Ŵakulalichila Ngani Syambone

YEHOFA ŵatupele chisyasyo chambone chakuti tukuyeje, chachili Mwanagwe, Yesu Klistu. (1 Pet. 2:21) Mundu jwaŵele jwakumkuya jwa Yesu, akusalalichila ngani syambone mpela jwakutumichila jwa Mlungu. Pakusaka kulosya kuti kumkuya Yesu kuli kwakulimbikasya mwausimu, Yesu ŵaŵechete kuti, “M’yiche kwangune, jemanja wosope ŵakupela ni ŵakusitopelwa, nipo tinampumusye. Twichilani likongwa lyangu nipo mlijiganye kwa une, pakuti ndili jwakutulala mtima ni jwakulinandiya; naga mkutenda yingumsalilayi, timchisimana chipumulisi cha umi wenu.” (Maloŵega tugombelechesye m’weji) (Mat. 11:28, 29) Ŵandu ŵasagwile kumkuya Yesu asimichisye kuti maloŵe gakwega gali gasyesyene.

² Yesu jwali Jwakutumichila Jwamkulungwa jwa Mlungu, ŵaŵilasile ŵandu ŵane kuti aŵe ŵakumkuya ŵakwe. (Mat. 9:9; Yoh. 1:43) Jwalakwe ŵajiganyaga kalalichile, soni ŵatumisyaga kuti akatende masengo gaŵatendaga Yesugo. (Mat. 10:1–11:1; 20:28; Luk. 4:43) Kaneko, jwalakwe ŵatumile ŵandu ŵane ŵakwana 70 kuti akalalichile ngani syambone syakwamba ya Uchimwene wa Mlungu. (Luk. 10:1, 8-11) Yesu paŵatumaga ŵakulijiganya ŵakwe ŵasalile kuti, “Jwalijose jwakumpikanila jemanja akumbikanila une, jwakumkana jemanja akungana soni une. Nipo jwakungana une akwakana soni Atati ŵiŵandumile une.” (Luk. 10:16) Pelepa, Yesu ŵagombelechesyaga kusosekwa kwa masengo gaŵapele ŵakulijiganya ŵakwe. Ŵakulijiganyaŵa ŵajimilaga Yesu soni Mlungu Jwamachili gosope. Mwelemu ni mwayiŵelelesoni lelo jino kwa ŵandu ŵakupikanila maloŵe ga Yesu gakuti, “m’yiche munguye une.” (Luk. 18:22; 2 Akoli. 2:17) Ŵandu wosope ŵakusapikanila maloŵega, Mlungu ŵapele masengo gakulalichila ngani syambone syakwamba ya Uchimwene soni kupanganya ŵakulijiganya.—Mat. 24:14; 28:19, 20.

³ Ligongo lyakuti tupikanile maloŵe ga Yesu gakuti tumkuye, tukwete upile ‘wakummanyilila’ Yehofa Mlungu soni Yesu Klistu. (Yoh. 17:3) Tulijiganyisye matala ga Yehofa, soni ni chikamuchisyo chakwe, tukombwele kugalawusya umi wetu, mwakuwala umi wasambano soni kutama mwakamulana ni ndamo syakulungama sya Yehofa. (Alo. 12:1, 2; Aef. 4:22-24; Akolo. 3:9, 10) Kuyamichila kwetu ni mtima wosope yatutendeleyi ni kwakukusatulimbikasya kuti tulipeleche kwa Yehofa, soni tukusalosya kulipelekaku mwakubatisidwa m’mesi. Patubatisidwe tukusaŵa ŵakutumichila ŵa Mlungu.

⁴ Ndaŵi syosope tukumbuchileje kuti tukusosekwa kutumichila Mlungu ni mtima weswela soni tuli ŵangali magambo m’miyala mwetu. (Sal. 24:3, 4; Yes. 52:11; 2 Akoli. 6:14–7:1) Kukola chikulupi mwa Yesu, kukusatukamuchisya kuŵa ni chikumbumtima cheswela. (Ahe. 10:19-23, 35, 36; Chiw. 7:9, 10, 14) Ndumetume Paulo ŵakalamwisye Aklistu kuti atendeje yiliyose kuti amchimbichisye Mlungu pakusaka kuti akakuŵasya ŵane. Ndumetume Petulo ŵasasile kuti kola ndamo syambone kuli kwakusosekwa ligongo mpaka kwatendekasye ŵangakulupilila kutanda usyesyene. (1 Akoli. 10:31, 33; 1 Pet. 3:1) Ana mpaka tumkamuchisye chamtuli mundu kuti aŵe jwakulalichila ngani syambone?

ŴAKULALICHILA ŴASAMBANO

⁵ Patandisye lijiganyo lya Baibulo ni mundu jwa chidwi, amlimbikasyeje kuti ŵasalileje ŵane yakulijiganyayo. Jwasambanojo papatile upile, komboleka kwasalilaga ŵachibale ŵakwe, achimjakwe, ŵakamula nawo masengo, soni ŵane ŵaliwose. Lyeleli lili litala lyakusosekwa lyakwakamuchisya ŵasambano kuŵa ŵakulalichila ngani syambone mpela ŵakumkuya ŵa Yesu Klistu. (Mat. 9:9; Luk. 6:40) Ŵasambanoŵa pakwawula pasogolo mwausimu, soni kusyoŵelela kulalichila mwaupile, mwangakayichila chachilosya kuti akusachilila kutendaga nawo utumiki wa mumgunda.

YAKUSOSEKWA KUYIKWANILISYA

⁶ Mkanajawule ni jwakulijiganya Baibulo kukulalichila ku nyumba ni nyumba paulendo wandanda, akusosekwa alolechesye kuti jwalakwejo akwanilisya yindu yine. Naga tupite mu utumiki wa mumgunda ni mundu jwine, jwalakwe akusalilosya peswela kuti akamulana ni Mboni sya Yehofa. Myoyo, mpaka yiŵe chenene kuti mundujo aŵe ali achenjile kala umi wakwe kuti ukamulaneje ni ndamo syakulungama sya Yehofa, yampaka yimtendekasye kuti aŵe jwakulalichila jwangabatisidwa.

⁷ Pakulijiganya ni mundu soni kukambilana najo malamusi ga m’Baibulo, akusamanyilila mwayiŵelele yindu ni mundujo. Mpaka amanyilile naga mundu akutama mwakamulana ni yakusalijiganya. Nambope, pana mbali sine sya umi wa jwakulijiganyajo syele achakulungwa ŵa mumpingo mpaka asosekwe kukambilana najo yalumo ni wawojo.

⁸ Jwakulondesya masengo ga achakulungwa chachilinganya yakuti, achakulungwa ŵaŵili (jumo jwa mu komiti ja utumiki) akambilane yindu yine ni jwakulijiganya Baibulojo. M’mipingo mwamuli achakulungwa ŵamnono, jwamkulungwa jumo ni jwakutumichila jwakamuchisya jwakuŵajilwa mpaka atende mbaliji. Abale ŵasagulidwe kutenda mbaliji akusosekwa kwanguya kukambilana ni mundujo. Naga abalewo ŵasalile yeleyi lisiku lyamisongano, mpaka yiŵe yakomboleka kukambilana ni wawojo soni jwakulijiganyajo panyuma pa misonganojo. Achakulungwawo chachilolechesya kuti jwalijose akuŵecheta mwagopoka. Jemanjaji mkanamjitichisye jwakulijiganyajo kuŵa jwakulalichila jwangabatisidwa chachisaka kumanyilila yindu yakuyichisyayi:

1. (1) Ana jwalakwejo akusakulupilila kuti Baibulo gali Maloŵe gakusalilidwa ni Mlungu?—2 Tim. 3:16.

2. (2) Ana jwalakwejo akumanyilila soni kulupilila yijiganyo yandanda ya m’Malemba mwamti ŵandu ali am’wusisye yiwusyo, mpaka ajanje mwakamulana ni Baibulo ngaŵaga mwakamulana ni yijiganyo ya dini sya unami kapena nganisyo syakwe?—Mat. 7:21-23; 2 Tim. 2:15.

3. (3) Ana akusapikanila lilamusi lya m’Baibulo lyakusongana pampepe ni ŵandu ŵa Yehofa ku misongano jampingo naga umi wakwe ukumkunda kutenda yeleyo?—Sal. 122:1; Ahe. 10:24, 25.

4. (4) Ana akusamanyilila yajikusajiganya Baibulo pakwamba ya kutamila pamo kwa ŵandu ŵangalombana, chikululu, mitala soni gonana kwa achalumepe kapena achakongwepe, soni ana akusatama mwakamulana ni yijiganyo yeleyi? Naga mundujo ali jwamlombele, ana ŵalombene mwakuya malamusi?—Mat. 19:9; 1 Akoli. 6:9, 10; 1 Tim. 3:2, 12; Ahe. 13:4.

5. (5) Ana akusapikanila lilamusi lya m’Baibulo lyakulekasya kolelwa soni kamulichisya masengo mitela jakusokonasya mtwe?—2 Akoli. 7:1; Aef. 5:18; 1 Pet. 4:3, 4.

6. (6) Ana akusamanyilila kusosekwa kwa kuŵambala kunguluka ni ŵandu ŵakusakala?—1 Akoli. 15:33.

7. (7) Ana jwalakwe ŵalilekangenye ni dini soni magulu ga dini sya unami gaŵakamulanaga nago? Ana jwalakwe ŵalesile kusimanikwa soni kamuchisya yakutendekwa yawo?—2 Akoli. 6:14-18; Chiw. 18:4.

8. (8) Ana jwalakwe jwangajigala nawo mbali mu yakutendekwa yandale?—Yoh. 6:15; 15:19; Yak. 1:27.

9. (9) Ana jwalakwe akusakulupilila soni akusatamaga mwakamulana ni yakuyisala pa Yesaya 2:4 pakwamba ya ukangani wa yilambo?

10. (10) Ana jwalakwejo akusachilila kwene kuŵa jwa Mboni sya Yehofa?—Sal. 110:3.

⁹ Naga achakulungwaŵa ngakusimichisya mwakusayiwonela jwakulijiganyajo yindu yeleyi, komboleka kum’wusya yiwusyo pakamulichisya masengo malemba gagali kumbesi kwa yiwusyoyi. Yili yakusosekwa kuti jwakulijiganya Baibulojo apikanichisye kuti ŵandu ŵakusalalichila ni Mboni sya Yehofa, akusosekwa kutamaga mwakamulana ni yagakusasala Malemba. Yakuti kajanje jwakulijiganyajo, mpaka yakamuchisye achakulungwawo kumanyilila naga jwakulijiganyajo akumanyilila yakusosekwa kutenda, soni naga akuŵajilwa kulalichilaga nawo.

¹⁰ Naga akuŵajilwa, achakulungwawo akusosekwa kumsalila jwakulijiganyajo ndaŵi jijojo. Ndaŵi syejinji, yeleyi yikusatendekwa kumbesi kwa kukambilana. Naga akuŵajilwa, mpaka ampochele ni makono gaŵili mpela jwakulalichila. (Alo. 15:7) Akusosekwa kumlimbikasya kuti atande kulalichila, soni kuti apeleche lipoti lyakwe lya mu utumiki pambesi pa mwesi. Achakulungwawo akusosekwa kumsalila jwakulijiganya Baibulojo kuti naga mundu aŵajilwe kuŵa jwakulalichila jwangabatisidwa, soni naga apeleche lipoti lyakwe lyandanda, nipakusam’wugulila Chakulembapo Masengo ga Jwakulalichila jwa Mumpingo chachikusakola lina lyakwe soni akusachisungaga mpela yikalata yakusosekwa mnope ya mpingo. Achakulungwawo akusalokotela malipoti ga jwakulalichila kuti gulu jikomboleje kusamalila masengo ga Mboni sya Yehofa pa chilambo chosope ni chakulinga chakuti jwakulalichila ajigaleje mbali pa yakutendekwa yausimu soni kupochela chikamuchisyo chausimu. Konjechesya pelepa, achakulungwaŵa mpaka ŵakumbusyeje ŵakulalichila ŵasambano kuti malipoti ga jwalijose gakusasunjidwa mwakamulana ni Malamusi Gakwamba ya Kusunga Chinsisi ga Mboni sya Yehofa pa Chilambo Chosope gagakusasimanikwa pa jw.org.

¹¹ Kumanyigana chenene ni jwakulalichila jwasambano, soni kulosya kuti tukusayamichila yakusatenda yikusamlimbikasya. Yeleyi mpaka yimkamuchisyesoni kuti atumichileje Yehofa mwakulimbichila soni kuti apelecheje lipoti lyakwe lya utumiki mwesi uliwose.—Afi. 2:4; Ahe. 13:2.

¹² Naga achakulungwa ajikutile kuti jwakulijiganya Baibulojo akuŵajilwa kwinjilaga mu utumiki wa mumgunda, nikuti jwakulijiganyajo akusosekwa kuti apochele buku jakwe ja Gulu Jakutenda Yakusasaka Yehofa. Jwalakwe papeleche lipoti lyakwe lya utumiki lyandanda, chimanyisyo chakata chichipelechedwa kumpingo chakusala kuti jwalakwe ali jwakulalichila jwangabatisidwa jwasambano.

KWAKAMUCHISYA ŴANACHE

¹³ Ŵanache nombenawo mpaka aŵajilwe kuŵa ŵakulalichila ngani syambone. Yesu ŵapochele ŵanache ni kwajaliwa. (Mat. 19:13-15; 21:15, 16) Atamose kuti achinangolo ni ŵakwete udindo wekulungwa wakwajiganya ŵanache ŵawo, ŵandu ŵane mumpingo mpaka ŵakamuchisyesoni ŵanache ŵakusachilila kuti alalichileje nawo ya Uchimwene wa Mlungu. Naga wawojo ali nangolo, chisyasyo chawo chambone mu utumiki chichalimbikasya mnope ŵanache ŵawo kutumichilaga Mlungu mwakulimbichila. Ana mpaka tumkamuchisyesoni chamtuli mwanache jwandamo syambone jwakusachilila kwasalilaga ŵane ya chikulupi chakwe?

¹⁴ Mpaka yisosekwe kuti nangolo achingangane ni jumo jwa m’Komiti ja Utumiki ni kukambilana naga mwanachejo mpaka aŵajilwe kuŵa jwakulalichila. Jwakulondesya masengo ga achakulungwa chachilinganya yakuti achakulungwa ŵaŵili (jumo jwa mu komiti ja utumiki) akachingangane ni mwanachejo yimpepe ni nangolo (achinangolo) kapena jwalijose jwakusatama najo. Naga mwanachejo akusamanyilila yijiganyo yandanda ya m’Baibulo soni akulosya kuti akusasachilila kwinjilaga mu utumiki, welewu mpaka uŵe umboni wakulosya kuti akwawula pasogolo. Panyuma pa kukambilana yindu yeleyi, ni yine yakusakambilanasoni ni mundu jwamkulungwa, achakulungwawo mpaka alole naga mwanachejo akuŵajilwa kuŵa jwakulalichila jwangabatisidwa. (Luk. 6:45; Alo. 10:10) Achakulungwaŵa pakukambilana ni mwanache mpaka yiŵe chenene kuti akakambilanaga najo yindu yakusakambilana ni achakulungwa yakuti mwanachejo ngayikumkwaya.

¹⁵ Pakuchingangana ni mwanachejo achakulungwaŵa akusosekwa kum’yamichila mwanachejo ligongo lya kwawula pasogolo kwatesile, soni akusosekwa kumlimbikasya kuti asachilile kubatisidwa. Nombe nawo achinangolo akusosekwa kwayamichila ligongo jemanjajo aŵele ali mkumjiganya usyesyene mwakulimbichila mwanachejo. Pakusaka kwakamuchisya achinangolo mwampaka atendele pakumkamuchisya mwanache jwawo, achakulungwaŵa komboleka kwasalila achinangolowo kuti akaŵalanje yayili pa mtwe wakuti “Utenga kwa Achinangolo,” pa mapeji 179-181.

KULIPELEKA SONI KUBATISIDWA

¹⁶ Pammanyilile Yehofa soni kola chinonyelo pa jwalakwe mwakwanilisya yajikusasala Baibulo soni kujigala nawo mbali mu utumiki, akusosekwa kulimbisya unasi wawo ni jwalakwejo. Mwamtuli? Mwakulipeleka kwa jwalakwe, soni kulosya kulipelekaku mwakubatisidwa m’mesi.—Mat. 28:19, 20.

¹⁷ Kulipeleka kukusalosya chakulinga chapajika chatukwete. Kulipeleka kwa Mlungu kukusagopolela kum’yichila jwalakwe mwipopelo, soni kusimichisya kuti pa umi wawo wosope chachimtumichila jwalakwe soni kwenda m’matala gakwe. Kukugopolelasoni kuti chachilipeleka kwa jwalakwe jikape mpaka kalakala. (Det. 5:9) Kulipelekaku jili ngani jatukusalisagulila pajika soni mundu akusalipeleka kwajika. Pangali mundu jwampaka ŵatendele yeleyi.

¹⁸ Nambope, akusosekwa kutenda yinesoni konjechesya pa kumsalila Yehofa kwajika kuti akusaka amtumichileje. Akusosekwa kwalosya ŵane kuti wawojo alipeleche kwa Mlungu. Mpaka alosye yeleyi mwakubatisidwa m’mesi mpela muŵatendele Yesu. (1 Pet. 2:21; 3:21) Naga asimichisye mumtima mwawo kuti chamtumichileje Yehofa, soni akusaka kubatisidwa, ana akusosekwa kutenda chichi? Akusosekwa kumsalila yeleyi jwakulondesya masengo ga achakulungwa. Jwalakwe chachilinganya yakuti achakulungwa ŵane achingangane ni wawojo kuti asimichisye naga wawojo akwanilisya yajikusasala Baibulo pakwamba ya ŵakusaka kubatisidwa. Kuti amanyilile yejinji, aŵalanjesoni pa mtwe wakuti “Utenga kwa Jwakulalichila Jwangabatisidwa,” pa mapeji 182-184 m’bukuji, soni wakuti “Yiwusyo kwa Ŵakusaka Kubatisidwa,” pa mapeji 185-207.

LIPOTI LYA MWAWUKWAWULILA PASOGOLO UTUMIKI

¹⁹ Kwa yaka yejinji, malipoti gakusala ya kuwanda kwa kulambila kusyesyene pachilambo chosope, gaŵele gali mkwalimbikasya ŵandu ŵa Yehofa. Kutandila pa ndaŵi jele Yesu Klistu ŵasalile kandanda ŵakulijiganya ŵakwe kuti ngani syambone tisichilalichidwa pachilambo chosope chapasi, Aklistu ŵasyesyene aŵele ali mkwembecheya mwachidwi kuti ayiwone yeleyi yili mkukwanilichikwa.—Mat. 28:19, 20; Maliko 13:10; Mase. 1:8.

²⁰ Ŵakumkuya Yesu ŵandanda ŵasangalalaga kupikanila malipoti gakusala ya mwagajawulilaga pasogolo masengo gakulalichila. (Maliko 6:30) Buku ja Masengo jikusasala kuti pa Pentekosite mu 33 C.E., paliji ŵandu 120 pandaŵi jele msimu weswela wayichilaga ŵakulijiganyawo. Kaneko chiŵalanjilo cha ŵakulijiganyawo chajonjechekwe kwika pa 3,000 kaneko kwika pa 5,000. Ŵakulijganyaŵa ŵapikene kuti “lisiku ni lisiku Ambuje ŵaliji mkwajonjechesya ŵane ŵandu ŵakupochela chikulupusyo” soni kuti “ŵakutaga mbopesi ŵajinji ŵajitichisye chikulupicho.” (Mase. 1:15; 2:5-11, 41, 47; 4:4; 6:7) Malipoti ga konjechekwa kwa ŵanduku, galimbikasisye mnope ŵakulijiganya ŵala. Malipoti gakusangalasyaga galimbikasisye kuti apitilisye kamula masengo gaŵalamwile, atamose kuti achimlongola ŵa dini ja Chiyuda ŵalagasyaga.

²¹ Cha m’ma 60 mpaka 61 C.E., Paulo ŵalembile lipoti mu chikalata chakwe cha kwa Akolose, kuti ngani syambone syaliji ‘mkuŵeleka yisogosi soni ni kuwanda pachilambo chosope chapasi,’ soni kuti ‘syalalichidwe kwa ŵandu ŵapachilambo chosope chapasi.’ (Akolo. 1:5, 6, 23) Aklistu ŵandanda ŵapikanilaga Maloŵe ga Mlungu, soni msimu weswela wapaga machili gakuti akomboleje kukamula masengo gamakulungwa gakulalichila. Ayuda mkanaŵe konanjidwa mu 70 C.E., Aklistu ŵakulupichikaŵa piŵapikene malipoti gakwamba ya masengo gagatendekwagaga, yalimbikasisye mnope.

²² Mwakulandana ni yeleyi, gulu ja Yehofa ja masiku agano jikusasunga malipoti ga masengo gagakutendekwa pakwanilisya lilemba lya Mateyu 24:14, lyalikusati, “Ngani Syambonesi syakwamba ya Uchimwene wa Mlungu tisichilalichidwa pachilambo chosope chapasi, kuti ŵandu ŵamitundu josope asipikane, kaneko mbesi ni tijichiyika.” Mpela ŵakutumichila Mlungu ŵakulipeleka, tukwete masengo gatukusosekwa kugakamula mwachitema. Jwalijose akusosekwa kola chidwi ni masengo gakulalichila kuti gatendekwe mwakwanila mbesi mkanijiyiche. Yehofa chachilolechesya kuti masengoga gatendekwe mwakwanila, soni naga tukamula nawo masengoga, Yehofa chachisangalala nawe.—Esek. 3:18-21.

LIPOTI LYAWO LYA UTUMIKI WA MUMGUNDA

²³ Ana kusyesyene tukusosekwa kutendela lipoti chichi? Kapepala kakulembapo Lipoti lya Utumiki wa Mumgunda kakakusapelechedwa ni gulu, kakusalosya yindu yatukusosekwa kulemba. Nambope, yayili pasipa mpaka yiŵe yakamuchisya.

²⁴ Palembile kuti “Yagaŵile (Chinga pa Yala Kapena M’matala Gane),” alembe yindu yosope yagaŵile kwa ŵandu ŵanganaŵa Mboni syebatisidwe. Palembile kuti “Mafidiyo galosisye,” alembe maulendo galosisye mafidiyo getu.

²⁵ Palembile kuti “Maulendo Gakuwilisya” akusosekwa kulembapo chiŵalanjilo chosope cha maulendo gatesile kwa mundu jwalijose juŵalosisye chidwi pa ulendo wandanda jwanganaŵa Mboni. Ulendo wakuwilisya mpaka utendekwe mwakumjawulila mundu, kumlembela chikalata, kumjimbila foni, kumtumichisya utenga pa foni kapena pa kompyuta soni kumtumuchisya yakuŵalanga. Ndaŵi jilijose jatendesye lijiganyo lya Baibulo, akusosekwa kuŵalanjila ulendo wakuwilisya. Nangolo mpaka aŵalanjile ulendo wakuwilisya umo wiki jilijose pakutendesya kulambila kwa peŵasa naga pana mwanache jwangabatisidwa pakulambilapo.

²⁶ Atamose kuti akusatendesya lijiganyo lya Baibulo wiki jilijose, akusosekwa kulemba kuti lili limo pambesi pa mwesi. Ŵakulalichila akusosekwa kulemba chiŵalanjilo chosope cha majiganyo ga Baibulo gakulekanganalekangana gatendesye mkati mwa mwesi welewo, pasi kumbali jakumlyo kwa kapepala kakulembapo Lipoti lya Utumiki wa Mumgunda. Akusosekwa kulemba chiŵalanjilo cha majiganyo ga Baibulo gatesile ni ŵandu ŵanganaŵa Mboni syasyalipeleche ni kubatisidwa. Mpaka aŵalanjilesoni lijiganyo lya Baibulo lyakusatenda ni Mklistu jwangakwawula pasogolo, naga m’bale jwa mu komiti ja utumiki ŵasalile kuti amjiganyeje. Kombolekasoni kuŵalanjila lijiganyo lyakusatenda ni mundu jwabatisidwe kwene nambo nganamalisye kulijiganya buku jakuti Ana Baibulo Jikusatujiganya Yamtuli? Soni Yampaka Atende Kuti Mlungu Ŵanonyeleje.

²⁷ Akusosekwa kulemba “Maawala” gasyesyene. Ndaŵi jeleji ni jakamulichisye masengo pakulalichila ku nyumba ni nyumba, kutenda maulendo gakuwilisya, kutendesya majiganyo ga Baibulo, kulalichila mwaupile kapenasoni kulalichila pelanga kwa ŵandu ŵane ŵanganaŵa Mboni syasyalipeleche ni kubatisidwa. Naga ŵakulalichila ŵaŵili akulalichila yalumo, wosope mpaka alembe maawala gakamulichisye masengo pakulalichila, nambo jumo ni jwakusosekwa kulemba maulendo gakuwilisya kapena majiganyo ga Baibulo gatendesye. Naga achinangolo wosope akujigala mbali pakwajiganya ŵanache pa Kulambila kwa Peŵasa, wosopewo mpaka akomboleche kuŵalanjila awala jimo wiki jilijose. Abale mpaka aŵalanjilesoni ndaŵi jakamulichisye masengo pakuŵecheta ngani ja wosope. Mundu jwakugopolela ngani ja wosope kombolekasoni kuŵalanjila ndaŵijo. Nambope, payakutendekwa yine ngakusosekwa kuŵalanjila ndaŵi, mpela pakukosechela kwawula ku msongano wakosechela utumiki wa mumgunda soni pali pamsonganowo, pakwakamuchisya ŵane masengo, soni pakutenda yindu yine.

²⁸ Jwakulalichila jwalijose akusosekwa kulemba ndaŵi jamalile mu utumiki mwakamulana ni chikumbumtima chakwe chechijiganye Baibulo. Ŵane akusalalichila m’madela mwamuli ŵandu ŵajinji, nambo ŵane akusalalichila m’madela mwamuli ŵandu ŵamnono soni akusasosekwa kwenda lutando lwelewu kuti akasimanikwe. Madela gakulalichila gakusalekangana, soni ŵakulalichila akusalekangana mwakusawuwonela utumiki wawo. Likuga Lyakulongolela lyangalamula abale ni alongo ya mwakusosechela kuŵalanjila ndaŵi jakamulichisye masengo pakulalichila, soni pangali jwampele ulamusi panganiji.—Mat. 6:1; 7:1; 1 Tim. 1:5.

²⁹ Akusosekwa kulemba ndaŵi jakamulichisye masengo pakulalichila m’maawala gamtundu. Nambo yeleyi ngayikwakwaya ŵakulalichila ŵakwete yakusawusya yekulungwa mpela uchekulu, ulwele wekulungwa, ŵakutama nyumba jakusamalila ŵachekulupe, kapena ŵalemale. Ŵakulalichilaŵa komboleka kupeleka maminisi 15 kapena kupunda. Atamose ali alalichile kwa maminisi 15, akusosekwa kupelekape ndaŵiji pa lipoti lyawo. Jwalakwejo chachiŵape jwakulalichila ya Uchimwene jwakutamilichika. Yeleyi mpaka yikamulesoni masengo kwa jwakulalichila jwachingangene ni yakusawusya mpela kulwala mnope kapena kutenda ngosi jekulungwa mkati mwa mwesiwo. Yeleyi ŵalinganyisye kuti yakamuchisye ŵandupewo ŵakulepela kutenda yejinji ligongo lya yakusawusya yakwete. Komiti ja utumiki jichilola naga jwakulalichila akuŵajilwa kuŵa mbaliji.

CHAKULEMBAPO MASENGO GA JWAKULALICHILA JWA MUMPINGO

³⁰ Malipoti ga utumiki wa mumgunda gakusapeleka mwesi uliwose akusagalemba mu Chakulembapo Masengo ga Jwakulalichila jwa Mumpingo. Malipotiga gakusaŵa ga pampingo. Naga akusaka kusamila ku mpingo wine, akusosekwa kwamanyisya achakulungwa. Mlembi chachilolechesya kuti malipoti gawo atumisye ku mpingo wakusamila. Yeleyi yichakamuchisya achakulungwa kuti ŵapochele soni kwapa chikamuchisyo chausimu chakusosechela. Naga atyosile kaje miyesi jangakwana jitatu, akusosekwa kutumisyagape lipoti lyawo lya utumiki ku mpingo wakumangwawowo.

LIGONGO CHICHI TUKUSAPELEKA LIPOTI LYA UTUMIKI WA MUMGUNDA?

³¹ Ana ndaŵi sine akusaliŵalila kupeleka lipoti lyawo lya utumiki wa mumgunda? Mwangakayichila wosopewe tukusasosekwa kutukumbusya ndaŵi sine. Nambo kola nganisyo syambone, soni kumanyilila kusosekwa kwakutenda yeleyi, kuchitukamuchisya kuti tukumbuchileje mwangasawusya kupeleka lipoti lyetu lya utumiki wa mumgunda.

³² Ŵandu ŵane ŵawusisyepo kuti, “Pakuŵa Yehofa akusamanyilila yangusatenda mu utumiki, ligongo chichi ngusosekwasoni kupeleka lipoti ku mpingo?” Yili yisyene kuti Yehofa akusamanyilila naga tukumtumichila jwalakwe ni mtima wosope, kapena iyayi. Nambope, akumbuchile kuti Yehofa ŵasunjile chiŵalanjilo cha masiku gele Nowa ŵaliji m’chombo, soni chiŵalanjilo cha yaka yele Aisalaeli ŵajesile mu chipululu. Mlungu ŵasunjile chiŵalanjilo cha ŵandu ŵaŵaliji ŵakulupichika, soni ŵanganapikanila. Ŵasunjilesoni ngani jakwamba ya kugomekwa kwa chilambo cha Kanani, soni yiŵatesile ŵakwelusya ŵakulupichika ŵa ku Isalaeli. Kusala yisyene, Yehofa ŵasunjile ngani syejinji syakwamba yaŵatendaga ŵakutumichila ŵakwe. Jwalakwe ŵatendekasisye kuti yakutendekwayi ayilembe pakusaka kutumanyisya nganisyo syakwe pangani jakusunga malipoti gakuŵajilwa.

³³ Yindu yayatendekwe kala yaŵayilembile m’Baibulo, yikusalosya malipoti gasyesyene gaŵasunjile ŵandu ŵa Yehofa. Ngani sine sya m’Balibulo ngamkanasisala mwakuŵajilwa pakaŵe pangali yiŵalanjilo yisyesyene. Alole yisyasyo yakuyichisyayi: Genesesi 46:27; Eksodo 12:37; Ŵakulamula 7:7; 2 Ayimwene 19:35; 2 Mbili 14:9-13; Yohane 6:10; 21:11; Masengo 2:41; 19:19.

³⁴ Atamose kuti malipoti gatukusapeleka ngagakusapwatika yindu yosope yatukusatenda pakumtumichila Yehofa, nambope gakusakamuchisya mnope mu gulu ja Yehofa. M’yaka 100 yandanda, ŵandumetume ŵane ŵa Yesu paŵawusile kukulalichila, ŵamsalile Yesu “yosope yiŵatesile ni yiŵajiganyisye.” (Maliko 6:30) Ndaŵi sine malipoti mpaka galosye kuti mbali sine sya utumiki wetu sikusosekwa kusilolasoni. Atamose kuti mbali sine sya undumetume mpaka sijawule pasogolo, nambo yiŵalanjilo mpaka yilosye kuti mbali sine sijawile pasi, mwachisyasyo naga chiŵalanjilo cha ŵakulalichila ngachikonjechekwa. Mpaka yiŵe kuti pakusosekwa chilimbikasyo kapena pana yakusawusya yine yakusosekwa kumalana nayo. Ŵakulolela chachilola yeleyi m’malipotiga soni kulingalinga kumalana ni yindu yiliyose yayikutendekasya kuti mundu kapena mpingo wosope ukajawulaga pasogolo.

³⁵ Malipoti gali gakusosekwasoni kuti gulu jimanyilile kwakukusosechela ŵakulalichila ŵajinji, kumalo kwele masengo gakulalichila gakwawula pasogolo soni kwangagakwawula pasogolo, nambosoni mabuku gagakusosekwa kuti gakamuchisye ŵandu kulijiganya usyesyene. Malipoti gakusakamuchisya gulu kumanyilila mabuku gagakusosechela pa masengo gakulalichila m’madela jakulekanganalekangana pachilambopa.

³⁶ Malipoti gakusatulimbikasya ŵajinjiwe. Ana ngayikusaŵa yakulimbikasya kupikana ya masengo gakutenda Aklistu achimjetu gakulalichila ngani syambone kusyungulila pachilambo chosope? Malipoti gakusala ya konjechekwa kwa chiŵalanjilo, gakusatukamuchisya kumanyilila mwalikukulila gulu ja Yehofa. Kupikana yakutenda achimjetu kukusasangalasya mitima jetu soni kukusatulimbikasya kuti tupitilisye kujigala nawo mbali mwakwanila pa masengo gakulalichila. (Mase. 15:3) Kupeleka malipoti ga mu utumiki wa mumgunda kuli kwakusosekwa mnope, soni kukusalosya kuti tukusitwaganichisya abale ŵetu kulikose. Kutenda yeleyi, kukusalosya kuti tukupikanila yalilinganyisye gulu ja Yehofa.—Luk. 16:10; Ahe. 13:17.

KUKOLA YAKULINGA

³⁷ Pangali ligongo lyakuti tulandanichisye yakutenda yetu mu utumiki wa mumgunda ni ya mundu jwine. (Aga. 5:26; 6:4) Yakutendekwa ya paumi yikusalekangana. Kola yakulinga yampaka tukwanilisye mpaka kutukamuchisye kulola mwatukwawulila pasogolo mu utumiki wetu. Kukwanilisya yakulingayi mpaka kutukamuchisye kuti tusangalaleje ni utumiki wetu.

³⁸ Pana maumboni gakulosya kuti Yehofa akutendekasya kuti masengo gakusonganganya ŵandu ŵachachikulupuka pa “yisawusyo yekulungwa” gatendekwe mwakwanguya. Apano tukutama mu ndaŵi jele yiŵalochesye Yesaya yikukwanilichikwa. Jwalakwe ŵalochesye kuti, “Jwamwana chachiŵa ŵandu 1000, soni jwamnandi chachiŵa mtundu wamachili. Une, Yehofa, chinjijanguyisya yeleyi pandaŵi jakwe.” (Chiw. 7:9, 14; Yes. 60:22) Tukusosekwa kuwuwona kuŵa upile wekulungwa wakuŵa ŵakulalichila ngani syambone m’masiku gakumalisya gakusosekwa gano.—Mat. 24:14.