოსავალიშ ეჭოფუაშ დრო ხოლო ქუდოდირთუ. ჩქი ხოლო, დიხაშ დუმამუშებელცალო, დუდის ვა ბზოგენთ, ნამდა მონაწილება მიბღათ ღორონთიშ მსახურებას, თიშ უმკუჯინუო, ნამდა ზუსტას ვა მიჩქნა, „ნამ დღას მოურს [ჩქინ] უფალ“ (მათ. 24:42). ჩქი მოთვინებათ იბჯინეთ დო ბჯერა, ნამდა მუშ დროს იეჰოვა შეასრულენს არძა დუნაპირებუს. მოთვინებას ვეგმიფრჩქინანთ-და, შილებე ჯინათ დოფშურდათ, ჭიე-ჭიეთ გეგნურთათ ჭეშმარიტებაშ შარაშე დო ყურადღება თიცალ მუდგარენეფშა გეგნიბღათ, მუდგას დროებით სიამოვნება მოუღ. მარა, თეშ გინაწონს, მოთვინებას გეგმიფრჩქინანთ-და, შემალებენა ქიმვოჭირინუათ თე უბადო ქვეყნიერებაშ აღსასრულშახ დო მიბღათ რსხება (მიქ. 7:7). w23.08 22 ¶7

დანიელიშ 2:41—43-ს მოჩამილ წინასწარმეტყველებას, „დანიელიშ“ დო „გამოცხადებაშ“ წიგნეფს მოჩამილ შხვა წინასწარმეტყველებეფს ქეშუდარენთ-და, თი დასკვნაშა ქიმურთ, ნამდა ნარჩაკუჩხეფით წარმოდგენილ რე ინგლის-ამერიკაშ მსოფლიო იმპერია. დანიელქ თე ალიანსიშ გურშენ თეცალ მუდგარენ თქუ: „თე სამეფო გვერდო ძალიერ დო გვერდო ადვილო ტირხუნფერ იჸუაფ“. თეშ მიზეზ თინა რე, ნამდა მოქალაქეეფ, მით „თიხათ“ რენა წარმოდგენილ, ასუსტენა თე სამეფოშ „რკინაცალ“ ძალას. დანიელიშ ენწყუმილ თე სიზმარშე ბრელ მნიშვნელოვან დეტალს ბგებულენთ. პირველ, ინგლის-ამერიკაქ მსოფლიოს მუშ ძალაუფლება ბრელშა ოძირუ. მაგალთო, თიქ მთავარ როლ ილაჸაფ პირველ დო მაჟია მსოფლიო ომეფიშ მოგებას. მარა თე იმპერიაშ ძალას ასუსტენდეს დო ასუსტენა კინ მუნეფიშ მოქალაქეეფ, მით ობრძოლნა, მუჭოთ ართიანს, თეშ სახელმწიფოს ხოლო. მაჟია, ინგლის-ამერიკა იჸუაფ ბოლო მსოფლიო იმპერია, მუჟამსით ღორონთიშ სამეფო განადგურენს არძა ადამიანურ მართველობეფს. w23.08 10, 11 ¶12, 13

მინშა პრობლემეფ დო სირთულეეფ დავითის გურს უმონკენდჷ დო ძალეფს მიდმუღანდჷ (ფსალმ. 18:4, 5). მარა თი ჸოროფა დო ალარნა, ნამდგას იეჰოვაშე გინაფლენდჷ, გიშაცოცხალენდჷ თის. იეჰოვა მუშ ძალაგიშალიებურ მეგობარს მასვანჯებელო „გოფალირ ოდიარეეფ“ დო „წყარით ეფშა ადგილეფჸურე“ აწოჸუნდჷ. შედეგო, დავითიქ დირთინუ ძალეფ დო შეიალებუ, ხიოლით გაგრძელუკო იეჰოვაშ მსახურება (ფსალმ. 18:28—32; 23:2). თაშ რე ამდღა ხოლო. თიშ უმკუჯინუო, ნამდა ქიანაშ პრობლემას ფხვადუთ, „იეჰოვაშ ართგურ ჸოროფათ მიდგუნა შურ“ (გოდ. 3:22; კოლ. 1:11). დავითიშ სიცოცხლე ხშირას რდჷ საფრთხეშ თუდო, მუშენდა თის ბრელ ძალიერ ნტერ ჸუნდჷ. მარა იეჰოვაშ ჸოროფა დავითის დუდის თხილერო ოგინაფუანდჷ. თინა არძა სიტუაციას გინაფლენდჷ, ნამდა იეჰოვა ალურდჷ, მუთ ოხვარუდ, შინაგან სიმშვიდე ვადინუკო. ათეშენ თამამას შეულებუდ უთქუალუდუკო: „იეჰოვაქ არძა ჩქიმ შიშშე გუმათავისფალ“ (ფსალმ. 34:4). მართალ რე, დავითის მინშა შიშ ინაჭკირუდ, მარა თიშ ჭყოლოფათ, ნამდა ჯერდჷ, იეჰოვას უჸორდჷ, ირნერ შიშის გიორჯგინანდჷ. w24.01 30 ¶15—17

დიგურეთ იეჰოაშიშ მეღებულ არასწორ გადაწყვეტილებეფშე. მღვდელმთავარ იეჰოიადაშ ღურაშ უკულ იეჰოაშიქ გლახა საზოგადოებას ქაკათ (2 მატ. 24:17, 18). თიქ დემეგობრჷ დო ურჩქილედ იუდაშ მთავრეფს, მიდგას ვა უჸორდეს იეჰოვა. ალბათ თქვა ხოლო ფიქრენთ, ნამდა უჯგუშ იჸუაფუდ, იეჰოაშიქ დუდ შორს დეკინკო თინეფშე, მარა თაშ ვა მოხვალამე. თეშ მანგიორო, თინა ირფელს დოჸუნდჷ მუშ ითამ მეგობრეფს დო თი დონეშა ქიმერთჷ, ნამდა მუშ მამდასქუა, ზაქარია, დაჸვილაფუ, მით ოცადუდ, თინა სწორ შარას ქიგიორინუკო (2 მატ. 24:20, 21; მათ. 23:35). წერმიდგინით, სოიშახ მერთჷ იეჰოაშიქ. დუდშე თინა იეჰოვაშ ართგურ მეფე რდჷ, მარა უკულ, სანარღოთ, განდგომილო დო კოჩიშ მაჸვილარო გინირთჷ დო ბოლოს მუშ მსახურეფქ დოჸვილეს (2 მატ. 24:22—25). იეჰოაშის კინ იეჰოვაშა დო თიშ ართგურ მსახურეფშა ქუმურჩქილუაფუდკო, თიშ ცხოვრება გვალო შხვანერო მიდეშ. w23.09 9 ¶6

იესოქ ქიმეხვად, ნამდა თე სიტყვეფ პეტრე მოციქულს შიშიქ ორაგადაფუ, მუდგაშ მიზეზ შილებე უღირსობაშ გრძნობა რდუკო. მარა ქრისტეს თინა ხოლო ჯგირო უჩქუდ, ნამდა პეტრეს შეულებუდ ბოლოშა ართგურ ჸოფედკო. ათეშენ გემუანო უწუ თის: „ვა გაშქურნას“. პეტრექ ქიგინ, ნამდა იესო თის ონდუდ, მუდგაქ თიშ მთელ ცხოვრებაშა იმოქმედ დო სერიოზულ ნაბიჯ გინადგუმაფუ. პეტრექ დო თიშ ჯიმა ანდრიაქ მიოტუეს მეჩხომეობა, მუდგათ დუდის ეიჯუმუანდეს, დო იესოშ მიმაჸუნალეფო გინირთეს, მუდგაშ გურშენ იეჰოვაქ კურთხევეფით ეიოფშჷ თინეფ (მარ. 1:16—18). პეტრექ, მუჭოთ ქრისტეშ მიმაჸუნალქ ბრელ სარკო მუდგარენ ძირჷ. მაგალთო, თიქ მუშ თოლით ძირჷ, მუჭო ოსქილიდუანდჷ იესო ხალხის ლახალაშე, ათავისფალენდჷ დემონეფშე დო ათელენდჷ ღურელეფს (მათ. 8:14—17; მარ. 5:37, 41, 42). თეს გეძინელ, ართშა ხილუას სამეფო დიდებულებათ ეფშა იესო ხოლო ძირჷ, მუთ მთელ ცხოვრებას დღას ვა გოჭყოლად (მარ. 9:1—8; 2 პეტ. 1:16—18). თაშ ნამდა, პეტრე იესოშ მიმაჸუნალ ვა ჸოფედკონ დღას ვა ძირუნდჷ თე სარკო მუდგარენეფს. წერმიდგინით, მუ ბედნერ იჸუაფუდ თინა, ნამდა უღირსობაშ გრძნობას დო მუშ დუდიშ გურშენ უარყოფით ფიქრეფს ვემეჩ უფლება, იეჰოვაშე თე კურთხევეფიშ მეღებას ეცილკო. w23.09 21 ¶4, 5

მოციქულ პეტრექ მუშ პირველ წერილს ხოლო ართშა მოძირეს, მუსხით მნიშვნელოვან რე, მთელ გურით მიჸორდან ართიან დო თქუ, ნამდა თეცალ ჸოროფა ხვალე ართ დო ჟირ ცოდას ვარინ „ბრელ ცოდას გინოფორუნს“ (1 პეტ. 4:8). თე სიტყვეფიშ ჭარუაშ დროს, პეტრეს ალბათ ქუგაშინ თიქ, მუთ წანეფიშ წოხოლე იესოშე დიგურუ პატიებაშ გურშენ. ართ დროს პეტრე ფიქრენდჷ, ნამდა შხვას დაშებულს შქვითშა ქაპატიენდჷ-და, დიდ ჭყოლოფას გეგმირჩქინანდჷ. მარა იესოქ უწუ, ნამდა შქვითშა ვარინ 77-შა ოკო აპატუკო, მუთ ირიათო პატიებას ნიშნენდჷ (მათ. 18:21). თენა ჩქინო ხოლო გაკვეთილ რე. მინშა შილებე ქოძირათ, ნამდა გიჭირა თე რჩევაშ გათვალისწინება, მარა გურ ვეგიტახათ, მუშენდა ხვალე ვა რეთჷ. მინშა არძას მიჭირა შხვეფშა პატიება. მთავარ რე, მუთ შეილებნან ირფელ გაკეთათ, ნამდა ქაპატუათ თანაქრისტიანს დო დირთინუათ მშვიდობა. w23.09 29 ¶12

ჩხომიშ ქვარას იონა დარწმუნებულ რდჷ, ნამდა ღორონთ ქიმირჩქილუანდჷ თიშ თანდაბლურო რაგადებულ ლოცვას, ქოძირუნდჷ, მუჭო ნარღენდჷ დაშებულს დო იეჰოვა აუცილებერო ქიმეხვარებუდ. თექ ქოთ ქუმოხვად, ჩხომქ იონა წყარპიჯის გეკაჸათ. იეჰოვაქ ირსხჷ თინა, მუდგაშ უკულ იონას გაბედულებაქ ქიმიაჩ დო მზათ რდჷ, შეასრულკო ღორონთშე მეღებულ დავალება (იონ. 2:10—3:4). დღას ქოჸოფეთო თიცალ სიტუაციას, მუჟამსით სირთულეეფიშ გურშენ, გურ თეშ გაფდეს დამონკებულ, ნამდა ლოცვაშ ძალა ხოლო ვაიღდეს? ვარდა ქოჸოფეთო თიცალ გინოშულადირ, ნამდა პირად გურაფაშ დუდ ხოლო ვაიღდეს? შილებე თე სიტუაციეფ ნაჩინებ რე თქვანო. მარა რშუდან, იეჰოვა ორწყე თქვან მდგომარეობას დო ირფელ ჯგირო არჩქილე. ათეშენ, გვალო ჟირ სიტყვათ რაგადებულ ლოცვაშ უკულ ხოლო შეილებნა დარწმუნებულ რდათ, ნამდა ღორონთ აუცილებერო ქიმერჩანა თის, მუთ თი მომენტის გოსაჭირუნა (ეფეს. 3:20). ფიზიკურო დო ემოციურო გლახათ ქორეთ დო კითხირიშ დო გიმორკვიებაშ დუდ დო ძალა ვაიღნან-და, შეილებნა ქუმურჩქილუათ ბიბლიაშ დო თიშა გერსხილ პუბლიკაციეფიშ აუდიო ჩანაწერეფს. თეს გეძინელ, თეცალ დროს შილებე მიგეხვარან, ჩქინ ნამთინე ობირეშიშ რჩქილაქ ვარდა ჩქინ ვებგვერდის გედვალირ ნამდგაინ ვიდეოშ ჯინაქ. მუჟამსით ლოცულენთ დო ლოცვაშ პასუხეფს გორუნთ თი საშვალებეფს, მუთ იეჰოვაქ თქვანო ხეშამალაფარო გინაშქვჷ, თეშნერო, თის არზენთ საშვალებას, გუგამანგარან რთულ სიტუაციეფიშ დროს. w23.10 13 ¶6; 14 ¶9

კარავს დო თი ტაძარეფს, ნამდგაქ უმოს გვიანო ისრაელს იჸუ შენებულქ, ბრელ საერთო უღუდ. ქოთ კარავს დო ქოთ ტაძარს უღუდ ჟირ ოთახ — „წმინდა“ დო „წმინდათაწმინდა“. თინეფ ართიანშე მოქარგილ ფარდათ რდჷ გიშართილ (ებრ. 9:2—5; გამ. 26:31—33). ოთახის, ნამდგას წმინდა ჯოხოდ, მილაძუდ ოქროშ სალამპრე, სამსხვერპლო, ნამდგას საკმელ გეძუდ დო აწადვალარ ქობალიშ სტოლ. წმინდა მსახურებაშ შეიოსრულებერო თექ მინულა ხვალე „ცხებულ მღვდელეფს“ შეულებდეს (რიცხ. 3:3, 7, 10). წმინდათაწმინდას მილაძუდ მთლიანო ოქროთ ფორილ შეთანხმებაშ კიდობან, ნამუთ თიშ სიმბოლო რდჷ, ნამდა იეჰოვა მუშ ხალხწკუმა რდჷ (გამ. 25:21, 22). თექ მინულაშ უფლება ხვალე მღვდელმთავარს უღუდ, თინა ხოლო წარმოწანაშე ართშა, გიშაჸიდირიშ დღას (ლევ. 16:2, 17). თინა მინიშ წმინდათაწმინდაშა დო მუჭოთ მუშ, თეშ მთელ ერიშ ცოდეფიშ გიშაჸიდირალო მინუღუდ ცხოველიშ ზისხირ. უმოს გვიანო, იეჰოვაქ მუშ წმინდა შურიშ ჭყოლოფათ გეგმაარგამ, მუს ასიმბოლოენდჷ თი ირფელ, მუთ კარავს რდჷ (ებრ. 9:6, 7). w23.10 27 ¶12

ღორონთიშ სიტყვას ბრელ დიხას შეფხვადუთ მითითებას თიწკუმა დაკავშირებით, ნამდა მიჸორდან ართიან (იოან. 15:12; რომ. 13:8; 1 თეს. 4:9; 1 პეტ. 1:22; 1 იოან. 4:11). თე ძვირფას თვისება გურშე მოურს, მარა ჩქინ გურს ადამიანეფ ვარწყენა. მუ ოკო ვაკეთათ, ნამდა და დო ჯიმალეფს ჸოროფა ქუვოძირათ? სიტყვეფით დო საქმეეფით ოკო ვოძირათ, ნამდა მიჸორა თინეფ. და დო ჯიმალეფიშ მიმართ ჸოროფაშ გიმოხანტუა შხვადოშხვა საშვალებათ შემლებნა. ბიბლიას თეწკუმა დაკავშირებით ბრელ რჩევა რე მოჩამილ. მაგალთო, თექ ბკითხულენთ: „სიმართლე ეჩით ართიანს“ (ზაქ. 8:16). „ვადინუათ ართიან შქას მშვიდობა“ (მარ. 9:50). „პატიცემა ართიანს ქუჭიშეთ“ (რომ. 12:10). „მთელ გურით მიღით ართიან“ (რომ. 15:7). „ქაპატით ართიანს“ (კოლ. 3:13). „გილეღით ართიანიშ ოღალ“ (გალ. 6:2). „გურშა ეუქექეთ ართიანს“ (1 თეს. 4:18). „გამანგარით ართიან“ (1 თეს. 5:11). „ილოცით ართიანშო“ (იაკ. 5:16). w23.11 9 ¶7, 8

ჩქი ირდღას ბღებულენთ თიცალ გადაწყვეტილებეფს, სოდეთ ძალიერ რწმენაშ გიმორჩქინა რე საჭირო. მაგალთო, გინმობჭყვიდუნთ, მუნერ საზოგადოებაწკუმა მიღდან ურთიერთობა, მუ განათლება მიბღათ, დეფქორწინათ დო ვარ, პჸუნდან დო ვარ სქუალეფ დო მუნერ გართობა დო სამუშა გიშებგორათ. ჯგირ იჸუაფ, თეცალ დროს ჩქინ დუდის ქობკითხათ: „ქაძირანსო ჩქიმ გადაწყვეტილებეფ, ნამდა მართალო ბჯერს თე ქვეყნიერება მალას მისპუ დო თის ღორონთ ახალ ქვეყნიერებათ დოთირანს? ხომ ვა მოქმედენს ჩქიმ გადაწყვეტილებეფშა თი ხალხიშ აზროვნება, მით ამდღარ დღათ ცხოვრენს დო ვა უღჷ მარადიულ ცხოვრებაშ იმენდ?“ (მათ. 6:19, 20; ლუკ. 12:16—21). სწორ გადაწყვეტილებეფს მიბღენთ, მუჟამსით მაღვენუნა თიშ ძალიერ რწმენა, ნამდა ღორონთიშ დუნაპირებ ახალ ქვეყნიერება მალას დოდირთუ. ძალიერ რწმენა განსაცდელეფიშ დროს ხოლო მოსაჭირნა. მაგალთო, შილებე რწმენაშ გურშენ ფთხოზუდან, ქრონიკულ ლახალა მიღდან ვარდა შხვადოშხვა მიზეზეფიშ გურშენ გურგოტახილ ვორდათ. მუჟამსით თეცალ სირთულეეფ რჩქინდუ, დუდშე შილებე მტკიცას მაფდან გინოჭყვიდილ, გივორჯგინათ თინეფს, მარა მუჟამსით ვორწყეთ, თე პრობლემეფს ბოლო ვა უღჷ, ძალიერ რწმენა მოსაჭირნა, ნამდა გავურზათ თინეფს დო ხიოლით გუვაგრძელათ იეჰოვაშ მსახურება (1 პეტ. 1:6, 7). w23.04 27 ¶4, 5

იეჰოვა ჩქინდე ელჷ, ნამდა ლოცვაშ თანახმას მიფქციებუთ. წერმიბდგინათ თეცალ სიტუაცია: ართ ჯიმა იეჰოვას თხინსჷ მოხვარას, ნამდა რეგიონულ კონგრესშა დასწრებელო სამუშაშე მუსხირენ დღათ გათავისფალან. მუჭო შილებე იეჰოვაქ უპასუხას თე ოთხუალს? თიქ შილებე ჯიმას უნჩაშწკუმა დარაგადაფალო გაბედულება ქიმეჩას. მარა საჭირო რე, თეშ ოკეთებელო ჯიმაქ ხოლო გეგნოდგას ნაბიჯეფ. მაგალთო, შილებე მუსხირენშა აჸუას დარაგადაფალქ უნჩაშშა მუშ ოთხუალიშ გურშენ. თეს გეძინელ, შილებე თინა ხოლო ქეშეთავაზას, ნამდა შხვა დღას ქიმუშენს ვარდა შხვა თანამშრომელს ქოთხინს მუშ მანგიორო მუშობას. ხვალე თენა ვარინ შილებე უნჩაშის უხელფასო შვებულება ქოთხუას. იეჰოვა ჩქინდე ელჷ, ნამდა ვემვოტენთ ოწუხებელიშ გურშენ ლოცვას. იესოშ სიტყვეფშე ბგებულენთ, ნამდა ნამთინე ჩქინ ოთხუალს იეჰოვაქ შილებე ხეთეშე ვა უპასუხას (ლუკ. 11:9). თაშ ნამდა, იმენდ ვადინუათ! ილოცით მთელ გურით დო დაჩემებულო (ლუკ. 18:1—7). მუჟამსით თაშ იფქციებუთ, იეჰოვას ვოძირანთ, ნამდა მუდგარენ უბრალოთ აჩემებულ ვა მაფუნან, მართალო მთელ გურით მოკონა, ღორონთიქ შემსრულან თინა. თეს გეძინელ, ვოძირანთ, ნამდა ბჯერა, იეჰოვას შეულებ ჩქინ მოხვარა. w23.11 22 ¶10, 11

იეჰოვაქ მუშ მეგობარ აბრაამს დეპირ, ნამდა თიშ გამნარყიშ საშვალებათ იჸუაფუდ კურთხეულ „არძა ერ“ (დაბ. 15:5; 22:18). აბრაამს ღორონთიშ მიმართ ძალიერ რწმენა უღუდ, ათეშენ დარწმუნებულ რდჷ, ნამდა თიშ დუნაპირებ აუცილებერო შისრულებუდ. მარა დრო მიკიშ, აბრაამ 100 წანერ რდჷ, სარა — 90 დო თე ართგურ ჩილ დო ქომონჯის სქუა დიო ხოლო ვა ჸუნდეს (დაბ. 21:1—7). მარა, მუჭოთ ბიბლიას ბკითხულენთ, თეშ უმკუჯინუო, „აბრაამ იშენით ვადინუანდჷ იმენდის დო წანდჷ, ნამდა იჸუაფუდ ბრელ ხალხიშ მუმა, მუჭოთ ღორონთის აფუდ რაგადებულ“ (რომ. 4:18). მუჭოთ მიჩქნა, აბრაამიშ იმენდ ვა გამტყუნებე. თის ქეშეძინ ქომოლსქუაქ, ისაკიქ, ნამდგას ქიანაშ ხანს ნატრენდჷ. მორთ ქიგებგათ, მუშენ რდჷ აბრაამ დარწმუნებულ, ნამდა ღორონთიშ დუნაპირებ აუცილებერო შისრულებუდ. აბრაამ ჯგირო იჩინენდჷ იეჰოვას დო ხოლოშიან ურთიერთობა უღუდ თიწკუმა, ათეშენ „ბოლოშა ჯერდჷ, ნამდა ღორონთის შეულებუდ მუშ დუნაპირებუშ შესრულება“ (რომ. 4:21). ზუსტას რწმენაშ გურშენ მიწონუ იეჰოვაქ აბრაამ დო მართალ კოჩო მირჩქინ თინა (იაკ. 2:23). w23.12 8 ¶1, 2

სანდო ახალგაზრდა მუშ არძა დავალებას პასუხიშმგებლობათ ასრულენს. თეშ სრულყოფილ მაგალით იესო ქრისტექ დომტუეს. თინა ვა რდჷ უპასუხიშმგებლო პიროვნება დო არდებულო ვემურდჷ საქმეს. თეშ გინაწონს, მთელ პასუხიშმგებლობათ ასრულენდჷ იეჰოვაშე მეღებულ ირნერ დავალებას, თიმწკუმა ხოლო, მუჟამსით თეშ კეთება ადვილ ვა რდჷ. იესოს უჸორდჷ ადამიანეფ დო განსაკუთრებულო მუშ მოწაფეეფ. ზუსტას ჸოროფაქ აღძრჷ თინა, მუშ სიცოცხლე დათმუკო შხვეფშო (იოან. 13:1). ახალგაზრდა ჯიმალეფ, მიაჸუნით იესოშ მაგალითის დო ბრელ იხანდით, ნამდა პასუხიშმგებლობათ შეასრულათ თქვანდა მენდებულ არძა დავალება. მუჟამსით ვაიჩქნა, მუჭო შეასრულათ თქვანდა მენდებულ საქმე გეგმირჩქინით თანდაბლობა დო ქოთხით მოხვარა სულიერო მოწიფულ ჯიმალეფს. მუჟამსით მუდგაინ საქმეს დუგავალენა დღას ვეგეჯერდათ აკაბურცხაშ კეთებას (რომ. 12:11). მთელ შურ დო გურ ქინოდვით თქვანდა მენდებულ დავალებას დო თეშ შეასრულით თინა „ითამ იეჰოვაშო ორთუდათ დო ვართ ხოლო ადამიანეფშო“ (კოლ. 3:23). მუშო ოკო რაგად, სრულყოფილეფ ვა რეთჷ დო დავალებაშ შესრულებაშ დროს შილებე შეცდომეფქ მოირთან, ათეშენ, გეგმირჩქინით თანდაბლობა დო აღიარით თი შეცდომეფ, ნამუთ მუგალენა (იგავ. 11:2). w23.12 26 ¶8

მანგარ დიდ ხიოლ მოუღ ნათუას დო იეჰოვაშ ოჯახიშ ნაწილო გინორთას. არძა, მიდგას თე პატი მიღუნა, ფსალმუნმაბირე დავითცალო ფიფქრენთ: „ბედნერ რე თინა, მიდგას სი გიშეგორუნქ დო ხოლოშა მიჸუნანქ სქან ოზეეფს დამკვიდრებელო“ (ფსალმ. 65:4). იეჰოვას ირკოჩ ვემნოჸუნს მუშ ოზეეფშა — მუშ ოჯახშა. თინა თიცალეფს ეახლოვებ, მით ოძირანს, ნამდა ღორონთწკუმა ხოლოშიან ურთიერთობა ოკო (იაკ. 4:8). მუჟამსით დუდის მეუძღვინენქ იეჰოვას დო დინათუქ, რჯერდას, ნამდა იეჰოვა ხვამათ ეგოფშანს (მალ. 3:10; იერ. 17:8). ნათუათ იჭყაფ ირფელ. სი ირნერო ეცადებუქ, შხვადოშხვა ცდუნებაშ დოვარ რწმენაშ გამოცდეფიშ უმკუჯინუო, იცხოვრე მეძღვინუაშ აღთქმაშ თანახმას (ეკლ. 5:4, 5). ასე ქრისტეშ მოწაფე რექჷ, ათეშენ მუთ შილებენ კილ-კილშა მიაჸუნ იესოშ მაგალითის დო ვეგნურთა თიშ მითითებეფს (მათ. 28:19, 20; 1 პეტ. 2:21). w24.03 8 ¶1—3

მუშ რაგად შილებე, მუჟამსით თქვა დო თქვან მეუღლეს ართიანწკუმა დროშ გატარება ვა გოსიამოვნუნა? მუშ კეთება შეილებნა თეცალ დროს? მორთ გუვარჩუათ დაჩხირიშ მაგალით. დაჩხირ დორზამაშე ხეთეშე ბორბონჩიათ ვეგნირთუ. საჭირო რე, ჭიე-ჭიეთ უმოს დიდ დიშკეფ ქიმთუტურუათ, ნამდა დაჩხირს უმოსო ქუმაძინას. თეშნერო, თქვა ხოლო, დუდშე ჭიჭე დრო გეგმურთით ართიანს. გაკეთით თიცალ მუდგარენ, მუთ ჟირხოლოს გოსიამოვნუნა (იაკ. 3:18). თეშ უკულ შილებე ქოძირათ, ნამდა თქვან შქას ჸოროფაქ უმოსო მიძინ. პატიცემაშ გიმორჩქინა მანგარ მნიშვნელოვან რე ქორწინებას. თინა მოგენს ჟანგბადის, ნამდგაშ უმშო დაჩხირ ბორბონჩიათ ვეგნირთუ დო მალას დოშქირტუ. თეშნერო, წყვილ ართიანიშ მიმართ პატიცემას ვეგმირჩქინანს-და, თინეფიშ ჸოროფაქ შილებე ჭიე-ჭიეთ გორგიდას. მარა მუჟამსით ჩილ დო ქომონჯ ირნერო ეცადებნა, გეგმირჩქინან ართიანიშ მიმართ პატიცემა, თინეფიშ „ჸოროფაშ ალ“ დღას ვა შქირტუ. მარა ართ მუდგარენ ოკო ფშუდან — შილებე ჩქი ფიფქრენდათ, ნამდა პატიცემას გიმიფრჩქინანთ მეუღლეშ მიმართ, მარა მთავარ რე, ქოგინაფლენსო თინა თეს. w23.05 22 ¶9; 24 ¶14, 15

ბიბლიას ბკითხულენთ ღორონთიშ თი ართგურ მსახურეფიშ სიტყვეფს, მით ნტერეფიშ დოვარ შხვა პრობლემეფიშ გურშენ შიშით კანკალანდეს (ფსალმ. 18:4; 55:1, 5). თეშნერო, შილებე ჩქი ხოლო ფხვადუდათ წინააღმდეგობას სკოლას, სამუშას, ოჯახის დოვარ მთავრობაშე. ხვალე თენა ვარინ, შილებე ჯამრთელობაშ პრობლემაშ გურშენ თიშა ხოლო მოშქურუდან, ნამდა დობღურუთ. მინშა, თეცალ დროს დუდის ჭიჭე ბაღანაცალო ბგინაფლენთ, ნამდგას მუშ დუდშა ვამახვარებე. მუჭო მოხვარუნა იეჰოვა თეშნერ სიტუაციეფს? თინა გურშა ელამკინანა დო მამშვიდენა. თაშ ნამდა რეგულარულო გეგშურთით დრო იეჰოვაწკუმა ურთიერთობას, ქილოცით დო წეკითხით თიშ სიტყვა (ფსალმ. 77:1, 12—14). თეშნერო, მუჟამსით ოწუხებელ გაღვენუნა, პირველ, მუდგას გაკეთენთ, თინა იჸუაფ, ნამდა ზეციერ მუმას ქოთხინთ მოხვარას. ქეჩით თის, მუ გაწუხენა დო მუშა გოშქურუნა დო მუს ხოლო ქიმეჩით საშვალება, ქიგეჩუან დო გურშა ელაიკინან მუშ სიტყვაშ საშვალებათ (ფსალმ. 119:28). w24.01 24, 25 ¶14—16

სულიერ მიზნეფს ქიმვოჭირინუათინ მთავარ რე, მიღდან თეშ ძალიერ სურვილ. მუთ უმოს ძალიერ რე ჩქინ სურვილ, თით უმოსო რე შეიოლებერ, ქიმვოჭირინუათ ჩქინ მიზნეფს. მუშ კეთება შეილებნა, ნამდა უმოსო გიღდან მიზანიშ მენჭირნაფაშ სურვილ? ლოცვას ქოთხით ღორონთის, გაიმანგარან სურვილ. იეჰოვას მუშ წმინდა შურიშ ჭყოლოფათ შეულებ გაიმანგარან თიშ სურვილ, ნამდა მიოჭირინუათ თქვან მიზანს. მინშა შილებე მიზან ხვალე თიშ გურშენ დეფსახათ, ნამდა მარჩქილენა თენა თაშ ოკო რდას, მუთ შუროთ ვა რე გლახა, მარა შილებე იშენდოიშენ სურვილ ვა მიღდან, ქიმვოჭირინუათ თის. იფიქრით თი ირფელშე, მუთ იეჰოვაქ თქვანო აკეთ (ფსალმ. 143:5). მოციქულ პავლე ხშირას ფიქრენდჷ, მუშმადიდა ჭყოლოფა გიმირჩქინ იეჰოვაქ თიშ მიმართ დო თენა ოხვარუდ, უღუდკო ძალიერ სურვილ, ნამდა დუდ ვადაზოგუკო დო უმოს გაკეთკო იეჰოვაშო (1 კორ. 15:9, 10; 1 ტიმ. 1:12—14). თაშ რე ჩქინ შემთხვევას ხოლო. მუთ უმოსის ფიფქრენთ თიშე, მუ აკეთ იეჰოვაქ ჩქინო, თით უმოსო მემანგარებნა სურვილ, ქიმვოჭირინუათ ჩქინ მიზნეფს (ფსალმ. 116:12). w23.05 27 ¶3—5

მუჟამსით ჩქინ ზეციერ მუმაშ სახელს განვადიდენთ, თის თენა მანგარო ოხიოლ (ფსალმ. 119:108). ნიშნენსო თენა, ნამდა ირფელიშშემალებე ღორონთის ხოლო არასრულყოფილ ადამიანცალო ოსაჭირ ცქვაფა დო ჯგირ სიტყვეფ, ნამდა ღირსებაშ გრძნობა უღუდას დო მუშ დუდშა დარწმუნებულ რდასჷ? შუროთ ვარ! მუჟამსით განვადიდენთ იეჰოვას, ვამტკიცენთ, ნამდა სატანა მეტყურე რე. თიქ ჩქი ხოლო ეკმაწამეს ტყურა დო თქუ, ნამდა ნამთინ ადამიან ვეჸუაფ ბოლოშა ღორონთიშ ართგურ, მუჟამსით გეგმიცადებ. სატანაშ ნარაგადით, იეჰოვაშ მსახურებას მუთუნ სამოგებოს ვა ბძირუნთ-და, ხეთეშე ქურთინუანთ თის ოჭიშის (იობ. 1:9—11; 2:4). ღორონთიშ მსახურ იობიქ, მუშ ართგურობათ დამტკიც, ნამდა სატანა ტყურას იჩიებუდ. თითოულს მიღუნა საშვალება, ქიგებდირთათ იეჰოვაშ მხარეს დო ჩქინ ართგურ მსახურებათ გურ გუხარათ თის (იგავ. 27:11). თენა მართალო დიდ პატი რე! w24.02 8, 9 ¶3—5

მოსე დო იესო ნავეშ სქუაშ უკულ იეჰოვაქ მუშ ხალხის ხემძღვანელო მსაჯულეფ ქიგურინუ. უკულ, მეფეეფიშ მართველობაშ პერიოდის, იეჰოვაქ ოხემძღვანელებერო წინასწარმეტყველეფ დანიშნჷ დო ართგურ მეფეეფ მეჸუნდეს თის, მუდგას წინასწარმეტყველეფ ელუჩანდეს. მაგალთო, მეფე დავით თანდაბლურო ურჩქილედ წინასწარმეტყველ ნათანს, მუჟამსით თინა რჩევეფს არზენდჷ (2 სამ. 12:7, 13; 1 მატ. 17:3, 4). მეფე იეჰოშაფატიქ მიაჸუნ წინასწარმეტყველ იახაზიელიშ რჩევეფს დო ხალხის ხოლო ელუჩ, ქურჩქილესკო ღორონთიშ წინასწარმეტყველეფს (2 მატ. 20:14, 15). მუჟამსით მეფე ხიზკია მანგარ რთულ მდგომარეობას რდჷ, წინასწარმეტყველ ესაიას ქოთხუ მოხვარა (ეს. 37:1—6). ირო, მუჟამსით მეფეეფ მეჸუნდეს იეჰოვაშ ხემძღვანელობას, კურთხევას ღებულენდეს ღორონთშე დო ხალხ ხოლო თხილერ რდჷ (2 მატ. 20:29, 30; 32:22). ირ კოჩშო არგამა ოკო რდჷ, ნამდა იეჰოვა ირინუანდჷ წინასწარმეტყველეფს მუშ ხალხიშ ოხემძღვანელებერო. w24.02 21 ¶8

სატანას ოკო, თიცალ ხალხის ქუაკათათ, ნამდგაწკუმა ურთიერთობაშ შედეგო, უმოს ძნელ მაჸინა იეჰოვაშ ნორმეფიშ მეჸუნა. მარა ჩქი ეფესოელეფშე უმოს კურცხას ოკო ვორდათ, მუშენდა ამდღა შხვეფწკუმა ურთიერთობა ხვალე პირადო ვარინ, სოციალურ ქსელეფით ხოლო რე შეიოლებერ. ირნერო ოკო ვეცადათ, ვებრძოლათ სატანაშ ქვეყნიერებას გავრცელებურ აზროვნებას, ნამდა უზნეო ცხოვრებას მუთუნ ვა რე გლახა. ჩქი ხომ ქომიჩქნა, ნამდა თენა სიმართლეშ სარხოს ვა რე (ეფეს. 4:19, 20). მარა იშენით ჯგირ იჸი, ქობკითხათ ჩქინ დუდის: ქუვოცადუქო, დუდ ეუჩილითუე ნაბეტან ურთიერთობას თანამშრომელეფწკუმა, კლასელეფწკუმა ვარდა თიცალეფწკუმა, მიდგაშო მნიშვნელოვან ვა რე იეჰოვაშ ნორმეფ? ქიგმიფრჩქინანქო გაბედულებას დო ქიმეპჸუნქო იეჰოვაშ ნორმეფს, თიშ უმკუჯინუო, ნამდა შილებე თენა მინშა ვა მომწონუან? მუჭოთ 2 ტიმოთეშ 2:20—22-ს ჭარჷ, მეგობრეფ თანაქრისტიანეფ შქას ხოლო ყურადღებათ ოკო გიშებგორათ, მუშენდა კრებას ხოლო შილებე ნამთინეწკუმა ხოლოშიან ურთიერთობაქ მეცილან იეჰოვაშ ართგურო მსახურებას. w24.03 22, 23 ¶11, 12

დღას დაფიქრებეთო, მუნერ რე იეჰოვა? მართალ რე, იეჰოვა თოლშო უძირაფ რე, მარა ბიბლია თის ბრელნერო ეჭარუნს. მაგალთო, იეჰოვა მოშინაფილ რე, მუჭოთ „ჩხანა დო ფარ“ დო „გუმანადგურებელ დაჩხირ“ (ფსალმ. 84:11; ებრ. 12:29). ეზეკიელ იჩიებ, ნამდა ხილუას ძირჷ იეჰოვა, ნამუთ მოგენდჷ ვარკალა მეტალს, გეხედ საფირონიშ ტახტის დო ირდიხას რწკინუნდუნ ფერ ცისარტყელა გოურდჷ (ეზეკ. 1:26—28). რახანს იეჰოვაშ ძირაფა ვეშემლებუნა, შილებე გამჭირდან თიშ დაჯერებაქ, ნამდა თის ვუჸორთ. ნამთინეშ აზრით, ულირს დაშებულიშ გურშენ იეჰოვა დღას ვეჸოროფუანს. იეჰოვას ჯგირო არჩქილე, მუს ბგინაფლენთ თე დროს დო მუჭო მოქმედენს თეცალ გრძნობეფ ჩქინდა. ათეშენ მუშ სიტყვაშ საშვალებათ მოგებაფუანა, მუნერ ღორონთ რე თინა. ჸოროფა რე თი თვისება, ნამუთ არძაშ უჯგუშო ეჭარუნს იეჰოვას (1 იოან. 4:8). თინა ჸოროფა რე დო ირფელს ჸოროფათ ორთჷ. ღორონთიშ ჸოროფა თიცალ ძალიერ დო ულიებ რე, ნამდა თის თი ადამიანეფიშ მიმართ ხოლო გიმირჩქინანს, მიდგას თინა ვა უჸორა (მათ. 5:44, 45). w24.01 26 ¶1—3

იეჰოვაქ მოსე გიორინუ ისრაელეფიშ წინამძღოლო. იეჰოვა დღაშით მუნაფაშ სვეტით დო სერით დაჩხირიშ სვეტით ეწოჸუნდჷ თინეფს (გამ. 13:21). მოსე ეკოჸუნდჷ თე სვეტის, მუდგაქ თინეფ ჭითა ზღვაშა ქიმიჸუნ. ისრაელეფქ მანგარო დოშქურდეს, მუშენდა სოთინ ვა უღუდეს ონტებელ — წოხოლე ჭითა ზღვა ეწუძუდეს დო უკახალე ეგვიპტელეფიშ ჯარ მოთხოზუდეს. მარა სინამდვილეს, თენა ვა რდჷ შეცდომა, მუშენდა ისრაელეფ თექ მოსექ ვარინ, იეჰოვაქ მიჸუნ (გამ. 14:2). ღორონთიქ სასწაულით დერსხჷ ისრაელეფ (გამ. 14:26—28). თე შემთხვევაშ უკულ ხოლო მოსე 40 წანას ეკოჸუნდჷ თე სვეტის, მუდგათ იეჰოვა ხემძღვანელენდჷ მუშ ხალხის უდაბნოს. (გამ. 33:7, 9, 10). თე სვეტშე იეჰოვა მოსეს მითითებეფს არზენდჷ, მუდგას უკულ მოსე ხალხის გინოჩანდჷ. თეშნერო ისრაელეფ არგამათ ორწყედეს, ნამდა იეჰოვა მოსეს ირინუანდჷ მუშ ხალხშა ოხემძღვანელებერო. w24.02 21 ¶4, 5