DISOLO DI NDONGOKOLO 33

Bue Yehova katididi kimvuka kivangila mambu kuidi batu bobo beta vanga masumu manneni

‘Enati mutu vengi masumu buna tuidi na phovi wukutuvovilanga.”—1 YOW. 2:1.

MAMBU MO MADI MU KHATI DISOLO DIADI

Tueka m’baka malongi mamfunu wombo mu mambu momo masalama mu kimvuka ki Kolinto mu tandu kitheti mu thangu khomba mosi wubakala kavanga disumu dinneni.

1. Diambu mbi Yehova katidi kuidi batu boso?

Mvutu’aku

YEHOVA wuvanga batu na kiphuanza kisobula vanga mambu momo batidi. Beta sadila dikaba beni kadika thangu mu diambu di babaka zinzengolo. Nzengolo yilutidi mfunu tufueti baka yidi yikukivana kuidi Yehova ayi ba mu khati dikanda di bisadi biandi. Yehova katidi ti batu boso babutudila. Bila mbi? Bila weta zola batu ayi katidi ti baba mu luzingu lumboti. Katidi ti baba mu zikhini ziba kikundi ayi niandi ayi bazinga mvu ka mvu.—5 Mo. 30:19, 20; Nga. 6:7, 8.

2. Bue Yehova keta muena batu bobo ka batianga ko balulala mavanga? (1 Yow. 2:1)

Mvutu’aku

² Tuzaba ti Yehova kakuikanga ko batu mu kingolo bansadila. Weta bikila kadika mutu nzila kavanga diambu diodi katidi. Diambu mbi dieta salama enati Mukristu nioni wubaka mbotama vuezidi nsiku Nzambi mu vanga disumu dinneni? Enati kakadi balula mavanga, kafueti botulu mu kimvuka. (1 Ko. 5:13) Buba ti mutu beni bam’botudi mu kimvuka, Yehova katidi ti kabalula mavanga ayi kavutula diaka nguizani yingolo ayi niandi. Diawu, kiawu kioki bila kimfunu kavanina khudulu—mu diambu di minsumuki milemvukulu enati babaludi mavanga. (Tanga 1 Yowani 2:1.) Nzambi’eto yi luzolo wulembo lombi mu zanti yoso ayi wulembo lebidila minsumuki mibalula mavanga.—Zak. 1:3; Lom. 2:4; Zaki 4:8.

3. Mbi tueka ntubila mu disolo diadi?

Mvutu’aku

³ Yehova katidi ti tuba mbueno yiphila mosi ayi niandi kuidi batu bobo beta vanga masumu manneni. Disolo diadi dieka kutumonisa phila yoyi tulenda kubutudila. Mu thangu weka nlonguka disolo diadi, tala 1) phila yoyi kimvuka ki Kolinto mu tandu kitheti kitadila disumu dinneni, 2) phila yoyi thumu Polo kavanina lutuadusu mu thangu mutu nioni wuvanga disumu dinneni kabalula mavanga, ayi 3) mambu momo disolo beni di Bibila dieta monisa mu phila yoyi Yehova keta tadila batu bobo beta vanga masumu manneni.

BUE MASUMU MANNENI MATADULU MU TANDU KITHETI

4. Diambu mbi disalama mu kimvuka ki Kolinto mu tandu kitheti? (1 Kolinto 5:1, 2)

Mvutu’aku

⁴ Tanga 1 Kolinto 5:1, 2. Mu vuayaje yandi yintatu yi ki misionere, Polo wuwa tsangu mosi yimbimbi mu kimvuka kimona kioki kitulu ku Kolinto. Khomba mosi wubakala mu kimvuka beni wutula kitsuza ayi nketo siandi. Diambu beni diodi dilueka mintima mi batu ayi ‘disi keta salama ko kuidi batu bobo basi ba ko Bakristu’! Vayi kimvuka kibanzila ti khomba beni nioni wuvanga diambu diphila yoyi fueni kuandi tatamana ba mu khati kimvuka. Bulendakana bankaka beba banzilanga ti Nzambi ntima kiadi keba monisanga ayi weba sudikanga ti batu baba bakambu lunga. Vayi Yehova kakikininanga ko mambu mambimbi mu khati dikanda diandi. Na ndiatulu beni yoyi yi busoto, mutu beni wuvuezisisa kimvuka ki Bukristu. Mutu beni nginu wuvukumuna Bakristu bankaka bobo baba pfika pfika ayi niandi. Diawu, diambu mbi Polo kakamba kimvuka beni kivanga?

5. Diambu mbi Polo kakamba kimvuka beni kivanga ayi mbi kazola tuba? (1 Kolinto 5:13) (Tala phe foto.)

Mvutu’aku

⁵ Tanga 1 Kolinto 5:13. Mu lutuadusu lu pheve santu, Polo wusonika nkanda wowo wutuba ti nsumuki nioni kakadi balula mavanga kafueti botulu mu kimvuka. Bue Bakristu bakuikama bafueti kuntadila? Polo wubakamba ‘babika tula kikundi ayi mutu beni.’ Mbi dinsundula? Polo wusudikisa ti nsiku beni wutadila phe ‘kadi dia va kimosi ayi mutu beni.’ (1 Ko. 5:11) Dia va kimosi ayi mutu kulenda tula bukundi bungolo ayi mutu. Yimonika bumboti mboti ti Polo wutuba ti kimvuka kilendi ko tula bukundi ayi mutu beni. Bila tudila phila beni yoyi kuawu kutanina kimvuka mu mavanga mambimbi ma mutu beni momo malenda vukumuna batu bankaka. (1 Ko. 5:5-7) Mu buela, kambu tula bukundi ayi mutu beni, kulenda kuntula kasudika phila yoyi katatukila zinzila zi Yehova, kulenda kuntula kamona tsoni ayi kuntuma kabalula mavanga.

Thumu Polo wulembo sonika mu rulo. — Mu lutuadusu lu pheve santu, Polo wusonika nkanda wowo wutuba ti nsumuki nioni mengi balula mavanga kafueti botulu mu kimvuka (Tala paragrafi 5)

6. Diambu mbi nkanda wu Polo wutula mu kimvuka beni ayi kuidi mutu nioni wuvanga disumu beni?

Mvutu’aku

⁶ Kumanima ma tinda nkanda beni kuidi Bakristu ba Kolinto, Polo wutona kukiyuvula bue kimvuka maki tadila nkanda beni. Tsuka tsuka, Tite wunnatina zitsangu ziozi zinyangidika. Kimvuka kitadila mu phila yimboti nkanda beni. (2 Ko. 7:6, 7) Batumukina mambu momo Polo kabakamba. Mu zingondi ziozi zivioka tona Polo katinda nkanda beni, mutu beni wuyiza balula mavanga ma ndiatulu’andi yimbimbi! Wubalula mavanga mandi ayi bumutu buandi, ayi wuyiza tona landakana zitsikudukusu zisonga zi Yehova. (2 Ko. 7:8-11) Diambu mbi buabu Polo kayiza lomba kimvuka kivanga?

BUE KIMVUKA KITADILA MUTU NIONI WUBALULA MAVANGA

7. Botula mutu beni mu kimvuka, mim’butu mbi mimboti kunatina kimvuka? (2 Kolinto 2:5-8)

Mvutu’aku

⁷ Tanga 2 Kolinto 2:5-8. Polo wusudikisa ti ‘thumbudulu yoyi mutu beni kabaka kuidi batu bawombo yiba yifuana.’ Mu thubulu yinkaka, tsembolo beni yitula diambu kuidi mutu beni. Mu lukanu mbi? Yintuma kabalula mavanga.—Ebe. 12:11.

8. Kumanima, diambu mbi Polo katuma kimvuka kivanga?

Mvutu’aku

⁸ Polo wukamba kimvuka ti: ‘Balemvukila ayi bakindisa’ khomba beni nioni wuvanga mambu mambimbi, ayi ‘bammonisina luzolo.’ Polo wutia ti kimvuka kibikila mutu beni nzila kavutuka mu dikanda di Yehova. Polo wutomba ti bakhomba ba kimvuka bamonisa mu ziphova ziawu ayi mu mambu momo beba tubanga, ti banlemvukila ayi ban’zola. Tudila phila beni yina kuawu kumonisa mutu beni ti banyembi bumboti mu kimvuka.

9. Bila mbi batu bankaka babela ziduti mu lemvukila mutu beni nioni wubalula mavanga?

Mvutu’aku

⁹ Batu bankaka bamona phasi mu yamba mu kimvuka mutu beni nioni wubalula mavanga? Bibila kisi butubila ko, vayi bulendakana buawu bubela. Mu kondo finda phaka, mambu momo kavanga mamonisa bakhomba ba kimvuka phasi mu ntima ayi bulendakana phe mamonisa batu bankaka tsoni. Batu bankaka bulendakana babanzila ti disi ba ko diambu di busonga ti bayamba mu zanti yoso mu khati kimvuka mutu nioni wuvanga disumu dinneni ayi wubalula ntima banga khomba, bila bawu batula zingolo mu tatamana tumukina minsiku mi Yehova. (Dedikisa Luka 15:28-30.) Bila mbi dibela diambu dimfunu ti kimvuka kimonisa luzolo lukiedika kuidi khomba nioni wuvutuka mu kimvuka?

10-11. Nginu diambu mbi disalama enati bakulutu basi lemvukila ko mutu nioni wubalula mavanga?

Mvutu’aku

¹⁰ Yindula theti, nginu diambu mbi disalama enati bakulutu bamanga yamba mutu beni nioni wubalula mavanga kavutuka mu kimvuka voti enati, kumanima ma vutuka mu kimvuka, bakhomba bamanga kummonisina luzolo. Bedi kubutudila, nginu wuyiza ba mu “kiadi kiwombo.” Nginu wuyiza fika kukimona ti mambu momo kavanga malendi ko lemvukulu. Ayi nginu wuyiza vonga kuandi tula zingolo mu vutula nguizani’andi ayi Nzambi.

¹¹ Dilutidi biva, enati bakhomba ba kimvuka beni bamanga lemvukila mutu beni nioni wubalula mavanga, nginu batula nguizani’awu ayi Yehova mu nzomono. Bila mbi? Bila bedi kubutudila, nginu basi sokudila ko Yehova nioni weta lemvukila minsumuki miomi mibaludi mavanga, vayi nginu Satana basokudila nioni wukala mambu mangolo ayi kakala ko ntima kiadi. Ayi nginu yawu yitula ti baba bisadulu biobi Satana keta sadila mu diambu di vonda mutu mu kipheve.—2 Ko. 2:10, 11; Efe. 4:27.

12. Bue kimvuka kifuanina sokudila Yehova?

Mvutu’aku

¹² Bue kimvuka ki Kolinto kifuanina sokudila Yehova vayi bika Satana? Mu sokudila phila yoyi Yehova keta tadila minsumuki miomi mibaludi mavanga. Tutala mambu momo ndambu batu bobo basonika Bibila batuba mu diambu di Yehova. “Widi wumboti ayi weti lemvukila,” butuba Davidi. (Nku. 86:5) Mika wusonika ti: “Nani widi Nzambi banga ngeyo, nioni weta lemvukila ayi nioni katulanga ko thalu mu zinzimbala?” (Mika 7:18) Ayi Yesaya wutuba ti: “Mutu wumbimbi kabika mambi mandi ayi sadi kimbimbi kabika mayindu mandi mambimbi, kavutukila Yehova ayi maka mmona kiadi, kavutukila Nzambi’eto bila maka nlemvukila mu ntim’andi woso.”—Yes. 55:7.

13. Bila mbi dididi diambu dimboti mu vutula nsumuki nioni baludi mavanga mu kimvuka? (Tala ankadre “Thangu kua nsumuki beni muisi Kolinto katula muingi kavutuka mu kimvuka?”)

Mvutu’aku

¹³ Mu sokudila Yehova, kimvuka ki Kolinto kibue yamba bakala beni nioni wubalula mavanga ayi bankitisa ntima mu kummonisa ti beta kun’zola. Mu landakana lutuadusu lu thumu Polo mu bue yamba nsumuki nioni wubalula mavanga, kimvuka kimonisa “bulemvo mu mambu moso.” (2 Ko. 2:9) Bukiedika, mua ndambu zingondi kuandi zivioka tona kabotulu mu kimvuka, vayi thumbudulu yintuma kabalula mavanga. Diawu, disi ba ko diambu dimfunu mu teka kumvingidisa kabika vutuka mu kimvuka.

Thangu kua nsumuki beni muisi Kolinto katula muingi kavutuka mu kimvuka?

Yimonika banga mutu beni nioni batubidi mu 1 Kolinto kapu 5 wuvutulu mu kimvuka kumanima ma mua thangu yi botulu mu kimvuka. Bila mbi tubutubidi?

Tutala thangu mbi Polo kasonikina minkanda miodi miomi kasonikina basi Kolinto. Yimonika ti wusonika nkand’andi wutheti kuidi basi Kolinto mu vuayaje yandi yintatu yi ki misionere bulendakana mu thonono yi mvu 55 T.E. Yimonikini banga ti wusonika nkand’andi wummuadi kutsuka mvu beni, bulendakana kutsuka yithangu mvula (été) voti vathonono yi zimvula zitheti (automne) zi mvu 55 T.E.

Tuzaba phe diaka ti mu nkand’andi wutheti, Polo wuvana zithumunu mu diambu di kindisa bakhomba ku Kolinto bavana lusadusu kuidi bakhomba ku Yuda bobo baba mu nzala. Bizingu bi batu bawombo biba mu vonza, diawu Polo kasonikina nkand’andi wummuadi mu nsualu woso, muawu kalombila kimvuka ki Kolinto kikubika makaba mawu mu diambu di bamatinda.—1 Ko. 16:1; 2 Ko. 9:5.

Polo wuba na bila kinkaka kimboti kioki kintuma kafika sonika nkand’andi wummuadi. Wuyiza baka zitsangu mu diambu ditedi mbaludulu yi mavanga ma bakala beni. Mu thangu beni yina, yitombana bilumbu biwombo mu diambu di nkanda wuvanu kuidi kimvuka ki Kolinto. Bulendakana Polo wufika bue sonika nkanda wunkaka mu diambu di kamba kimvuka muingi kivanga mambu momo kifueti bue vanga diaka.

Ayi mayindu beni momo, mu thangu Polo kakamba basi kolinto bakikinina mutu beni nioni wubalula mavanga kavutuka mu kimvuka, yimonikini banga ti mutu beni kasi kue tula ko bilumbu biwombo kunganda kimvuka, bulendakana phe mua ndambu zingondi kuandi katula.

SOKUDILA BUSONGA AYI NTIMA KIADI WU YEHOVA

14-15. Dilongi mbi tubeki mu phila yoyi Bakristu batadila diambu diodi disalama ku Kolinto? (2 Pi. 3:9) (Tala phe foto.)

Mvutu’aku

¹⁴ Disolo diphila yoyi mambu beni matadulu ku Kolinto disonama ayi badilunda “mu diambu di kutulonga.” (Lom. 15:4) Disolo beni dieta kutulonga ti Yehova kakikininanga ko mu khati kimvuka batu bobo beta vanga masumu manneni ayi bobo ka babalulanga ko mavanga mawu. Kayangalalanga ko monisa “ntima kiadi” kuidi batu bobo beta vanga masumu manneni ayi bobo ka babalulanga ko mavanga ayi kababikilanga ko nzila batatamana ba va khati tsika bisadi biandi bikuikama. Ka diambu ko Yehova ntima kiadi kakala, kakikininanga ko mavanga mambimbi. Zitsikudukusu ziandi mu diambu dimboti ayi mu diambu dimbimbi zibalukanga ko. (Yuda 4) Yehova kakuiza monisa ko ntima kiadi niandi bikila minsumuki miomi ka mibalulanga ko mavanga mitatamana ba mu khati kimvuka, bila bakhomba ba kimvuka balenda mona phasi mu ntima.—Zin. 13:20; 1 Ko. 15:33.

¹⁵ Kadiambu ko tueta longuka ti Yehova kakadi zola ti wumosi kabungana. Tidi vukisa batu kadika khumbu yoyi kamueni ti bufueni mu kubutudila. Weta monisa ntima kiadi kuidi batu bobo beta balula mavanga ayi bobo beta tomba bongisa nguizani ayi niandi. (Yeh. 33:11; tanga 2 Piela 3:9.) Diawu, mu thangu mutu nioni wuba ku Kolinto kabalula mavanga ayi mu thangu kalembo zinzila ziandi zi masumu, Yehova wusadila Polo mu diambu di kasudikisa bakhomba ba kimvuka ti bafueti kunlemvukila ayi bue kunyamba diaka.

Khomba mosi wunketo, wulembo yambi mu nzo yi Kipfumu khomba mosi wunketo nioni me vutuka mu kimvuka. Bankaka banzungididi mu zikhini zioso. — Tueta sokudila luzolo ayi ntima kiadi wu Yehova mu thangu tueta monisa luzolo ayi zanti kuidi batu bobo bamvutuka mu kimvuka (Tala paragrafi 14-15)

16. Bue wummuena mu phila yoyi Yehova katadila diambu diodi disalama mu kimvuka ki Kolinto ayi phila yoyi batadila diambu beni?

Mvutu’aku

¹⁶ Kifuani ki kimvuka ki Kolinto kitumonisini ti Yehova luzolo luwombo kakala ayi busonga. (Nku. 33:5) Zaba phila beni yoyi kueta kututuma tuzitisa Yehova mu bikadulu biandi bimboti. Beto boso tuidi bankua masumu, diawu wumosi mosi mu beto tueta ba phuila yibaka nlemvo’andi. Wumosi mosi mu beto tuidi na bibila biobi bifueti kututuma tumonisa phutudulu matondo mu khubukulu yoyi yeta tula ti tubaka nlemvo wu Yehova. Yidi lukindusu mu zaba ti Yehova weta zola mu ntim’andi woso dikanda diandi ayi tidi ti diba mu mayangi!

17. Mambu mbi tuela tubila mu masolo momo malandikini?

Mvutu’aku

¹⁷ Buabu, bue masumu manneni meta tadulu mu lumbu kiaki? Bue bakulutu balenda sokudila phuila yi Yehova yisadisa nsumuki kabalula mavanga? Bue bakhomba ba kimvuka bafueti bela mu thangu bakulutu babeki nzengolo yi botula voti yi vutula mutu mu kimvuka? Biuvu biobi tuela kubibakila mimvutu mu masolo momo malandikini.

NKUNGA 109 Tólingana makasi, na motema moko