DISOLO DI NDONGOKOLO 34
NKUNGA 3 Zingolo zieto, vuvu kieto, sikididi kieto
Ba sikididi ti Yehova wulemvukila
“Ngeyo wulemvukila mambimbi ma disumu diama.”—NKU. 32:5.
MU BUKHUFI
Tueka longuka bila kioki tufueti kikinina nlemvo wu Yehova ayi phila yoyi Bibila kieta kutuvanina sikididi ti niandi weta lemvukila batu bobo beta balula mintima.
1-2. Bue tueta muena mu thangu Yehova katulemvukidi? (Tala phe va baba.)
DAVIDI wuzaba ziphasi ziozi zieta mona mutu nioni wulembo kitatikisa mu bila ki masumu momo kavanga mu thama. (Nku. 40:12; 51:3; ziphova zi thonono) Wuvanga masumu manneni mu luzingu luandi. Ka diambu ko buawu, wubalula ntim’andi mu bukiedika ayi Yehova wunlemvukila. (2 Sam. 12:13) Davidi wubaka ndembama yi ntima mu thangu kayiza zaba ti Yehova wulemvukidi.—Nku. 32:1.
2 Banga Davidi, beto phe tulenda baka ndembama yi ntima yoyi yeta nata nlemvo wu Yehova. Luidi lukindusu lunneni mu zaba ti Yehova widi wukubama mu kutulemvukila—buba ti masumu manneni tuvengi—ti tubaludi mintima mieto mu bukiedika, tufunguni masumu momo tuvengi ayi ti tutudidi ngolo tubika bue mavanga! (Zin. 28:13; Mav. 26:20; 1 Yow. 1:9) Ayi luidi phe lukindusu lunneni mu zaba ti Yehova weta kutulemvukila mvimba mvimba, banga ti tuisi teka vanga ko disumu beni!—Yeh. 33:16.
Ntinu Davidi wusonika minkunga miwombo miomi mieta monisa nlemvo wu Yehova (Tala paragrafi 1-2)
3-4. Bue khomba mosi wunketo kayiza kimuena kumanima ma baka mbotama, ayi mbi tueka ntadila mu disolo diadi?
3 Batu bankaka phasi beta mona kikinina nlemvo wu Yehova. Tutadila kifuani ki Jennifer nioni wuyonzukila mu kiedika. Mu thangu kayiza ba ntueni, wutona zingila mu nzingulu yimbimbi ayi sueka mambimbi mandi. Kumanima ma mimvu, wuyiza tona bue longuka Bibila ayi tsuka tsuka wuyiza baka mbotamba. Tubidi ti: “Luzingu luama luba lutomba baka bima biwombo, lu kitsuza, lunua malavu mawombo ayi lukue fuemanga fuemanga. Mu mayindu mama ndizaba ti mu thangu ndibalula ntima, ndilomba Yehova nlemvo ayi wundemvukila mu nzila yi khudulu yoyi yitula ti ndibue ba mutu wumboti. Vayi ntim’ama phasi wube monanga mu kikinina ti Yehova wundemvukila.”
4 Ngeyo phe thangu zinkaka phasi weta mona mu kikinina ti Yehova wulemvukila zinzimbala ziozi wuvanga mu thama? Yehova tidi ti beto phe tubaka ndembama yi ntima yoyi yibaka Davidi mu nlemvo’andi. Mu disolo diadi tueka n’zaba bila kioki tufueti kikinina nlemvo wu Yehova ayi diambu diodi dilenda kutusadisa tubutudila.
BILA MBI TUFUETI BELA SIKIDIDI TI YEHOVA WUTULEMVUKILA?
5. Mbi Satana katidi kutukuika tukikinina? Vana kifuani.
5 Kikinina nlemvo wu Yehova kulenda kutusadisa tubika bua mu ntambu wu Satana. Kadi zimbakana ti Satana kalenda vanga mamoso momo kalenda vanga mu diambu di katukakidila tubika sadila Yehova. Muingi kanunga lukanu luandi, kalenda tomba kutukuika tukikinina ti masumu meto malendi ko lemvukulu. Tutadila kifuani ki bakala dimosi ku Kolinto nioni wubotulu mu kimvuka mu bila ki kitsuza. (1 Ko. 5:1, 5, 13) Mu thangu kayiza balula ntima kuntuala, Satana wedika tomba ti bakhomba zi kimvuka babika lemvukila bakala beni ayi baba mintima mingolo muingi babika bue kunyamba mu kimvuka. Satana wubue tomba ti mutu beni kakimona ti kasi fuana ko baka nlemvo mu diambu di kaba “mu kiadi kiwombo” muingi kalembo sadila Yehova. Satana kasi balula ko lukanu luandi ayi madiela mandi. Vayi ‘tuzebi bumboti mayindu mandi.’—2 Ko. 2:5-11.
6. Mbi tufueti tula mu diambu di tubika kue kitatikisanga mu bila ki masumu momo tuvanga?
6 Beto kikinina nlemvo wu Yehova, matu lembo kukitatikisa mu bila ki masumu momo tuvanga ayi matu ba mu zikhini. Tuedi yituka ko mu mona mutu nioni vengi disumu kakitatikisa, bila buawu bukadila. (Nku. 51:17) Dikala phe diambu dimboti. Kansasa kieto kilenda kututuma tubongisa nzingulu’eto. (2 Ko. 7:10, 11) Vayi, beto tatamana kue kitatikisanga mu bila ki masumu momo tuvanga ka diambu ko tubalula kueto ntima, tulenda lebakana. Beto kikinina nlemvo wu Yehova, matu lembo kue kitatikisanga mu bila ki masumu momo tuvanga. Diawu madi tula ti tusadila Yehova mu phila yoyi kantombila, mu kansasa kimboti ayi mu zikhini. (Kol. 1:10, 11; 2 Tim. 1:3) Buabu, mbi tufueti tula mu diambu di ntim’eto wukikinina nlemvo wu Yehova?
MBI BILENDA KUSADISA WUBA SIKIKIDIDI TI YEHOVA WULEMVUKILA?
7-8. Mambu mbi Yehova katuba mu diambu diandi kuidi Mose ayi sikididi mbi matuveni? (2 Mose 34:6, 7)
7 Yindulanga mambu momo Yehova katuba mu phila yoyi kakadila. Mu kifuani, tala mambu momo kakamba Mose mu mongo Sinayi.a (Tanga 2 Mose 34:6, 7.) Va buangu ki mana tubila bikadulu biandi bioso ayi phila yoyi keta vangila mambu, wumona ti didi diambu dimboti mu tuba ti widi “Nzambi yi nlemvo ayi yi ntima kiadi.” Nzambi yiphila yoyi muna kambulu lemvukila mutu nioni baludi kuandi ntima? Kadi khumbu! Bila niandi tudila buawu, mayi monika ti kasi ko ntima kiadi ayi ntima ngolo kadi. Kosoko, kadi khumbu Yehova kela monisa bifu biphila yoyi.
8 Tulenda ba sikididi ti kadi khumbu Yehova kela baluka bila widi Nzambi yikiedika. (Nku. 31:5) Diawu, tulenda kun’wilukila banga phila yoyi katubila mu ziphova ziandi. Enati phasi weta mona mu lembo kukitakisa mu bila ki masumu momo wuvanga, wukiyuvulanga: ‘Ndieta wilukila kuama ti bukiedika Yehova widi Nzambi yi nlemvo ayi yi ntima kiadi, ayi kadi khumbu kela kambu lemvukila mutu nioni wubalula kuandi ntima? Diawu, ndilendi ko kikinina ti wundemvukila?’
9. Nkunga 32:5 mbi wukutulonga mu phila yoyi Yehova keta lemvukila masumu meto?
9 Yindudila mu buphinda mambu momo Yehova kakamba minsoniki mi Bibila misonika mu diambu di nlemvo’andi. Mu kifuani, tutadila phila yoyi Davidi kasudikisila nlemvo wu Yehova. (Tanga Nkunga 32:5.) Wutuba ti: “Ngeyo wulemvukila mambimbi ma disumu diama.” Thubulu yi ki Ebelewo yoyi yilembo bangula kuma “lemvukila,” yilenda sundula “nanguna,” “botula,” voti “nata.” Mu thangu Yehova kalemvukila Davidi, yiba banga niandi wubotula masumu mandi ayi wumanata kielo. Davidi wubaka ndembama mu zitu ki kukitatikisa koko kuba yandi. (Nku. 32:2-4) Beto phe tulenda baka ndembama yiphila yoyi. Mu thangu tubaludi mintima mieto mu masumu momo tuvanga, tuedi bue kue natanga ko zitu ki kukitatikisa bila Yehova wubotula masumu beni.
10-11. Ziphova “wukubama mu lemvukila,” mbi zilembo monisa mu diambu di Yehova? (Nkunga 86:5)
10 Tanga Nkunga 86:5. Mu verse yayi Davidi tubidi ti Yehova widi “wukubama mu lemvukila.” Mu tadila ziphova beni ziozi, bukub mosi yeta sudikisa mambu ma Bibila yitubidi mu diambu di Yehova ti: “[Widi] ‘nkua nlemvo,’ buawu ‘bumutu buandi.’” Bila mbi lemvukila buididi bumutu buandi? Tini kioki kilandikini ki verse beni kitubidi ti: “Widi wufuluka mu mamboti kuidi bobo beti kuntela.” Banga phila tubumuenini mu disolo di ndongokolo diodi diviokidi, luzolo lukuikama lueta tuma Yehova katula nguizani yingolo yoyi yeta zingila ayi bisadi biandi bikuikama. Mu luzolo luandi beni lolo lukuikama, Yehova weta “lemvukila [bisadi biandi] mu ntima mosi.” (Yes. 55:7, nkp.) Enati phasi weta mona mu ba sikididi ti Yehova wulemvukila, wulenda kukiyuvula: ‘Ndieta wilukila kuama ti Yehova widi nkua nlemvo ayi ti weta lemvukila mu ntima mosi batu bobo beta balula mintima bobo beta kunlomba nlemvo? Buabu, ndiedi kikinina ko ti wundemvukila mu thangu ndinlomba nlemvo?’
11 Tulenda baka lukindusu mu zaba ti Yehova zebi bumboti mboti ti tuidi batu bakondo lunga. (Nku. 139:1, 2) Buawu phe nkunga wunkaka wu Davidi wumonisini bumboti mboti diambu beni. Nkunga beni wulenda kutusadisa tuba sikididi ti Yehova wutulemvukila.
MAMBU MOMO YEHOVA KAZEBI MU DIAMBU DI BETO
12-13. Mu tadila Nkunga 103:14, diambu mbi Yehova keta tebukila moyo, ayi mbi dieta kuntuma kavanga?
12 Tanga Nkunga 103:14. Davidi tubidi ti Yehova ‘weti tebuka moyo ti tuidi mbungi-mbungi yi ntoto.’ Mu ziphova beni ziozi, Davidi sudikisidi bila kimosi mu bibila biobi Yehova kakadila wukubama mu lemvukila bisadi biandi bikuikama biobi bibaludi mu bukiedika mintima: Kazimbakanga ko ti tuidi batu bakondo lunga. Muingi tusudika bumboti mboti diambu beni, tufiongunina ziphova zi Davidi.
13 Davidi tubidi ti Yehova ‘zebi bumboti mboti phila yoyi tuvangulu.’ Wuvanga Adamu mu “mbungi-mbungi yi ntoto” ayi zebi bumboti mboti ti maluaku ma batu ndilu makala, mu kifuani, mutu mo kazinga: Phuila yi dia kakala, yi leka ayi yi vumuna. (1 Mo. 2:7) Vayi mu thangu Adamu ayi Eva bayiza sumuka, tsundu yi vangulu mu mbungi-mbungi yi ntoto yiyiza baluka. Bo tuidi bana bawu, tutambakana disumu diawu diodi dieta kututula tuba kaka mayindu ma vanga mambu mambimbi. Yehova kasukilanga ko kaka mu zaba ti tuidi batu bakondo lunga, vayi Davidi tubidi ti weta “tebukila [phe diambu beni] moyo.” Yawu yintia sundula ti niandi weta kutuvangila kaka mambu mu ntima kiadi. Tulenda tubila mu bukhufi tsundu yi ziphova zi Davidi mu phila yayi: Yehova zebi ti thangu zinkaka tueta tula zinzimbala, buba buawu, beto thumu balula ntima mu bukiedika, niandi weta kutumonisina ntim’andi kiadi ayi weta kutulemvukila.—Nku. 78:38, 39.
14. a) Mu tadila Nkunga 103:12, diambu mbi diaka Davidi katubidi mu phila yoyi Yehova keta lemvukila? b) Bue kifuani ki Davidi kimonisini ti nlemvo wu Yehova widi wuduka? (Tala ankadre “Phila yoyi Yehova keta lemvukila ayi keta zimbikinina.”)
14 Mbi binkaka bilenda kutusadisa tuba sikididi ti Yehova wutulemvukila? (Tanga Nkunga 103:12.) Davidi tubidi ti mu thangu Yehova katulemvukidi, Weta tatula masumu meto banga “boso este yitatukidi ayi weste.” Mu tala ayi mu mona, Este yawu yilutidi tatuka mu weste. Kadi khumbu este ayi weste biela dengana. Mu tadila ziphova beni ziozi, dilongi mbi tubeki mu thangu Yehova kelemvukidi masumu? Bukuc mosi yitubidi ti: “Bo masumu meto bamatatudi kielo, tulenda ba sikididi ti tuedi bue mawa ko kadi mua tsudi, tuedi bue mamona ko ayi tuedi bue matebukila ko moyo kadi fifioti.” Bukiedika, thangu zinkaka, tsudi yeta kututebula moyo mambu mankaka momo mavioka. Vayi Yehova niandi lemvukila disumu, kulendi bue ba ko kadi mua tsudi fiofi fikum’bambula moyo disumu diodi kalemvukila mu diambu di katuvana tumbu.—Yeh. 18:21, 22; Mav. 3:19.
15. Mbi tulenda tula enati tueta kue kitatikisanga kaka mu masumu momo tuvanga mu thama?
15 Bue ziphova zi Davidi ziozi zidi mu Nkunga 103 zilenda kutusadisila tuba sikididi ti Yehova wutulemvukila? Enati tueta kue kitatikisanga kaka mu masumu momo tuvanga mu thama, tulenda kukiyuvula: ‘Ndin’zaba kuama ti Yehova weta tebuka moyo ti ndidi mutu wukondo lunga ayi weta lemvukila nsumuki nioni baludi ntima banga minu? Ndieta zaba kuama phe ti Yehova wundemvukila ayi wuzimbakana masumu momo ndivanga ayi kalendi ko bue kuphanina mawu tumbu?’ Yehova kalundanga ko mu mayindu mandi masumu momo tuvanga mu thama. Beto phe tufueti kunsokudila. (Nku. 130:3) Ba sikididi ti Yehova wutulemvukila, maku tusadisa tukilemvukila phe beto veka masumu momo tuvanga mu thama ayi tutatamana kuenda kuntuala.
16. Vana kifuani kioki kimmonisa ti luta tula mayindu meto mu zinzimbala ziozi tuvanga mu thama, kidi vonza kinneni. (Tala phe foto.)
16 Tubonga kifuani kimosi. Kue kitatikisanga mu masumu momo wuvanga mu thama, yidi banga ngeyo wunnata ditoma, va buangu kitatamana tala kuntuala, ngeyo wulembo kue tatamananga kaka tala mu lumueno. Didi kuandi diambu dimboti talanga lumueno mu diambu di wuzaba bivonza biobi bidi kumanima, tudila buawu kulenda kusadisa wutina bivonza beni. Vayi muingi wubika tula kizida, wufueti tatamana tala kuntuala mu thangu wunnata ditoma. Bo buawu phe, dilenda kuandi ba diambu dimboti mu yindulanga zinzimbala ziozi tuvanga mu thama; bila kulenda kutusadisa tubaka malongi ayi tuyedisa nzengolo’eto yikondo bue zivutukila. Vayi, enati tutatimini tula mayindu meto mu zinzimbala ziozi tuvanga mu thama, matu kitatikisa buwombo ayi tulenda vonga sadila Yehova. Va buangu ki kubutudila, tutatamana tula mayindu meto koko tunkuenda. Tuidi mu nzila yoyi yilembo tunati ku nza yimona yoyi Nzambi katuvanina tsila, koko tuela sie bue “yindudila ko mambu mathama.”—Yes. 65:17; Zin. 4:25.
Banga kuandi phila yoyi mutu nioni wunnata ditoma keta luta tadila kuntuala va buangu ki tala lumueno, beto phe tufueti luta tulanga thalu’eto mu zitsila zi kitoko ziozi Yehova kalembo tukubikila va buangu kiluta tula mayindu meto mu zinzimbala ziozi tuvanga mu thama (Tala paragrafi 16)
TATAMANA BA SIKIDIDI
17. Bila mbi tufueti tatiminina bela sikididi ti Yehova weta kutuzola ayi weta kutulemvukila?
17 Tufueti tatamana ba sikididi ti Yehova weta kutuzola ayi weta kutulemvukila. (1 Yow. 3:19, nkp.) Bila mbi? Bila Satana kalendi vonga ko kutukuika mu kingolo tukikinina ti Yehova katuzolanga ko ayi katulemvukilanga ko. Lukanu luandi lukutuvongisa muingi tubika sadila Yehova luisi baluka ko. Tufueti zaba ti Satana maka tatamana kaka tomba kutuvongisa bila thangu yime siala yandi yeka yifioti. (Tso. 12:12) Tuedi kum’bikila ko nzila kanunga!
18. Mbi wulenda tula muingi wuba sikididi ti Yehova weta kuzola ayi weta kulemvukila?
18 Muingi wuyedisa sikididi kiaku ti Yehova weta kuzola, sadila mambu momo tulongukidi mu disolo diodi diviokidi. Muingi wutatamana ba sikididi ti Yehova wulemvukila, yindulanga mambu momo katuba mu phila yoyi kakadila. Yindudilanga mu buphinda mambu momo batu bobo basonika Bibila mu pheve santu’andi batuba mu diambu di nlemvo’andi. Kadi zimbakana ti kazimbakananga ko ti tuidi batu bakondo lunga ayi weta tuvangila mambu mu ntima kiadi. Ayi tebuka moyo ti mu thangu keta lemvukila, weta zimbakana. Banga kuandi phila yoyi Davidi kabela sikididi mu nlemvo wu Yehova, ngeyo phe wulenda tuba banga niandi ti: “Matondo Yehova bila wulemvukila ‘mambimbi ma disumu diama’!”—Nku. 32:5.
NKUNGA 1 Mavanga ma Yehova
a Tala disolo “Pusaná penepene na Nzambe Yehova alobelaki bizaleli na ye moko” mu Nzo yi Nkengidi wu 1 Mai 2009 mu dingala.
b W. Oesterley, The Psalms, S.P.C.K., 1959.
c C. Spurgeon, The Treasury of David, Marshall Brother’s Ltd., 1874.