წინასწარმეტყველ დანიელ გვალო ახალგაზრდა რდჷ, მუჟამსით ბაბილონელეფქ მუშ მშობლიურ დიხაშე, იერუსალიმშე შორს, ტყვეთ მიდეჸონეს. მარა თიქ მანგარო მეწონეს თი კათას, მიდგაქ თინა ტყვეთ იჸონ, მუშენდა თე ახალგაზრდა ბოშის მუთუნ კილ ვა უღუდ, მეჯინელო ჯგირ რდჷ დო თეს გეძინელ, დიდგვაროვან ოჯახშე მიშჷ (1 სამ. 16:7). ზუსტას ათეშენ, ბაბილონელეფქ გეგნოჭყვიდეს, დანიელ მეფეშ სასახლეს მსახურებაშო მამზადესკო (დან. 1:3, 4, 6). იეჰოვას თე ახალგაზრდა ბოშ მუშ ჯგირ თვისებეფიშ გურშენ უჸორდჷ. შილებე დანიელ 20 წანერ ვარდა ხოლო უმოს ნაკლებ ჸოფედკო, მუჟამსით იეჰოვაქ თინა მუშ ართგურ მსახურეფიშ, ნოე დო იობ შქას მიშინუ, მით სიცოცხლეშ ბოლოშა ომსახურდეს იეჰოვას (დაბ. 5:32; 6:9, 10; იობ. 42:16, 17; ეზეკ. 14:14). იეჰოვას მანგარო უჸორდჷ დანიელ, მუდგას თე ართგურ კოჩ მთელ ცხოვრება გინაფლენდჷ (დან. 10:11, 19). w23.08 2 ¶1, 2

მუჟამსით ჸუდეშ ჸიდირს გინოჭყვიდუნთ ჸიდირშახ ქიმურთ დო თქვან თოლით ქოძირუნთო თის. მუჭო შემლებნა თე მაგალით ბიბლიაშ კითხირს დო გიმორკვიებას დუკავშირათ? ბიბლიას გინორულაფირო წებკითხენთ-და, ხვალე თიშ „საფუძველეფს“, თაშ ქოფთქუათინ, ძირითად საკითხეფს გებგენთ (ებრ. 5:12). მარა თიშ ინონჭაფა ქუმოკონან-და, კითხირიშ დროს საჭირო რე, დევეკვირათ დეტალეფს, მუჭოთ თეს ჸუდეშ ჸიდირიშ დროს გუვაკეთენდით. გიმორკვიებაშ დროს ოკო ვეცადათ, ქობძირათ, მუჭო რე დაკავშირებულ ბიბლიაშ შხვადოშხვა მონაკვეთეფ ართიანწკუმა. თეს გეძინელ, ჯგირ იჸუაფ, დეფიფქრათ მუ ბწანა დო მუშენ. ღორონთიშ სიტყვაშ სიტომბეეფს სრულას ქინვანჭათინ თიშო საჭირო რე, გეგმიბრკვიათ ტომბა ბიბლიურ საკითხეფ. მოციქულ პავლექ თანაქრისტიანეფს ელუჩ, გურგედვალირო გეგმირკვისკო ღორონთიშ სიტყვა, ნამდა შეიალებუესკო ბოლოშა ქინანჭესკო ჭეშმარიტებაშ „სიგანეს, სიგინძას, სიმაღალეს დო სიტომბეს“. შედეგო, თინეფიშ რწმენას ჩხვიჩხვეფ უმოს მტკიცას აჸიდ გოდგუმილ დო ძალიერ საძირკველშა იჸუაფუდ გერსხილ (ეფეს. 3:14—19). ჩქი ხოლო თე ქრისტიანეფცალო ოკო მიფქცუათ. w23.10 18 ¶1—3

ბიბლიას ხოლო ბრელ ადამიანიშ გურშენ ბკითხულენთ, მით გიმირჩქინანდეს მოთვინებას. ჯგირ იჸუაფ, დრო გეგმურთათ პირად გურაფაშ დროს თინეფიშ შემთხვევეფიშ გიმორკვიებას. მაგალთო, შეილებნა გეგმირკვიათ დავითიშ გურშენ. თინა მანგარ ახალგაზრდა რდჷ, მუჟამსით ისრაელიშ მომავალ მეფეთ იჸუ ცხებულქ, მარა წანეფქ აჸუ ოჯინექ, ონდო საბოლათ მიღენდუკო მეფობას. ღორონთიშ ართგურ მსახურეფს, სიმონ დო ანას ხოლო ბრელ ხანს აჸუეს ოჯინექ, ონდო ძირუნდეს დუნაპირებ მესიას (ლუკ. 2:25, 36—38). ბიბლიას მოჩამილ თეცალ შემთხვევეფიშ გიმორკვიებაშ დროს, ქოკითხით თქვან დუდის: „მუქ შილებე მეხვარკო თე პიროვნებას, მოთვინებაშ გიმორჩქინას? მუ ჯგირ შედეგეფ მოუღ თის მოთვინებაშ გიმორჩქინაქ? მა მუჭო შემლებ მივაჸუნე თიშ მაგალითის?“. ხვალე თენა ვარინ, თინეფიშ მაგალითშე ხოლო შეილებნა ბრელ მუდგარენიშ გურაფა, მით ვეგმირჩქინანდეს მოთვინებას (1 სამ. 13:8—14). თეცალ გიმორკვიებაშ დროს ხოლო ქოკითხით თქვან დუდის: „მუშენ ვეშიალებუეს თინეფს მოთვინებაშ გიმორჩქინაქ? მუ გლახა შედეგ მიღეს, მუჟამსით ვეგმირჩქინეს მოთვინება?“ w23.08 25 ¶15