Kulalicila Mwakamulana mu Mkuli wa Yiŵeceto Yejinji

Ŵandu ŵajinji akusapikanila cenene ngani syakwamba ya Ucimwene naga akusipikana m’ciŵeceto cawo. Komboleka ni ligongo lyakwe pa Pentekote mu 33 C.E., Yehofa jwalinganyisye yakuti “Ayuda ŵakumjogopa Mlungu ŵakutyocela mu mtundu wuliwose wa pacilambo capasi” apikane ngani syambone “m’ciŵeceto cawo” atamose kuti ŵaŵecetaga yiŵeceto yakumanyika mpela Cihebeli ni Cigiliki. (Mase. 2:5, 8, NW) Masiku agano, mikuli jajikusakamulicisya masengo yiŵeceto yejinji, soni mipingo jajikusatenda misongano m’yiŵeceto yakulekangana, mpaka jikole mkuli wakulalicila m’misi jakulandana. Ŵakulalicila ŵa m’mipingo jeleji mpaka asosekwe kuŵa ŵakamulana kuti amlalicile jwalijose mumkuliwo. Soni mpaka aŵambale kwalalicila ŵandu ŵagambile kulalicilidwa kwene ni ŵakulalicila ŵa ciŵeceto cine, yampaka yasakalisye acimsyene nyumbawo. Ana mpaka atende wuli yeleyi?

• 

  Kukambilana (Mis. 15:22, NW): Ŵakulolela undumetume ŵa m’mipingoji akusosekwa kukambilana ni kulola dongosolo jampaka akuye pakulalicila mumkuliwo. Naga mkuli wawo wuli wamwana, mipingo jajikusalalicila mu yiŵeceto yine mpaka jisace kuti mpingo wine ukajawulaga kukulalicila mnyumba syasili mu mkuli wa yiŵeceto yawo. Nambope, naga jemanjajo ngakukombola kulalicila mkuli wawo mwakutamilicika ligongo lya kukula kwa mkuliwo, jemanjajo mpaka asace kuti alalicileje mu mkuliwo nambo ŵasalileje naga apatile mundu jwalung’wanu mu mkuliwo. (od 93 ¶37) Kapena jemanjajo mpaka aŵende kuti mpingo wawo wakamucisye kupata ŵandu ŵakusaŵeceta ciŵeceto ca mpingo wawo soni kwapa mena ga ŵanduwo ni kwakusatamaga. (km-CN  7/12 5, libokosi) Akumbucileje kuti ndaŵi sine, yiŵeceto yakupunda yiŵili yikusaŵecetedwa pa nyumba jimo. Dongosolo jeleji, jikusosekwa jitendekweje mwakamulana ni malamusi ga mu mkuliwo.

• 

  Kulumbikana (Aef. 4:16): Akusosekwa kuya mwakusamala yasasile jwakulolela undumetume jwawo. Ana akutendesya lijiganyo lya Baibulo ni mundu jwele ciŵeceto cakusacinonyela nganiciŵa ca mpingo wawo? Jwakulijiganyajo mpaka ajawule pasogolo mwacitema naga ali apelece lijiganyolyo ku mpingo wakuŵandikana ni kwakusatamaga, kapena kalikuga kakakusakamulicisya masengo ciŵeceto cakwe.

• 

  Kosecela (Mis. 15:28; 16:1, NW): Naga msyene nyumba jwa mumkuli wawo akusaŵeceta ciŵeceto cakulekangana ni ca wawojo, atende yampaka akombole kuti amlalicile. Mpaka akosecele mwakuwungunya yiŵeceto yakusaŵeceta ŵandu ŵa mu mkuli wawo, soni mwakujigalila cile ma Baibulo soni ma fidiyo ga yiŵecetoyo mu foni jawo. Mpaka akamulicisyesoni masengo pologalamu ja JW Language app, kuti alijiganye moni wa yiŵeceto yeleyo.