Biuvu bi mintangi
Thangu mbi kisalu ki tsamununu kiela mana?
Yesu wutuba ti: “Buna Nsamu wawu wumboti wu Kipfumu wela longo va nza yimvimba mu diambu di wuba kimbangi kuidi batu ba makanda ma zitsi zioso. Buna bosi tsukulu yi nza yela ba.” (Mat. 24:14) Kuma ki Kingeleki kioki kibangulu mu “tsukulu” mu verse yayi, buba phe mu verse 6 ayi 13 kidi télos. Kilembo monisa tsukulu yi mambu moso ma nza yi Satana mu Alimangadoni. (Tso. 16:14, 16) Diawu, tuela tatamana samuna nsamu mboti tii muna mua thangu yitsuka tuamina Alimangedoni yiba. Nzayilu beni yibaludi phisulu yoyi tuba mu thama.
Mu thama tueba banzilanga ti tuela lembo samuna nsamu mboti mu thangu yoyi yela tonina ziphasi zinneni ayi mbungulu yi Babiloni dinneni. (Tso. 17:3, 5, 15, 16) Tueba banzilanga ti mu thangu ziphasi zinneni ziela tona, Yehova kela sie bue vana ko batu diluaku diyakula nsamu wumboti. (Yes. 61:2) Tueba banzilanga phe ti batu bobo bela vuka mu ziphasi zinneni badi kaka batu bobo bela monisa kuikama kuidi Yehova tuamina diambu beni disalama. Tubadedikisa ayi Bayuda bobo bavuka mu mbungulu yi Yelusalemi mu mvu 607 T.T.E. Batu beni basobulu mu diambu di bavuka bila beba sambilanga Yehova ayi beba lendanga mambu mambimbi. (Yeh. 5:11; 9:4) Diawu phila yoyi tudedikisila batu beni yikadi wizana ayi ziphova zi Yesu ziozi zidi mu Matayi 24:14, yoyi yilembo monisa ti batu balenda kikinina nsamu wumboti tii muna mua thangu yitsuka yi tsukulu yi mambu moso tuamina Alimangedoni yiba.
Phisulu’eto yimona yi Matayi 24:14 yibaludi phe phisulu’eto yi tsangu yoyi yidi banga mvula wu matadi yoyi Tsongolo 16:21 yiyolukidi. Pfiongununu mosi yiphinda yimonisini ti kadika verse yilembo dukisa diyindu di n’diandi verse mu ziverse beni ziozi. Mu phila mbi? Mu phila yoyi batu beta muena tsangu yi Kipfumu. Polo wusonika ti “kuidi batu bobo balembo vuki,” tsangu beni yimboti yidi “malasi ma luzungu.” Vayi kuidi bambeni zi Nzambi yidi tsangu yimbimbi, “tsudi yi lufua.” (2 Ko. 2:15, 16) Batu beni beta lenda tsangu yi Kipfumu bila nza yoyi beta zola yidi yimbimbi, yilembo yadulu kuidi Satana ayi yeka nduku bungu.—Yow. 7:7; 1 Yow. 2:17; 5:19.
Zaba phe ti mabienga beni ma mvula wu matadi wu kifuani mela “ba manneni ngolo.” Yawu yimmonisa ti mu thangu ziphasi zinneni, kisalu ki tsamununu kiela luta vanga mambu, yin’zola tuba ti dizina di Yehova diela luta zabakana viokila mu thama. (Yeh. 39:7) Mu thangu beni yina, kumanima ma mbungulu yi Babiloni dinneni, batu bankaka bela yakula tsangu beni banga malasi ma kitoko? Bukiedika, diawu dilenda salama. Bulendakana bela kuiza bambuka moyo voti bela kuiza zaba ti tona thama Bambangi zi Yehova batona samuna tsukulu yi mabundu ma luvunu.
Diambu beni didedikini ayi mambu momo masalama ku Ngipiti kumanima ma 10 ki Bivunga. Yehova bo kamana “[vana] zinzambi zioso zi Ngipiti tumbu,” basi Ngipiti “bobo baba nkangu wunneni wu batu baphila mu phila” balandakana bana ba Iseli. (2 Mo. 12:12, 37, 38) Yilenda ba basi Ngipiti beni balandakana dikanda di Yehova mu bila kioki bamuena lungana ku mambu momo Mose katuba mu diambu di kumi ki bivunga.
Woso mutu wela sobula ba ku ndambu Yehova kumanima ma mbungulu yi Babiloni dinneni, wela baka diluaku dibuedila bakhomba zi Kristu mioko bobo bela ba va mbata ntoto tii muna mua thangu yitsuka tuamina Alimangedoni yiba. (Mat. 25:34-36, 40) Bukiedika, diluaku di batu di tadulu banga mamemi diela kuiza mana tii muna mua thangu yitsuka tuamina Alimangedoni yiba, mu thangu Bakristu bobo batulu mafuta mu kipheve bobo bela ba va ntoto bela baka nsendo wu diyilu.
Phisulu beni yoyi yime bue sudukusu bumboti, yilembo luti monisa luzolo lunneni ayi ntima kiadi wunneni wu Yehova. Bukiedika, ‘kakadi zola ti wumosi kabungana. Vayi kantomba ti baboso babalula mavanga.’—2 Pi. 3:9.