NGANI JAKULIJIGANYA 42
NYIMBO NA. 44 Lipopelo lya Mundu Jwakulaga
Yampaka Atende Kuti Apelecheje Mapopelo Gambone Mnope
“ Ngusinaŵilanga wawojo ni mtima wosope. Anjanje, wawo Yehofa.”—SAL. 119:145.
CHAKULINGA CHA NGANIJI
Chijitukamuchisye kumanyilila yampaka gajile pakutukamuchisya mapopelo gagalembedwe m’Baibulo pakongolela mapopelo getu.
1-2. (a) Ana chichi champaka chitulepelekasye kumsalila Yehofa mwatukupikanila mumtima patukupopela? (b) Ana tukusamanyilila chamti uli kuti Yehofa akusapikanila mapopelo getu?
ANA ndaŵi sine akusayiwona kuti akusapeleka mapopelo gakuwilisya, mwamti akusalepela kumsalilaga Yehofa mwakupikanila mumtima? Naga yili myoyo, nganaŵa jika. Ndaŵi sine ligongo lyakuti tukusatanganidwaga, mpaka yitendekasye kuti tupelecheje mapopelo gejipi ni kulepelaga kupeleka mapopelo gelewu. Mwinesoni mpaka tuyiwoneje kuŵa yakusawusya kumsalila Yehofa mwatukupikanila ligongo lyakuti tukuliwona kuŵa ŵangaŵajilwa kuŵechetana najo.
2 Baibulo jikusatusalila kuti chindu chakusachiwona Yehofa kuŵa chakusosekwa mnope nganichiŵa yatukusati pakulilondesya chenene m’mapopelo getu, nambo chili kupopela mwakutyochela mumtima soni mwakulinandiya. Mwamti Yehofa akusapikanila “kuŵenda kwa mundu jwakufasa.” (Sal. 10:17) Jwalakwe akusapikanila yiliyose yatukusaŵecheta ligongo lyakuti akusatuganichisyaga mnope.—Sal. 139:1-3.
3. Ana mu ngani ajino chitupate kwanga kwa yiwusyo yapi?
3 Ndaŵi sine mpaka tuliwusyeje kuti, Ligongo chichi tukusasosekwa kupopela kwa Yehofa mwangakayichila? Ana mpaka tutende uli kuti tupelecheje mapopelo gakupikanika chenene? Ana kuganichisya mapopelo gagalembedwe m’Baibulo mpaka kutukamuchisye chamti uli kongolela mapopelo getu? Soni ana mpaka tutende chichi naga ngatukumanyilila yampaka tumsalile Yehofa mu lipopelo lyetu? Kwende tupate kwanga kwa yiwusyo yeleyi.
AKAJOGOPAGA KUPOPELA KWA YEHOFA
4. Ana chichi champaka chitukamuchisye kuti tukajogopaga kupopela kwa Yehofa? (Salimo 119:145)
4 Kumanyilila kuti Yehofa ali mjetu jwakulupichika jwakusasaka kuti yindu yitujendeleje chenene, kuchitukamuchisya kuti tupopeleje kwa jwalakwe mwangakayichila. Mwamti juŵalembile Salimo 119 jwalingaga kumwona Yehofa chamti myiyi pajwapopelaga kwa jwalakwe. Nambotu ngaŵa kuti jwalakwe nganasimanaga ni yakusawusya yine. Ŵandu ŵane ŵaŵechetaga yaunami yakwamba jwalakwejo. (Sal. 119:23, 69, 78) Konjechesya pelepa, jwalagasikagasoni ligongo lya ungali umlama wakwe. (Sal. 119:5) Atamose yaliji myoyo, jwalakwe nganajogopaga kupopela kwa Yehofa.—Aŵalanje Salimo 119:145.
5. Ligongo chichi ngatukusasosekwa kunda kulikayichila kutulepelekasya kupopela? Asale chisyasyo.
5 Yehofa akusiŵasalila atamose ŵandu ŵatesile ulemwa wekulungwa kuti apopeleje kwa jwalakwe. (Yes. 55:6, 7) Myoyo, tukakundaga kuti kulikayichila kutulepelekasyeje kupopela. Aganichisye ayi. Tuwanichisye kuti mundu jwine asokonechele mu ukweti kapena kuti mungalango. Kaneko jwalakwejo akumwona mundu jwampaka amkulupusye. Ana jwakusokonechelaju mpaka alepele kumgumilila mundu jula ligongo lya kogopa kutenda sooni? Iyayi. Mwakulandana ni yeleyi, atamose kuti ndaŵi sine m’weji mpaka tusokonechele kapena kuti kutenda ulemwa, yili yakomboleka kupopela kwa Yehofa mwangakayichila.—Sal. 119:25, 176.
YAMPAKA TUTENDE KUTI TUPELECHEJE MAPOPELO GAKUPIKANIKA CHENENE
6-7. Ana kuganichisya ndamo syakwete Yehofa mpaka kutukamuchisye chamti uli kuti tupelecheje mapopelo gakupikanika chenene? Asale chisyasyo. (Alolesoni maloŵe gamwiŵanda.)
6 Mapopelo getu gakusaŵa gakupikanika chenene patukupopela kwa Yehofa mwagopoka, soni kumsalila yayili mumtima mwetu. Nambo ana chichi champaka chitukamuchisye kuti tupelecheje mapopelo mpela gelega?
7 Kuganichisya ndamo syakwete Yehofa.a Patukuganichisya mnope ndamo syakwete Yehofa, ni patukusakombolasoni kumsalila mwatukupikanila mumtima. (Sal. 145:8, 9, 18) Aganichisye yayamtendechele Mlongo Kristine, jwelesoni babagwe ŵaliji ŵangasa. Jwalakwe jwatite, “Nayiwonaga kuŵa yakusawusya kuŵechetana ni Yehofa mpela Atati ŵangu. Nayiwonagasoni kuti Yehofa mpaka aleche kunonyela ligongo lya yakulemwa yangu.” Ana ni ndamo japi jakwete Yehofa jajamkamuchisye jwalakweju? Jwalakwe jwatite, “Chinonyelo chakulupichika chakwete Yehofa changamuchisyaga kuti ngajogopaga. Ngusamanyilila kuti jwalakwe chapitilisye kungamuchisya ndaŵi syosope. Mwamti atamose ndili ngwile, jwalakwe chachinjimusya mwachinonyelo. Kuganichisya yeleyi, kukusangamuchisya kuti namsalileje yindu yayikusangalasya soni yangudandawula.”
8-9. Ana kuganichisya yindu yawukusaka kuŵecheta mkaniwuŵe kupopela kukwete umbone wamti uli? Asale chisyasyo.
8 Aganichisyeje yakusaka kuŵecheta. Mkanatande kupopela, mpaka atende chenene kuliwusya yiwusyo yine. Mwine mpaka aliwusye kuti, ‘Ana ni chakusawusya chapi changulimbana nacho apano? Ana pana mundu jwangusosekwa kumkululuchila? Ana ngusimana ni chakusawusya chasambano chele ngusosekwa chikamuchisyo cha Yehofa kuti ngombole kumalana nacho?’ (2 Ayi. 19:15-19) Chindu chine chakamuchisya chili kukuya chisyasyo chaŵatupele Yesu, mwaganichisya yampaka tumŵende Yehofa pakwamba ya lina lyakwe, Uchimwene wakwe, soni yakusasaka jwalakwejo.—Mat. 6:9, 10.
9 Mlongo Aliska pajwamanyilile kuti ŵamkwakwe akwete kansa ja mu ututu jwayiwonaga kuŵa yakusawusya kupopela. Jwalakwe jwatite, “Nalagasikaga mnope nganisyo, mwamti nayiwonaga kuŵa yakusawusya kupopela ligongo nganingombolaga kuganisya chenene.” Ana chichi chachamkamuchisye jwalakweju? Mlongoju jwatite, “Mkanimbe kupopela, naganichisyaga kaje yangusaka kumsalila Mlungu. Yeleyi yangamuchisyaga kuti ŵambale kupeleka mapopelo gakulondesya ya yakusawusya yangupe. Kutenda yeleyi kwangamuchisye kuti mtima wangu uŵeje mmalo, mwamti nakombolaga kumŵenda Yehofa yindu yakulekanganalekangana.”
10. Ligongo chichi tukusasosekwa kulingalinga kupelekaga mapopelo gelewu? (Alolesoni yiwulili.)
10 Kupeleka mapopelo gelewu. Atamose kuti mapopelo gejipi mpaka gaŵe gakupikanika chenene, tukusakombolasoni kusala mwatukupikanila mumtima patukupeleka mapopelo gelewu.b Ŵamkwakwe Mlongo Aliska jula ŵele lina lyawo ali Elijah ŵatite, “Ngusapopelaga kwa Yehofa kwa maulendo gejinji palisiku. Nambo pambopesile lipopelo lyelewu ngusalipikana kuŵa jwakuŵandikana mnope ni Yehofa. Ligongo lyakuti Yehofa ali jwakuwusimana mtima, ngusayiwona kuti jwalakwejo nganaŵa alepele kunjembecheya mpaka ndili malisisye lipopelo lyangu.” Mpaka alinje ayi: Apate ndaŵi soni malo gambone kuti apopele kwa Yehofa, mwinesoni mwakoposya maloŵe kwandaŵi jelewu, pali pangali chakwasokonasya. Kaneko atendeje yakulandanayo mwakuwilisyawilisya.
Apateje ndaŵi soni malo gangali yakusokonasya kuti apeleche lipopelo lyelewu (Alole ndime 10)
AGANICHISYEJE MAPOPELO GAGALEMBEDWE M’BAIBULO
11. Ana kuganichisya mapopelo gagalembedwe m’Baibulo mpaka kutukamuchisye chamti uli? (Alolesoni libokosi lyakuti “Ana Yakusawusya Yawo Yikulandana ni Yaŵasimanaga Nayo Jemanjaji?”)
11 Kuganichisya mapopelo soni nyimbo kapena masalimo yayikusasimanikwa m’Baibulo mpaka kutukamuchisye mnope. Pakuganichisya yaŵatiga ŵakutumichila ŵa Yehofa pakusala muŵapikanilaga mu mtima mwawo, yichalimbikasyasoni wawojo kupopela kwa Yehofa. Mpaka apatesoni maloŵe gane gasambano ga kumchimbichisya Mlungu gampaka agakamulichisye masengo m’mapopelo gawo. Nambosoni mpaka apate mapopelo gampaka gakamulane ni yakusawusya yawo.
12. Ana ni yiwusyo yapi yampaka tuliwusye patukuganichisya yayili mu lipopelo lyatukuŵalanga m’Baibulo?
12 Pakuganichisya yayili mu lipopelo lyakuŵalanga m’Baibulo, mpaka aliwusye kuti, ‘Ana ŵani ŵaŵaŵechete maloŵega soni pandaŵijo ŵasimanaga ni yakusawusya yamti uli? Ana yayili mu lipopeloli yikukamulana chamti uli ni yangusimana nayo uneji? Ana ngulijiganya chichi mu lipopeloli?’ Mpaka asosekwesoni kuwungunya yindu yine kuti apate kwanga kwa yiwusyoyi. Mwamti pakutenda yeleyi yichakamuchisya mnope. Kwende tuganichisye yisyasyo yakuyichisyayi.
13. Ana pana lijiganyo limpepe lyapi lyatukupata kwa Hana? (1 Samuyele 1:10, 11) (Alolesoni chiwulili chapachikuto.)
13 Aŵalanje 1 Samuyele 1:10, 11. Hana pajwapelekaga lipopeloli jwaliji ali mkusimana ni yakusawusya yiŵili yekulungwakulungwa. Jwalakwe jwaliji jwangaŵeleka soni ŵalagasidwaga mnope ni aŵele ajakwe. (1 Sam. 1:4-7) Naga wawojo akusimana ni chakusawusya chele ngachikumala, ana mpaka alijiganye chichi pa lipopelo lyaŵapeleche Hanali? Jwalakweju jwapatile mtendele wamumtima ligongo lyakupopela kwandaŵi jelewu soni kumsalila Yehofa yosope yayamlagasyaga. (1 Sam. 1:12, 18) M’wejisoni mpaka tupate mtendele naga ‘tukumtulila Yehofa yindu yayikusatulagasya nganisyo’ mwakumlondechesya jwalakwejo yakusawusya yetu.—Sal. 55:22.
Hana jwapopesile kwa Yehofa kumsalila yakusawusya yajwasimanaga nayo soni yaŵatiga pakumlagasya jwamkongwe mjakwe (Alole ndime 13)
14. (a) Ana chindu chine chapi chatukulijiganya kwa Hana? (b) Ana kuŵalanga soni kuganichisya Maloŵe ga Mlungu mpaka kutukamuchisye chamti uli kumanyilila yampaka tuŵechete mu lipopelo lyetu? (Alole maloŵe gamwiŵanda.)
14 Pali pagambile kumala yaka yamnono kutyochela pajwaŵeleche mwanache jwakwe jwamlume Samuyele, Hana jwampeleche jwalakwe kwa Eli juŵaliji Jwamkulungwa jwa Ŵakutaga Mbopesi. (1 Sam. 1:24-28) Mu lipopelo lyakwe, Hana jwamyamichile mnope Yehofa ligongo lyakwasamalila ŵakutumichila ŵakwe ŵakulupichika.c (1 Sam. 2:1, 8, 9) Hana jwakwetepe yakusawusya yine, nambo mmalo mwakuganichisya mnope ya yeleyo, jwalakwe jwaganichisyaga mnope yaŵatite Yehofa pakumpa upile. Ana tukulijiganya chichi pelepa? Mpaka tukombole kuyipilila yakusawusya yetu yele ngayikumala naga tukuganichisya yakutenda Yehofa pakutukamuchisya apano.
15. Ana mpaka tulijiganye chichi kwa jwakulochesya Yelemiya patukusimana ni yindu yangali chilungamo? (Yelemiya 12:1)
15 Aŵalanje Yelemiya 12:1. Pandaŵi jine, jwakulochesya Yelemiya jwalasile mnope mumtima mwakwe ligongo lyakwawona ŵandu ŵakusakala yili mkwajendela. Jwalakwe jwalagagasoni ligongo lya yindu yaŵamtendelaga Ayisalayeli achimjakwe. (Yel. 20:7, 8) Mpaka tupikanichisye mwajwapikanilaga jwakulochesyaju naga ŵane akutunyosya kapena patukwawona ŵandu ŵakusatenda yakusakala yindu yili mkwajendela. Atamose kuti Yelemiya jwamsalile Yehofa mujwapikanilaga mumtima, jwalakwe nganamjimba magambo Mlungu kuti akusatenda yindu yangali chilungamo. Yili yangakayikasya kuti Yelemiya pajwayiweni yaŵatite Yehofa pakwapa chilango ŵakutumichila ŵakwe ŵangakulupichika, yalimbisye chikulupi chakwe chakuti Mlungu akusatenda yindu mwachilungamo. (Yel. 32:19) M’wejisoni mpaka tumsalile Yehofa yindu yatukudandawula kupitila mu lipopelo, kwineku tuli tukwete chikulupi chakuti pandaŵi jakwe jwalakwejo chachimasya yangali chilungamo yiliyose.
16. Naga tukulepela kutenda yejinji pakumtumichila Yehofa, ana mpaka tulijiganye chichi mu lipopelo lyajwapeleche Mlefi juŵaliji ku ukapolo? (Salimo 42:1-4) (Alolesoni yiwulili.)
16 Aŵalanje Salimo 42:1-4. Nyimbo jeleji jalembedwe ni Mlefi jwine juŵaliji ku ukapolo jwelesoni nganakola upile wakutenda yindu yine ni ŵakutumichila achimjakwe. Nyimboji jikusalosya mujwapikanilaga jwalakweju. Mpaka tupikanichisye mujwapikanilaga jwalakweju naga ngatukusakombola kutyoka panyumba jetu, mwine ligongo lyakulwala kapena ligongo lyakuti tuli mundende. Yisyene kuti ndaŵi sine mpaka tupikaneje chenene soni pane mpaka tudandawuleje mnope. Nambope chakusosekwa mnope chili kumsalila Yehofa mwatukupikanila mumtima. Yeleyi mpaka yitukamuchisye kuti tupikaneje chenene mumtima soni kuti tuyiwoneje mwakuŵajilwa yakusawusya yetu. Mwachisyasyo, Mlefiju jwayikopochele kuti akwete upile wine wa kumchimbichisya Yehofa. (Sal. 42:5) Jwalakwe jwaganichisyagasoni yaŵatiga Yehofa pakumsamalila. (Sal. 42:8) Kusala yisyene, kupopela kwa Yehofa mwakutyochela pasi pamtima mpaka kutukamuchisye kuti mtima wetu uŵe mmalo, kutandilasoni kuganisya chenene, soni kupata machili gakutukamuchisya kuti tukombole kupilila.
Mlefi juŵalembile Salimo 42 jwamsalile Mlungu yindu yayamlagasyaga nganisyo. M’wejisoni patukumsalila Mlungu mwatukupikanila mumtima tuchikombola kutanda kuyiwona yindu mwakuŵajilwa (Alole ndime 16)
17. (a) Ana mpaka tulijiganye yamti uli pa lipopelo lyajwapeleche jwakulochesya Yona? (Yona 2:1, 2) (b) Ana maloŵe gane gagakusasimanikwa m’buku ja Masalimo mpaka gatukamuchisye chamti uli patukusimana ni yakusawusya? (Alole maloŵe gamwiŵanda.)
17 Aŵalanje Yona 2:1, 2. Jwakulochesya Yona jwapeleche lipopeloli pajwaliji mmatumbo mwa chisomba chekulungwa. Atamose kuti Yona nganampikanila Yehofa, jwalakwejo jwakulupililaga kuti Mlungu chapikane kuŵenda kwakwe. Mu lipopelo lyakwe lyakuchondelela, Yona jwakamulichisye masengo maloŵe gejinji gagakusasimanikwa m’buku ja Masalimo.d Mwamti yili yangakayikasya kuti jwalakwe jwagamanyililaga chenene maloŵego. Myoyo, kumbuchila maloŵego soni kugaganichisya, kwamkamuchisye jwalakwe kulupilila yakuti Yehofa chamkamuchisye. Mpela muyaŵelele ni Yona, m’wejisoni patukwinjisya pamtima maloŵe gane ga m’Baibulo mpaka tugakumbuchile, mwamti mpaka gatulimbikasye patukupopela kwa Yehofa pandaŵi jatusimene ni yakusawusya.
APOPELEJE KWA YEHOFA NDAŴI SYOSOPE
18-19. Naga ndaŵi sine tukusalepela kumsalila Yehofa mwatukupikanila mumtima, ana pa Aloma 8:26, 27 pakusatusimichisya chichi? Asale chisyasyo.
18 Aŵalanje Aloma 8:26, 27. Ndaŵi sine, mpaka tulagasicheje nganisyo ni kwika pakuyiwona kuti nganituŵa tukombwele kusala mwatukupikanila mumtima. Nambope nganitusoŵa chitela chakamula. Yili myoyo ligongo lyakuti pandaŵi mpela syelesi, msimu weswela wa Mlungu ‘ukusachondelela’ mmalo mwa m’weji. Ana yeleyi yikusakomboleka chamti uli? Kupitila mwa msimu wakwe weswela, Yehofa ŵatendekasisye kuti mapopelo gejinji gasunjidwe m’Maloŵe gakwe. Myoyo, patukulepela kulilondesya chenene mwipopelo, Yehofa mpaka akamulichisye masengo mapopelo gagali m’Baibulo gala gagakulandana ni yayikututendechelayo ni kugawona mpela getu soni kugajanga.
19 Yeleyitu ni yayamkamuchisye Mlongo jwine jwa ku Russia lina lyakwe Yelena. Mlongoju jwataŵidwe ligongo lyakupopela soni kuŵalanga Baibulo. Jwalakwe jwalagasikaga mnope nganisyo mwamti jwayiwonaga kuŵa yakusawusya kupopela. Jwalakwe jwatite, “Nakumbuchile kuti pangulagasika mnope nganisyo ni kusoŵaga chakuŵecheta mwipopelo, Yehofa chachikamulichisya masengo mapopelo ga ŵakutumichila ŵakwe ŵakala . . . mpela lipopelo lyambeleche uneji. Yeleyi yalimbikasyaga mnope pasimene ni yakusawusya yekulungwa.”
20. Ana mpaka tukosechelesye chamti uli nganisyo syetu kuti tupopele pandaŵi jatukulagasika nganisyo?
20 Patukulagasika nganisyo, mpaka yiŵe yakusawusya kuti nganisyo syetu sitamilichiche patukupopela. Myoyo, pakusaka kusikosechelesya nganisyo syetu mpaka tupikanile buku ja Masalimo jakwambula. Mpaka tulinjesoni kulemba yatukusaka kumsalila Mlunguyo mpela mujwatendele Mwenye Daudi. (Sal. 18, 34, 142; maloŵe gapenani.) Patukutenda yeleyi, tukumbuchileje kuti pangali malamusi pakwamba yatukusasosekwa kutenda patukukosechela kupopela. (Sal. 141:2) Wawojo agambeje kutenda yakusayiwona kuti yikusiyakamuchisya.
21. Ligongo chichi tukusasosekwa kupopela ni mtima wetu wosope?
21 Yikusaŵa yakulimbikasya mnope kumanyilila kuti Yehofa akusamanyilila mwatukupikanila mumtima atamose m’wejo mkanituŵechete chilichose. (Sal. 139:4) Atamose yili myoyo, jwalakwe akusasangalala mnope kupikana patukumsalila ya mumtima mwetu soni yatukusati pakumdalila jwalakwejo. Myoyo, kwende tukalepelaga kupopela kwa Atati ŵetu ŵa kwinani. Akamulichisyeje masengo mapopelo gagakusasimanikwa m’Baibulo. Nambosoni apopeleje ni mtima wawo wosope. Pakupopela, amsalileje Mlungu yindu yayikwasangalasya soni yakudandawula. Pakuŵa Yehofa ali mjawo jusyesyene, ndaŵi syosope jwalakwe chachipikanila mapopelo gawo.
NYIMBO NA. 45 Nganisyo sya Mumtima Mwangu
a Alole “Ndamo sine syapadela sya Yehofa” syakusasikolanga m’kabuku kakuti Malemba Gakamuchisya Paumi wa Chiklistu pasi pa mtwe wakuti “Yehofa.”
b Ndaŵi syejinji mapopelo gagakusapelechedwa pagulu pameso pa mpingo gakusaŵa gejipi.
c Hana pajwapopelaga, jwakamulichisye masengo maloŵe gakulandana ni maloŵe gagakusasimanikwa mu yakulemba ya Mose. Yili yangakayikasya kuti jwalakwe jwapataga ndaŵi jaganichisya yagakusasala Maloŵe ga Mlungu. (Det. 4:35; 8:18; 32:4, 39; 1 Sam. 2:2, 6, 7) Yaka yejinji yeleyi yili yitendekwe, Maliya jwelesoni ŵaliji mamagwe Yesu jwakamulichisye masengo maloŵe gakumchimbichisya Mlungu gakulandana ni gaŵakamulichisye masengo Hana.—Luk. 1:46-55.
d Mwachisyasyo, mpaka alandanye yayili pa Yona 2:3-9; ni pa Salimo 69:1; 16:10; 30:3; 142:2, 3; 143:4, 5; 18:6; soni 3:8. Malembaga gakusakuya mulyaŵelele lipopelo lya Yona.