DISOLO DI NDONGOKOLO 34
NKUNGA 107 Ndakisa ya bolingo ya Nzambe
Bue bakulutu beta monisina luzolo ayi ntima kiadi kuidi minsumuki
‘Nzambi mu mamboti mandi, tidi kusadisa wubalula mavanga.’—LM. 2:4.
MAMBU MO MADI MU KHATI DISOLO DIADI
Tueka mmona phila yoyi bakulutu beta tombila sadisila bakhomba bobo beta vanga masumu manneni mu kimvuka.
1. Diambu mbi dilenda salama mutu niandi vanga disumu dinneni?
MU DISOLO diodi diviokidi, tulongukidi mambu momo Polo kakamba kimvuka ki Kolinto kifueti vanga mu thangu mutu mosi kavanga disumu dinneni. Nsumuki beni kasi balula ko mavanga ayi bam’botula mu kimvuka. Diawu, banga phila bumonisini verse yoyi yisimbidi disolo diadi, Nzambi kalenda sadisa batu bobo bavanga masumu manneni babalula mavanga. (Lom. 2:4) Bue bakulutu balenda kubasadisila muingi babalula mavanga?
2-3. Mbi tufueti tula enati tuwilu wumosi mu bakhomba zieto Bakristu mevanga disumu dinneni, ayi bila mbi?
2 Tuamina bakulutu basadisa mutu nioni vengi disumu dinneni, bafueti keta zaba diambu beni. Diawu, mbi tufueti tula enati tuwilu wumosi mu bakhomba zieto Bakristu vengi disumu dinneni diodi dilenda tula ti kabotulu mu kimvuka? Tufueti kindisa khomba nioni vengi disumu dinneni kelombi lusadusu kuidi bakulutu.—Yes. 1:18; Mav. 20:28; 1 Pi. 5:2.
3 Diambu mbi dieta salama enati mutu nioni vengi disumu dinneni mengi kue tubi disumu diandi kuidi bakulutu? Diawu, beto veka ma tue kambi bakulutu diambu beni, muingi tuba sikididi ti khomba beni maka baka lusadusu lolo lufueni. Diawu diambu di luzolo tufueti vanga bila tulendi ko yangalala zimbisa khomb’eto wubakala voti wunketo. Enati nsumuki beni mengi kuandi balula mavanga mandi, maka luta bebisa nguizani’andi ayi Yehova. Kalenda bebisa phe lukumu lu kimvuka. Buba ti dilenda ba phasi mu kamba bakulutu disumu diodi divengi khomba, matu butudila kaka bila tueta zola Yehova ayi khomb’eto nioni vengi disumu dinneni.—Nku. 27:14.
BUE BAKULUTU BETA SADISILA BOBO BETA VANGA MASUMU MANNENI
4. Bakulutu lukanu mbi bafueti ba mu thangu bansolula ayi mutu nioni vengi disumu dinneni?
4 Mu thangu mutu mosi mu kimvuka kavengi disumu dinneni, kimvuka ki bakulutu maki sobula mu bawu bakhomba batatu bobo bafueni mu vanga komite.a Bakhomba beni bafueti zaba vovo vasukidi maluaku mawu ayi bafueti ba kukikulula. Kadiambu ko beta tomba sadisa mutu nioni vengi nzimbala kabalula mavanga mandi, beta zaba ti balendi ko kunkuika mu kingolo kabaluka. (5 Mo. 30:19) Bakulutu beta zaba ti, yisi ko ti batu boso bobo beta vanga masumu manneni beta balula mavanga banga Ntinu Davidi. (2 Sa. 12:13) Minsumuki minkaka milenda manga kuawu wilukila khebusulu yi Yehova. (1 Mo. 4:6-8) Vayi lukanu lu bakulutu luidi lusadisa nsumuki kabalula mavanga enati bulendakana. Zitsikudukusu mbi ziela kubasadisa mu thangu bela solula ayi mutu nioni vengi disumu dinneni?
5. Dilongi mbi diodi bakulutu bafueti ba na diawu mu mayindu mawu mu thangu bela solula ayi mutu nioni vengi disumu dinneni? (2 Timote 2:24-26) (Tala phe foto.)
5 Bakulutu beta tadila nsumuki ti widi dimemi dimfunu wombo diodi dizimbidi. (Luka 15:4, 6) Vayi mu thangu balembo solula ayi mutu beni, balendi ko ba mambu mangolo mu thangu bantuba, mu phila yoyi bammonikina va ntuala mutu beni ayi balendi ko kaka sukila mu yuvula biuvu ayi baka mimvutu. Va buangu ki kubutudila, bafueti monisa bikadulu biobi bidi mu 2 Timote 2:24-26. (Tanga.) Bakulutu bafueti ba buphombo, lembama ayi zanti mu thangu balembo tudi zingolo mu simba ntima nsumuki.
Banga kuandi mimvungi mi mamemi mithama, bakulutu beta tula ngolo mu tomba mamemi momo mazimbala (Tala paragrafi 5)
6. Bue bakulutu bafueti bongisila mintima miawu tuamina basolula ayi nsumuki? (Loma 2:4)
6 Bakulutu beta bongisa mintima miawu. Beta tula ngolo mu sokudila Yehova mu thangu yoso yoyi balembo soludila ayi nsumuki mu bambukila moyo ziphova zi Polo zio zitubidi ti: ‘Nzambi mu mamboti mandi, tidi kusadisa wubalula mavanga.’ (Tanga Loma 2:4.) Bakulutu bafueti keta bambuka moyo ti badi mimvungi mi mammemi ku tsi lutuadusu lu Yesu. (Yes. 11:3, 4; Mat. 18:18-20) Tuamina bakulutu basolula ayi nsumuki, bafueti keta yindudila mu nzila yi lusambulu lukanu luawu: Lusadisa nsumuki kabalula mavanga. Maba tula zithombolo mu Bibila ayi mu minkanda mieto ayi maba sambila mu diambu di bazaba suasikisa mambu. Maba tadila phe mambu momo mafueti kubasadisa bazaba mambu momo matumini mutu beni kayindula mu phila beni yina ayi kavanga disumu dinneni.—Zin. 20:5.
7-8. Bue bakulutu balenda sokudila mvibudulu wu Yehova mu thangu balembo solula ayi mutu nioni vengi disumu dinneni?
7 Bakulutu beta sokudila mvibudulu wu Yehova. Beta bambukila moyo phila yoyi Yehova kavangila minsumuki mambu mu thama. Mu kifuani, Yehova wusolula mu mvibudulu woso ayi Kaini mu kummonisa bivonza bi disumu ayi mu kumvana vuvu ki bue ba nguizani yimboti ayi niandi. (1 Mo. 4:6, 7) Yehova wusemba Davidi mu nzila m’bikudi Natani, nioni wusadila kifuani kioki kisimba ntima wu ntinu. (2 Sa. 12:1-7) Yehova “wutuma” diaka phe mim’bikudi miandi “mu khumbu ziwombo” kuidi dikanda di Iseli diodi diba ntu ngolo. (Yel. 7:24, 25) Keba teka vingilanga ko ti dikanda di Iseli diteka balula mavanga tuamina kadisadisa. Vayi wubaka diyindu di kubakindisa babalula mavanga.
8 Bakulutu beta sokudila kifuani ki Yehova mu thangu balembo tombi sadisa mutu nioni vengi disumu dinneni. Banga butubidi 2 Timote 4:2, bakulutu bafueti solula mu “mvibudulu woso” ayi Mukristu nioni wulembo kitatikisa voti nioni vengi disumu dinneni. Diawu, nkulutu kafueti ba wulembama ayi ba mvibudulu mu diambu di kasadisa nsumuki kabalula mavanga. Enati nkulutu fuemini voti kengi zizi kiandi, mutu nioni vengi disumu dinneni kalenda manga wa ndongi’andi ayi manga balula mavanga.
9-10. Bue bakulutu balenda sadisila nsumuki kazaba mambimbi mandi?
9 Bakulutu beta tomba zaba mambu momo matumini nsumuki beni kasumuka. Mu kifuani, mu malembi malembi Mukristu beni kayiza lebikinina mu bila ki kondu bue tula ndongokolo yi niandi veka voti mu kambu bue sala kisalu ki tsamununu? Kasie bue sambila ko buwombo, voti mu yilu yilu kayika butudila? Ziphuila zimbimbi kabikidi nzila zin’diatisa? Zinzengolo zikondo ku nduenga kabeki mu tsobodolo’andi yi bakundi voti mu phiokosolo’andi thangu? Bue zinzengolo beni ziozi zivangidi diambu mu ntim’andi? Wulembo zabi mambu momo zinzengolo ziandi ayi mavanga mandi bitudidi kuidi Dise diandi Yehova?
10 Bakulutu balenda yuvula biuvu kuidi mutu beni, biobi bikunsadisa kayindula mambu momo mabebisidi nguizani’andi ayi Yehova ayi momo manneti mu vanga disumu. Mu zanti beta kubutudila ayi bedi kunyuvula ko biuvu bi mambu momo mantadidi momo bakulutu ka basidi ko mfunu mu zaba. (Zin. 20:5) Mu buela, balenda sadila bifuani mu diambu di basadisa mutu beni kazaba zinzimbala zi mavanga mandi, banga phila butudila Natani kuidi Davidi. Bulendakana mu tsoludulu yitheti, mutu beni kalenda kukitatikisa buwombo mu bila ki mambu momo kavengi. Kalenda phe balula mavanga.
11. Bue Yesu katadila minsumuki?
11 Bakulutu beta tula ngolo mu sokudila Yesu. Mu thangu kadengana Sawuli muisi Talise, Yesu nioni wufuluka, wunyuvula kiuvu kinduenga: “Sawuli, Sawuli, bila mbi wulembo ndiamisina?” Yesu wunsadisa kazaba mambimbi mandi. (Mav. 9:3-6) Ayi mu diambu ditedi “nketo wowo Zezabeli,” Yesu wutuba ti: “Ndim’bikila thangu kabalula mavanga.”—Tso. 2:20, 21.
12-13. Bue bakulutu balenda bikila nsumuki thangu kabalula mavanga? (Tala phe foto.)
12 Mu sokudila Yesu, bakulutu balendi ko lukumuka mu tuba ti nsumuki kalendi ko balula mavanga. Bankaka balenda balula mavanga mu tsoludulu yitheti ayi bakulutu vayi kuidi bankaka yilenda tombana thangu yiwombo muingi babalula mavanga. Yawu yilenda tula ti bakulutu basolula mu khumbu ziwombo ayi nsumuki beni. Bulendakana kumanima ma tsoludulu beni yitheti, Mukristu nioni vengi disumu dinneni kalenda yindudila bumboti mboti mu mambu momo bankembi kuidi bakulutu. Kalenda fikama kuidi Yehova mu nzila yi lusambulu lu kukikulula. (Nku. 32:5; 38:18) Mu phila beni yoyi, mu thangu kela bue solula diaka ayi bakulutu mu khumbu yinkuiza, nsumuki beni kalenda ba na mayindu maviakana ayi momo kateka ba mu tsoludulu yitheti.
13 Mu diambu di sadisa nsumuki kabalula mavanga, bakulutu bafueti kukitula va buangu kiandi ayi bafueti ba zanti. Vuvu bakala ayi beta sambila Yehova kasakumuna zingolo ziawu mu diambu di Mukristu nioni vengi disumu dinneni kabongisa mayindu mandi ayi kabalula mavanga.—2 Tim. 2:25, 26.
Bakulutu balenda solula ayi nsumuki mu zikhumbu ziwombo muingi bamvana diluaku di baludila mavanga (Tala paragrafi 12)
14. Nani fueti baka nkembo enati nsumuki baludi mavanga, ayi bila mbi?
14 Dikala diambu di zikhini ziwombo enati nsumuki baludi mavanga! (Luka 15:7, 10) Kadiambu ko bakulutu beta tula ngolo mu ludika mutu, nani bukiedika weta sadisa nsumuki kabalula mavanga? Bambuka moyo mambu momo Polo kasonika mu diambu di minsumuki: “Mananga Nzambi lenda kubavana diela di baludila mavanga.” (2 Tim. 2:25) Yisi ko mutu, vayi Yehova niandi weta sadisa Mukristu kabongisa mayindu mandi ayi kabalula mavanga mandi. Polo sudikisidi mambu mamboti momo meta salama mutu niandi balula mavanga. Mutu beni kalenda ba nzayilu yifuana yikiedika, weta bue ba diaka mavanga mamboti ayi kalenda nunga mintambu mi Satana.
15. Bue bakulutu balenda tatiminina sadisila nsumuki nioni baludi mavanga?
15 Mu thangu nsumuki kabaludi mavanga, komite yi bakulutu mayi ntula zivisiti mu diambu di mutu beni katatamana baka lusadusu lolo lufueni, kanunga mintambu mi Satana ayi katatamana vanga mambu mamboti. (Ebe. 12:12, 13) Tuzaba ti bakulutu balendi ko tuba kadi kuidi mutu mambu momo nsumuki beni kavengi. Vayi diambu mbi kimvuka kilenda tomba zaba?
‘TSEMBOLO VA NTUALA BATU BOSO’
16. Mu tadila 1 Timote 5:20, mu thangu Polo katuba ‘tsembolo va ntuala batu boso,’ mbi kazola tuba?
16 Tanga 1 Timote 5:20. Polo wukamba Timote nioni wuba phe nkulutu, kasemba minsumuki ‘va ntuala batu boso.’ Mbi kazola tuba? Kasi tuba ko kaka ti kimvuka kioso kifueti zaba tsembolo yoyi kamvana mutu. Vayi, bulendakana Polo wutubila kaka batu bobo bazebi disumu diodi divengi mutu. Balenda ba bambangi bobo bamona disumu diodi mutu beni kavanga voti balenda ba batu bobo mutu beni kaye kamba disumu diodi kavanga. Bakulutu bafueti kubakamba mu kitsueki ti bame sadisa mutu beni ayi bamveni tsembolo.
17. Enati disumu beni dinneni diodi mutu kavengi dizabikini kuidi batu bawombo mu kimvuka, voti enati mu phila yoyi dimmonikina, diela zabakana kaka mu kimvuka, bakulutu diambu mbi bafueti tula ayi bila mbi?
17 Mu mambu mankaka, disumu dinneni diodi mutu kavengi dilenda zabakana kuidi batu bawombo mu kimvuka voti mu phila yoyi dimmonikina, diela zabakana kaka kuidi batu. Mu diambu diphila yoyi, ziphova zi Polo ‘va ntuala batu boso,’ zinsundula kimvuka kioso. Mu diawu, nkulutu mosi kafueti kamba kimvuka kioso ti basembidi khomba beni nioni vengi disumu dinneni. Bila mbi? Polo veni mvutu ti: “Muingi bankaka bamona boma” mu vanga disumu.
18. Bue bakulutu bafueti sadisila muana lezi nioni wubaka mbotama, nioni vengi disumu dinneni? (Tala phe foto.)
18 Mbi bakulutu beta tula mu thangu muana lezi nioni wubaka mbotama kaka dukisidi ko 18 ki mimvu vengi disumu dinneni? Kimvuka ki bakulutu maki baka khubukulu yi sobula bakulutu buadi basolula ayi muana lezi beni va kimosi ayi bambuta ziandi bobo badi Bambangi zi Yehova. Bakulutu bafueti keta yuvula bambuta mambu momo bawu bame tula mu sadisa muan’awu kabongisa nzingulu’andi ayi kabalula mavanga. Enati muana beni wilu zindongi zi bambuta ziandi, ayi bongisidi nzingulu’andi ayi baludi mavanga mandi, bakulutu beni balenda baka nzengolo yibikila bambuta ziandi nzila batatamana sadisa muan’awu voti balenda kuawu baka nzengolo yikambu bue vanga komite yo yinsolula ayi muana beni va kimosi na bambuta ziandi. Kutu, kiyeko ki semba bana mu luzolo, Yehova kuidi bambuta kavana kiawu. (5 Mo. 6:6, 7; Zin. 6:20; 22:6; Efe. 6:2-4) Bakulutu maba fionguninanga thangu ka thangu muingi baba sikididi ti bambuta beni balembo vani muan’awu lusadusu lolo lufueni. Vayi enati muana lezi beni nioni wubaka mbotama wulembo tatamana kaka vanga mambu mambimbi? Ti buawu buididi, komite yi bakulutu mayi solula ayi muana beni va kimosi na bambuta ziandi bobo badi Bambangi zi Yehova.
Mu thangu muana lezi kavengi disumu dinneni, bakulutu maba solula ayi muana beni va kimosi na bambuta ziandi bobo badi Bambangi zi Yehova (Tala paragrafi 18)
“YEHOVA WIDI NA LUZOLO LUWOMBO AYI NTIMA KIADI”
19. Bue bakulutu beta tudila ngolo mu sokudila Yehova mu thangu balembo solula ayi nsumuki?
19 Bakulutu bobo basobulu mu komite yi solula ayi mutu nioni vengi disumu dinneni badi na kiyeko va ntuala Yehova kitatamana vedisa kimvuka. (1 Ko. 5:7) Vayi balenda tula phe zingolo mu sadisa nsumuki kabalula mavanga. Mu diawu, bakulutu bafueti ba mbueno yimboti ayi ba vuvu ti mutu beni kalenda baluka. Bila mbi? Bila beta tomba sokudila Yehova nioni widi “luzolo luwombo ayi ntima kiadi.” (Zaki 5:11) Tala phila yoyi thumu nioni wuyonzuka buwombo Yowani kamonisina pheve yiphila yoyi. Wusonika ti: “Bana bama, ndilusonikini mambu mama muingi lubika sumuka; ayi enati mutu wuvola masumu buna tubeki phovi yikutuvovilanga kuidi Tata: Yesu Kristu, mutu wusonga.”—1 Yow. 2:1.
20. Mbi tuela tadila mu disolo ditsuka di masolo momo tume longuka mu Nkendidi wawu?
20 Diambu dikiadi, Bakristu bankaka batianga ko balula mavanga. Enati buawu buididi, bafueti botulu mu kimvuka. Bue bakulutu beta tadila diambu diphila yoyi? Diawu diambu tuela tadila mu disolo ditsuka mu masolo momo madi mu Nkengidi wawu.
NKUNGA 103 Babateli ya mpate—Makabo oyo ezali bato
a Mu thama, komite beni yawu beba tedilanga komite yi tsambusulu. Vayi tsambusulu bo yidi mu mosi kuandi mu mambu momo madi mu kisalu kiawu, tusiedi bue sadilanga ko thedolo beni. Va buangu ki kubutudila, tuyika tedila komite beni komite yi bakulutu.