DISOLO DI NDONGOKOLO 43
NKUNGA 90 Tólendisanaka
Bue bunungina kifu ki ba ziduti
“Vayi lufionguninanga mambu moso.”—1 TES. 5:21.
MAMBU MO MADI MU KHATI DISOLO DIADI
Tueka nlonguka phila yinungina ziduti ziozi zilenda bebisa kisalu kioki tunsadila Yehova.
1-2. a) Ziduti mbi bisadi bi Yehova balenda ba? b) Mbi tueka ntadila mu disolo diadi?
BETO boso, buba nkulutu voti muana lezi, tulenda ba ziduti.a Mu kifuani, ntueni mosi kalenda kukiyuvula keni Yehova weta kun’yangalala. Bulendakana kalenda ba ziduti mu baka mbotama. Voti khomba mosi wunkulutu widi mimvu mifuanakana nioni mu thangu kaba ntueni wubaka nzengolo yitula minluta mi Kipfumu ki Nzambi va ntuala va buangu kitomba baka busila buwombo mu nza yayi. Kalenda ba ziduti enati dikanda diandi dieka n’dengana zithatukusu zikambu ku zimbongo. Khomba mosi wunketo nioni widi wuyonzuka ayi kasiedi ko zingolo, kalenda vonga nitu mu bila kioki kakadi bue kokila sala buwombo banga phila yoyi kabela mu thama. Wume teka kiyuvula biuvu biphila yayi: ‘Bukiedika Yehova weta kuthudila kuandi thalu? Mambu momo ndikiyimina mu diambu di Yehova, mfunu kuandi madi? Mfunu kuama ndikala kuidi Yehova?’
2 Tulenda ba ziduti mu tsambudulu yoyi tueta vana Yehova, enati tukadi bakila biuvu biphila yoyi mimvutu. Mu disolo diadi, matu mona phila yoyi Bibila kilenda kutusadisila enati ziduti tukala 1) mu kikinina ti Yehova weta tutudila thalu, 2) mu kikinina ti zinzengolo zimboti tubaka mu thama, 3) mu kikinina ti mfunu kueto tukala va meso ma Yehova.
BUE BUNUNGINA ZIDUTI ZIAKU
3. Phila mbi tulenda nungina ziduti zieto?
3 Yimosi yi ziphila yinungina ziduti zieto yidi yitomba mimvutu mu biuvu bieto mu Mbembo Nzambi. Beto kubutudila, matu baka lukindusu, matu yonzuka mu kipheve ayi matu ba bafuana mu “tatamana ba bakinda mu minu.”—1 Ko. 16:13.
4. Bue tulenda “fionguninanga mambu moso”? (1 Tesalonika 5:21)
4 Tanga 1 Tesalonika 5:21. Bibila kilembo tulongi ti “tufionguninanga mambu moso.” Bue tulenda butudila? Tulenda ba sikididi ti mambu momo tueta wilukila madi makiedika beto kumadedikisanga na mambu momo Bibila kieta longa. Tubonga kifuani ki ntueni mosi wulembo kiyuvula keni mfunu kadi va meso ma Nzambi. Lenda kuandi bela bobo mu kondo tomba baka mvutu mu kiuvu beni? Nana, kafueti “fionguninanga mambu moso” mu tomba zaba mayindu ma Yehova mu diambu beni.
5. Bue tulenda “bakila” mimvutu mi Yehova mu biuvu biobi tueta kukiyuvula?
5 Mu thangu tulembo tangi Mbembo Nzambi buawu tueta “wila” Yehova. Vayi muingi tubaka mvutu mu kiuvu kimfunu, tufueti tula zingolo beto veka. Tufueti tula mayindu meto mu lutangulu lueto lu Bibila mu diambu diodi dilembo tutatisa. Tulenda tula zithombolo mu diambu beni, mu lusadusu lu bisadulu bithombolo bi ndongokolo biobi khubukulu yi Yehova yilembo tuvani. (Zin. 2:3-6) Tulenda lomba Yehova mu nzila yi lusambulu katutuadisa mu zithombolo zieto ayi katusadisa tubaka mimvutu mu biuvu bieto. Mu buela tufueti tomba zitsikudukusu zi Bibila mu mambu momo matutadidi ayi tula thalu mu zindongi ziozi zilenda kutusadisa. Ayi tufueti tulanga ngolo mu baka malongi mu masolo ma batu bobo Bibila kieta tubila bo badengana zithatukusu ziozi zidedikini ayi zieto.
6. Zikhutukunu bue zilenda kutusadisila mu nunga ziduti?
6 Tueta “wa” diaka Yehova mu nzila zikhutukunu. Enati tueta kutakana thangu zioso mu zikhutukunu zi kimvuka, tulenda wa diambu dimosi mu diskur voti mu komantere mosi yoyi yintubila diambu diodi tuidi phuila muingi tununga ziduti zieto. (Zin. 27:17) Buabu tutadila phila yinungina ziduti zieto mu mambu momo matutadidi.
MBI WULENDA TULA ENATI ZIDUTI WUKALA MU KIKININA TI YEHOVA WETA KUTUDILA THALU
7. Kiuvu mbi batu bankaka balenda kiyuvula?
7 Wume keta kiyuvula, ‘Yehova weta kuthudila kuama thalu?’ Enati weta kimona wisi ko mfunu, wulenda yindula ti wedi ba ko kadi fifioti nkundi wu Mvangi wu luyalanganu loso. Bulendakana Ntinu Davidi wuba phe na mayindu maphila yoyi. Wuyituka buwombo mu zaba ti Yehova zebi ayi batu baphamba, diawu kayuvudila kiuvu kiaki: “A Yehova, buna mutu niandi nani muingi wum’belanga mayindu, muana mutu muingi wunyindulanga?” (Nku. 144:3) Kue wulenda bakila mvutu mu kiuvu beni?
8. Mu tadila 1 Samueli 16:6, 7, 10-12, mbi Yehova keta tala kuidi batu?
8 Bibila kilembo tulongi ti Yehova weta bongila mu mfunu wombo batu bobo belembo kimoni ti badi batu baphamba va meso ma batu. Mu kifuani, Yehova wutuma Samueli ku nzo Isayi ke vindi mafuta kuidi wumosi mu bana bandi muingi keba ba ntinu wu Iseli. Wutela tsambuadi mu dinana di bana bandi muingi badengana Samueli, vayi kasi tedisa ko Davidi nioni wuba muana lezi mu bawu boso.bVayi, Yehova Davidi kasobula. (Tanga 1 Samueli 16:6, 7, 10-12.) Yehova wumona ntima Davidi—ntueni nioni wube bongilanga mu mfunu wombo mambu ma kipheve.
9. Bila mbi wulenda bela sikididi ti Yehova weta kutudila thalu? (Tala phe foto.)
9 Yindula mambu momo Yehova kavangila momo mammonisa ti weta kutudila thalu. Weta kuvana zindongi ziozi zidi nguizani ayi ziphuila ziaku. (Nku. 32:8) Bue kalenda kubutudila enati kasi kuzaba ko bumboti? (Nku. 139:1) Enati weta sadila zindongi zi Yehova ayi ti weta mona phila yoyi Yehova keta kusadisila, mawu ba na sikididi ti weta kutudila thalu. (1 Lus. 28:9; Mav. 17:26, 27) Yehova weta mona zingolo ziozi wulembo tudi. Weta mona bikadulu bimboti biobi bidi yaku ayi tidi wuba nkundi’andi. (Yel. 17:10) Ayi maka yangalala buwombo ti ngeyo phe tidi ba nkundi’andi.—1 Yow. 4:19.
“Ngeyo kuntomba [Yehova], maka tula ti wummona.”—1 Lus. 28:9 (Tala paragrafi 9)c
ENATI ZIDUTI WIDI MU KIKININA TI ZINZENGOLO ZIOZI WUBAKA MU THAMA ZIBA ZINDUENGA
10. Mu thangu tulembo yindula zinzengolo zieto zithama, biuvu mbi tulenda kiyuvula?
10 Batu bankaka balenda kiyuvula keni zinzengolo ziozi babaka mu thama enati ziba kuandi zimboti. Bulendakana babaka nzengolo yi bika kisalu kimosi kimboti voti bamanga sala kisalu kioki kilenda bavana zimbongo ziwombo mu diambu di baluta sadila Yehova buwombo. Buabu kumanima ma bilumbu voti buba phe kumanima ma mimvu miwombo, balenda mona batu bobo batatamana sala bisalu biobi bawu babika voti bamanga, balembo monika banga bawu badi na luzingu lu zimbongo ziwombo ayi mu luzingu lumboti. Ayi balenda kukiyuvula: ‘Kukiyimina koko ndikiyimina mu diambu di Yehova, mfunu kuandi kuidi? Voti kukhondusu maluaku mankaka?’
11. Mbi bitatikisa nsoniki wu Minkunga 73?
11 Enati ngeyo phe weta kiyuvula biuvu biphila yoyi, yindula phila yoyi nsoniki wu Minkunga 73 kakimuena. Wumona batu bankaka banga bawu baba mu luzingu lumboti, lu zimbongo ayi lo lukambulu zithatukusu. (Nku. 73:3-5, 12) Mu thangu kamona luzingu luawu luidi lumboti, wuyindula ti zingolo katula mu sadila Yehova ziba ziphamba. “Wutatakana buwombo lumbu kimvimba” mu mayindu momo meta vongisa nitu. (Nku. 73:13, 14) Bue katadila mayindu momo meta vongisa nitu?
12. Mu tadila Minkunga 73:16-18, mbi bisadisa nsoniki wu Minkunga kanunga mayindu momo meta vongisa?
12 Tanga Minkunga 73:16-18. Nsoniki wu Minkunga wuyenda mu kinlongo kindembama ki Yehova. Kuna kayindudila bumboti. Wusudika ti buba luzingu lu batu lumonika banga luidi lumboti, vayi basi ba ko vuvu mu diambu di bilumbu binkuiza. Yindula mu buphinda mu phila beni yoyi, kunsadisa kabaka ndembama mu mayindu mu zaba ti landakana mambu ma kipheve yawu yiba nzengolo yilutidi yimboti yoyi kabaka. Diawu, wubue baka nzengolo yitatamana sadila Yehova.—Nku. 73:23-28.
13. Bue wulenda bakila ndembama mu mayindu enati ziduti widi mu zinzengolo ziozi wubaka mu thama? (Tala phe foto.)
13 Mu lusadusu lu Mbembo Nzambi wulenda baka ndembama mu mayindu. Mu phila mbi? Yangalala mu bima biobi bidi yaku, ayi yindula lusakumunu lolo Yehova kalembo kubikila mu bilumbu binkuiza ayi bambuka moyo ti batu bobo ka bansadilanga ko basi ko lutanunu lukiedika. Batu bawombo bobo ka basadilanga ko Yehova, beta banzila ti dilutidi mfunu, baka kisalu kimboti voti ba mu luzingu lumboti, bila basi’awu vuvu ko. Vayi ngeyo, Yehova wuveni tsila yi kusakumuna buwombo viokila phila yoyi wulenda yindudila. (Nku. 145:16) Tutadila diaka diambu diadi: Tulenda zaba nginu bue luzingu lueto luididi ti tuisi baka ko zinzengolo zimboti? Diambu dikiedika didi ti: Mu thangu mutu kabeki zinzengolo mu bila ki luzolo lolo kadi kuidi Nzambi ayi mu diambu di batu bankaka, kalendi ko kondu baka mambu mamboti mu luzingu luandi.
Vingila mu phuila yoso lusakumunu lolo Yehova katuvanina tsila (Tala paragrafi 13)d
MU THANGU WIDI ZIDUTI MU KIKININA TI MFUNU WIDI VA MESO MA YEHOVA
14. Bila mbi batu bankaka bakitudilanga ko ntima ayi kiuvu mbi balenda kukiyuvula?
14 Bisadi binkaka bi Yehova bilembo yonzuka, bimbevo bilembo batatisa voti bankaka balembo zingi na bieta. Balenda ba mayindu ti basiedi ko mfunu va meso ma Yehova. Balenda kukiyuvula thangu zinkaka, ‘Mfunu kuama kaka ndidi va meso ma Yehova?’
15. Nsoniki wu Minkunga 71 diambu mbi kabela sikididi?
15 Nsoniki wu Minkunga 71 niandi phe wukitatikisa mu diambu beni. Wusambila ti: “Kadi kundiekula mu thangu zingolo ziama zilembo suki.” (Nku. 71:9, 18) Vayi, nsoniki wu Minkunga beni wuba na sikididi ti weba sadilanga Nzambi’andi Yehova mu bukuikama, weba kuntuadisanga ayi weba kunsadisanga. Banga phila bulongukila nsoniki wu Minkunga beni, Yehova weta yangalala bato boso bobo balembo tudi ngolo mu kunsadila ka diambu ko zindilu ziawu.—Nku. 37:23-25.
16. Mu phila mbi batu bobo bayonzuka bakadila mfunu kuidi Yehova? (Minkunga 92:12-15)
16 Enati widi wuyonzuka, tadila mambu maku banga phila yoyi Yehova keta kumatadila. Kalenda kusadisa wutatamana kuenda kuntuala mu kipheve buba lebakana kuaku ku nitu. (Tanga Minkunga 92:12-15.) Va buangu kitula mayindu maku mu mambu momo ka wulendi bue koka ko vanga, luta tudi mayindu maku mu mambu momo wulenda koka vanga. Mu kifuani wulenda kindisa batu bankaka mu phila yoyi weta monisina kuikama ayi mu phila yoyi weta tudila batu bankaka thalu. Wulenda kubatubila phila yoyi Yehova kasadidisila mu luzingu luaku ayi kubamonisa ti sikididi kidi yaku mu lungana ku zitsila ziandi. Ayi kadi zimbakana ti minsambu miomi weta tula mu diambu di batu bankaka mfunu mikala. (1 Pi. 3:12) Buba phila yoyi buididi luzingu lueto, beto boso tuidi na mambu momo tulenda vangila Yehova ayi batu bankaka.
17. Bila mbi tufueti mangina kifu ki kukidedikisa ayi batu bankaka?
17 Enati wukadi bue yangalala mu bila kioki wukadi bue sadila buwombo mu kisalu ki Yehova, ba sikididi ti weta bongila mu mfunu wombo moso kuandi momo wulenda nunga vanga mu kisalu kiandi. Thangu zinkaka wulenda tomba dedikisa mambu momo wumvanga ayi momo mamvanga batu bankaka. Tula ngolo mu nunga mayindu maphila yoyi! Bila mbi? Bila Yehova kabutudilanga ko. (Nga. 6:4) Mu kifuani, Maliya wukabila Yesu malasi mathalu. (Yow. 12:3-5) Vayi mu luviakunu ayi Maliya, nsukami mosi wudifola mu khati kinlongo, niandi wuvana makaba ma bisengo biodi bi zimbongo biobi biba luvalu lufioti. (Luka 21:1-4) Vayi, Yesu wubongila makaba beni mu mfunu wombo. Yesu wusokudila Siandi mu phila yiduka. Ngeyo phe, wulenda ba sikididi ti Yehova weta mona ayi weta bongila mu mfunu wombo mambu moso momo weta vanga mu minu ayi mu luzolo lolo widi kuidi niandi buba ti wukumamona madi mafioti.
18. Mbi bilenda kutusadisa tununga ziduti zieto? (Tala phe ankadre “Mbembo Yehova yilenda kusadisa wununga ziduti.”)
18 Thangu zinkaka, beto boso tueta kuiza ba ziduti. Diawu, banga phila tubumuenini, Mbembo yikiedika yi Nzambi, Bibila, yilenda kutusadisa tununga kifu beni. Tula ngolo wununga botula ziduti ziaku ayi bikila sikididi nzila kisala mu ngeyo. Bukiedika, Yehova wuzebi bumboti mboti. Weta bongila mu mfunu wombo mambu momo weta kukiyimina mu diambu di wuntula va buangu kitheti mu luzingu luaku ayi maka dukisa tsil’andi yi kuvana nsendo. Ba sikididi ti Yehova weta tadila bisadi biandi bioso bikuikama ti bifueni baka mamboti ma luzolo luandi ayi mamboti ma lutanunu luandi.
NKUNGA 111 Ntina ya esengo na biso
a TSUDUKUSULU YI ZIPHOVA: Mu disolo diadi, tulembo tubila ziduti ziozi zieta kututula tumona phasi mu kikinina ti mfunu tuidi va meso ma Yehova voti tumona phasi mu kikinina zinzengolo zinduenga ziozi tubaka mu thama. Wisi ko ntindu wu ziduti ziozi Bibila kieta tubila zio zilenda monisa kondo ku minu kuidi Yehova ayi mu zitsila ziandi.
b Kadiambu ko Bibila kisi tubila ko mimvu miomi Davidi kaba mu thangu Yehova kansobula, yilenda ba ti wuba ntueni.—Tala Nzo yi Nkengidi wu 01 Septembre 2011, pha. 29, par. 2 mu dingala.
c TSUDUKUSULU YI FOTO Mu: Ntueni mosi wunketo wu Mbangi Yehova wulembo tombi zindongi mu Bibila mu diambu di kazaba phila yoyi Yehova kalembo mmuena ayi kalembo tadila mambu momo mantadidi.
d TSUDUKUSULU YI FOTO: Khomba mosi wubakala wulembo sadi kisalu kimioko mu diambu di dukisa ziphuila zi dikanda diandi, vayi wulembo tatamana tula mayindu mandi mu Paladiso yoyi yilembo yizi.