მუსხით მნიშვნელოვან რე იეჰოვაშ სახელ ჩქინო?

1, 2. სოვრეშე იძირე, ნამდა იეჰოვაშ სახელ ირფელშე უმოს მნიშვნელოვან რე იესოშო?

ᲘᲔᲰᲝᲕᲐᲨ სახელ იესოშო ირფელშე უმოს მნიშვნელოვან რე. მუამუშიშ სახელიშ გაცხადებელო თიქ აკეთუნ თიზმა მითინს ვა უკეთებ. მუჭოთ წოხოლენ სტატიაშე გებგით, თინა მზათ რდჷ, დოღურუკო იეჰოვაშ სახელშო დო თიშ დამტკიცებელო, ნამდა ირფელ, მუდგას თინა ორთჷ, სამართლიან რე (მარ. 14:36; ებრ. 10:7–9). თეწკუმა ართო, თინა თიშო ხოლო რე მზათ, ნამდა მუშ ანთასწანიან მმართველობაშ ბოლოს თანდაბლურო დურთინუას მუამუშის ძალაუფლება, ნამდა საბოლათ გენიწმინდას იეჰოვაშ სახელქ (1 კორ. 15:26–28). იესოს ღორონთიშ სახელ თეშმანწარას უჸორსინ თენა თის ხოლო მოგებაფუანა, მუნერ ურთიერთობა უღჷ თიწკუმა – თის მანგარო უჸორს მუამუშ.

² იესოქ დედამიწაშა მუამუშიშ სახელით მორთჷ (იოან. 5:43; 12:13). თიქ იეჰოვაშ სახელ ქუგაგებაფუ მუშ მიმაჸუნალეფს (იოან. 17:6, 26). იესო იეჰოვაშ სახელით ოგურუანდჷ ხალხის დო ორთუდ სასწაულეფს (იოან. 10:25). თიქ იეჰოვას მუშ მოწაფეეფიშ გურშენ თხუ, „სქან სახელიშ გურშენ“ დოთხილევა თინეფ (იოან. 17:11). არგამა რე, ნამდა იესოშო ღორონთიშ სახელშე უმოს მნიშვნელოვან მუთუნ ვა რდჷ. თაშ ნამდა, მუჭო არაგადე კოჩის ნამდვილ ქრისტიან ვორექია, ქრისტეშ მუმაშ სახელ ვა უჩქჷ დო ვერინუანს-და?

3. მუს გუვარჩიენთ თე სტატიას?

³ ჩქი, მუჭოთ ნამდვილ ქრისტიანეფ, მეპჸუნთ ქრისტეშ მაგალითის დო ვოძირანთ, ნამდა მიჸორა დო პატის ფცენთჷ იეჰოვაშ სახელს (1 პეტ. 2:21). თე სტატიას გუვარჩიენთ, მუშენ გეძუნა იეჰოვაშ სახელ თინეფს, მით ქადაგენს „სახიოლო ამბეს სამეფოშ გურშენ“ (მათ. 24:14). ქიგებგენთ თის ხოლო, მუს ოკო ნიშნენდას ჩქინო, თითოულშო, ღორონთიშ სახელ.

„ᲮᲐᲚᲮ ᲛᲣᲨ ᲡᲐᲮᲔᲚᲨᲝ“

4. ა) მუ უწუ იესოქ მუშ მიმაჸუნალეფს ზეცაშა ულაშახ? ბ) მუ კითხვაქ შილებე გომრჩქინდან?

⁴ ზეცაშა ულაშახ იესოქ მუშ მიმაჸუნალეფს უწუ: „მუჟამსით თქვანდა წმინდა შურ გინილენს, გემანგარებუთ დო იჸუაფუთ ჩქიმ მოწმეეფ იერუსალიმს, მთელ იუდეას დო სამარიას დო დედამიწაშ არძა კუნთხუს“ (საქ. 1:8). მუჭოთ იესოშ თე სიტყვეფშე იძირე, სახიოლო ამბექ ხვალე ისრაელს ვარინ, ირდიხას ოკო იჸუკო ქადაგებულქ. საბოლათ არძა ერიშ ხალხის მიაჩამუდ საშვალება, გინირთესკო ქრისტეშ მიმაჸუნალეფო (მათ. 28:19, 20). მარა ქიდეკვირით, მუ თქუ იესოქ: „იჸუაფუთ ჩქიმ მოწმეეფ“. შილებე თეცალ კითხვაქ გომრჩქინდან: ნიშნენდუო იესოშ თე სიტყვეფ, ნამდა თინეფ, მით თიშ მიმაჸუნალეფო გინირთუდეს, ხვალე იესოშ გურშენ იქადაგენდეს შხვეფწკუმა დოვარ თის ნიშნენდჷ, ნამდა თინეფქ ოკო გეჩინებაფუესკო იეჰოვა დო თიშ გურშენ ხოლო ოკო გაუცხადესკო ხალხის? თე კითხვაშ პასუხის საქმეეფიშ მა-15 დუდ მოგებაფუანა.

5. მუჭო ოძირუეს მოციქულეფქ დო უხუცესეფქ იერუსალიმს, ნამდა არძა ხალხიქ ოკო ქიგეგუკო იეჰოვაშ სახელ? (ქოძირით სურათ).

⁵ ახ. წ. 49 წანას მოციქულეფქ დო უხუცესეფქ იერუსალიმს აკიშაყარეს თიშ გინაჭყვიდირალო, მუ ოკო აკეთესკო წინადაუცვეთელ უცხოტომელეფქ, ნამდა ქრისტიანეფო გინირთესკო. თე ჩიებაშ ბოლოს იესოშ ჯიმაჸონერქ, იაკობიქ, თეცალ მუდგარენ თქუ: „[პეტრექ] ირფელ ქიმეჩუეს, მუჭო მიკაჯინ ღორონთიქ პირველო შხვა რჯულიშ კათას დო მუჭო გიშეგორ თინეფშე ხალხ მუშ სახელშო“. მიშ სახელს გულისხმენდჷ იაკობ? თიქ წინასწარმეტყველ ამოსიშ სიტყვეფ მიშინუ: „მუშენდა დოსქილადირეფქ გურგედვალირო გორან იეჰოვა არძა რჯულიშ ხალხწკუმა ართო, მით ჩქიმ სახელით გილურს, – იჩიებ იეჰოვა“ (საქ. 15:14–18). თაშ ნამდა, თინეფ, მით იესოშ მოწაფეეფო გინირთუდეს, იეჰოვას ხვალე ვეგეჩინებაფუანდესინ, „თიშ სახელით გილეშესკონ იჸიდ“. თენა ნიშნენს, ნამდა თინეფ გაცხადენდეს ღორონთიშ სახელიშ გურშენ დო ხალხ თინეფს თიშ სახელით იჩინენდუკონ იჸიდ.

6, 7. ა) მუშენ მორთჷ იესოქ დედამიწაშა? ბ) მუ რდჷ იესოშ მოულაშ ხოლო უმოს მნიშვნელოვან მიზეზ?

⁶ იესოშ სახელ ნიშნენს „იეჰოვა რე რსხება“. იესოქ გამართლჷ მუშ სახელიშ მნიშვნელობა, მუშენდა იეჰოვაქ თიშ საშვალებათ რწმენას გიმირჩქინანსინ თი ადამიანეფს მარადიულ სიცოცხლეშ იმენდ მეჩჷ. იესოქ დედამიწაშა მორთჷ, ნამდა მუშ სიცოცხლე დათმუკო კაცობრიობაშო (მათ. 20:28). გიშაჸიდირალიშ გაფათ თიქ ადამიანეფს ცოდეფიშ პატიებაშ დო ულიებ სიცოცხლეშ საშვალება მეჩჷ (იოან. 3:16).

⁷ მუშენ დესაჭირეს ადამიანეფს გიშაჸიდირქ? მუჭოთ წოხოლენ სტატიაშე გებგით, ჩქინ პირველ მშობლეფქ, ადამ დო ევაქ, ედემიშ ბაღის იეჰოვაშ წინააღმდეგ მიდართეს დო მიოდინუეს დედამიწას მარადიულო ცხოვრებაშ საშვალება (დაბ. 3:6, 24). მარა იესოქ ცოდამ კაცობრიობაშ დარსხებაშე უმოს მნიშვნელოვან მიზეზით მორთჷ დედამიწაშა. იეჰოვაშა ტყურა რდჷ ეკოწამებულ დო სახელ აფუდ გოტახილ (დაბ. 3:4, 5). თაშ ნამდა, ადამ დო ევაშ ცოდამ გამნარყიშ რსხება ბრელით უმოს მნიშვნელოვან საკითხწკუმა, იეჰოვაშ სახელიშ განწმენდაწკუმა, რდჷ დაკავშირებულ. ღორონთიშ სახელიშ განწმენდაშო იესოქ არძაშე უმოს დიდ საქმე აკეთ, მუშენდა თიქ, მუჭოთ იეჰოვაშ წარმომადგენელქ, სრულყოფილო შეასრულ ირფელ, მუთ მუამუშის თიშა აფუდ დავალებურ.

8. მუ ოკო არჩქილედუკო იესოშ არძა მიმაჸუნალს?

⁸ არძას, მით იესოშ რწმენას გეგმირჩქინანდ, იჸუაფუდუო იუდეველ დოვარ უცხოტომელ, ოკო არჩქილედუკო, ნამდა სინამდვილეს თინეფიშ რსხება იესოშ მუმაშე, იეჰოვაშე მიშჷ (იოან. 17:3). თეწკუმა ართო, იესოცალო, თინეფს ხოლო ქიგიადვალუდეს იეჰოვაშ სახელ. ათეშენ ოკო არჩქილედესკო, მუსხით მნიშვნელოვან რდჷ თე სახელიშ განწმენდა; თინეფიშ რსხება ზუსტას თეშა რდჷ დამოკიდებულ (საქ. 2:21, 22). თაშ ნამდა, იესოშ ართგურ მიმაჸუნალეფქ ოკო ქიდიგურუესკო ქოთ იეჰოვაშ დო ქოთ იესოშ გურშენ. ათეშენ, გასაკვირ ვა რე, მუშენ ათუ იესოქ იოანეშ მა-17 დუდის ინოჭარილ ლოცვა თეცალ სიტყვეფით: „მა სქან სახელ გაუცხად თინეფს დო ხოლო გაუცხადენქ, მუშენდა მუნეფქ ხოლო თი ჸოროფა გეგმირჩქინან, ნამდგათ მიჸოროფე, დო მა თინეფწკუმა ვორდე ართობას“ (იოან. 17:26).

„ᲗᲥᲕᲐ ᲠᲔᲗᲷ ᲩᲥᲘᲛ ᲛᲝᲬᲛᲔᲔᲤ“

9. მუჭო შემლებუნა ვოძირუათ, ნამდა იეჰოვაშ სახელ მნიშვნელოვან რე ჩქინო?

⁹ ქრისტეშ ნამდვილ მიმაჸუნალეფ ღორონთიშ სახელიშ განწმენდას ოკო ღებულენდან მონაწილებას (მათ. 6:9, 10). თინეფშო იეჰოვაშ სახელიშ განწმენდა ირფელშე უმოს მნიშვნელოვან ოკო რდასჷ დო საქმეეფით ხოლო ოკო ოძირუან თენა. მუშ კეთება რე საჭირო ჩქინ მხარეშე ღორონთიშ სახელიშ განწმენდაშო დო თიშ დამტკიცებელო, ნამდა ირფელ, მუდგას სატანა იეჰოვაშ გურშენ იჩიებ, ტყურა რე?

10. მუშე მეურს ჩიება ესაიაშ 42–44 დუდეფს? (ეს. 43:9; 44:7–9; ქოძირით სურათ).

¹⁰ ღორონთიშ სახელიშ განწმენდაშო ჩქი მუშ კეთება შემლებუნან თენა ჯგირო იძირე ესაიაშ 42–44 დუდეფს. თე დუდეფს ეჭარილ რე სიმბოლურ სასამართლო პროცეს, სოდეთ იეჰოვა იჭანუანს მუს ვამსახურუნან თი ხალხის დო ურაგად თინეფს, დამტკიცან, ნამდა მუნეფიშ ღორონთეფ მართალო არსებენა. თინა თეშ დამტკიცებელო მოწმეეფიშ მოჸუნაფას ხოლო ითხინს, მარა თეშ მოწმე მითინ ვა რე (წეკითხით ესაიაშ 43:9; 44:7–9).

11. მუს ურაგად იეჰოვა მუშ ხალხის ესაიაშ 43:10–12-ს?

¹¹ წეკითხით ესაიაშ 43:10–12. იეჰოვა მუშ ხალხის ურაგად: „თქვა რეთჷ ჩქიმ მოწმეეფ . . . დო მა თქვან ღორონთ ვორექ“. თინა მუშ მსახურეფს ოკითხ: „ქოარსებენსო ღორონთ ჩქიმ მეტ?!“ (ეს. 44:8). ჩქი მიღუნა პატი, ქუპასუხათ იეჰოვაშ თე კითხვას დო ჩქინ სიტყვათ დო საქმეთ დუვამტკიცათ, ნამდა ხვალე თინა რე ჭეშმარიტ ღორონთ დო თიშ სახელ არძა სახელშე უმოს დიდებულ რე. თეწკუმა ართო, ჩქინ ცხოვრებათ ვოძირანთ, ნამდა მთელ გურით მიჸორა იეჰოვა დო სატანაქ მუდგა სირთულე ვეშემხვამილუანინ, ბოლოშა თიშ ართგურეფ დოფსქიდუთ. თეშნერო, მიღუნა საშვალება, ხუჯ ქუდუკინათ იეჰოვაშ სახელიშ განწმენდას.

12. მუჭო შისრულ ესაიაშ 40:3, 5-ის ინოჭარილ წინასწარმეტყველებაქ?

¹² მუჟამსით იეჰოვაშ სახელიშ განწმენდაშო ჩქინ ოკეთებელს ვორთუთ, იესოშ მაგალითის მეპჸუნთ. ესაიაქ თინა ხოლო იწინასწარმეტყველ, ნამდა გამკორჩქინდუდ მიდგარენ, მით შარას მამზადენდ იეჰოვაშო (ეს. 40:3). მუჭო შისრულ ესაიაშ თე სიტყვეფქ? მანათალ იოანექ შარა მუმზად იესოს, მიდგაქ იეჰოვაშ სახელით მორთჷ დედამიწაშა დო თიშ სახელით რაგადანდჷ (მათ. 3:3; მარ. 1:2–4; ლუკ. 3:3–6). თე წინასწარმეტყველებას თე სიტყვეფ ხოლო რდჷ რაგადებულ: „გეცხადებ იეჰოვაშ დიდება“ (ეს. 40:5). მუჭო გეცხად იეჰოვაშ დიდებაქ? იესოქ, მუჭოთ იეჰოვაშ წარმომადგენელქ, იეჰოვაშ დავალება დედამიწას თიცალ სრულყოფილო შეასრულ, ნამდა თეშ იძირედ, ითამ იეჰოვა რდუკო მოულირ დო თიქ აკეთუკო თე საქმე (იოან. 12:45).

13. მუჭო შემლებუნა მივაჸუნათ იესოშ მაგალითის?

¹³ იესოცალო ჩქი ხოლო იეჰოვაშ მოწმეეფ ვორეთ, თიშ სახელ გებძუნა დო არძას ვოგებაფუანთ თიშ დიდებულ სახელიშ გურშენ. მარა თექ ჯგირო გეგშამირთანინ, საჭირო რე, ხალხის თიშ გურშენ ხოლო ქივეჩუათ, იესოქ მუ აკეთ იეჰოვაშ სახელიშ განწმენდაშო (საქ. 1:8). იესოშ უჯგუშო მითინს ვა დუმოწმებ იეჰოვაშ გურშენ. ჩქი თიშ მაგალითის მეპჸუნთ (გამოცხ. 1:5). მორთ ასე თიშე ქიფჩუათ, მუ ოკო ვაკეთათ, ნამდა ვოძირუათ, მუსხით მნიშვნელოვან რე იეჰოვაშ სახელ ჩქინო, თითოულშო.

ᲛᲣᲡ ᲜᲘᲨᲜᲔᲜᲡ ᲘᲔᲰᲝᲕᲐᲨ ᲡᲐᲮᲔᲚ ᲩᲥᲘᲜᲝ?

14. მუჭოთ ფსალმუნეფიშ 105:3-შე იძირე, მუნერ დამოკიდებულება მიღუნა იეჰოვაშ სახელშენ?

¹⁴ ჩქი მოამაყუნა იეჰოვაშ სახელ (წეკითხით ფსალმუნეფიშ 105:3). იეჰოვას მანგარო ოხიოლ თიშ ძირაფა, ნამდა იფცქვანთ თიშ სახელით (იერ. 9:23, 24; 1 კორ. 1:31; 2 კორ. 10:17). იფცქვანდათ იეჰოვათ, ნიშნენს, მოამაყუდან, ნამდა თინა ჩქინ ღორონთ რე. ჩქი დიდ პატით მიმორჩქუნა, ნამდა მიღუნა საშვალება, განვადიდათ თიშ სახელ დო ხალხის ქუვოძირუათ, მუნერ ჯგირ ღორონთ რე თინა. ონჯღორე ვა მიჩქუნა, თანამშრომელეფს, კლასელეფს, მეზობელეფს დო შხვეფს ქუწუათ, იეჰოვაშ მოწმეეფ ვორეთინ. ეშმაკის ოკო, მიმოტებაფუან შხვეფწკუმა იეჰოვაშ სახელიშ გურშენ ჩიება (იერ. 11:21; გამოცხ. 12:17). სატანა დო თიშ მიმაჸუნალეფ ოცადუნა, ღორონთიშ სახელ გაჭყოლიდუან ადამიანეფს (იერ. 23:26, 27). მარა ჩქი თიშმანწარას მიჸორა იეჰოვაშ სახელ, ნამდა ხეშე ვა უტენთ საშვალებას, განვადიდათ თინა (ფსალმ. 5:11; 89:16).

15. მუ მიშურს იეჰოვაშ სახელიშ მოშინაფაშა?

¹⁵ ჩქი ირიათო ფშინანთ იეჰოვაშ სახელს (იოელ. 2:32; რომ. 10:13, 14). იეჰოვაშ სახელიშ მოშინაფაშა თე სახელიშ რჩქინა დო გიმორნაფაშე უმოს მიშურს. თენა ნიშნენს, ნამდა იფჩინენდათ ღორონთიშ პიროვნებას, ვონდუდათ თის დო თიშ მოხვარაშა დო ხელმძღვანელობაშა ვორდათ დაიმენდებულ (ფსალმ. 20:7; 99:6; 116:4; 145:18). იეჰოვაშ სახელს თი გაგებათ ხოლო ფშინანთ, ნამდა შხვეფს ვოგებაფუანთ თიშ სახელს დო ვეჩიებუთ თიშ დიდებულ თვისებეფიშ გურშენ. თეწკუმა ართო, ვოხვარუთ, დოთირუან მუნეფიშ ცხოვრება დო მიღან ღორონთიშ მოწონა (ეს. 12:4; საქ. 2:21, 38).

16. მუჭო შემლებუნა ვოძირუათ, ნამდა სატანა მეტყურე რე?

¹⁶ ჩქი მზათ ვორეთ, იპტანჯათ იეჰოვაშ სახელიშ გურშენ (იაკ. 5:10, 11). მუჟამსით სირთულეეფიშ დროს იეჰოვაშ ართგურეფ ფსქიდუთ, ვამტკიცენთ, ნამდა სატანა მეტყურე რე. იობიშ დროს სატანა ამტკიცენდჷ, ნამდა ღორონთიშ მსახურეფ ხვალე მუთუნ ვა უჭირდესინ თიმ დროს ომსახურუდეს ართგურო იეჰოვას, მარა სირთულეეფს ქეშეხვადუდესინ, მიოტენდეს თიშ მსახურებას. თიქ თქუ: „სიცოცხლეშ მანგიორო ირფელს გამასქიდუ კოჩ“ (იობ. 2:4). მარა იობიქ მუშ ართგურობათ ოძირუ, ნამდა თენა ტყურა რდჷ. იობცალო, ჩქი ხოლო მიღუნა თიშ პატი, დუვამტკიცათ, ნამდა სატანაქ მუდგა სირთულე ვეშემხვამილუან დო მუჭოდგა ვეცადასინ, ვა ურთინუანთ იეჰოვას ოჭიშის. შემლებუნა ბოლოშა ვორდათ დარწმუნებულ, ნამდა იეჰოვა აუცილებერო დოფთხილანა მუშ სახელიშ გურშენ (იოან. 17:11).

17. 1 პეტრეშ 2:12-იშ თანახმას, ხოლო მუჭო შემლებუნა იეჰოვაშ სახელიშ განდიდება?

¹⁷ ჩქი განვადიდენთ იეჰოვაშ სახელს (იგავ. 30:9; იერ. 7:8–11). რახანს ღორონთიშ სახელ გებძუნა, შილებე ჩქინ საქციელით ვარდა განვადიდათ თიშ სახელ დო ვარდა შეურაცხყოფა მივორინუათ (წეკითხით 1 პეტრეშ 2:12). მოკონა, ირფელ გუვაკეთათ, ნამდა ჩქინ სიტყვათ დოვარ საქმეთ დიდება უძღვინათ ჩქინ ღორონთის დო თეშნერო, არასრულყოფილებაშ უმკუჯინუო, განვადიდათ თიშ სახელ.

18. ხოლო მუჭო ვოძირანთ, ნამდა იეჰოვაშ სახელ მნიშვნელოვან რე ჩქინო? (ქოძირით სქოლიო).

¹⁸ ჩქინო მუნერ სახელ მაღვენუნან თიშე უმოს მნიშვნელოვან იეჰოვაშ სახელ რე (ფსალმ. 138:2). მუშენ რე თეცალ დამოკიდებულება მნიშვნელოვან? მუშენდა ხშირას ხალხის ვა მოწონს, ნამდა თეშ იფქციებუთ, მუჭოთ იეჰოვაშ თოლს რე სწორ, ათეშენ შილებე სახელს მიტახუნდან.a იეჰოვაშ სახელქ განდიდებულქ ქიჸუკონ თიშენ, იესო მზათ რდჷ, უბადოშ მაკეთებელიშ სახელით დოღურუკო. თიქ თე ონჯღორე მუთუნო ვემირჩქინ დო ვართ თიშე ნერვიანობას რდჷ გინოჸუნელ, მუს ფიქრენდეს შხვეფ მუშ გურშენ (ებრ. 12:2–4). იესოს მთელ ყურადღება იეჰოვაშ ნებაშ შესრულებაშა აფუდ გინოღალირ (მათ. 26:39).

19. მუ დამოკიდებულება გიღუნა ღორონთიშ სახელიშ მიმართ დო მუშენ?

¹⁹ ჩქი მოამაყუნა იეჰოვაშ სახელ დო დიდ პატით მიმორჩქუნა, ნამდა თიშ მოწმეეფ ბჯოხონა. ათეშენ მზათ ვორეთ, ირნერ დამცირება მიფთვინათ, მუშენდა ჩქინო არძაშ უმოს მნიშვნელოვან იეჰოვაშ სახელ რე დო ვართ ხოლო თინა, ხალხ მუს იფიქრენს ჩქინდე. თაშ ნამდა, მორთ გინოჭყვიდილ მაფუდან, სატანაქ მუდგა სირთულე ვეშემხვამილუანინ, ვემვოტუათ იეჰოვაშ სახელიშ განდიდება დო თეშნერო ვოძირუათ, ნამდა იესოცალო, ჩქინო ხოლო ირფელიშ უმოს მნიშვნელოვან იეჰოვაშ სახელ რე.