DISOLO DI NDONGOKOLO 7
NKUNGA 15 Tókumisa Mwana ya liboso ya Yehova!
Mamboti ma nlemvo wu Yehova
“Vayi kuidi ngeyo kuidi ndemvukulu yikiedika yi masumu.”—NKU. 130:4.
MU BUKHUFI
Tueka ntadila mua ndambu bifuani bi Bibila biobi bilembo sudikisa phila yimosi yoyi Yehova keta kutulemvukila. Disolo diadi madi tusadisa tuyonzula phutudulu matondo mu nlemvo’andi wukiedika.
1. Bila mbi nlemvo wu batu wukadila phasi?
“NDILEMVUKIDI.” Ziphova ziphila yoyi, zilenda kutukindisa nduka nduka mu thangu tuzebi ti diambu tutubidi voti diambu tuvengi, diodi diluekidi mutu! Vayi ziphova “ndilemvukidi,” mbi zin’sundula? Mutu nioni vangidi diambu dimbimbi wukembi ti bukundi bueno, niandi ayi ngeyo, buvutukidi? Voti bulendakana mutu beni kakadi kuandi bue yangalala bue tubila mambu momo lubakana ayi niandi vayi bukundi bueno busiedi ko banga phila yoyi lubela mu thama? Mutu kalenda mona phasi mu lemvukila n’diandi mutu.
2. Bue masonoko meta sudikisila nlemvo wu Yehova? (Tala phe noti kuwanda phapi.)
2 Phila yoyi Yehova keta kutulemvukila beto bankua masumu, luviakunu yidi ayi phila yoyi beto tueta lemvukila batu bankaka. Nlemvo wowo Yehova keta vana widi wuphila yinkaka. Nsoniki wu Minkunga wutuba mu diambu di Yehova ti: “Kuidi ngeyo kuidi nlemvo wukiedika, diawu fueni kinzuku.”a (Nku. 130:4) Ninga, nlemvo wu Yehova widi “nlemvo wukiedika.” Niandi weta kutumonisa tsundu yi nlemvo wukiedika. Mu ziverse zinkaka zi masonoko ma ki Ebelewo, minsoniki mi Bibila misudikisa phila yoyi Yehova keta lemvukila mu sadila kuma kioki basi keta sadila ko mu diambu di sudikisa phila yoyi batu beta lemvukila.
3. Bue nlemvo wu Yehova wididi disuasanu ayi wowo weto? (Yesaya 55:6, 7)
3 Mu thangu Yehova kalemvukidi mutu weta zimbakana disumu diandi. Mu thangu Yehova katulemvukidi, tulenda bue ba diaka nguizani yingolo ayi niandi. Yehova weta kutulemvukila mu ntim’andi woso ayi mu luzolo luandi loso.—Tanga Yesaya 55:6, 7.
4. Bue Yehova keta kutusadisila tusudika tsundu yi nlemvo wukiedika?
4 Enati nlemvo wu Yehova disuasanu widi ayi nlemvo wu batu, mu phila mbi beto batu bakambu lunga tulenda sudikila tsundi yikiedika yi nlemvo’andi? Yehova weta sadila bifuani bimboti biobi bieta kutusadisa tusudika phila yoyi keta kutulemvukila. Mu disolo diadi, tueka ntubila mua ndambu bifuani beni. Mabi tumonisa phila yoyi Yehova keta zimbikinina disumu, ayi yo yawu thangu phila yoyi keta vutudila nguizani yoyi yibebusulu mu disumu. Mu thangu tueka nlonguka bifuani beni biobi, matu luta yonzula phutudulu matondo kuidi Dise dieto di luzolo nioni weta kutulemvukila mu ziphila ziwombo.
YEHOVA WETA BOTULA DISUMU
5. Mambu mbi meta salama mu thangu Yehova keta lemvukila masumu meto?
5 Mu Bibila, khumbu ziwombo beta dedikisa masumu ayi bizitu binneni. Ntinu Davidi wutubila tsundu yi masumu mandi mu phila yayi: “Zinzimbala ziama zipfietikisidi ngolo; banga mfuna widi zitu kiwombo, zididi ngolo zitu mu diambu diama banga mfuna wungolo.” (Nku. 38:4) Vayi Yehova weta lemvukila masumu ma batu bakambu lunga bobo beta balula ntima. (Nku. 25:18; 32:5) Thubulu yi ki Ebelewo yoyi yilembo bangula kuma “lemvukila” yinsundula nduka nduka “Nanguna” voti “nata.” Diawu, mu thangu Yehova kalemvukidi zinzimbala zieto, weta kuiza botula zitu ayi kukitatikisa koko tueta kuiza ba na kuawu, yidi banga beto tuidi na zitu kinneni mu mavangiti ayi niandi wutubotudi kiawu.
“Lemvukila” (Nku. 32:5)
6. Tii kue Yehova keta tatudila masumu meto?
6 Kifuani kinkaka kilembo monisa phila yoyi Yehova keta tatudila kielo masumu meto. Minkunga 103:12 yitubidi ti: “Boso este yitatukidi ayi weste, buawu bobo katatudila zinzimbala zieto.” Este, yawu yilutidi tatuka mu weste. Kadi khumbu este ayi weste biela dengana. Yawu yimmonisa ti Yehova weta tatula masumu meto kielo viokila phila yoyi tulenda kubuyindudila. Yawu yikutuvana sikididi ti Yehova weta kutulemvukila mu ntim’andi woso!
“Boso este yitatukidi ayi weste, buawu bobo katatudila zinzimbala zieto” (Nku. 103:12)
7. Bue Bibila kisudikisidi mambu momo Yehova keta vanga mu diambu di masumu meto? (Mika 7:18, 19)
7 Buba ti mu phila yimbonosono, Yehova weta tatula kielo masumu meto, weta kumalunda kaka mu mayindu mandi? Nana. Ntinu Hizikia wusonika mu diambu di Yehova ti: “Wutatula masumu mama kumanima maku.” Voti banga phila butubidi noti kuwanda phapi mu Bibila ki Libongoli ya Mokili ya sika mu dingala, “wubotula masumu mama mu meso maku.” (Yes. 38:9, 17; nkp.) Yawu yinsundula ti Yehova weta lemvukila masumu ma batu bobo beta balula ntima ayi kabue matalanga ko. Ziphova beni phe zilenda tubulu mu phila yayi: “Wutula ti [masumu mama] banga masi salam’andi ko.” Bibila kimonisini diaka diambu beni mu ziphova ziozi zidi mu Mika 7:18, 19. (Tanga.) Verse beni yoyi yitubidi mu diambu di Yehova ti weta loza masumu meto tii muna thipudika yi m’bu. Mu thangu thama, phasi yiba mu bue baka kima kioki balozidi mu thipudika yi m’bu.
“Wuloza masumu mama moso kumanima maku” (Yes. 38:17)
“Wela loza masumu mawu moso mu thipudika yi m’bu” (Mika 7:19)
8. Tona tutoniningi disolo diadi tii vava tueka, mambu mbi tume longuka?
8 Mu nzila yi bifuani biobi, tume longuka ti mu thangu Yehova keta kutulemvukila weta botula zitu ki masumu meto. Bukiedika, banga phila butubidi Davidi ti, “khini kuidi batu bobo balemvokulu minkanu miawu ayi masumu mawu mafuku; khini kuidi woso mutu Pfumu kankambu tangila masumu.” (Loma 4:7, 8) Wawu wowo nlemvo wukiedika!
YEHOVA WETA KUBULA DISUMU
9. Bifuani mbi Yehova keta sadila mu diambu di sudikisa tola ku nlemvo’andi?
9 Yehova weta sadila bifuani binkaka mu diambu di katusadisa tusudika phila yoyi mu nzila yi nkayilu wu khudulu keta kubudila masumu ma batu bobo babaludi mintima. Mu phila yimbonosono, Bibila kitubidi mu diambu di Yehova ti weta sukula ayi weta siakumuna masumu mu lukanu luvedisa nsumuki. (Nku. 51:7; Yes. 4:4; Yel. 33:8) Yehova niandi veka sudikisidi m’butu wu kisalu beni: “Buba ti masumu meno madi mambuaki yingolo, mama ba banga mvula wuphembi; buba ti madi na mbuaki yingolo banga nledi widi mbuaki yingolo, mama ba banga mika mi mamemi maphembi.” (Yes. 1:18) Phasi yiwombo yikala mu botula ditono dimbuaki yingolo mu nledi wuphembi. Vayi mu nzila yi kifuani beni kioki kikiedika, Yehova wutuveni sikididi ti masumu meto malenda sukulu bumboti mboti mu phila yoyi ka malendi bue monikina ko.
“Kadiambu ko masumu meno madi mambuaki mela ba maphembi banga mvula phembi” (Yes. 1:18)
10. Kifuani mbi diaka kinkaka Yehova keta sadila mu diambu di monisa bunneni bu nlemvo’andi?
10 Banga phila tumuenini mu disolo diodi diviokidi, masumu madi phe banga “zipholo.” (Mat. 6:12; Luka 11:4) Diawu, kadika khumbu tumvangila Yehova disumu, yidi banga beto tulembo tatamana kota pholo. Pholo’andi tuidi yinneni! Vayi mu thangu Yehova katulemvukidi yidi banga niandi wutulemvukidi pholo yoyi tufueti kumfuta. Katombanga ko mfutu wu masumu momo katulemvukila. Bobuawu bobo mutu kakadila mu zikhini mu thangu banlemvukidi pholo, beto phe tueta ba mu zikhini mu thangu Yehova keta kutulemvukila!
“Wutulemvukila masumu meto” (Mat. 6:12)
11. Mu thangu Bibila kitubidi ti masumu meto “makubulu,” mbi yinsundula? (Mavanga 3:19)
11 Yehova kasukilanga ko kaka mu lemvukilanga zipholo zieto voti masumu meto; weta kumakubula phe. (Tanga Mavanga 3:19.) Mu thangu batulemvukidi pholo, yidi banga yawu babare mu mintialungu miodi minneni. Vayi kadiambu ko babare pholo beni, thalu yi pholo beni yilenda kuandi phe kaka monika. Vayi disuasanu didi mu kubula kima ayi bare kima. Muingi tusudika kifuani beni, tufueti bambuka moyo ti thita yoyi yeba sadulungu mu thangu thama yiba yisangana na karbone, gome ayi nlangu. Mutu kalenda kuandi bonga phe shifon yoyi yidi ayi mua nlangu ayi kubula bisonoko biobi bisonimina mu thita beni. Diawu, mu thangu “beba kubulanga,” pholo, yeba zimbalanga mvimba mvimba. Bisonoko bithalu yi pholo beni bieba bue monikanga ko mu meso. Yimonikini ti banga pholo beni yisi keta bandi ko. Tuidi na phutudulu matondo mawombo mu zaba ti Yehova kasukilanga ko kaka mu lemvukila masumu meto, vayi weta kumazimbakana mu ntim’andi woso!—Nku. 51:9.
“Muingi masumu meno malemvukulu” (Mav. 3:19)
12. Dilongi mbi tubeki mu kifuani ki dituti dinneni?
12 Kuidi na phila yinkaka yoyi Yehova kasudikisidi phila yoyi keta lemvukila masumu meto mu ntim’andi woso. Tubidi ti: “Minu mandi fuka mambu maku moso mambimbi banga dituti ayi masumu maku banga dituti dinneni.” (Yes. 44:22) Mu thangu Yehova katulemvukidi, yidi banga niandi fukidi masumu meto mu dituti dinneni muingi beto ayi niandi tubika bue mamona mvimba mvimba.
“Ndiela fuka mavanga maku mambimbi banga mawu mafukulu mu dituti” (Yes. 44:22)
13. Mu thangu Yehova kalemvukidi masumu meto, bue tueta kimuena?
13 Bifuani beni biobi mbi bikutulonga? Mu thangu Yehova kalemvukidi masumu meto, tufueti manganga kifu ki kue kimonanga banga beto tunnata zitu ki masumu mu luzingu lueto. Mu nzila yi menga ma Yesu, zipholo zieto zilemvukulu mvimba mvimba. Mu thangu Yehova katulemvukidi disumu, yidi banga tuisi keta divang’eto ko. Buawu bobo Yehova keta kutulemvukila mu thangu tubaludi ntima mu kondo bue vanga masumu meto.
YEHOVA WETA VUTULA NGUIZANI YIMBOTI
Nlemvo wowo Dise dieto di mazulu keta kutuvana weta tula ti tuba nguizani yimboti ayi niandi (Tala paragrafi 14)
14. Bila mbi tulenda tudila nlemvo wu Yehova ntima? (Tala phe foto zifoto.)
14 Nlemvo wukiedika wowo wubedi kuidi Yehova, weta tula ti tuba nguizani yimboti ayi niandi. Weta kutusadisa tubika kukimona banga beto tume bakana mambu. Tuedi banzila ko ayi tuedi mona ko tsisi ti Yehova weta tulundila nganzi mu kitsueki ayi weta tomba phila yoyi kalenda kutuvanina tumbu. Kadi khumbu kela kubutudila. Bila mbi tulenda tudila Yehova ntima mu thangu katukembi ti wutulemvukidi? Yehova wukamba m’bikudi Yelemia ti: “Mandi balemvukila mu mambimbi mawu ayi ndiedi bue bambukila ko moyo masumu mawu.” (Yel. 31:34) Polo wuvutukila ziphova beni mu thangu katuba ti: “Ndilendi buela tebukila ko moyo masumu mawu.” (Ebe. 8:12) Vayi bukiedika ziphova beni mbi zinsundula?
“Ndiela sie bue tebukila ko masumu mawu moyo” (Yel. 31:34)
15. Yehova katebukilanga ko masumu meto moyo, mbi yinsundula?
15 Mu Bibila ziphova “tebukila moyo” zisi sundula ko kaka ti mutu wulembo yindula diambu dimosi disalama mu thama. Vayi zilenda sundula phe mutu wulembo vangi diambu dimosi. Dovula kioki babanda va nti va ndambusu Yesu wulomba ti: “Yesu, bika weba kuthebukila moyo mu thangu wela kuiza mu Kipfumu kiaku.” (Luka 23:42, 43) Kasi lomba ko kaka kuidi Yesu ti kanyindula mu thangu beni yina. Mvutu wowo Yesu kavana dovula beni wumonisa ti wela baka zikhubukulu mu diambu di kamfulukisa. Diawu, mu thangu Yehova katubidi ti kalendi ko bue bambukila masumu meto moyo, yintia tuba kalendi ko kutufuemina voti kutuvana tumbu. Kela sie kutuvana ko tumbu mu bilumbu binkuiza, mu masumu momo katulemvukila.
16.Mu phila mbi Bibila kitubidi kiphuanza kioki kieta ba mu nlemvo wukiedika?
16 Bibila kieta sadila kifuani kinkaka mu diambu di kitusadisa tusudika kiphuanza kioki kieta ba mu nlemvo wukiedika. Kitubidi ti bo tuidi batu bakambu duka, tuidi “mimvika mi masumu.” Vayi mu lusadusu lu nlemvo wu Yehova tuidi bavika bobo “bakudulu mu disumu.” (Loma 6:17, 18; Tso. 1:5) Beto zaba ti Yehova wutulemvukidi, tueta kuiza ba mu zikhini zikulu mu buvika bu disumu.
“Lumana kulu mu masumu” (Lom. 6:18)
17. Mu phila mbi nlemvo weta kuiza tubelusila? (Yesaya 53:5)
17 Tanga Yesaya 53:5. Kifuani kitsuka kioki tueka ntubila, kitudedikisidi banga batu bobo badi kimbevo kingolo kioki kieta nata mu lufua. Mu bila ki nkayilu wowo kavana mu nzila muan’andi, Yehova wutubelusa. (1 Pi. 2:24) Khudulu yeta vutula mu phila yiduka nguizani ayi Yehova, yoyi yibebusu mu kimbevo ki kipheve. Mutu niandi beluka mu kimbevo kingolo, weta mona zikhini ziwombo, beto phe tueta ba mu zikhini mu thangu tubelukidi mu kimbevo ki kipheve ayi mu thangu tueta kuiza bue kikununu kuidi Yehova mu lusadusu lu nlemvo’andi.
“Mu nzila yi ziphuta ziandi tubelukila” (Yes. 53:5)
NLEMVO WU YEHOVA TSUNDU MBI WIDI KUIDI BETO
18. Malongi mbi tume longuka mu thangu tume tadila bifuani biphila mu phila biobi bidi mu Bibila mu diambu ditedi nlemvo wu Yehova? (Tala phe ankadre “Phila yoyi Yehova keta kutulemvukila.”)
18 Malongi mbi tume longuka mu thangu tume tadila bifuani biobi bidi mu Bibila mu diambu ditedi nlemvo wu Yehova? Mu thangu katulemvukidi, weta kubutudila mu ntim’andi woso ayi mvimba mvimba. Yawu yeta kutusadisa tuba nguizani yimboti ayi Dise dieto di mazulu. Ayi yo yawu thangu, tueta kuiza tebuka moyo ti nlemvo wukiedika widi dikaba. Tueta bakila dikaba beni mu luzolo ayi mu nlemvo wukiedika wowo Yehova kalembo monisina kuidi batu ba masumu. Vayi bika ti mu zingolo zieto veka.—Loma 3:24.
19. a) Mu mbi tufueti bela phutudulu matondo? (Loma 4:8) b) Mbi tuela longuka mu disolo dinkuiza?
19 Tanga Loma 4:8. Tufueti ba phutudulu matondo mu zaba ti Yehova widi Nzambi nioni “weta lemvukila mu bukiedika”! (Nku. 130:4) Diawu, enati tutidi Yehova katulemvukila, tufueti vanga diambu dimosi dimfunu. Yesu wusudikisa ti: “Enati lumengi lemvukila batu buna Dise dieno kalendi ko kululemvukila.” (Mat. 6:14, 15) Diawu, tufueti sokudila Yehova ayi lemvukilanga batu bankaka. Vayi bue tufueti kubutudila? Mawu mambu tuela tadila mu disolo dinkuiza.
NKUNGA 46 Totɔndi yo, Yehova
a Mu ziphova zi originale zi ki Ebelewo tueta mona ziphova “nlemvo,” ziphova beni zieta sundula nlemvo wukiedika vayi bika mintindu minkaka mi nlemvo. Zimbangudulu ziwombo zi Bibila zimonisanga ko disuasanu beni diodi mu Minkunga 130:4.