Ana Chikusatendekwa Chichi Mundu Pawile?

Ana pakwete pawililwe? Pandaŵi jakusawusya mpela jeleji komboleka ŵaliwusisye kuti, ‘Ana chikusatendekwa chichi mundu pawile? Ana yichikombolekasoni kwawona ŵakunonyelwa ŵetu ŵaŵawile?’ Mu lijiganyoli soni lyakuyichisya chitupate kwanga kwakulimbikasya kwakutyochela m’Baibulo.

1. Ana chikusatendekwa chichi mundu pawile?

Yesu jwalandenye chiwa ni lugono. Mundu jwagonile mnope, jwangamanyililaga yindu yayikutendekwa. Ana chiwa chikusalandana chamtuli ni lugono? Mundu pawile, jwangapikana kupweteka. Konjechesya pelepa, atamose kuti jwanonyelaga mnope achimjakwe soni ŵamwiŵasa mwakwe, nambo pawile lyangamtendaga lipowo. Baibulo jikusati, “Ŵawe ŵangamanyilila chilichose.”—Aŵalanje Jwakulalichila 9:5.

2. Ana kumanyilila yisyesyene yayikusatendekwa mundu pawile kukusatukamuchisya chamtuli?

Ŵandu ŵajinji akusachijogopa chiwa soni akusiŵajogopa ŵandu ŵawe. Nambo yajikusasala Baibulo panganiji mpaka yalimbikasye mnope. Yesu jwasasile kuti, “Chakuwonacho [“Yisyesyene,” NWT] tichichimgopola jemanja.” (Yohane 8:32) Ma dini gane gakusajiganya kuti mundu pawile, pana chindu chine chachikusapitilisya kuŵa ni umi, nambo Baibulo jangajiganya yeleyi. Myoyo pangali mundu jwakusalagasikaga pawile. Konjechesya pelepa, pakuŵa ŵawe ŵangamanyilila chilichose, nikuti nganaŵa atuwulesye. Ligongo lya yeleyi, ngatukusosekwa kwapopelela kapena kwapaga yindu pakulupilila kuti chaleche kutulagasya.

Ŵandu ŵane akusaŵecheta kuti mpaka akombole kuŵecheta ni ŵawe. Nambo yeleyi nganiyiŵa yikomboleche. Mwakamulana ni yatulijiganyisye, “ŵawe ŵangamanyilila chilichose.” Ŵandu ŵakusaganisya kuti akusakombola kuŵecheta ni ŵawe, akusaŵa ali mkuŵechetana ni yiŵanda yayikusalitendaga mpela ŵandu ŵawe. Myoyo kumanyilila yisyesyene yakwe ya ŵawe, mpaka kutuchenjele ku yiŵanda. Yehofa akusatusalila kogoya kwa kuŵechetana ni ŵawe. Ligongo jwalakwe akusamanyilila kuti patukuŵechetana ni ŵawe tukusaŵa tuli mkukamulana ni yiŵanda yampaka yituwulasye.—Aŵalanje Detulonomo 18:10-12.

3. Alijiganye yisyesyene yakwamba mwaŵelele ŵawe

Ŵandu pachilambopa akwete yikulupi yakulekanganalekangana pa yayikusatendekwa mundu pawile. Nambo kusala yisyene ngaŵa kuti yosope yakusakulupilila ŵanduŵa yili yisyene.

• Ana kumangwawoko, ŵandu ŵajinji akusakulupilila yamtuli pakwamba ya ŵawe?

FIDIYO: Ana Ŵawe ali Mundamo Jatuli?—Kambali ka fidiyo (1:19)

Aŵalanje Jwakulalichila 3:20, kaneko akambilane yiwusyo ayi:

• Mwakamulana ni vesiji, ana ni chichi chachikusatendekwa mundu pawile?

• Ana pana chindu chine chachikusapitilisya kuŵa ni umi mundu pawile?

Baibulo jikusatusalilasoni yakwamba chiwa cha Lasalo juŵaliji mjakwe jwapamtima jwa Yesu. Aŵalanje Yohane 11:11-14, kuti alole yaŵasasile Yesu pakwamba ya mwaŵaŵelele Lasalo ali awile. Kaneko akambilane yiwusyo ayi:

• Ana Yesu akuchilandanya chiwa ni chichi?

• Ana yaŵalandenye Yesuyi, yikutujiganya yamtuli pakwamba mwakusaŵela ŵawe?

• Ana yajikusajiganya Baibulo panganiji akuyiwona kuti yili yisyene?

4. Kumanyilila yisyesyene ya ŵawe kukusatugopola

Kumanyilila yisyesyene yakwe yakwamba ŵawe kukusatukamuchisya kuti tukajogopaga jemanjajo. Aŵalanje Jwakulalichila 9:10, kaneko akambilane chiwusyo achi:

• Ana ŵawe mpaka atuwulasye?

Kukulupilila yisyesyene yajikusajiganya Baibulo pakwamba ya ŵawe kukusatukamuchisya kuti tukapelekaga mbopesi kwa ŵawe pakulupilila kuti chaleche kutulagasya. Aŵalanje Yesaya 8:19 soni Chiwunukuko 4:11, kaneko akambilane chiwusyo achi:

• Ana akuganisya kuti Yehofa akusapikana uli mumtima pakumwona mundu ali mkwatumichila ŵawe soni kwaŵenda chikamuchisyo?

5. Tukusasangalala patumanyilile yisyesyene ya ŵawe

Ŵandu ŵajinji akusiŵajiganyaga ŵane kuti mundu pawile akusasimana ni yipwetesi naga ŵatendaga yakusakala. Nambo chasangalale kumanyilila kuti mundu pawile atamose juŵatendaga yakusakala jwangasimana ni yipwetesi. Aŵalanje Aloma 6:7, ni akambilane chiwusyo achi:

• Baibulo jisasile kuti chiwa chikusamgopola mundu ku ulemwa wakwe, ni ana akuganisya kuti mundu pawile akusalagaga ligongo lya yakulemwa yiŵatendega paŵaliji ni umi?

Patukummanyilila chenene Yehofa, ni patukusapikanichisya kuti ŵawe ŵangasimanaga ni yipwetesi. Soni kuti nganisyo syakuti ŵawe akusasimana ni yipwetesi sikusamsakalisya Mlungu. Aŵalanje Detulonomo 32:4 soni 1 Yohane 4:8, kaneko akambilane yiwusyo ayi:

• Ana Mlungu jakwete ndamo syasisasile mu malembaga, mpaka ŵalagasyeje ŵawe?

• Ana ngakusangalala kumanyilila yisyesyene yakwe pakwamba ya ŵawe? Naga akusangalala, ligongo chichi?

YALIJIGANYISYE

Mundu pawile umi wakwe ukusamalila papopo. Ŵawe ŵangasimana ni yipwetesi, soni nganiyiŵa yikomboleche kuti ŵalagasye ŵali ni umi.

Yiwusyo Yakuwilisya

• Ana chikusatendekwa chichi mundu pawile?

• Ana kumanyilila yisyesyene ya ŵawe kukusatugopola chamtuli?

• Ana kumanyilila yisyesyene yakwe yakwamba ŵawe kukusatukamuchisya chamtuli kuŵa ŵakusangalala?

YAKULINGA YINESONI

Alole yajikusati Baibulo pagopolela maloŵe gakuti “umi.”

“Ana Mundu Pawile Pana Chinechakwe Chachikusapitilisya Kuŵa ni Umi?” (Ngani ja pa intaneti)

Alijiganye kuti amanyilile naga Mlungu akusiŵalagasya ŵandu ni moto wa helo.

Ana Mlungu Akusiŵalagasya Ŵandu ku Moto wa Helo? (3:07)

Ana tukusosekwa kwajogopaga ŵawe?

Ana Misimu ja Ŵandu Ŵawe Mpaka Jitukamuchisye Kapena Kutuwulasya? Ana Jipali? (kabuku)

Alijiganye yayamkamuchisye jwamlume jwine kuŵa jwakusangalala ali amanyilile yisyesyene yakwe yayikusatendekwa mundu pawile.

“Nasangalele ni Kwanga kwa Yiwusyo Kwakupikanika Cenene kwa Baibulo” (Sanja ja Mlonda, Febuluwale 1, 2015)