იეჰოვა მუს გურგედვალირო გორუნს, თის აჯილდოვენს

1, 2. ა) მუჭო რე დაკავშირებულ ართიანწკუმა ჸოროფა დო რწმენა? ბ) მუ კითხვეფს გენიფხილენთ?

ჩქი მიჸორა იეჰოვა, მუშენდა „პირველო თიქ მიჸოროფუეს“ (1 იოან. 4:19). ღორონთიშ ჸოროფაშ ართ-ართ გიმოხანტუა თინა რე, ნამდა თინა აკურთხენს მუშ ართგურ მსახურეფს. ღორონთი მუთ უმოსო მეჸოროფებუნან, თით უმოსო იმანგარებ ჩქინ რწმენა ხვალე ღორონთიშ არსებობაშა ვარინ, თიშა ხოლო, ნამდა თინა დაჯილდოვენს მუშ მოჸოროფე კათას (წეკითხით ებრაელეფიშ 11:6).

² დაჯილდოება ღორონთიშ პიროვნებაშო დამახასიათებელ თვისება რე დო თინა თის გიმირჩქინანს. ჩქინ რწმენა გოფშა ვეჸუაფ, მუჟამსით ბოლოშა ვეპჸით დარწმუნებულ თიშა, ნამდა ღორონთი აჯილდოვენს თინეფს, მიდგა გურგედვალირო გორუნს თის, მუშენდა „რწმენა თიშ საფუძვლიან მოლოდინ რე, მუდგაშ იმენდ მიღუნა“ (ებრ. 11:1). ნამდვილო, რწმენა თინა რე, ნამდა ველუთ ღორონთიშ დუნაპირებ კურთხევეფიშ შესრულებას. მარა ჩქინო მუ ჯგირობუა მოუღ ჯილდოშ იმენდის? მუჭო აჯილდოენდ იეჰოვა მუშ მსახურეფს ჯვეშო დო მუჭო აჯილდოვენს ამდღა? მორთ გენიფხილათ თე კითხვეფიშ პასუხეფ.

იეჰოვა პირობას ირზენს, ნამდა აკურთხენს მუშ მსახურეფს

3. მუს მოპირუნა ღორონთი მალაქიაშ 3:10-ს?

³ იეჰოვა ღორონთიქ ვალდებულო გინიშქუ მუშ დუდი, ნამდა დოუჯილდოებუდუკო ართგურ მსახურეფ, ათეშგურშენ მომწოდენა არძას, ირნერო ვეცადათ, მიბღათ თე კურთხევა. ბიბლიას ჭარ: „გაგმობცადით თეს, იჩიებ იეჰოვა ღორონთი დო გომწყუნქ ცაშ კარეფს დო ვამგარკენთ აუარებელ კურთხევეფს“ (მალ. 3:10). ჩქი იეჰოვაშ მარდულეფ ვორეთინ თის, თით ვოძირანთ, ნამდა, ირნერო ვოცადუთ, მიბღათ იეჰოვაშ კურთხევა.

4. მუშენ შემლებუნა ვენდათ მათეშ 6:33-ს ინოჭარილ იესოშ სიტყვეფს?

⁴ იესოქ დარწმუნ მუშ მოწაფეეფ, ნამდა ღორონთი ქელუდირთუდ თინეფს, პირველ ადგილს სამეფოშ საქმეეფს ქიგიორინუანდეს-და (წეკითხით მათეშ 6:33). იესო დარწმუნებულ რდუ მუშ სიტყვაშა, მუშენდა თის უჩქუდ, ნამდა ღორონთი მუშ დუნაპირებუს ირიათო ასრულენდ (ეს. 55:11). თაშ ნამდა, შემლებუნა დარწმუნებულ ვორდათ, იეჰოვაშა მთელ გურით რწმენას გეგმიფრჩქინანთ-და, თინა ვარიას ვათქუანს მუშ დუნაპირებუშ გურშენ: „დღას ვადოიტენქ დო დღას ვემგოტენქ“ (ებრ. 13:5). იეჰოვაშ თე დუნაპირებ მოხვარუნა, ვენდათ იესოშ სიტყვეფს, ნამდა პირველ ადგილს სამეფოშ საქმეეფი დო ღორონთიშ სამართლიანობა ქიგვორინუათ.

5. მუჭო მიმანგარენა რწმენას იესოშ სიტყვეფი, ნამუთ პეტრეს უწუ?

⁵ არჩა მოციქულ პეტრექ იესოს კითხუ: „ჩქი ირფელ ქიდიპტეთ დო სი ქეგკაჸუნით. მუ მაღვენუნა თეშ გურშენ?“ (მათ. 19:27). იესო ვაგადღანებ პეტრეს თე კითხვაშ გურშენ, პირიქით თიქ უწუ მუშ მოწაფეეფს, ნამდა მიღენდეს ჯილდოს თი მსხვერპლიშ გურშენ, ნამდგაშა თინეფ მიშეს. ართგურ მოციქულეფ დო შხვეფ ქრისტეწკუმა ართო იმეფენა ზეცას. მარა კურთხევეფიშ მიღება ამდღა ხოლო რე შეიოლებერ. იესოქ თქუ: „არძაქ, მიდგაქ ქიდიტუ ჸუდეეფი ვარდა ჯიმალეფი, ვარდა დალეფი, ვარდა მუმა, ვარდა დიდა, ვარდა სქუალეფი, ვარდა ეზო-კარი ჩქიმ სახელიშ გურშენ, ბრელით უმოსის მიღენს დო მარადიულ სიცოცხლე ხოლო ქაში“ (მათ. 19:29). კურთხევეფ, ნამუსით იესოშ მოწაფეეფ მიღენდესინ, ბრელით უმოს იჸუფუდ თიშე, მუდგა დათმეს. სულიერ მუმალეფი, დიდალეფ, ჯიმალეფი, დალეფი დო სქუალეფი ბრელით ძვირფას ვარენო თიშე, მუდგა დაფთმით, სამეფოშ საქმეეფი პირველ ადგილშა ქიგემრინუაფუდესკონ თიშენ?

„ღუზაცალო რე ჩქინო“

6. მუშენ დეპირ იეჰოვაქ მუშ თაყვანიშმცემელეფს, ნამდა დაჯილდოენდ?

⁶ იეჰოვაქ პირობა მეჩუ მუშ თაყვანიშმცემელეფს, ნამდა დაჯილდოენდ, მუთ თის ნიშნენს, ნამდა მეხვარებუდ პრობლემეფიშ დო გამოცდეფიშ გარზებას. ღორონთიშ მსახურეფს ამდღა ხოლო ბრელ სულიერ კურთხევეფი უღუნა, მარა თინეფ უმოს დიდ კურთხევეფს ელუნა მომავალს (1 ტიმ. 4:8). ჩქინ რწმენა უმოსო გემანგარებ, მუჟამსით ბოლოშა ქიპჸუაფუთ დარწმუნებულ, ნამდა იეჰოვა „აჯილდოვენს თინეფს, მიდგა გურგედვალირო გორუნს თის“ (ებრ. 11:6).

7. მუჭო მიცვენა იმენდი ღუზაცალო?

⁷ გვალას ქადაქებაშ დროს იესოქ თქუ: „გოხიოლუდან, მუშენდა დიდ რე თქვან საზღაურ ზეცას; თქვანშახ ცხოვრენდესინ თი წინასწარმეტყველეფს ხოლო თეცალო თხოზუდეს“ (მათ. 5:12). ხიოლიშ მიზეზი ზეცას ცხოვრებაშ იმენდი უღუნან თინეფს ხოლო უღუნა დო ქოთ დედამიწას მარადიულო ცხოვრებაშ იმენდი უღუნან თინეფს (ფსალმ. 37:11; ლუკ. 18:30). არძა, მით მარადიულ ცხოვრებაშ ჯილდოს ზეცას იჸინ დო ვარ დედამიწას მიველუთინ, თე იმენდ „ჩქინ შურშო ღუზაცალო სანდო დო მტკიცე რე“ (ებრ. 6:17—20). მუჭო ღუზა იცვენს გემს ქარბორიაშ დროს თეშ, ჯილდოშ იმენდი ხოლო მოხვარუნა მიღუდან ემოციურ, გონებრივ დო სულიერ სიმტკიცე. თინა მოხვარუნა, ვა ვოდინუათ ძალეფი სირთულეეფიშ დროს.

8. მუჭო შეულებ იმენდის ემქექუან ოწუხებელ?

⁸ ბიბლიაშა გერსხილ იმენდის შეულებ ემქექუან თი ოწუხებელ, ნამუთ ამდღა მიღუნა. ღორონთიშ დუნაპირებ მალამოცალ რე, ნამუსით შეულებ ჩქინ აკოჭირებულ გურშა ემიშკვან. გურიშ ემაკინალ რე თინა, ნამდა შემლებუნა ჩქინ „ოღალ იეჰოვას მივანდათ“, თიშა დარწმუნებულეფქ, ნამდა თინა ქიმმეხვარებუნა (ფსალმ. 55:22). შემლებუნა ბოლოშა ვორდათ დარწმუნებულ, ნამდა ღორონთის შეულებ „თიშე ბრელით მეტ გაკეთას, ვინემ ჩქი ფთხულენთ ვარდა აზრო მუმალენა“ (ეფეს. 3:20). ნამდვილო, ღორონთის უბრალოთ მეტიშ კეთება ვარინ, ბრელით მეტიშ კეთება შეულებ!

9. მუჭო შეილებუნა დარწმუნებულ რდათ, ნამდა იეჰოვა გაკურთხენა?

⁹ ჯილდო მიბღათინ თიშენ, ბოლოშა გეგმიფრჩქინათ ოკო რწმენა დო დევემორჩილათ იეჰოვაშ მითითებეფს. მოსექ ისრაელეფს უწუ: „იეჰოვა გაკურთხენა თი დიხას, ნამუსით იეჰოვა, თქვან ღორონთი გარზენა ოცხოვრებელო, ნამდა დესაკუთრათ თინა, მუჟამსით ქოურჩქილეთ იეჰოვას, თქვან ღორონთიშ ხონარს დო გურგედვალირო ქიდეცვენთ თიშ მცნებეფს, ნამუსით ამდღა გინორჩანთ. გაკურთხენა იეჰოვა თქვან ღორონთი, მუჭოთ დეგეპირეს“ (კან. 15:4—6). ქორეთო ბოლოშა დარწმუნებულ, ნამდა იეჰოვა გაკურთხენა, მუჟამსით გაგრძელენთ თიშ მსახურებას ართგურო? თქვა თეშ რეალურ მიზეზ გიღუნა.

იეჰოვა აჯილდოენდ თინეფს

10, 11. მუჭო აკურთხ იეჰოვაქ იოსები?

¹⁰ ბიბლიაქ ჩქინ საჯგირობუოთ იჭარ. თექ მოშინაფილ რე, მუჭო დაჯილდოვუ იეჰოვაქ მუშ ართგურ მსახურეფ (რომ. 15:4). თეშ ჯგირ მაგალით რე იოსები. იოსებიშ ჯიმალეფქ ეკიკათეს დო თინა მონათ გეგმოჩეს, ჭიჭე ხანიშ უკულ მუშ პატონიშ ოსურქ ტყურა ქეკაწამ თის დო ათეშგურშენ ციხეს ქუდახუნეს. მარა დეთხუო იოსებიქ ღორონთის? მუშო ოკო რაგადი, ვარ! „იეჰოვა რდუ იოსებწკუმა დო ვარკენდ თის ჯგირობუას . . . დო ირ საქმეს ხეს უნწყუნდ“ (დაბ. 39:21—23). იოსები ითვინენდ დო ელუდ იეჰოვას, მუჟამ მეხვარებუდ.

¹¹ წანეფიშ უკულ, ფარაონქ გოუტუ ციხეშე იოსებ დო თე თანდაბალ მონა მუშ უკულ ეგვიპტეს მაჟია მართველო ქუდარინუ (დაბ. 41:1, 37—43). მუჟამსით იოსების ჟირ ბოშიქ ქაშუნ, „პირველ სქუას მენაშე ქიგიოდუ, მუშენდა იჩიებუდ, გუმოჭყოლიდუ ღორონთიქ გაჭირება დო მუმაჩქიმიშ ჸუდე. მაჟია სქუას ეფრემი ქიგიოდუ, მუშენდა იჩიებუდ, ღორონთიქ გინმოშკუ ნაყოფიერო ჩქიმ საცოდალ დიხას“ (დაბ. 41:51, 52). იოსებიქ ღორონთიშ ართგურქ ქუდოსკიდ დო თეშ ჭყოლოფუათ ბრელ ისრაელქ დო ეგვიპტელქ გინასკიდ შკირენაშ დროს. იოსების ჯგირო არჩქილედ, ნამდა იეჰოვაქ აკურთხ თინა (დაბ. 45:5—9).

12. მუჭო დოსკიდ იესოქ ართგურქ გამოცდეფიშ დროს?

¹² იესო ქრისტექ ხოლო მიღუ ჯილდო, მუშენდა რწმენაშ შხვადოშხვა გამოცდაშ დროს ბოლოშა ღორონთიშ მორჩილ რდუ. მუ არზენდ იესოს ძალას, ნამდა ქუგურზუკო თე გამოცდეფს? ღორონთიშ სიტყვას პკითხულენთ: „ხიოლიშ გურშენ, ნამუთ მელუდ, თიქ ონჯღორე მუთუნო ვემირჩქინ დო ბოძის წამებას ქუგურზ“ (ებრ. 12:2). იესოს თინა ოხიოლუდ, ნამდა შეულებუდ ღორონთიშ სახელიშ განწმენდა. მუთ არძაშ უმოს მთავარ რე, იესოქ მუშ მუმაშ მოწონება დემსახურ დო ბრელ ძვირფას კურთხევეფი ხოლო მიღუ. ბიბლიას ჭარ, ნამდა თიქ ღორონთიშ ტახტიშ მარძგვანშე ქიდოზოჯ. ბიბლიაშ შხვა ადგილს ხოლო პკითხულენთ: „ღორონთიქ თინა უმოს მეტო ამაღალ დო ქიმეჩ არძა სახელშე აღმატებულ სახელი“ (ფილ. 2:9).

იეჰოვა ვეჭყოლიდუანს ჩქინ ჯგირ საქმეეფს

13, 14. მუჭო უჯინე იეჰოვა ჩქინ საქმეეფს?

¹³ შემლებუნა ბჯერდან, ნამდა იეჰოვა აფასენს ჩქინ ირნერ მონდომას, ვემსახურათ თის. ღორონთის ჯგირო არჩქილე, ნამდა მინშა ვავორეთ დარწმუნებულ ჩქინ დუდშა ვარდა მოეჭუნა ჩქინ შესაძლებლობეფიშ. თინა ჩქინ მდგომარეობაშა მიშურს, მუჟამსით ფინანსურ ვარდა ჯამრთელობაშ პრობლემეფიშ გურშენ ბრელ ვამამსახურებენა. შემლებუნა დარწმუნებულ ვორდათ, ნამდა იეჰოვა აფასენს მუშ მსახურეფს, მით ირფელიშ უმკუჯინუო, ართგურო აგრძელენა მსახურებას (წეკითხით ებრაელეფიშ 6:10, 11).

¹⁴ ირო ბშუდან, ნამდა იეჰოვა ლოცვეფიშ მარჩქილე ღორონთ რე დო მუჟამსით ბლოცულენთინ, თინა ყურადღებას ქიმიაქციენს ჩქინ ოთხუალს (ფსალმ. 65:2). „თანაგრძნობაშ დო ირნერ ნუგეშიშ მუმა“ ემოციურო დო სულიერო ქელამდირთუნა, შილებე თენა ჩქინ თანამორწმუნეეფიშ საშვალებათ გაკეთას (2 კორ. 1:3). იეჰოვაშ გურს ოხუ, მუჟამსით შხვეფიშ მდგომარეობაშა მიშურთ. „მიდგა ღარიბწკუმა ჭყოლოფას გიმირჩქინანსინ, თინა სესხის არზენს იეჰოვას დო [იეჰოვა] გინუგანს თის მუშ საქმეშენ“ (იგავ. 19:17; მათ. 6:3, 4). ნამდვილო, მუჟამსით შურდოგურით ვოხვარუთ თინეფს, მით გაჭირებას რენან, იეჰოვა ჩქინ საქმეეფს მირჩქინანს სესხო, ნამუსით მუს ვარზენთ. თინა მოპირუნა, ნამდა გინომგანა ჯგირობუათ თეცალ საქმეეფიშ გურშენ.

ჯილდო ამდღა დო მარადიულო

15. მუ ჯილდოს ელუთ პირადო თქვა მომავალს? (ქოძირით სურათ 24-ა გვერდის)

¹⁵ შურით ცხებულ ქრისტიანეფი მიღენა „სიმართლეშ გვირგვინს, ნამდგათ თიმ დღას დაჯილდოვენს უფალი“ (2 ტიმ. 4:7, 8). მარა დედამიწას ცხოვრებაშ იმენდი მიღუნან თენა თის ვანიშნენს, ნამდა ღორონთიშ თოლს ვა ვორეთ დაფასებულ. იესოშ მილიონობით შხვა შხურ მომავალს მარადიულო იცხოვრებ დედამიწას სამოთხეს. თინეფ გეხარებუნა დიდ მშვიდობათ (იოან. 10:16; ფსალმ. 37:11).

16. მუჭო ელამკინანა გურშა 1 იოანეშ 3:19, 20?

¹⁶ მინშა შილებე იფიფქრათ, ნამდა ისხის ვამსახურენთ ვარდა იეჰოვა ვა რე კმაყოფილ ჩქინ მონდომათ. შილებე თინა ხოლო მოეჭუდან, ქუვორეთ დო ვარ ღირსი, მიბღათ მუთუნნერ ჯილდო. მარა, მორთ, დღას ვაგმოჭყორდან ართ მუდგანერქ: „ღორონთი ჩქინ გურეფშე უმოს დიდ რე დო თის ირფელ უჩქუ“ (წეკითხით 1 იოანეშ 3:19, 20). თინა აფასენს თი ჭიჭე მუდგარენს ხოლო, მუდგას რწმენათ დო ჸოროფათ ვორთუთ, თიშ უმკუჯინუო, ნამდა შილებე ჩქი უმნიშვნელოთ მიმორჩქუდან, მუდგას ვორთუთ თინა (მარ. 12:41—44).

17. მუთ მაჯილდოვენა იეჰოვა ამდღა?

¹⁷ ამდღა ხოლო სატანაშ უბადო ქიანაშ ბოლო დღალეფს იეჰოვა კურთხევეფს ვარკენს მუშ ხალხის. თინა ზრუნენს თიშო, ნამდა მიბღათ სულიერ გურაფა დო ვორდათ ბედნერეფ (ეს. 54:13). მუჭოთ იესოქ დემეპირესინ, იეჰოვა მაჯილდოვენა ამდღა თით, ნამდა პჸუნა მოჸოროფე და დო ჯიმალეფ მთელ მსოფლიოს (მარ. 10:29, 30). თეშ გარდა, თინეფს, მით ღორონთის გურგედვალირო გორუნან, უღუნა მშვიდობა, რენა კმაყოფილეფ დო ბედნერეფ (ფილ. 4:4—7).

18, 19. მუჭო აფასენა იეჰოვაშ მსახურეფ თი კურთხევეფს, ნამუსით ამდღა ღებულენა?

¹⁸ მთელ მსოფლიოს იეჰოვაშ მოწმეეფქ მუნეფიშ დუდშა გაგმოცადეს თე ძვირფას კურთხევეფი. მაგალთო ბიანკა, ნამუთ გერმანიას ცხოვრენსინ, იჩიებ: „სიტყვეფით ვეკმარაგადე მუშმანწარა მარდულ ვორექ იეჰოვაშ, მუშენდა თიქ მანგარო მიმეხვარ დო ირდღას ჩქიმ გვერდით რდუ, მუჟამსით ოწუხებელ მიღუდ. ამდღარ ქიანას არეულობა რე დო მითინ ვა ვორეთ დაცულ. მარა იეჰოვაწკუმა მუთ უმოსო ხოლოს ვორექინ, თით უმოსო დაცულო ბგინაფლენქ დუც თიშ ხეს. ღორონთშო ჭიჭე მუდგარენს გუვაკეთენქინ, თინა ოშმაგო გინომგანს აშო“.

¹⁹ კანადას მახორუ 70 წანერ პაულა, ნამუსით ხერხემალს პრობლემა უღუნ, იჩიებ: „გილულა ვეშემლებუნ თინა ვა ნიშნენს, ნამდა მსახურება ხოლო ვეშემლებ. ვოცადუქ შხვადოშხვა მეთოდით იბქადაქე, მაგალთო ტელეფონით ვარდა არაფორმალურო. მანგარო მოხვარ ბიბლიურ მუხლეფიშ დო ჩქინ პუბლიკაციეფშე შხვადოშხვა გურიშემაკინალ სულიერ აზრეფიშ ბლოკნოტშა ინოჭარუა დო თინეფშე ფიქრი. თეს ჩქიმ „გინმასკილიდარ ბლოკნოტის“ უძახუქ. პრობლემეფი დროებით რე, მუჟამსით იეჰოვაშ დუნაპირეფშა გინომიღუნა ყურადღება. მუ მდგომარეობას ვა ვორდათინ, იეჰოვა ირიათო ჩქინ გვერდით რე“. თქვან მდგომარეობა შილებე შურო ვაგუდას ბიანკა დო პაულაშ მდგომარეობას. თეშ უმკუჯინუო, შეილებუნა დეფიქრათ თიშე, მუჭო გაკურთხეს იეჰოვაქ თქვა დო თქვან ხასლას რენან თი და დო ჯიმალეფ. მუშმაჯგირა რე თიშენ ფიქრი, მუჭო გაკურთხეს იეჰოვაქ ამდღა დო მუჭო გაკურთხენა თინა მომავალს!

20. მუშა შემლებუნა ვორდათ დარწმუნებულ, მუჟამსით მთელ გურით გავაგრძელენთ მსახურებას?

²⁰ დღას ვაგგოჭყორდან, ნამდა შურდოგურით დო თავისფალო ნათქუელ ლოცვეფს იეჰოვა დაჯილდოვენს. შეილებუნა რჯერდან, ნამდა მუჟამსით „ღორონთიშ ნებას შეასრულენთინ, მიღენთ დუნაპირებუს“ (ებრ. 10:35, 36). მორთ, ირნერო ვეცადათ გავამანგარათ ჩქინ რწმენა დო მთელ გურით ვემსახურათ იეჰოვას. შემლებუნა ბოლოშა ვორდათ დარწმუნებულ, ნამდა იეჰოვა დუმაჯილდოენა (წეკითხით კოლოსელეფიშ 3:23, 24).