Sokudila Yehova ayi Yesu mu phil’aku yi yindudila

1-2. Mambu mbi meta tombana mu zola Yehova, ayi bue Yesu kadukisila mambu beni?

“WUFUETI zola Pfumu Nzambi’aku mu ntima wumvimba, mu muel’aku wumvimba, mu zingolo ziaku zioso, mu mayindu maku moso.” (Luka 10:27) Yesu wuzaba ti wawu wuba nsiku wowo wuluta mfunu mu Minsiku mi Mose. Zaba ti luzolo lueto kuidi Yehova lutadidi ntim’eto wowo wukala na ziphuila zieto, phila yoyi tueta kukimuena, phila yoyi tueta bela beto dengana diambu (émotions). Zola Yehova kutadidi phe kukivana mu muel’eto woso, mu zingolo zieto​—buba phe mu maphada meto. Vayi kutadidi phe mayindu meto, buba phil’eto yiyindudila mambu. Bukiedika, tulendi ko thumbu zaba mayindu moso ma Yehova. Vayi tulenda luta sudika bumboti mboti “mayindu ma Kristu” bila niandi wumonisa mu phila yiduka mayindu ma Siandi.​—1 Ko. 2:16.

² Yesu weba zolanga Yehova mu mayindu mandi moso. Wuzaba luzolo lu Nzambi mu diambu diandi ayi wuba wukubama mu vanga mambu mu nguizani ayi luzolo beni, buba ti kubutudila yitombana ti kamona ziphasi mu diambu di vanga mambu mamboti. Bo kaluta tula mayindu mandi mu luzolo lu Siandi, Yesu kasi bikila ko kadi kima nzila kimvuvula mu lukanu beni.

3. Mambu mbi thumu Piela kalonguka kuidi Yesu ayi bue kakindisila Bakristu bankaka babutudila? (1 Piela 4:1)

³ Piela ayi bathumu bankaka babaka diluaku diviokisa thangu ayi Yesu ayi baba batu batheti mu zaba phila yoyi Yesu keba yindudilanga. Mu thangu Piela kasonika nkand’andi wutheti wowo wusonimina mu lutuadusu lu pheve santu, wukindisa Bakristu baba mayindu banga momo ma Kristu.a (Tanga 1 Piela 4:1.) Mu ziphova zithonono, mu thangu Piela kasonika ti “Luba bakubama,” wusadila thubulu yoyi yeta monisa phila yoyi masodi meta kubikila binuanunu biawu mu diambu di mvita. Diawu, enati Bakristu basokudidi phila yiyindudila yi Yesu, maba ba bafuana mu nuanisa mayindu mavanga disumu ayi maba ba bafuana mu nuanisa nza yayi yilembo yadulu kuidi Satana.​—2 Ko. 10:3-5; Efe. 6:12.

4. Bue disolo diadi dilenda kutusadisila tulandakana zindongi zi Piela?

⁴ Matu tadila phila yi yindudila yi Yesu ayi matu mona phila yoyi tulenda kunsokudila. Matu mona 1) phila yoyi tulenda sokudila phila yi yindudila yi Yehova, muingi tuba mayindu maphila mosi, 2) phila yoyi tulenda bela kukikulula, ayi 3) phila yoyi tulenda bela mayindu mamboti mu tudila Yehova ntima mu lusambulu.

SOKUDILA PHILA YI YINDUDILA YI YEHOVA

5. Mu thangu mosi plina, bue Piela kedika kambu sokudila phila yi yindudila yi Yehova?

⁵ Tubonga kifuani ki thangu mosi yoyi Piela ka kasi sokudila ko phila yi yindudila yi Yehova mu diambu dimosi. Yesu wukamba bathumu bandi ti kafueti kuenda ku Yelusalemi, bafueti kuntekisa kuidi bapfumu zi mabundu bobo baba kuna, mona ziphasi ayi bafueti kumvonda. (Mat. 16:21) Bulendakana ti Piela wumona phasi mu kikinina ti Yehova wela bika Yesu nioni wuba vuvu ki Iseli ayi Mesiya nioni wuvanunu tsila kavondu. (Mat. 16:16) Piela wubenda Yesu va ndambu ayi wunkamba: “Pfumu bika Nzambi kakeba mu diambu di mambu beni mabika kukuizila!” (Mat. 16:22) Bo Piela kasi monisa ko phila yi yindudila yi Yehova mu diambu beni, kasi ba ko mayindu maphila mosi ayi Yesu.

6. Mu phila mbi Yesu kamonisina ti mayindu mandi nguizani maba ayi momo ma Yehova?

⁶ Phila yi yindudila yi Yesu nguizani yiwombo yiba ayi yoyi yi Dise diandi di mazulu. Yesu wukamba Piela: “Satana! Botuka va ndidi! Wulembo tombi wumbuisa, bila mayindu maku masi ko ma Nzambi vayi ma kimutu!” (Mat. 16:23) Bulendakana Piela kasi ba ko mayindu mambimbi mu thangu kankamba diambu beni, vayi Yesu wuloza ndongi yi Piela. Didi dilongi mu diambu di beto. Ba diyindu dikondo mona ziphasi luisi ba ko lukanu lu Yehova mu diambu di Yesu. Mu diluaku beni diodi, Piela wubaka dilongi dimfunu wombo mu phila yi tudila mayindu ma Nzambi maba mayindu mandi.

7. Bue Piela kayiza monisina kuntuala ti wutia ludika mayindu mandi maba banga momo ma Yehova? (Tala va baba.)

⁷ Tsuka tsuka, Piela wuyiza monisa ti wuyangalala ba mu nguizani ayi phila yi yindudila yi Yehova. Thangu yiyiza fuana mu diambu di bapakanu bobo bakambu zengu zinitu baba mu khati dikanda di Nzambi. Piela wubaka kiyeko ki samunina Kolineyi nioni wuba mu nkangu wutheti wu bapakanu bobo bayiza ba bisadi bi Nzambi. Nduka nduka bayuda beba yangalalanga ko ba nguizani ayi Bapakanu, diawu ditomba ti Piela kateka bongisa mayindu mandi tuamina kabasamunina. Mu thangu Piela kabakula luzolo lu Nzambi mu diambu beni, wubongisa mbueno’andi. Diawu mu thangu bantuma, Piela wuyenda mu kambu “tula ziphaka voti mu kambu memata.” (Mav. 10:28, 29) Wusamunina Kolineyi ayi basi dikanda diandi ayi babaka mbotama.​—Mav. 10:21-23, 34, 35, 44-48.

8. Bue tulenda monisina ti mayindu meto nguizani madi ayi momo ma Yehova? (1 Piela 3:8 ayi noti kuwanda phapi mu Bibila ki Libongoli ya mokili ya sika.)

⁸ Mimvu miwombo kumanima, Piela wukindisa Bakristu baba “mayindu mamosi.” (Tanga 1 Piela 3:8 ayi noti kuwanda phapi.) Bo tuidi bisadi bi Yehova, tulenda ba mayindu maphila mosi mu monisa diyindu di Yehova banga phila buididi mu Mbembo’andi. Mu kifuani, Yesu wukindisa minlonguki miandi batula Kipfumu ki Nzambi va buangu kitheti mu luzingu luawu. (Mat. 6:33) Ayi mayindu beni momo, nsamuni mosi wu kimvuka kieno kalenda baka nzengolo yitona kisalu ki thangu ka thangu. Va buangu kikunkamba kasobula luzingu lukondolo phasi, tufueti kunkamba mambu mamboti mu diambu di lukanu luandi ayi kumvana lusadusu.

BA KUKIKULULA

9-10. Bue Yesu kamonisina kukikulula ku ngitukulu?

⁹ Mu builu butsuka tuamina bamvonda, Yesu wulonga Piela ayi minlonguki miandi dilongi dimosi dimfunu mu diambu ditedi kukikulula. Vatheti, Yesu wutuma Piela ayi Yowani babongisa bima mu diambu di ndikulu yitsuka yoyi kaviokisa ayi bawu mu thangu kaba va mbata ntoto. Bulendakana khubukulu beni yitomba ti bakubika dibodi ayi suma muingi batu bobo batedosolo babaka bu sukudila malu tuamina badia. Vayi nani wufueti sala kiyeko beni ki kukikulula mu sukula badiandi malu?

¹⁰ Mu kondo memata, Yesu wumonisa kukikulula ku ngitukulu. Mimvuala bayituka buwombo, bila nduka nduka kisalu beni kioki sadi weba salanga kiawu. Yesu wubotula minledi miandi miyilu, wukanga suma mu luketo luandi, wutula nlangu mu dibodi ayi wutona kubasukula malu. (Yow. 13:4, 5) Bukiedika thangu yitombana mu mana sukula malu ma 12 ki mimvuala miandi​—buba phe malu ma Yuda nioni wumvakula. Kadiambu ko buawu, Yesu wudukisa kiyeko beni mu kukikulula koso. Ayi mu mvibudulu woso, Yesu wusudikisa ti: “Lusudikidi diambu diodi ndiluvangidi? Beno lueta kuthedila ‘Nlongi’ ayi ‘Pfumu,’ bukiedika kuandi lueta tuba, bila ndidi Pfumu ayi ndidi Nlongi. Enati minu Pfumu ayi Nlongi ndilusukudi malu, buna beno mamveno lufueti kukisukulanga malu meno beno na beno.”​—Yow. 13:12-14.

11. Bue Piela kamonisina ti wulonguka ba kukikulula? (1 Piela 5:5) (Tala phe foto.)

¹¹ Piela wubaka dilongi mu kukikulula ku Yesu. Kumanima bo Yesu kavutuka ku diyilu, wuvanga diambu dingitukulu mu belusa mutu mosi nioni wuba na kieta tona kabutuka. (Mav. 1:8, 9; 3:2, 6-8) Mu kondo finda phaka, diambu beni diodi dingitukulu dibenda nkangu wu batu kuidi niandi. (Mav. 3:11) Piela wuyangalala mu mona phila yoyi batu beba kunniemisina mu thangu beni yina bo yidi ti wuyonzukila mu dikanda diodi batu beta luta tomba minkembo ayi bibuangu bizangama? Nana, Piela mu kukikulula koso wubotula nkembo beni kuidi niandi mu kuwuvana kuidi Yehova ayi kuidi Yesu, mu tuba ti: “Mu dizina diandi [Yesu], mutu wawu lulembo moni ayi wu luzebi, kabakidi zingolo.” (Mav. 3:12-16) Ziphova ziozi Piela kasadila mu nkanda wowo kasonikina Bakristu mu diambu ditedi yonzula kadulu ki kukikulula, zilenda kutubambula moyo thangu yoyi Yesu kakangila suma kiandi mu luketo ayi kasukudila malu ma mimvuala miandi.​—Tanga 1 Piela 5:5.

12. Banga Piela, bue tulenda tatiminina yonzudila kadulu ki kukikulula?

¹² Tulenda landakana kifuani ki Piela mu yonzula kadulu ki kukikulula. Bambuka moyo ti kukikulula kukiedika kusukilanga ko kaka mu tuba ziphova zimboti. Kuma kioki Piela kasadila mu diambu di tubila kukikulula kitadidi phe mayindu meto makhati​—‘kukilula ku mayindu.’ Tueta dukisa biyeko mu diambu di batu bankaka bila tueta zola Yehova ayi batu vayi bika mu diambu di batuvana nkembo. Enati tulembo sadila Yehova ayi bakhomba zieto mu zikhini ayi mu yoso kuandi phila, buba ti zingolo ziozi tuntula batu bakuzimona voti nana, matu monisa kadulu ki kukikulula.​—Mat. 6:1-4.

BA ‘MAYINDU MAMBOTI’

13. Ba ‘mayindu mamboti’ mbi yinsundula?

¹³ Mbi yintombana mu ba ‘mayindu mamboti’? (1 Pi. 4:7) Mukristu nioni widi mayindu mamboti weta tula ngolo mu baka zinzengolo ziozi zidi nguizani ayi diyindu di Yehova. Mukristu wuphila yoyi zebi ti mu luzingu luandi kuisi ko kadi kima kilutidi mfunu viokila nguizani’andi ayi Yehova. Mbueno yi bukhati khati kakala mu diambu di niandi veka bila zebi ti kasi zaba ko mambu moso. Ayi weta monisa ti weta tudila Nzambi ntima mu kumfikama thangu zioso mu lusambulu lu kukikulula.b

14. Bue Piela mu diluaku dimosi kasi tudila ko Yehova ntima?

¹⁴ Mu builu butsuka tuamina kafua, Yesu wulubula minlonguki miandi ti: “Va builu buabu beno boso malu mana zimbisa minu mu diambu diama.” Piela wuvutula mu sikididi kioso ti: “A Pfumu! Ka diambu ko baboso bela zimbisa minu mu diambu diaku, vayi minu ndilendi ko!” Mu builu beni buna, Yesu wulebidila minlonguki miandi minkaka ti: “Luleka nkielo ayi lusambila.” (Mat. 26:31, 33, 41) Piela kedi fika landakana ndongi beni yoyi, bulendakana nginu wubaka kibakala kizaba nguizani yoyi kaba ayi Yesu. Va buangu ki kubutudila, Piela wukala Pfumu’andi ayi wuyiza nionga buwombo.​—Mat. 26:69-75.

15. Bue Yesu kabela mayindu mamboti mu builu butsuka bu luzingu lu kimutu?

¹⁵ Yesu weba tudilanga buwombo Yehova ntima. Kadiambu ko Yesu wuba wuduka, wusambila Yehova mu khumbu ziwombo. Diawu dimvana kibakala kavangila mambu mu nguizani ayi mu lukanu lolo Yehova kaba mu diambu di niandi. (Mat. 26:39, 42, 44; Yow. 18:4, 5) Mu kondo finda phaka, Piela kasi zimbakana ko zikhumbu ziwombo ziozi Yesu kasambidila mu builu butsuka tuamina bamvonda.

16. Bue Piela kamonisina ti wuyonzula kifu kiba mayindu mamboti? (1 Piela 4:7)

¹⁶ Kuntuala, Piela wuyiza luta tudila buwombo Yehova ntima mu lusambulu. Kumanima ma pfulukulu’andi, Yesu wuvana sikididi kuidi Piela ayi kuidi mimvuala minkaka ti bela baka pheve santu muingi badukisa kisalu kiawu ki tsamununu. Diawu, Yesu wubakamba ti bavingila ku Yelusalemi tii mambu beni mela salama. (Luka 24:49; Mav. 1:4, 5) Mambu mbi Piela keba vanga mu thangu keba vingila? Piela ayi bakhomba ziandi Bakristu ‘batatamana kukivana mu sambila.’ (Mav. 1:13, 14) Kuntuala, mu nkand’andi wutheti, Piela wukindisa bakhomba ziandi Bakristu baba mayindu mamboti ayi batudila Yehova ntima mu lusambulu. (Tanga 1 Piela 4:7.) Piela wulonguka tudila Yehova ntima ayi wuyiza ba dikunzi mu kimvuka.​—Nga. 2:9.

17. Buba maluaku mbi mabutukila tulenda ba, diambu mbi tufueti tatamana vanga? (Tala phe foto.)

¹⁷ Muingi tuba mayindu mamboti, tufueti sambilanga Yehova thangu ka thangu. Tusudikidi ti tufueti tatamana sambila Yehova buba ti tuidi na maluaku momo tubutuka na mawu. Diawu, nduka nduka mu thangu yeta kuiza kututombana ti tubaka zinzengolo zimfunu, tufueti sambila Yehova muingi katutuadisa mu sikididi ti niandi lutidi zaba mambu mamboti mu diambu di beto.

18. Bue tulenda ludikila phil’eto yi yindudila mu sokudila bumboti mboti phila yoyi Yehova keta yindudila?

¹⁸ Tuidi na phutudulu matondo mawombo bila Yehova wutuvangila mu phila yoyi tulenda sokudila bikadulu biandi. (1 Mo. 1:26) Kadiambu ko tulendi ko sokudila Yehova mu buduka boso. (Yes. 55:9) Diawu, banga Piela, tulenda ludika phil’eto yi yindudila mu diambu di tusokudila bumboti mboti phila yoyi Yehova keta yindudila. Tutatamana kubutudila mu sokudila phila yi yindudila yi Nzambi, mu banga kukikulula ayi mu banga mayindu mamboti.