Yakamuchisya Pakuwungunya

Yindu Yakamuchisya Pakwajiganya Ŵanache

Achinangolo akwete udindo wekulungwa mnope wakwajiganya ŵanache ŵawo yakwamba Yehofa. (Aef. 6:4) Myoyo, gulu ja Yehofa pakusaka kwakamuchisya achinangolo jikopwesye yindu yejinji mpela ngani, mafidiyo soni nyimbo. Ana mpaka ayikamulichisye masengo chamtuli yindu yeleyi pakwajiganya ŵanache ŵawo?

• Apate ngani pa jw.org. Pa JW.ORG pakusasimanikwa yindu yosope yaŵayilinganyisye kuti yakamuchisyeje ŵanache.a Kuti apate yindu yeleyi ajawule palembile kuti “Yajikusajiganya Baibulo” kaneko asagule palembile kuti “Ŵachinyamata” kapena “Ŵanache.”

• Asagule ngani jakusaka. Yindu yayikusasimanikwa pambali jakuti “Ŵachinyamata” soni “Ŵanache” mpaka yakamuchisye wawojo kusagula ngani jakuŵajilwa kwa mwanache jwawo. Myoyo akusosekwa kwamba kusagula ngani jakusaka kuti ajikamulichisye masengo.

• Akambilaneje nganisi ni mwanache jwawo. Aŵambaleje kwamba kumlechela yindu yeleyi mwanache jwawo kuti ang’andileje. Mmalomwakwe, ayikamulichisyeje masengo yinduyi pakwakamuchisya ŵanache ŵawo kuŵa paunasi wambone ni Yehofa.