DISOLO DI NDONGOKOLO 33
NKUNGA 4 “Yehova Nsungi’ama”
Ba sikididi ti Yehova weta kuzola
“Mu luzolo lukuikama ndibendila kuidi minu.”—YEL. 31:3.
MU BUKHUFI
Tueka nlonguka bila kioki tufueti kikinina ti Yehova weta kutuzola ayi phila yoyi tulenda yedisila sikididi kieto mu diambu beni.
1. Bila mbi wukivanina kuidi Yehova? (Tala phe foto.)
WUKHIDI bue zaba thangu yoyi wukivanina kuidi Yehova? Bila mbi wubakila nzengolo beni? Mu kondo finda phaka, bila wuyiza kun’zaba ayi wuyiza kun’zola. Wumvana tsila ti mawu tula luzolo luandi va buangu kitheti mu luzingu luaku ayi mawu tatamana kun’zola mu ntim’aku woso, mu muel’aku woso, mu mayindu maku moso ayi mu zingokolo ziaku zioso. (Mlk. 12:30) Tona thangu beni yina, luzolo luaku kuidi niandi lulembo tatamana kaka buelama. Mvutu mbi wulenda vana enati mutu wuyuvudi: “Weta zola Yehova?” Mu kambu memata, mawu mvutudila ti: “Ndieta kun’zola viokila mutu woso ayi viokila kima kioso!”
Wukhidi bue zaba luzolo lolo luba yaku mu diambu di Yehova mu thangu wukivana kuidi niandi ayi mu thangu wubaka mbotama? (Tala paragrafi 1)
2-3. Diambu mbi Yehova katidi tubela sikididi, ayi mbi tueka ntadila mu disolo diadi? (Yelemia 31:3)
2 Buabu, mvutu mbi wulenda vana enati mutu wuyuvudi, “Sikididi kidi yaku ti Yehova weta kuzola?” Mawu memata mu vutula mvutu bila wummuena ti wisi fuana ko zolakana kuidi Yehova? Khomba mosi wunketo nioni wuviokisa luzingu luphasi mu bumuana buandi, tubidi ti: “Nzebi ti ndieta zola Yehova. Ndikala ko ziduti mu diambu beni. Diambu diodi ndieta luta bela ziduti didi dikikinina keni Yehova weta kunzola kuama.” Buabu mbi bilenda kusadisa wuzaba phila yoyi Yehova keta kumuena?
3 Yehova katidi ti wuba sikididi ti weta kuzola. (Tanga Yelemia 31:3.) Kadi zimbakana ti niandi veka Yehova wubenda kuidi niandi. Mu thangu wukivana kuidi niandi ayi mu thangu wubaka mbotama, wubaka kima kimosi kimfunu wombo, kima beni kidi: Luzolo luandi lukuikama. Diawu dimmonisa ti weta kuzola buwombo ayi kadi khumbu kela kuyekula. Luzolo beni luawu lueta kuntuma katadila bisadi biandi banga ‘kima [kiandi] kithalu,’ buba phe ngeyo. (Mal. 3:17.) Yehova katidi ti tuba sikididi ti weta kutuzola banga phila yoyi Polo kabela sikididi mu diambu beni. Mu sikididi kioso wusonika ti: “Bila bukiedika minu nzebi ti buba ti lufua voti zinga, buba ti zimbasi voti ziphevi zimbimbi, buba ti bima bi thangu yayi voti bima binkuiza kuntuala, voti lulendo, buba biobi bidi va kingiela voti biobi bidi kutsi ntoto, voti vangu kinkaka, bilendi kutuvambisa ko mu luzolo lu Nzambi.” (Loma 8:38, 39) Mu disolo diadi tueka mmona bila kioki tufueti yonzudila sikididi kieto ti Yehova weta kutuzola ayi diambu diodi dilenda kutusadisa tubutudila.
BILA MBI TUFUETI BELA SIKIDIDI TI YEHOVA WETA KUTUZOLA?
4. Bue tulenda nungina diela dimbimbi diodi Satana keta luta sadila?
4 Beto ba sikididi ti Yehova weta kutuzola, tulenda nunga “madiela mambimbi” ma Satana. (Efe. 6:11) Satana kalenda vanga mamoso momo kalenda vanga mu diambu di katukakidila tubika sadila Yehova. Diela diodi keta luta sadila didi ditembikisa mayuya mu tuba ti Yehova katuzolanga ko. Tubika zimbakana ti Satana weta tomba thangu yifuana yi kutuvukumunina. Weta luta kutunuanisa mu thangu yoyi tuididi balebakana; banga mu thangu tukukitatikisa buwombo mu mayindu mu bila ki mambu maphasi momo tudengana mu thama ayi momo tulembo dengana thangu yayi voti mu thangu tulembo kitatikisa mu diambu di bilumbu binkuiza. (Zin. 24:10) Satana widi banga khosi yintomba dia bulu kioki kidi kilebakana. Diawu, weta tomba kutuvukumuna mu thangu yoyi tuididi balebakana muingi tuyekula Yehova. Vayi enati tutatimini kindisa sikididi kieto ti Yehova weta kutuzola, matu nunga “nuanisa” Satana ayi madiela mandi mambimbi.—1 Pi. 5:8, 9; Zaki 4:7.
5. Bila mbi dididi diambu dimfunu kuidi ngeyo mu zaba ti Yehova weta kutuzola?
5 Beto ba sikididi ti Yehova weta kutuzola, tulenda fikama kuidi niandi. Bila mbi tutubidi buawu? Yehova wutuvanga na phuila yizola batu bankaka ayi beto phe tueta tomba ti batuzola. Mu thangu mutu katumonisini luzolo, beto phe tueta tomba kun’zola. Diawu, bobuawu bobo tueta luta muena luzolo lu Yehova, buawu phe tueta luta kun’zodila. (1 Yow. 4:19) Ayi bobuawu bobo tunyonzudila luzolo lueto kuidi niandi, buawu phe niandi keta yonzudila luzolo luandi kuidi beto. Diawu, Bibila kitubidi ti: “Bika lufikama vadi Nzambi ayi niandi wela kulufikama.” (Zaki 4:8) Buabu, bue tulenda yonzudila sikididi kieto ti Yehova weta kutuzola?
MBI BILENDA KUSADISA WUBA SIKIDIDI TI YEHOVA WETA KUZOLA?
6. Enati wukadi ba sikididi ti Yehova weta kuzola, mbi wulenda tula?
6 Sambila buwombo ayi wunkambi phila yoyi wulembo kimuena. (Luka 18:1; Loma 12:12) Lombanga Yehova kasadisa wukitadila banga phila yoyi niandi keta kutadila. Ti bulendakana, tudilanga buawu khumbu ziwombo mu lumbu. Enati weta kimona ti wisi fuana ko zolakana kuidi Yehova, yilenda ba phasi mu kikinina diambu beni. Vayi bambuka moyo ti Yehova niandi lutidi tola viokila ntim’aku. (1 Yow. 3:19, 20) Niandi lutidi kuzaba viokila ngeyo veka ayi weta mona mambu momo thangu zinkaka wulendi ko mona. (1 Sa. 16:7; 2 Lus. 6:30) Diawu kadi monanga tsisi “kunyalumuninanga” ntim’aku mu kunkamba phila yoyi wulembo kimuena, ayi kuntombanga lusadusu muingi kasadisa wuba sikididi ti weta kuzola. (Nku. 62:8) Diawu, vangilanga mambu mu nguizani ayi minsambu miaku mu sadila mambu momo madi mu ziparagrafi ziozi zilandikini.
7-8. Bue nkanda wu Minkunga weta kutusadisila tuba sikididi ti Yehova weta kutuzola?
7 Wilukila mambu momo Yehova keta tuba. Wuvana minsoniki mi Bibila pheve santu’andi muingi basudikisa mu bukiedika boso phila yoyi kakadila. Tutadila phila yoyi nsoniki wu minkunga Davidi kamonisina mu phila yimboti ti Yehova weta kutuzola buwombo. Wutuba ti: “Yehova widi wufikama vadi batu bobo badi mintima mi kofakana. Ayi wumvukisanga bobo badi pheve yidi mu kiadi kingolo.” (Nku. 34:18.) Mu thangu widi wulebakana, wulenda kukimona banga ti ngeyo veka widi. Vayi Yehova wuveni sikididi ti maka ba yaku mu thangu yoyi wididi wulebakana bila zebi bumboti mboti ti phuila yingolo widi yi lusadusu luandi. David wusonika diaka ti: “Lunda matsuela mama mu khutu’aku.” (Nku. 56:8) Yehova weta kumona mu thangu widi mu kiadi ayi mu thangu widi mu ziphasi. Weta kitatikisa buwombo mu diambu diaku ayi zebi momo wulembo dengana. Bobuawu bobo dibeti di nlangu mu ntutu wu mutu nioni wulembo tudi vuayaje mu dikanga dikadila mfunu, buawu phe matsuela maku makadila mfunu kuidi Yehova ayi weta mona kadika thangu yoyi wukadila mu ziphasi ayi weta didila. Minkunga 139:3 yitubidi ti: “Ngeyo [Yehova] zebi bumboti zinzila ziama zioso.” Yehova weta mona mambu maku moso, vayi weta tula thalu’andi mu mambu mamboti momo weta vanga. (Ebe. 6:10) Bila mbi? Bila weta bongila mu mfunu wombo zingolo ziozi weta tula mu diambu di wunyangidika.a
8 Yehova weta sadila ziverse beni ziozi zilukindusu muingi kamonisa ti weta kuzola buwombo ayi weta kitatikisa kuwombo mu diambu diaku. Banga phila tubumuenini, Satana weta tomba ti wukikinina mayuya mandi ti Yehova kazolanga ko. Diawu enati thangu zinkaka ziduti wukala mu kikinina ti Yehova weta kuzola, wukiyuvula buna: ‘Nani ndifueti wilukila, “dise di luvunu voti Nzambi yikiedika”?’—Yow. 8:44; Nku. 31:5.
9. Sikididi mbi Yehova kaveni kuidi batu bobo beta kun’zola? (2 Mose 20:5, 6)
9 Yindula phila yoyi Yehova keta muena batu bobo beta kun’zola. Tutadila ziphova ziozi kakamba Mose ayi bana ba Iseli. (Tanga 2 Mose 20:5, 6.) Yehova veni tsila ti wela tatamana monisa luzolo lukuikama kuidi batu bobo beta kun’zola. Ziphova ziozi zituveni sikididi ti kadi khumbu Yehova kela kambu monisa luzolo luandi lukuikama kuidi batu bobo beta kun’zola. (Neh. 1:5) Diawu, enati thangu zinkaka weta kuiza ba mu tezo kiyindula keni Yehova weta kuzola kuaku, wukiyuvulanga: ‘Minu phe ndieta zola kuama Yehova?’ Bambukanga phe moyo ti: Bo weta tula ngolo mu kun’zola ayi kunyangidika, wulenda ba sikididi ti niandi phe weta kuzola buwombo. (Dan. 9:4; 1 Ko. 8:3) Mu thubulu yinkaka, bo weta tula kuaku ngolo mu zola Yehova, bila mbi wulenda kambu kikinina ti niandi weta kuzola? Diawu, wulenda kuaku ba sikididi ti Yehova weta kuzola ayi kadi khumbu kela kuyekula.
10-11. Bue Yehova katididi wutadila khudulu? (Ngalatiya 2:20)
10 Yundudila mu khudulu. Khudulu yoyi yifuta Yesu mu luzingu luandi, diawu dikaba dilutidi mu makaba moso momo Yehova katuvana. (Yow. 3:16) Dikaba beni divanu mu diambu di ngeyo? Mu kondo finda phaka, buawu buididi! Tutadila kifuani ki Polo. Bambuka moyo ti tuamina kaba Mukristu, wuvanga masumu manneni ayi mu thangu kayiza ba Mukristu, weba tatamananga kaka nuanisa kambu kuandi ku lunga. (Loma 7:24, 25; 1 Tim. 1:12-14) Buba ti buawu, weba tadilanga khudulu banga dikaba diandi veka diodi Yehova kamvana. (Tanga Ngalatiya 2:20.) Bambuka moyo ti Yehova wumvana pheve santu’andi mu diambu di kasonika ziphova beni. Ayi mambu moso momo madi mu Bibila, masonama mu diambu di kutulonga. (Loma 15:4) Ziphova zi Polo zilembo monisa bumboti mboti phila Yehova katididi wutadila khudulu, yin’zola sundula banga dikaba diodi kaveni ngeyo veka. Ngeyo tadila khudulu mu phila beni yoyi, mawu yonzula sikididi kiaku ti Yehova weta kuzola.
11 Tumvutudila Yehova matondo mu phila katindila Yesu va ntonto muingi kafua mu diambu dieto. Vayi bila kinkaka kioki Yesu kayizila va ntonto kidi mu diambu di samuna kiedika ki Nzambi kuidi batu bankaka. (Yow. 18:37) Yesu wutumonisa phe phila yoyi Yehova keta kutuzodila.
PHILA YOYI YESU KETA KUTUSADISILA TUBA SIKIDIDI TI YEHOVA WETA KUTUZOLA
12. Bila mbi tulenda wilukila mambu Yesu katuba mu diambu di Yehova?
12 Mu thangu kaba va ntoto, mu luzolo luandi loso weba kambanga batu bumboti mboti phila yoyi Yehova kakadila. (Luka 10:22) Tulenda wilukila mambu momo Yesu katuba mu diambu di Yehova. Bila mbi? Bila Yesu wuluta viokisa thangu yiwombo ayi Yehova ku diyilu tuamina kiza va ntoto. (Kol. 1:15) Bo kakala yandi, wuzaba ayi weba monanga ti Yehova weta zola buwombo bana bandi ba babakala ayi ba baketo bobo badi bakuikama. Bue Yesu kasadisila batu baba sikididi ti Yehova weta kubazola?
13. Bue Yesu katididi tutadila Yehova?
13 Yesu katidi ti tutadila Yehova banga phila niandi keta kuntadila. Mu zievanzeli, Yesu wutedila Yehova “Dise” viokila 160 ki zikhumbu. Ayi mu thangu keba solulanga ayi balonguki bandi weba sadilanga ziphova banga “Dise dieno” voti “Dise dieno ku diyilu.” (Mat. 5:16; 6:26) Noti yi ndongokolo mu Bibila ki kifalisi (Traduction du monde nouveau) mu Matayi 5:16 yitubidi ti: “Bisadi bithama bi Yehova beba kuntedilanga mu zititre ziwombo zi luvalu banga ‘Nkua Ngolo Yoso,’ ‘Lutidi Zangama,’ ayi ‘Mvangi Wunneni.’ Vayi Yesu niandi weba kuntedilanga ‘Dise,’ thedolo yoyi yisi ba ko phasi mu sadila ayi yoyi batu beba luta sadilanga buwombo. Mu phila beni yoyi, buawu keba monisinanga bumboti mboti nguizani yoyi Nzambi kadi ayi bisadi biandi.” Yawu yimonisini bumboti mboti ti Yesu tidi tutadila Yehova banga phila yoyi niandi keta kuntadila, banga Dise di luzolo diodi dieta bongila mu mfunu wombo bana bandi. Tutadila bifuani biodi biobi Yesu kasadidi thedolo ‘Dise.’
14. Bue Yesu kamonisina ti kadika mutu mu beto mfunu wombo kadi va meso ma Dise dieto di mazulu? (Matayi 10:29-31) (Tala phe foto.)
14 Tutadila theti ziphova zi Yesu ziozi zidi mu Matayi 10:29-31. (Tanga.) Zitsodila zidi zinuni zifioti ziozi ka zilendi zola ko Yehova ayi kunsambila. Vayi, Dise dieto weta bongila buba tsodila yimosi mu mfunu wombo ayi weta mona thangu yoyi yim’buila va ntoto. Buabu, bia bisadi biandi bikuikikama biobi bieta kunsadila mu luzolo luawu loso, biedi luta ba ko luvalu viokila tsodila? Mu diambu ditedi ziphova “luzebi ti zitsuki zieno zidi zitangu,” noti yindonokolo mu Bibila ki kifalisi (Traduction du monde nouveau) mu verse 30 yitubidi ti: “Bo Yehova kazebi thalu yi zitsuki ziozi zikala mu ntu mutu, yawu yimmonisa ti weta tudila kadika nlonguki wu Kristu thalu.” Yimonikini bumboti mboti ti Yesu tidi tusudika ti kadika mutu mu beto mfunu wombo kadi va meso ma Dise dieto di mazulu.
Yehova weta bongila buba tsodila yimosi mu mfunu wombo ayi weta mona thangu yoyi yeta betila va ntoto. Bua ngeyo sadi kiandi ki kuikama kioki kieta kunsadila mu luzola, wedi luta ko luvalu viokila tsodila? (Tala paragrafi 14)
15. Ziphova zi Yesu ziozi zidi mu Yowani 6:44 mbi zilembo monisa mu diambu di Dise dieto di mazulu?
15 Tutadila diaka kifuani kinkaka kioki Yesu kasadila thedolo “Dise.” (Tanga Yowani 6:44.) Dise dieto di mazulu wubenda mu zanti yoso mu kiedika. Bila mbi kabendila? Bila wumona ntima wufuana kuidi ngeyo. (Mav. 13:48) Noti yi ndongokolo mu Bibila ki kifalisi (Traduction du monde nouveau) mu Yowani 6:44 yitubidi ti yilenda ba Yesu wuyindula ziphova zi Yelemia ziozi zidi mu verse yoyi yisimbidi disolo diadi. Ziphova beni zitubidi ti: “Mu luzolo lukuikama ndibendila kuidi minu [voti, nditatamana kumonisa luzolo lukuikama].” (Yel. 31:3; dedikisa ayi Hosea 11:4.) Yindula mbi dinsundula. Dise dieto di luzolo weta tatamana mona bikadulu bimboti mu ngeyo biobi thangu zinkaka ngeyo veka wubimonanga ko.
16. a) Mambu mbi Yesu katukembi ayi bila mbi tufueti kun’wilukila? b) Bue wulenda yonzudila sikididi kiaku ti Yehova niandi Dise diodi difueni kuidi ngeyo? (Tala ankadre “Dise diodi difueni kuidi beto.”)
16 Bo Yesu kalembo tedila Yehova Dise dieto, yidi banga niandi wukukamba ti: “Yehova kasi ko kaka Dise diama, vayi widi phe Dise diaku. Ayi ndikuvana sikididi ti weta kuzola ayi weta kitatikisa buwombo mu diambu diaku.” Enati thangu zinkaka wusiedi ko sikididi ti Yehova weta kuzola, wukiyuvula: ‘Ndiedi tudila ko muana Nzambi ntima, nioni lutidi kun’zaba bumboti mboti ayi nioni weta tuba kaka kiedika?’—1 Pi. 2:22.
TATAMANA YONZULA SIKIDIDI KIAKU
17. Bila mbi tufueti tatiminina yonzudila sikididi kieto ti Yehova weta kutuzola?
17 Tufueti tatamana yonzula sikididi kieto ti Yehova weta kutuzola. Bila mbi? Bila banga phila tume dimuena mu disolo diadi, Satana mbeni’eto nioni weta sadila madiela ma tsi tsi, kalendi vonga ko kutukakidila muingi tubika sadila Yehova. Lukanu luandi luidi lu kutuvongisa. Ayi maka tatamana kaka tomba botula sikididi kieto ti Yehova weta kutuzola. Diawu, tuedi kum’bikila ko nzila kanunga!—Yobi 27:5.
18. Bue wulenda yonzudila sikididi kiaku ti Yehova weta kuzola?
18 Muingi tuyonzula sikididi kieto ti Yehova weta kutuzola, tufueti tatamananga sambila katusadisa tukitadila banga phila yoyi niandi keta kututadila. Yindulanga phila yoyi minsoniki mi Bibila misudikisila phila yoyi Yehova keta kutuzodila buwombo. Kadi zimbakana ti Yehova weta zola kaka mutu nioni weta kun’zola. Yindudilanga bibila biobi bilenda kutuma wutadila khudulu banga dikaba diodi Yehova kavana ngeyo veka. Ayi tudilanga ziphova zi Yesu ntima bo kakukamba ti Yehova widi Dise diaku. Buabu, enati mutu wuyuvudi: “Sikididi kidi yaku ti Yehova weta kuzola?” Mu kondo finda phaka mawu mvutudila ti: “Ninga, ndieta kun’zola! Ayi kadika lumbu ndieta tula zingolo mu kummonisa ti ndieta kun’zola!”
NKUNGA 154 Luzolo lulendi suka ko