YEHOFA AKUPELEKA MALAMUSI GAKWE

PALI papite miyesi ciŵandika jiŵili Ayisalayeli ali atyosile ku Eguputo, akwika ku Litumbi lya Sinayi, lyakusalikolangasoni kuti Holebe. Gelega gali malo gaŵaŵecete Yehofa kwa Musa kupitila mu liwukutu lyakolela moto lila. Ŵandu akutaŵa matenti gawo nikutama kaje pelepa kwakandaŵi.

Ŵandu ŵala ali pasi pa litumbilyo kwembeceyaga, Musa akukwela palitumbilyo. Ali pacanya petumbi, Yehofa akumsalila Musa kuti akusaka Ayisalayeli ampikanileje Jwalakwe, soni kuti aŵe ŵandu Ŵakwe ŵapajika. Musa patulwice kwitumbi kula, akwasalila Ayisalayeli yaŵaŵecete Yehofa. Soni ŵandu ŵala akwiticisya kuti cacimpikanila Yehofa, ligongo akusaka kuŵa ŵandu ŵakwe.

Yehofa sambano akutenda cindu cakusimonjesya. Akutendekasya pacanya petumbi pala kopoka lyosi, soni cilindimo cikupikanika mnope. Akuŵecetasoni kwa ŵandu kuti: ‘Une ndili Yehofa Mlungu jwawo junakopwesye ku Eguputo.’ Kaneko akulamula kuti: ‘Akasalambila milungu jine nambo une.’

Mlungu akwapasoni Ayisalayeli malamusi gane gakwana msano ni mcece. Ŵanduwo wakamwile mnope woga. Akumsalila Musa kuti: ‘Mmwejo m’ŵeceteje ni m’weji, ligongo tukogopa kuwa naga Mlungu aŵeceteje kwa m’weji.’

Kaneko Yehofa akumsalila Musa kuti: ‘M’yice kwa une kwitumbi. Cinampe mapale gaŵili ga maganga, pelepo nembilepo malamusi gakusosekwa kugakuya ŵandu.’ Kaneko Musa akwawulasoni kwitumbi kula. Akutamako kwa masiku 40.

Mlungu akwete malamusi gamajinji gakuti ŵandu ŵakwe agakuyeje. Musa akugalemba malamusi gosopega. Mlungu akumpasoni Musa mapale gaŵili ga maganga. Pa mapale ga magangaga, Mlungu msyene alembilepo malamusi 10 gaŵaŵecete kwa ŵandu wosope. Gakusakolanjikwa kuŵa Malamusi Likumi.

Malamusi Likumiga gali malamusi gakusosekwa. Nambosoni malamusi gane gosope gaŵapelece Mlungu kwa Ayisalayeli gali gakusosekwa. Line mwa malamusiga lili lyakuti: ‘Mumnonyeleje Yehofa Mlungu jwenu ni mtima wenu wosope, ni nganisyo syenu syosope, ni umi wenu wosope, soni ni macili genu gosope.’ Soni line lili lyakuti: ‘Mumnonyeleje mjenu mpela mwamkusalinonyelela mwasyene.’ Mwanace jwa Mlungu, Yesu Klistu, ŵaŵecete kuti gelega gali malamusi gamakulungwa mnope gaŵapelece Yehofa kwa ŵandu ŵakwe Ayisalayeli. Kaneko tucilijiganya yindu yejinji pakwamba ya Mwanace jwa Mlunguju, soni yijiganyo yakwe.