ქორეთო მზათ წანაშ არძაშ უმოს მნიშვნელოვან დღაშო?

1. მუშენ რე გოშინაშ ონჯუა წანაშ არძაშ უმოს მნიშვნელოვან დღა? (ლუკ. 22:​19, 20).

ᲘᲔᲰᲝᲕᲐᲨ ხალხშო იესო ქრისტეშ ღურაშ გოშინაშ ონჯუა რე არძაშ უმოს მნიშვნელოვან დღა წანაშ დინახალე. იესოქ ხვალე თე დღაშ გურშენ უწუ მუშ მიმაჸუნალეფს, ნამდა აღნიშნესკო (წეკითხით ლუკაშ 22:​19, 20). მორთჷ ასე გუვარჩუათ, ნამ მიზეზეფიშ გურშენ მიმოლუნა შურ გოშინაშ ონჯუაშ აღნიშნებაშა.

2. ნამ მიზეზეფიშ გურშენ მივახიოლანთ გოშინაშ ონჯუას?

² გოშინაშ ონჯუა მოხვარუნა, დეფიფქრათ, მუშმადიდა ფას უღჷ გიშაჸიდირალს დო მუ კურთხევეფიშ მეღება რე შეიოლებერ თიშ ჭყოლოფათ. თინა გუმოშინანა, ნამ საშვალებეფით შემლებუნა გიმიფრჩქინათ მარდულობა იესოშ მსხვერპლშენ (2 კორ. 5:​14, 15). თეს გეძინელ, მთელ საჯიმალოს მარზენა შესაძლებლობას, გურშა ელუკინათ ართიანს (რომ. 1:12). ირ წანას ბრელ არააქტიურ ოსწრჷ თე ღონისძიებას დო და დო ჯიმალეფიშ გემუან შეხვამილაფაშ ჭყოლოფათ ნამთინე კინ ართუ იეჰოვას. ხვალე თენა ვარინ, შეხვალამაშა მოულირ დაინტერესებულეფს თექ ძირაფილ დო მორჩქილაფირ სურვილს ურჩქინანს, ქიგიოდირთან სიცოცხლეშ შარას. მუშო ოკო რაგად, იეჰოვაშ თითოულ მსახურშო გოშინაშ ონჯუა განსაკუთრებულო მნიშვნელოვან დღა რე.

3. მუჭო აერთიანენს გოშინაშ ონჯუა მთელ ჩქინ საჯიმალოს? (ქოძირით სურათ).

³ ხოლო ართ მიზეზ, მუდგაშ გურშენ გოშინაშ ონჯუას მივახიოლანთინ თინა რე, ნამდა თე დღა მთელ საჯიმალოს მაერთიანენა. იეჰოვაშ მოწმეეფ მსოფლიოშ შხვადოშხვა ადგილს ჩხანაშ ინულაშ დროს ართათ ეკიბშაყარუთ. გოშინაშ ონჯუას იფრჩქილუაფუთ მოხსენებას, ნამუთ ხაზის უსვანს, მუსხით მნიშვნელოვან რე გიშაჸიდირალ. ჩქი ჟირშა იბიბრთ იეჰოვაშ ოდიდებელ ობირეშის, ართიანს გინვოჭირინუანთ სიმბოლოეფს დო მთელ გურით იფჩიებუთ „ამინს“ თი ოთხ ლოცვაშ ბოლოს, ნამუთ პროგრამაშ ნაწილ რე. თე ირფელს 24 საათიშ დინახალე მთელ მსოფლიოს არძა კრებას ორთუნა. წერმიდგინით, მუშმადიდა ხიოლ მოუღ იეჰოვა დო იესოშა თიშ ძირაფას, ნამდა გოშინაშ ონჯუას ართათ აკოშაყარელო გიმიფრჩქინათ მარდულობას თინეფიშ მიმართ.

4. მუს გუვარჩიენთ თე სტატიას?

⁴ თე სტატიას პასუხის ქიმეფჩანთ სუმ კითხვას: 1) მუჭო შემლებუნა მუვამზადათ გურ გოშინაშ ონჯუაშო? 2) მუჭო მივეხვარათ შხვეფს, სარგებელ მიღან თიშე დო 3) მუჭო მივეხვარათ არააქტიურ და დო ჯიმალეფს, ნამდა დესწრან თე შეხვალამას? თე კითხვეფშე პასუხიშ მეღება მიმეხვარებუნა, მივემზადათ თე მნიშვნელოვან შეხვალამაშო.

ᲛᲣᲭᲝ ᲛᲣᲕᲐᲛᲖᲐᲓᲐᲗ ᲒᲣᲠ ᲒᲝᲨᲘᲜᲐᲨ ᲝᲜᲯᲣᲐᲨᲝ?

5. ა) მუშენ ოკო დეფიფქრათ, მუშმადიდა ფას უღჷ გიშაჸიდირალს? (ფსალმ. 49:​7, 8). ბ) მუ დიგურეთ ვიდეოშე „მუშენ ღურ იესო ქრისტექ?“

⁵ გურიშ მამზადებელო ართ-ართ მნიშვნელოვან საშვალება თიშე დაფიქრება რე, მუსხით ძვირფას რე იესოშ კეთებულ გიშაჸიდირალ ჩქინო. დეფიფქრათინ, ჩქინით დღას ვეშმალებედეს დუდ დეფრსხითკო ღურა დო ცოდაშ მონობაშე (წეკითხით ფსალმუნიშ 49:​7, 8; ქოძირით ვიდეო „მუშენ ღურ იესო ქრისტექ?“)a. ათეშენ იეჰოვაქ ჩქინ დარსხებელო მუშ საჸოროფო სქუაშ სიცოცხლე დათმჷ დო თეშნერო, ქოთ თიქ დო ქოთ იესოქ, ქიანაშმადიდა მსხვერპლშა იდეს (რომ. 6:23). მუთ უმოსო იფიფქრენთ თი ირფელშე, მუთ იეჰოვა დო იესოქ ჩქინო აკეთეს, თით უმოსო დუვაფასენთ გიშაჸიდირალს. უკულიან აბზაცეფს გუვარჩიენთ, კონკრეტულო მუქ აჸუეს ოკეთებელქ იეჰოვა დო იესოს ჩქინ დარსხებელო, მარა პირველ რიგის ქიგებგათ, მუ მიშურდჷ გიშაჸიდირალშა.

6. მუ მიშურდჷ გიშაჸიდირალშა?

⁶ გიშაჸიდირალ რე საფასურ მუდგარენიშ დართინაფალო. მუჭოთ მიჩქუნა, იეჰოვაშ გოჭყაფილ პირველ კოჩ ადამ სრულყოფილ რდჷ, მარა, მუჟამსით ღორონთიშ წოხოლე დაშუ დო შეცოდ მარადიულ სიცოცხლეშ შესაძლებლობა მეუდინუ მუჭოთ მუშ დუდის, თეშ მუშ გამნარყის ხოლო. იესო ქრისტექ დიდ მსხვერპლშა იდჷ დო მუშ სიცოცხლე დათმჷ, ნამდა დომრთინუესკო თი ირფელ, მუთ ადამქ მიოდინუ. ადამიშ გინაწონს, დედამიწას ცხოვრებაშ დროს იესო „ვართ ჩილათე დო ვართ ტყურას ეკურთუმ თიშ პიჯშე“ (1 პეტ. 2:22). იესო სრულყოფილ რდჷ, მუჟამსით ღურჷ, თეშ, მუჭოთ ადამ რდჷ სრულყოფილ, მუჟამსით შეცოდ. თაშ ნამდა, ქრისტექ მუშ ღურათ ჩქინ დარსხებელო შესაფერის საფასურ გინიგ (1 კორ. 15:45; 1 ტიმ. 2:6).

7. მუ გამოცდეფს შეხვად იესოქ დედამიწას ცხოვრებაშ დროს?

⁷ სიცოცხლეშ ბოლო წუთშახ იესო მუშ ზეციერ მუმას ომორჩილუდ, თიშ უმკუჯინუო, ნამდა დედამიწას ცხოვრებაშ დროს თიშ მორჩილებაქ ბრელშა გიმიცად. მაგალთო, მუჭოთ მიჩქუნა, სრულყოფილ იესოს არასრულყოფილ მშობლეფ ჸუნდჷ, მარა იშენით ბაღანობაშე ირიათო ოკო დემორჩილკო თინეფს (ლუკ. 2:51). ხვალე თენა ვარინ, მოზარდობაშ ასაკის იესოს გარზებელ აფუდ შხვეფიშ ზეწოლაშა, ნამდა ვა დემორჩილუკო მშობლეფს დო მიოდინუკო იეჰოვაშ ართგურობა. თეს გეძინელ, დიდობას იესოს გარზებელქ აჸუ სატანა ეშმაკიშ გამოცდეფშა, მიდგაქ ირნერო ეცად, მიოჩილითუკო ქრისტე დო უწუ, ნამდა ღორონთიშ მანგიორო მუს ემსახურუკო (მათ. 4:​1—11). სატანას მიზანო უღუდ, იესოს ქუდაშებაფუკო დო ცოდამო გინართინუკო, ნამდა ვეშიალებუკო ჩქინ გიშაჸიდირქ.

8. ხოლო მუ გამოცდეფს შეხვად იესოქ?

⁸ დედამიწას მსახურებაშ დროს იესოქ შხვა ბრელ გამოცდას ხოლო შეხვად. მაგალთო, თის ნტერეფ თხოზუდეს დო თიშ ჸვილუას ოცადუდეს (ლუკ. 4:​28, 29; 13:31). თეს გეძინელ, იესოს გარზებელ აფუდ მუშ არასრულყოფილ მიმაჸუნალეფიშ შეცდომეფშა (მარ. 9:​33, 34). ხვალე თენა ვარინ, ონდო დოჸვილუნდეს, აწამეს დო გიაძიცენდეს. ბოლოს თინა ნტერეფქ თიცალ ღურათ დასაჯეს, მუდგათ მანგარო დამცირეს დო ნინათ ვეიჭარენ ფერ ჭუა ქიმიორინუეს (ებრ. 12:​1—3). მუჟამსით თინა წამებაშ ძელს ქიმკაჭკადეს, თე ქიანაშმადიდა ჭუაშა იეჰოვაშ უმშო, ხვალე აჸუ გარზებელქb (მათ. 27:46).

9. მუს ბგინაფლენთ, მუჟამსით იესოშ მსხვერპლშე ფიფქრენთ? (1 პეტ. 1:8).

⁹ არგამა რე, ჩქინ გიშაჸიდირალო, იესოს ქიანაშ ჭუა დო ოტანჯებელშა აჸუ გარზებელქ. გურ იესოშ ჸოროფათ ემაფშაფუნა, მუჟამსით ფიფქრენთ, ნამდა წუთით ვა დაფიქრებენ თეშ გაწირ მუშ სიცოცხლე ჩქინ საჯგირობუოთ (წეკითხით 1 პეტრეშ 1:8).

10. მუქ აჸუ ოკეთებელქ იეჰოვას ჩქინ გიშაჸიდირალო?

¹⁰ მუშ რაგად შილებე იეჰოვაშე? მუ აკეთ თიქ მუშ სურვილით, ნამდა იესოს შეიალებუკო ჩქინ გიშაჸიდირქ? ჯგირო მიჩქუნა, ნამდა მუჭოთ მუმა დო სქუას, იეჰოვა დო იესოს, ართიან შქას ხოლოშიან ურთიერთობა უღუნა (იგავ. 8:30). ართ წუთით დეფიქრით, მუს გინაფლენდუკონ იჸიდ იეჰოვა, მუჟამსით ორწყედ, მუსხი განსაცდელს ურზუდ მუშ სქუა დედამიწას. მუშო ოკო რაგად, იეჰოვას ქიანაშმადიდა ჭუას ქიმიორინუანდჷ თიშ ძირაფა, მუ უდუნდებელო მექცის მუშ სქუას დო მუჭო აწამეს თინა.

11. მუს გინაფლენდკონ იჸიდ იეჰოვა, მუჟამსით მუშ სქუაშ ტანჯებას უჯინედ? ქიმიჸუნით მაგალით.

¹¹ არძა სქუაღურელ მშობელს უჩქჷ, მუშმანწარა რე საჸოროფო ადამიანიშ ღურა დო მუშმადიდა ჭუას იტენს თენა გურს. მართალ რე, ჩქი გათელებაშ ძალიერ იმენდ მიღუნა, მარა საჸოროფო ადამიანიშ ღურა იშენით ქიანაშმადიდა ჭუას მიმორინუანა. თე ირფელშე დაფიქრება მოხვარუნა, ქინვანჭათ, მუს გინაფლენდჷ იეჰოვა ახ. წ. 33 წანაშ 14 ნისანს, მუჟამსით მუშ სქუაშ ტანჯებას დო ღურას უჯინედc (მათ. 3:17).

12. მუშ კეთება შემლებუნა გოშინაშ ონჯუაშახ?

¹² ჯგირ იჸუაფ, გოშინაშ ონჯუაშახ პირად გურაფაშ ვარდა ოჯახურ თაყვანიშცემაშ დროს, უმოს ქიგეგათ გიშაჸიდირალიშ გურშენ. თეშო შეილებუნა გეგმირინუათ „იეჰოვაშ მოწმეეფიშ ორკვიებელ სახემძღვანელო“ ვარდა შხვა პუბლიკაციეფ.d თეს გეძინელ, ქიმიაჸუნით „ჩქინ ქრისტიანულ ცხოვრება დო მსახურებაშ ომეცადინებელ ფურცელს“ მოჩამილ ბიბლიაშ კითხირიშ გეგმას გოშინაშ ონჯუაშო. ვაგგოჭყორდან, გოშინაშ ონჯუაშ დროს ქუჯინათ სპეციალურო თე დღაშო მომზადებულ ოჭმარეშ თაყვანიშცემაშ პროგრამას. მუჟამსით თეშნერო თე მნიშვნელოვან დღაშო გურს მუვამზადენთ, შემალებენა შხვეფს ხოლო მივეხვარათ, სარგებელ მიღან თე მნიშვნელოვან ღონისძიებაშე (ეზრ. 7:10).

ᲥᲘᲛᲔᲮᲕᲐᲠᲘᲗ ᲨᲮᲕᲔᲤᲡ, ᲡᲐᲠᲒᲔᲑᲔᲚ ᲛᲘᲦᲐᲜ ᲗᲔ ᲦᲝᲜᲘᲡᲫᲘᲔᲑᲐᲨᲔ

13. მუ ოკო ვაკეთათ პირველ რიგის, ნამდა მივეხვარათ შხვეფს, სარგებელ მიღან გოშინაშ ონჯუაშე?

¹³ მუჭო შემლებუნა მივეხვარათ შხვეფს, სარგებელ მიღან გოშინაშ ონჯუაშე? მუშო ოკო რაგად, პირველ რიგის, საჭირო რე, ქუდვაპატიჟათ თინეფ. ჩქი გოშინაშ ონჯუაშა ვაპატიჟენთ თინეფს, მიდგას მსახურებაშ დროს შეფხვადუთ, მარა თეწკუმა ართო, შემლებუნა გეგმობჭარათ თი ადამიანეფიშ სია, მიდგაშ დაპატიჟება მოკონა. თენეფ შილებე რდან ჩქინ ნათესეეფ, თანამშრომელეფ, კლასელეფ ვარდა ნაჩინებუეფ. მაწვიებელეფიშ დასაბაღ რაოდენობა ვა მიღუნან-და, შემლებუნა ელექტრონულ ვერსიაშ ლინკ გეგნუჯღონათ. შილებე თე ღონისძიებაშა გამიკვირდანინ თისხიქ ქუმორთას (ეკლ. 11:6).

14. ქიმიჸუნით მაგალით, მუჭო მოქმედენს პიროვნებაშა, მუჟამსით გოშინაშ ონჯუაშა პირადო ვაპატიჟენთ.

¹⁴ დღას ვეფიქრათ, ნამდა ნაჩინებუშ პირადო დაპატიჟება დო თიშა მაწვიებელიშ მეჩამა ვა რე აუცილებერ. თექ ჯგირო ქიძირ ართ შემთხვევაშე. ართ დას მუშ ქომონჯიქ, ნამუთ ვა რე იეჰოვაშ მოწმე, უწუ, ნამდა გოშინაშ ონჯუაშა ულამუდ ულა, მუდგაქ თის მანგარო გუკვირდჷ. მუშენ რდჷ თენა გასაკვირ? მუშენდა, ულირს თიქ ბრელშა დაპატიჟ მუშ ქომონჯ გოშინაშ ონჯუაშა, მარა თის დღას ვა ულინ. მუქ ითირ ასე? მუჭოთ თე დაშ ქომონჯ იჩიებ, თის ართ ნაჩინებ უხუცესიქ პირადო გეგნოჩ მაწვიებელ დო ქუდაპატიჟ გოშინაშ ონჯუაშა. თე კოჩის ვართ თი დო ვართ უკულიან წანეფს, ვა გუჩილითუაფ თე მნიშვნელოვან შეხვალამა.

15. მუ ოკო ფშუდან, მუჟამსით პიროვნებას გოშინაშ ონჯუაშა ვაპატიჟენთ?

¹⁵ ვაგგოჭყორდან, თინეფს, მიდგას გოშინაშ ონჯუაშა ვაპატიჟენთ, შილებე კითხვეფქ გურჩქინდან, განსაკუთრებულო თიმწკუმა, მუჟამსით პირველო ოსწრუნა თე შეხვალამას. ათეშენ ჯგირ იჸუაფ, წინასწარ დეფიფქრათ, მუ შილებე ბკითხან დო მივემზადათ პასუხიშ მიოჩამალო (კოლ. 4:6). მაგალთო, ნამთინექ შილებე ბკითხან: „მუ ხვადუ თე შეხვალამას?“, „მუსხი ხანს გეგრძელებ თინა?“, „მუჭო ოკო მიკიბქუნე?“, „დასწრებელო ფარა მაჸინო გინაგაფალ?“, „მითინ ეშაყარანსო ფარას?“. მუჟამსით პიროვნებას ვაპატიჟენთ შემლებუნა იშო ბკითხათ, მუთუნ კითხვეფ ხომ ვა უღჷ დო უკულ ქუპასუხათ თიშ კითხვეფს. თიშ გაგებელო, მუჭო იტარებ ჩქინ შეხვალამეფ, შემლებუნა ვოძირუათ ვიდეოეფ: „იესო ქრისტეშ ღურაშ გოშინაშ ონჯუა“ დო „მუს ომსახურ იეჰოვაშ მოწმეეფიშ დარბაზ?“. თეს გეძინელ, შემლებუნა ვეჩუათ წიგნიშ „მარადიულო გეხარით ცხოვრებათ!“ 28-ო დუდის გარჩიებულ მხარეეფშე ხოლო.

16. ხოლო მუ კითხვეფქ შილებე გურჩქინდას ნამთინეს, მით გოშინაშ ონჯუას დესწრებ?

¹⁶ გოშინაშ ონჯუაშა დასწრებაშ უკულ დაინტერესებულეფს შილებე შხვა კითხვეფქ ხოლო გურჩქინდან. მაგალთო, ხვალე მუსხირენქ მუშენ გინოშვჷ ღვინ დო ჭკუმ ქობალ? მუსხიშა აბღნიშნენთ თე შეხვალამას? ვარდა შილებე თინა ხოლო ოინტერესუდან, იეჰოვაშ მოწმეეფიშ შხვა შეხვალამეფ ხოლო თეშნერო იტარებ დო ვარ. თიშ უმკუჯინუო, ნამდა თე კითხვეფიშ უმენტაშ გოშინაშ ონჯუაშ მოხსენებას გარჩიებულ რე, თინეფს შილებე იშენით უმოს დეტალ ოინტერესუდან. პასუხიშ მიოჩამალო, შემლებუნა გეგმიბრინუათ ჩქინ ვებგვერდის მოჩამილ სტატია: „მუშენ ვაღნიშნენა ქრისტეშ ღურაშ გოშინაშ ონჯუას იეჰოვაშ მოწმეეფ თეშ, მუჭოთ შხვა რელიგიეფ?“. მოკონა, მუთ შემლებუნან ირფელ გუვაკეთათ, ნამდა გოშინაშ ონჯუაშახ, გოშინაშ ონჯუაშ დროს დო უკულ, ქიმვეხვარათ „სწორას განწყობილ“ ადამიანეფს, სარგებელ მიღან თე ღონისძიებაშე (საქ. 13:48).

ᲥᲘᲛᲔᲮᲕᲐᲠᲘᲗ ᲐᲠᲐᲐᲥᲢᲘᲣᲠᲔᲤᲡ

17. მუჭო შეულებუნა უხუცესეფს, მეხვარან არააქტიურეფს? (ეზეკ. 34:​12, 16).

¹⁷ მუშ კეთება შეულებუნა უხუცესეფს გოშინაშ ონჯუაშ პერიოდის არააქტიურეფშა მახვარებელო? გეგმირჩქინით ყურადღება დო ჸოროფა თინეფიშ მიმართ (წეკითხით ეზეკიელიშ 34:​12, 16). გოშინაშ ონჯუაშახ ეცადით, მითინქ ვეგშქოსქიდან. დარწმუნით თინეფ, ნამდა მანგარო გიჸორა დო გოკონა, მუთ შეგალებენა ქიმეხვარათ. უკულ ქუდაპატიჟით გოშინაშ ონჯუაშა, ქუმორთეს-და, ჸოროფათ ქეშეხვადით. გოშინაშ ონჯუაშ უკულ ხოლო ვეგიჭყოლიდუათ თე ძვირფას და დო ჯიმალეფ, დურეკით ვარდა ქიმიაკითხეთ დო თქვან მხარეშე ირფელ გაკეთით, მუთ ოსაჭირუნა, ნამდა დართან იეჰოვას (1 პეტ. 2:25).

18. მუჭო შემლებუნა თითოულს, მივეხვარათ არააქტიურეფს? (რომ. 12:10).

¹⁸ ჸოროფაშ დო პატიცემაშ გიმორჩქინათ კრებას არძას შეულებ მეხვარას თი არააქტიურეფს, მით გოშინაშ ონჯუას ოსწრუნა (წეკითხით რომაელეფიშ 12:10). რშუდან, თე ძვირფას და დო ჯიმალეფს ეფ ვაჸიდეს შეხვალამაშა მოულა. თინეფ შილებე მიაშიშანდან, მუჭო მიღენა თანაქრისტიანეფ დო მუს უწინა.e ათეშენ დუდ ეუჩილითეთ თიცალ მუდგარენეფიშ კითხირს ვარდა რაგადის, მუთ თინეფს უხერხულს ქენაჸათანდ დო გურს ქელაჭუანდ (1 თეს. 5:11). ვაგგოჭყორდან, თე და დო ჯიმალეფ ჩქინ თანაქრისტიანეფ რენა. მანგარო მახიოლენა, მუჟამსით თინეფ კინ გაგრძელენა ჩქინწკუმა ართო იეჰოვაშ თაყვანიშცემას (ფსალმ. 119:176; საქ. 20:35).

19. მუ სარგებელ მოუღ ქრისტეშ ღურაშ გოშინაშ ონჯუაშ აღნიშნებას?

¹⁹ გასაკვირ ვა რე, ნამდა იესოქ დომჩინეს, ირ წანას აბღნიშნითკო თიშ ღურაშ გოშინაშ დღა, მუშენდა თე დღაშ აღნიშნებას ქოთ ჩქინდა დო ქოთ შხვეფშა ჯგირობუა მოუღ (ეს. 48:​17, 18). მაგალთო, უმოსო მემანგარებუნა ჸოროფა იეჰოვა დო იესოშ მიმართ, ვოძირანთ, მუ მარდულეფ ვორეთ თი ირფელშო, მუთ თინეფქ ჩქინო აკეთეს, უმოს ხოლოშიან ურთიერთობას ვავითარენთ და დო ჯიმალეფწკუმა დო მერზიებუნა საშვალება, შხვეფს ხოლო ქუგვოგებაფუათ, მუჭო შეულებუნა გეხარან თი კურთხევეფით, ნამდგაშ მეღება გიშაჸიდირალიშ საშვალებათ რე შეიოლებერ. ათეშენ, მორთჷ, მუთ შემლებუნა ირფელ გუვაკეთათ, ნამდა მზათ ვორდათ წანაშ არძაშ უმოს მნიშვნელოვან დღაშო — გოშინაშ ონჯუაშო!