JWAMLUME NI JWAMKONGWE JWANDANDA

ANA cici cacili casambano paciwulilipa? Ali ŵanduwo. Ŵeleŵa ali jwamlume ni jwamkongwe jwandanda. Ana nduni juŵapanganyisye? Ali Mlungu. Ana akummanyilila lina lyakwe? Ali Yehofa. Jwamlume ni jwamkongwejo ŵakolanjikwaga Adamu ni Hawa.

Ana Yehofa ŵampanganyisye Adamu catuli? Ŵajigele litaka lyapasi nikupanganya ni litakalyo cilu cambone mnope ca mundu. Kaneko ŵapepelele mbumu mumbula mwakwe, ni Adamuwo ŵaŵele cijumi.

Yehofa ŵakwete masengo gakuti Adamu akamule. Ŵamsalile Adamu kuti ayikolanje yinyama yakulekanganalekangana mena gakwe. Komboleka kuti Adamu ŵayiweni yinyamayi kwandaŵi jelewu, ni ligongo lyakwe jwalakwejo akakombwele kusagula mena gambone mnope ga yinyamayo. Paŵaliji mkuyikolanga yinyamayo mena, Adamu ŵakopocele cindu cine. Ana akucimanyilila?

Yinyama yosope yayilume, yatamaga ni yayikongwe. Paliji ndembo syasilume ni syasikongwe, masimba gagalume ni gagakongwe. Nambo Adamu nganakola ŵamkwakwe. Sambano Yehofa ŵamgonesye lugono lwekulungwa Adamu, ni ŵamtyosisye liwupa lya luŵalati lwakwe. Yehofa ŵakamulicisye masengo luŵalatilo pakupanganya jwamkongwe, ni ŵaliji ŵamkwakwe Adamu.

Adamu ŵasangalele kwabasi! Agambe ganisya muŵasangalalile Hawa kutama mu mgunda wakusalalawo! Sambano jemanjaji akakombolece kuŵeleka ŵanace ni kutamaga mwakusangalala.

Yehofa ŵasakaga kuti Adamu ni Hawa atameje ni umi wangamala. Jwalakwe ŵasakaga kuti jemanjaji alinganye cilambo cosope kuŵa cakusalala mpela mgunda wa Edeni. Mwangakayicila Adamu ni Hawa ŵasangalele mnope paŵaganicisyaga kutenda yeleyi! Ana wawojo akasangalele kulinganya nawo cilamboci kuŵa mgunda wakusalala? Nambo Adamu ni Hawa nganajendelecela kuŵa ŵakusangalala. Kwende tulole ligongo lyakwe.