Ga Manang Murung’agen e Re N’ey, Fa?
Uw rogon ni ma chuweg e pi prist rachaen e gamanman ni kan li’ ni ngan pi’ ni maligach u tempel ko bin som’on e chibog?
PI PRIST u Israel kakrom e gubin e duw ni bokum biyu’ e gamanman ni yad ma ognag ni maligach u daken e altar u tempel. I yog reb e tayol rok e pi Jew ko bin som’on e chibog ni ka nog Josephus ngak nnap’an nra taw ko Paluk’af mab pag 250,000 pi fak e saf ni yima pi’ ni maligach, ere bochan e re n’ey ma boor e racha’ ni ma map’ u daken e altar ni kan li’ fapi gamanman riy. (Lev. 1:10, 11; Num. 28:16, 19) Ere uw e ma yan e pi racha’ nem ngay?
Piin yad ma gay murung’agen e girdi’ nge boch ban’en ni immoy kakrom e kar kered tooben fare tempel ni ngongliy Herod. Bay ban’en ni kar pirieged u rom ni ma yan i map’ e pi racha’ nem nga langgin me yan nge chuw ko tempel.
Baaray l’agruw ban’en ni ma ayuweg e re altar nem ni nge par nib beech:
Yu yang nib kur u tan e re altar nem: Be yog ba ken e babyor rok e pi Jew nni yoloy kakrom ni bay murung’agen e pi motochiyel nge yalen rorad riy nni yoloy u tomuren e duw ni 200. I weliy e re ke babyor nem ni bay l’agruw yang ko tabthung ko fare altar ni kan kuruf. Aram e gin ni ma map’ rachaen e pi gamanman ngay ni kan li’ ni ngan fanay ko maligach nge ran ni kan fanay ni ngan klinnag fare altar, me yan u rom nga lan ban’en me yan i po’ nga lan e Loway nu Kidron.
Ba m’agan’ e piin yad ma gay murung’agen e girdi’ nge boch ban’en ni immoy kakrom ko n’en be yog e re ke babyor ney ni ke n’uw nap’an. Be weliy ba ken e babyor ni chepin e pi Jew ni ke pirieg e piin yad ma gay murung’agen e girdi’ nge boch ban’en ni immoy kakrom yu yang ni kan ngongliy ni bay u tooben e tempel nrayog ni un fanay ni nga i yan rachaen e gamanman ni kan li’ ni kan pi’ ni maligach riy nge ran ni ke yib ko fare tempel.
Boor e ran: Boor e ran nib t’uf ni nge fanay e pi prist ni ngar luknaged daken fare altar ngay, me n’igin fapi racha’ ni nge yan i map’ nga lan fare gin’en ni kan ngongliy ni nge yan i map’ ngay. Ere ma fek e pi prist e ran u lan e mach ni ngar fanayed ko re n’ey. Ma yib e pi ran nem ko yungi n’en ma yan e barkow riy, nge bogi ban’en ni kan ngongliy ni bod e wethal ni ma yan e ran u langgin, nge luwed, nge yungi ran. I weliy Joseph Patrich ni be’ nib llowan’ ni bod ndariy reb e tempel ni immoy e ngiyal’ nem ni aram rogon ni kan ngongliy nrayog ni nge yan e ran ngay nib fel’ rogon, maku rayog ni ngan chuweg e ran riy nib alit.