რჯერდან, იეჰოვა გეიქექუანა გურშა

1. მუ სიტუაციას რდესჷ ბაბილონშა გინოხორაფილ იუდეველეფ?

ᲥᲔᲪᲐᲓᲘᲗ, წერმიდგინათ, მუს გინაფლენდესკონ იჸიდ ბაბილონშა გინოხორაფილ იუდეველეფ. თე ხალხიქ მუშ თოლით ძირჷ, მუჭო გენადგურ თინეფიშ ქიანაქ. ქოთ თინეფ დო ქოთ თინეფიშ ჯვეშეფ წანეფიშ დინახალე აშენდეს იეჰოვაშ წოხოლე, ათეშენ თიქ დაუშვჷ, ნამდა ბაბილონელეფქ ქიგიანთხესკო თინეფიშ ქიანას დო ტყვეეფო მიდეჸუნესკო (2 მატ. 36:15, 16, 20, 21). მართალ რე, ბაბილონს თინეფს ჭიჭე თავისუფლება ქოუღუდეს დო ჩვეულებრივო ცხოვრენდეს, მარა თინეფშო თექ რინა იშენით ძნელ რდჷ დო ვაკოდეს თექ ცხოვრება, მუთ შურო ვა რე გასაკვირ (იერ. 29:4–7). დეკვირით ართ-ართ გინოხორაფილ იუდეველიშ სიტყვეფს, სოვრეშეთ იძირე, მუჭო გინაფლენდჷ თე ხალხ დუდის: „ბაბილონიშ მალწყარეფს ელვოხედით დო იმნგარდით, მუჟამსით იფშინანდით სიონს“ (ფსალმ. 137:1). გურგოტახილ იუდეველეფს გურიშექექაფა ოსაჭირუდეს. მიშ იმენდ შილებე უღუდესკო თინეფს?

2, 3. ა) მუ აკეთ იეჰოვაქ გინოხორაფილ იუდეველეფშო? ბ) მუს გუვარჩიენთ თე სტატიას?

² ბიბლიაშე ბგებულენთ, ნამდა იეჰოვა „ირნერო გურიშემაქექაფალ“ ღორონთ რე (2 კორ. 1:3). ღორონთის უჸორს მუშ მსახურეფ დო ოკო, გურშა ელუკინას თინეფს. იეჰოვას უჩქუდ, ნამდა გინოხორაფილ იუდეველეფშე ნამთინე ინარღენდ ღორონთის ვამორჩილუდესინ დო კინ დართუდ თის (ეს. 59:20). ათეშენ, გინოხორაფაშახ 100 წანაშე უმოს ხანიშ წოხოლე, იეჰოვაქ წინასწარმეტყველ ესაიას ოჭარაფუ წიგნ, ნამდგას თე წინასწარმეტყველიშ სახელ გეძჷ. მუ რდჷ თე წიგნიშ მიზან? ესაიაქ ჭარჷ: „გურშა გეუქექეთ, გეუქექეთ გურშა ჩქიმ ხალხის – იჩიებ თქვან ღორონთ“ (ეს. 40:1). თაშ ნამდა, თე წიგნიშ ჭყოლოფათ, იეჰოვა გურშა გეუქექუანდ ბაბილონშა გინოხორაფილ იუდეველეფს, მუთ თინეფს მართალო დესაჭირებუდეს.

³ თე სტატიას ქიფჩიებუთ თი სუმ მხარეშე, მუდგათ იეჰოვაქ გურშა ეუქექუ იუდეველეფს. პირველ, თიქ პირობა მეჩჷ იუდეველეფს, ნამდა აპატიენდ თინეფს, მით ინარღენდ დაშებულს. მაჟია, თიქ იმენდ მეჩჷ მუშ ხალხის დო მასმა, მეხვარ შიშშა გერჯგინას. იუდეველეფცალო, კანკალეშა ჩქი ხოლო მოსაჭირუნა გურშა ექექაფა, ათეშენ თე მხარეეფიშ გარჩიება მიმეხვარებუნა, ქობძირათ, ჩქი მუჭო ემქექუანა გურშა ამდღა იეჰოვა.

ᲘᲔᲰᲝᲕᲐ ᲛᲗᲔᲚ ᲒᲣᲠᲘᲗ ᲛᲐᲞᲐᲢᲘᲔᲜᲐ

4. მუჭო ოძირუ იეჰოვაქ, ნამდა მოჭყოლოფე ღორონთ რე? (ეს. 55:7).

⁴ იეჰოვა „ჭყოლოფათ ეფშა მუმა“ რე (2 კორ. 1:3). თიქ თენა ჯგირო ოძირუ, მუჟამსით პატიებაშ პირობა მეჩჷ თი გინოხორაფილ იუდეველეფს, მით დენარღენდეს დაშებულს (წეკითხით ესაიაშ 55:7). იეჰოვაქ თქუ: „რახანს მარადიულ რე ჩქიმ ჸოროფა, შეიცოდილუანქ“ (ეს. 54:8). სოვრეშე იძირე, ნამდა იეჰოვაქ შიცოდილუ გინოხორაფილეფ? მართალ რე, იუდეველეფს მუნეფიშ დაუმორჩილებლობაშ გურშენ ბრელ წანას აჸიდეს ბაბილონს გაჩერებელ, მარა იეჰოვაქ პირობა მეჩჷ თინეფს, ნამდა ირიათო თექ ვედიტენდ დო ართ დღასით დართინუანდ მუნეფიშ დიხაშა (ეს. 40:2). წერმიდგინით, მუჭო გეუქექუანდ გურშა დო მუჭო დამშვიდენდ თე სიტყვეფ თი იუდეველეფს, მით ნარღენდეს მუნეფიშ საქციელს.

5. მუშენ მიღუნა იუდეველეფშე უმოს მიზეზ თიშ დაჯერებელო, ნამდა იეჰოვა ცოდეფს მაპატიენა?

⁵ მუს ბგურაფლენთ? იეჰოვა მზათ რე, ბოლოშა აპატუას მუშ მსახურეფს დაშებულ. ბაბილონშა გინოხორაფილ იუდეველეფიშ გინაწონს, ჩქი უმოს მიზეზ მიღუნა თიშ დაჯერებელო, ნამდა იეჰოვა მაპატიენა ცოდეფს, მუშენდა მიჩქუნა, მუ აკეთ თიქ თეშო. ესაიაქ იეჰოვაშ პატიებაშე იჩუნ თევრეშე საუკუნეეფიშ უკულ, იეჰოვაქ მუშ საჸოროფო სქუა მაშქვჷ დედამიწაშა, ნამდა თიშ სიცოცხლეთ გეგშეჸიდუკო თი ადამიანეფ, მით მთელ გურით ინარღენდეს დაშებულს. ზუსტას იესოშ მსხვერპლიშ ჭყოლოფათ „ლასუნს“ იეჰოვა ჩქინ ცოდეფს (საქ. 3:19; ეს. 1:18; ეფეს. 1:7). მართალო, მუ მოჭყოლოფე ღორონთის ვომსახურუთ!

6. მუშენ რე ჩქინო გურიშემაქექაფალ იეჰოვაშ პატიებაშე ფიქრ? (ქოძირით სურათ).

⁶ ულირს დაშებულ ნარღებულ ქუმაფუნა, მარა გურ იშენ ბრალს ქიგებდვანან-და, ესაიაშ 55:7-ის ენოჭარილ იეჰოვაშ სიტყვეფ ჩქი ხოლო ქელამკინანა გურშა. დაშებულიშ გურშენ განსაკუთრებულო თიმწკუმა შილებე პწუხენდათ, მუჟამსით თიშ გლახა შედეგეფს ამდღა ხოლო ბღებულენთ. მარა დაშებულ ქუვაღიარით დო გლახაშ კეთება მივოტეთ-და, შემლებუნა ბჯერდან, ნამდა იეჰოვაქ მაპატუეს. დო მუჭოთ მიჩქუნა, მუჟამსით იეჰოვა მაპატიენა შეცდომას, დღას ვა გომშინანა თის (ქეშუდარით იერემიაშ 31:34). ჩქინ შეცდომეფს იეჰოვა ვეგიშინანს-და, ჩქი მუშენ ოკო გიფშინათ?! ღორონთშო ულირს კეთებულ ჩქინ გლახა საქმეეფ ვარინ, ამდღა მუს ვორთუთინ თინა რე მნიშვნელოვან (ეზეკ. 33:14–16). მალას, ახალ ქვეყნიერებას, ჩქინ მოჭყოლოფე მუმა სადღამუშოთ ჩამთხინუანა თი გლახა შედეგეფს, მუთ ჩქინ შეცდომეფქ მომიღეს.

7. მუ მიმეხვარებუნა, მოხვარა ქოფთხუათ უხუცესეფს, მუჟამსით სერიოზულო ვაშენთ დო ფუბლუნთ თეს?

⁷ მუ ოკო ვაკეთათ სერიოზულ ცოდას ქოფუბლუნთ დო თეშ გურშენ სინდის ქუმაწუხენან-და? ღორონთიშ სიტყვა ელამჩანა, მოხვარა ქოფთხუათ უხუცესეფს (იაკ. 5:14, 15). მართალ რე, უხუცესეფწკუმა ცოდაშ აღიარება შილებე ძნელ მაფუდან, მარა ოკო ფშუდან, ნამდა იეჰოვა თე ქომოლკათას ირინუანს ჩქინ მახვარებელო დო თინეფ ირნერო ოცადუნა, იეჰოვაცალო ჸოროფა დო ჭყოლოფა გეგმირჩქინან. თენა ქოფშუნა დო დაშებულს მთელ გურით ქომნარღენთ-და, ვა გამჭირდუნა თინეფშა მეულა დო მოხვარაშ თხუალა. დეკვირით, მუჭო გიმირინუ იეჰოვაქ უხუცესეფ ართ ჯიმაშ, არტურიშ,a მახვარებელო, ნამდგას დაშებულიშ გურშენ სინდის მანგარო აწუხენდჷ. თინა იჩიებ: „სოდგარენ ართ წანას უჯინედ პორნოგრაფიას, მარა ართ მოხსენებაშ მორჩქილაფაქ, სოდეთ სინდისიშ გურშენ მიშჷ ჩიება, გინმოჭყვიდირაფუ, ჩქიმ ოსურწკუმა დო უხუცესეფწკუმა ქოფთქვიკო თენა. მართალ რე, აღიარებაშ უკულ ემაშქვჷ, მარა დაშებულ იშენ მონკა ოღალცალო გებჯანუდ. უხუცესეფქ ქუგმოშინეს, ნამდა იეჰოვას ოჭიშ ვა აფუდ ჩქიმდა რთინაფილ დო თინა თიშენ მასაჯენა, ნამდა უჸორთ. თე ჯიმალეფიშ გემუან სიტყვეფქ გურს მომჰამუ დო დუმარწმუნ, ნამდა იეჰოვას პატიებულ აფუდ ჩქიმდა“. ამდღა არტურ პიონერო დო მომსახურეთ მსახურენს. მართალო, მუ გურიშემაკინალ რე თიშ რჩქინა, ნამდა ქომნარღენთ-და, ჩქინ მოჭყოლოფე ღორონთ, იეჰოვა, ირიათო მზათ რე პატიებაშო.

ᲘᲔᲰᲝᲕᲐ ᲛᲐᲠᲖᲔᲜᲐ ᲘᲛᲔᲜᲓᲘᲡ

8. ა) მუშ იმენდ მეჩჷ იეჰოვაქ გინოხორაფილ იუდეველეფს? ბ) მუჭოთ ესაიაშ 40:29–31-ის ჭარჷ, მუჭო იმოქმედენდ იეჰოვაშ დუნაპირებ იუდეველეფშა?

⁸ კოჩიშ გინაჯინშე იუდეველეფ უიმენდო მდგომარეობას რდესჷ, მუშენდა ბაბილონიშ იმპერია დღას ვათავისფალენდ ტყვეეფს (ეს. 14:17). მარა იეჰოვაქ მუშ ხალხის იმენდ მეჩჷ დო დეპირ, ნამდა გათავისფალენდ ტყვეობაშე. მუთუნს ვაწარინედ იეჰოვაშ სიტყვაშ შესრულებაშა (ეს. 44:26; 55:12). იეჰოვაშ თოლს ბაბილონ ტვერცალო რდჷ, ნამუთ ართ შურიშ მემბარაფათ დინუ (ეს. 40:15). მუჭო იმოქმედენდ თე იმენდ იუდეველეფშა? თინა თინეფს ხვალე გურშა ვეუქექუანდუნ, მუჭოთ ესაიაქ ჭარჷ, ძალეფით გეიფშაფუდეს დო არწივცალო გოფაჩუნდეს ფსუალეფს (წეკითხით ესაიაშ 40:29–31).

9. მუშენ შეულებუდეს იუდეველეფს ჯერდესკო, ნამდა იეჰოვა შეასრულენდ მუშ პირობას?

⁹ მუშენ შეულებუდეს ჯერდესკო იუდეველეფს, ნამდა იეჰოვა შეასრულენდ მუშ სიტყვას? თეშ ბრელ მტკიცებულება უღუდეს. თინეფქ იეჰოვაშ ბრელ წინასწარმეტყველებაშ შესრულება ძირეს მუნეფიშ თოლით. მაგალთო, ძირეს მუჭო გიორჯგინ ასურეთიქ ისრაელიშ ჩრდილოეთ სამეფოს დო ხალხ გეგნახორუ (ეს. 8:4). თინა ხოლო ძირეს, მუჭო განადგურეს ბაბილონელეფქ იერუსალიმ დო თექიან მახორუეფ ტყვეეფო მიდეჸუნეს (ეს. 39:5–7). იუდეველეფს უჩქუდეს თინა ხოლო, ნამდა ბაბილონიშ მეფექ მეფე ციდკიას თოლსინთე მიდუღ დო ბაბილონშა გეგნახორუ (იერ. 39:7; ეზეკ. 12:12, 13). თაშ ნამდა, ირფელქ, მუთ იეჰოვას აფუდ ნარაგად, შისრულ (ეს. 42:9; 46:10). თე ირფელ თინეფს უმოსო დაჯერენდ, ნამდა ღორონთ თინეფშა მეჩამილ პირობას ხოლო შეასრულენდ დო გათავისფალენდ.

10. მუ მიმეხვარებუნა, თე ბოლო დღალეფს იმენდ ვა ვოდინუათინ?

¹⁰ მუს ბგურაფლენთ? მუ მიმეხვარებუნა თე ბოლო დღალეფს იმენდიშ გამანგარებას? ჩქი ფცხოვრენთ ძნელო გარზებელ ბოლო დროს დო ღორონთიშ მოწინააღმდეგეეფ ხოლო მონტერუნა, მარა უიმენდოთ ვა ვორეთ, მუშენდა იეჰოვაქ მშვიდობიან დო უსაფრთხო გარემოს მარადიულ ცხოვრებაშ დიდებულ იმენდ მუჩეს. თაშ ნამდა, მუჟამსით პრობლემეფ გურს მიმონკენა, თე იმენდ ძალეფიშ დორთინაფას მოხვარუნა. თე იმენდშე ირიათო ვეფიფქრით-და, თი ცხოვრებას, ნამდგას იეჰოვა მოპირუნა, შილებე სუფთას ვარინ, ჟღაბილო ვორწყედათ, ზუსტას თეშ, ითამ მანგარ სქვამ ხედის წინდამ აკოშკაშე უჯინედათ. მუჭო შემლებუნა „გობჯირქათ აკოშკა“, ნამდა ირიათო „სუფთას ვორწყედათ“ დუნაპირებ სამოთხეს? თეშო საჭირო რე, ირიათო წერმიბდგინათ, მუნერ იჸუაფ ცხოვრება ახალ ქვეყნიერებას. შემლებუნა წეპკითხათ სტატიეფ, ქუჯინათ ვიდეოეფს დო ქუმურჩქილუათ ობირეშეფს, ნამუთ თე იმენდიშ გურშენ რე. თეწკუმა ართო, შემლებუნა იეჰოვას ლოცვას ქივეჩუათ, არძაშ უმოსო ნამ დუნაპირებუშ შესრულებას მივახიოლანთ.

11. მუ ოხვარ ართ დას, ნამდგას ჯანმრთელობაშ სერიოზულ პრობლემეფ უღჷ, ძალეფიშ დორთინაფას?

¹¹ ქობძირათ, მუჭო ეუქექუანს გურშა დო ამანგარენს მომავალიშ იმენდ ჩქინ ართ დას, ჯოის, ნამდგას ჯანმრთელობაშ სერიოზულ პრობლემეფ უღჷ. თინა იჩიებ: «მუჟამსით გურ ეკმეჭირებ, იეჰოვაწკუმა ეკიფაფრთხუნქ გურს, მუშენდა ბჯერსჷ, ირფელს გამგენს. თინა მარზენს ძალას, „ნამუთ ჩვეულებრივშე უმოს რე“» (2 კორ. 4:7). თეწკუმა ართო, ჯოი ხშირას წერმიდგინენს მუშ დუდის ახალ ქვეყნიერებას, სოდეთ „ნამთინ მახორუ ვა თქუანს, გლახათ ვორექია“ (ეს. 33:24). თე დაცალო, ჩქი ხოლო იეჰოვას გეგნუფაჩუნთ გურს დო მთელ ყურადღებას მომავალიშ იმენდშა გეგნიბღანთ-და, თენა ძალეფით გემოფშანა.

12. მუშენ შემლებუნა ბჯერდან, ნამდა იეჰოვა შეასრულენს მუშ დუნაპირებუეფს? (ქოძირით სურათ).

¹² ბაბილონშა გინოხორაფილ იუდეველეფცალო, ჩქი ხოლო ბრელ მიზეზ მიღუნა თიშ დაჯერებელო, ნამდა იეჰოვა შეასრულენს მუშ დუნაპირებუეფს. ვორწყეთ, ნამდა ჩქინ თოლიშ წოხოლე ისრულებ ნამთინე წინასწარმეტყველება. მაგალთო, ჩქინ დროს მმართველენს მსოფლიო იმპერია, ნამუთ „გვერდო ძალიერ დო გვერდო ადვილო ტირხუნ ფერ“ რე (დან. 2:42, 43). თის ხოლო ვორწყეთ, მუჭო ხვადუ დიხანწალუეფ „მინ ართ დო მინ მაჟია ადგილს“ დო მუჭო მეურს სახიოლო ამბეშ ქადაგება „მთელ მსოფლიოს, ნამდა არძაქ ქიმირჩქილუას“ (მათ. 24:7, 14). თე დო შხვა ბრელ შესრულებურ წინასწარმეტყველება მარწმუნენა, ნამდა იეჰოვაშ შხვა დუნაპირებუეფ ხოლო აუცილებერო შისრულებ.

ᲘᲔᲰᲝᲕᲐ ᲛᲝᲮᲕᲐᲠᲣᲜᲐ, ᲒᲘᲕᲝᲠᲯᲒᲘᲜᲐᲗ ᲨᲘᲨᲘᲡ

13. ა) მუ სირთულეეფს შეხვადუდეს იუდეველეფ გათავისფალებაშახ ჭიჭე ხანით ადრე? ბ) მუჭოთ ესაიაშ 41:10–13-შე ბგებულენთ, მუჭო ელუკინ იეჰოვაქ თინეფს გურშა?

¹³ მართალ რე, იეჰოვაქ გინოხორაფილ იუდეველეფს გათავისფალებაშ იმენდით ელუკინ გურშა, მარა თინა ხოლო უჩქუდ, ნამდა გათავისფალებაშახ ჭიჭე ხანით ადრე თინეფ სირთულეეფს ქეშეხვადუდეს. მუჭოთ იეჰოვაქ იწინასწარმეტყველ, ართ-ართ ძალიერ მმართველ დიო ბაბილონიშ გოხოლუა ქიანეფს ქიგიანთხუდ დო უკულ ბაბილონს ხოლო ქადირთუდ (ეს. 41:2–5). ონერვიანებელო უღუდესო საქმე იუდეველეფს? თე ირფელ მოხვადუდუკონ თეიშახ ბრელ წანაშ წოხოლე, იეჰოვას ესაიაშ წიგნის უკვე ენოჭარილ აფუდ გურიშემაქექაფალ სიტყვეფ იუდეველეფშო. თექ პკითხულენთ: „ვა გაშქურინას, მუშენდა სქანწკუმა ვორექ! მუთუნშე ვეწუხა, მუშენდა სქან ღორონთ ვორექ!“ (წეკითხით ესაიაშ 41:10–13). მუს გაშინანდ იეჰოვა თე სიტყვეფით იუდეველეფს? თისო, ნამდა თქვან ღორონთ ვორექ დო მა ოკო მემსახურათია? ვარ, ენა თეშით ხოლო უჩქუდეს. იეჰოვა თე სიტყვეფით თინეფს თის ურაგადუდ, ნამდა თქვანწკუმა ვორექ დო მიგეხვარებუთია (ფსალმ. 118:6).

14. ხოლო მუჭო მეხვარ იეჰოვაქ იუდეველეფს, ორჯგინესკო შიშის?

¹⁴ იეჰოვაქ გინოხორაფილ იუდეველეფ თით ხოლო დამშვიდ, ნამდა ქუგაშინ, მუნერ ძალა დო სიბრძნე უღჷ. თიქ თინეფს უწუ, ქელაჯინესკო მურიცხეფით მოჭკადილ ცას დო ქუგაშინ, ნამდა ხვალე მურიცხეფიშ გოჭყაფაშ ძალა ვარინ, თიშმაშხვა სიბრძნე ხოლო უღჷ, ნამდა თითოულიშ სახელ შჷ (ეს. 40:25–28). იეჰოვას არძა მურიცხიშ სახელ ქოშუნ-და, მუშ მსახურეფიშ სახელ ვა შუდას იჸინო?! ვარდა თეზმა მურიცხიშ გოჭყაფაშ ძალა ქუღუდ-და, მუშ მსახურეფიშ მოხვარა ვეშიალებენო?! თაშ ნამდა, იუდეველეფს შიშიშ მიზეზ ვა უღუდეს.

15. მუჭო მამზად იეჰოვაქ იუდეველეფ?

¹⁵ იეჰოვაქ იუდეველეფ თიშო ხოლო მამზად, მუთ წიმი ელუდეს. ესაიაშ წიგნიშ პირველ ნაწილს თიქ თეცალ გაფრთხილება ენაჭარაფუ მუშ ხალხშო: „გემნორთით თქვან-თქვან ოთახეფშა დო ქინიკილეთ კარეფ! ჭიჭე ხანს დიტყობით, ონდო რისხუა ვეგნიშას“ (ეს. 26:20). თე მითითებაშა ღორონთიშ ხალხის პირველო შილებე თიმწკუმა აჸუ მიოჸუნალქ, მუჟამსით ბაბილონს კიროსიქ ქიგიანთხჷ. ჯვეშ ბერძნულ ისტორიულ წყარო იჩიებ, ნამდა „კიროსიშ ჯარქ ბაბილონშა მიშელუნ, თიქ მუშ ჯარიშკოჩეფს უზოჯ, დოჸვილესკო არძა, მიდგას ჸუდეშ გალე ელახვილუანდეს“. წერმიდგინით, მუ დღას იჸუაფუდეს ბაბილონელეფ. მარა გინოხორაფილ იუდეველეფს იეჰოვაშ მითითებეფიშ მეჸუნა გინატენდ.

16. მუშენ ოკო ვა მნერვიანენდათ ნაბეტანს თი მოვლენეფშე, ნამუთ წიმი მელუნა? (ქოძირით სურათ).

¹⁶ მუს ბგურაფლენთ? მალას, დღას ვა ჸოფენ ფერ, დიდ გაჭირება დოდირთუ. მუჟამსით თინა ქიდიჭყაფუ, ხალხ მანგარ შქურნაფილ იჸი დო ვარჩქვენუნა, მუ აკეთან. მარა ჩქი მშვიდას იპჸით, მუშენდა ჩქინ ღორონთ, იეჰოვა, ჩქინწკუმა იჸუაფ. დუდეკინელო გივორდათ იჸი, მუშენდა მარჩქვენუნა, ნამდა „[ჩქინ] რსხება მონჭაფილ რე“ (ლუკ. 21:28). ვართ თიმწკუმა მაშქურინენა, მუჟამსით ერეფიშ კოალიცია ჩქინ წინააღმდეგ მოლურს. იეჰოვა ანგელოზეფს გეგმირინუანს ჩქინ ოთხილარო დო ქომუჩანა მითითებეფს, ნამდგაშ მეჸუნა მირსხენა. დიო ვა მიჩქუნა, თე მითითებეფს მუჭო მიბღენთ; ქიბჯინათ დო ქობძირუნთ. შილებე თიქ თეშო კრებეფ გეგმირინუას დო ზუსტას კრებეფქ იჸუას ჩქინო „დინახალენ ოთახეფქ“, სოდეთ თხილერო იპჸით. მუჭო შემლებუნა მივემზადათ თი ირფელშო, მუთ წიმი მელუნა? ასეშე ოკო დევეახლოვათ და დო ჯიმალეფს, მივაჸუნათ თეოკრატიულ მითითებეფს დო ბჯერდან, ნამდა ჩქინ ორგანიზაციას იეჰოვა ხელმძღვანელენს (ებრ. 10:24, 25; 13:17).

17. მუ მიგეხვარებუნა, ვადინუათ იეჰოვაშ იმენდ?

¹⁷ მართალ რე, გინოხორაფილ იუდეველეფ სირთულეეფს ქეშეხვადუდეს, მარა იეჰოვაქ ირფელ გაკეთ, ნამდა გურშა გეუქექუკო თინეფს დო თაშ მიქციებ ჩქინ შემთხვევას ხოლო. ათეშენ, თქვან ცხოვრებას მუდგაქ ვა მოხვადასინ, იეჰოვაშ იმენდ გიღუდან დო რჯერდან, ნამდა თინა გეიქექუანა გურშა. დღას ვაგგოჭყორდან, თინა მოჭყოლოფე ღორონთ რე, მით პატიენს შეცდომეფს დო ზრუნენს მუშ მსახურეფშე. ირიათო იფიქრით მომავალიშ დიდებულ იმენდშე. რშუდან, იეჰოვა რე თქვანწკუმა, ათეშენ შიშიშ მუთუნნერ მიზეზ ვაიღუნა!