Fan ni Be Ulul e Mahl nge Cham

DENEN

I sunmiy Got e gal ga’ rodad ni aram Adam nge Efa ni yow bod yaan. (Genesis 1:27) Re n’ey e be yip’ fan nra i m’ug pi fel’ngin Got rorow nib muun ngay e gapas nge t’ufeg. (1 Korinth 14:33; 1 John 4:8) Machane daki fol Adam nge Efa rok Got mi yow denen. Wenegan ni ke yib riy e gad gubin ni ke af e denen nge yam’ ngodad. (Roma 5:12) Bochan ni ke af e denen ngodad, ma aram fan ni gad ma lemnag boch ban’en nib kireb ma gad ma cham.​—Genesis 6:5; Mark 7:​21, 22.

AM KO GIRDI’

De sunmiydad Got ni ngaud gagiyegnaged gadad. Be gaar e Bible: “Dariy be’ ni bay gafan e yafos rok u pa’.” (Jeremiah 10:​23, BT) Aram fan ndabiyog ko am ko girdi’ ni nge chuweg e mahl nge cham.

SATAN NGE PI MOONYAN’ ROK

Be yog e Bible ni fayleng e ‘ke suwey Faanem nib Kireb.’ (1 John 5:19) “Faanem nib Kireb” e aram Satan ni Moonyan’ ma ir be’ nib ta thang e fan nrib kireb. (John 8:44) Yad e pi moonyan’ rok e yad be k’aring e girdi’ ni ngaur mahlgad ma yad be cham.​—Revelation 12:​9, 12.