Bila mbi fueti tatamana longuka Bibila?

1. Mambote mbi wela baka nge tatamana longuka Bibila?

Bu kiedika, malongi ma thete mo melonguka mu mua nkanda wawu makindisidi luzolo luaku kudi Yehova. Fueti tula ngolo muingi luzolo beni lubika kita. (1 Petelo 2:2) Vuvu kiaku ki luzingu lu mvu ka mvu mu bilumbu bi nkuiza kitadidi vema kioki wulembu tudi mutatamana longuka Phova Nzambi ayi fikama kudi.​—Tanga Yoane 17:3; Yuda 21.

Bobuawu nzayilu aku yi Nzambi yimbuelimina, minu kiaku kiela ba ngolo. Minu kiaku kiela kusadisa wuyangidika Nzambi. (Ebeleo 11:1, 6) Yawu yiela kutinda wuvilula ntima aku ayi wubalula mavanga mu luzingu luaku.​—Tanga Mavanga 3:19.

2. Bue nzayilu yoyi mebaka yilenda natina bankaka mambote?

Nge veka wela mona ti fueti tubila bankaka mambu momo melonguka, bila beto boso tueta yangalala tubila badietu minsamu mimbote. Bobo wulembu tatamana longuka Bibila, wela zaba phila yi sadila Bibila mu diambu di tubila minu kiaku mu Yehova ayi minsamu mimbote.​—Tanga Loma 10:13-15.

Bato bawombo beta tonina tubila nsamu wumbote kudi bakundi voti kudi ziphangi ziawu. Fueti ba lukinzu. Bulutudi mbote mu kubatubila zitsila zi Nzambi ayi mu kubakamba ti dibundu diawu di luvunu. Kadi zimbakana ti batu beta luta longuka mu bikadulu biaku bimbote viokila mambu momo wulembo tubi.​—Tanga 2 Timoteo 2:24, 25.

3. Phila mbi nguizani lenda ba ayi Nzambi?

Longuka Phova Nzambi yela kusadisa wuzaba diaka mambu mawombo matadidi Nzambi. Tsukatsuka, wela ba ayi nguizani yimbote ayi Yehova. Lenda ba kutu mutu wu dibuta diandi.​—Tanga 2 Kolinto 6:18.

4. Bue lenda tatimina kuenda ku ntuala?

Lenda kuenda ku ntuala mu mambu ma Nzambi ngeyo tatamana longuka Phova andi. (Ebeleo 5:13, 14) Lomba Mbangi yi Yehova mosi kalonguka yaku Bibila mu nkanda Mbi Bibila kieta toma longa? [mu Dingala] Luzingu luaku luela ba lumbote buwombo nge tatamana longuka Bibila.​—Tanga Nkunga 1:1-3; 73:27, 28.

Minsamu mimbote mimetubulu mu mua nkanda wawu kudi Yehova mibedi, nioni widi Nzambi yi kiese. Lenda fikama kudi niandi enati fikimini kudi minsambidi miandi. (Ebeleo 10:24, 25) Enati wulembo tatamana tula ngolo mu yangidika Yehova, widi mu nzila mu diambu di baka luzingu lu kiedikakiedika, yintia tuba luzingu lu mvu ka mvu. Fikama kudi Nzambi yidi diambu dilutidi dimbote dio wulenda vanga.​—Tanga 1 Timoteo 1:11; 6:19.