¿Bix jeʼel k-eʼesik importante k-ilik u kʼaabaʼ Jéeobaeʼ?

1, 2. ¿Bix k-ojéeltik utiaʼal Jesúseʼ jach importante u kʼaabaʼ Jéeoba?

UTIAʼAL Jesúseʼ jach táaj importante u kʼaabaʼ u Taata, letiʼ le máax maas defendertik u kʼaabaʼ Jéeobaoʼ. Jeʼex t-ilil teʼ xook máanikoʼ Jesúseʼ hasta tu tsʼáaj u kuxtal tu yoʼolal u kʼaabaʼ Jéeoba bey xan utiaʼal ka eʼesaʼak maʼ jaaj le baʼax ku yaʼalaʼal tu contra u kʼaabaʼoʼ (Mar. 14:36; Heb. 10:​7-9). Tsʼoʼoleʼ le kéen tsʼoʼokok le Mil Años kun gobernaroʼ, letiʼeʼ yéetel kiʼimak óolal ken u sut le Reino tu kʼab Jéeobaoʼ (1 Cor. 15:​26-28). Beyoʼ yaan u pʼáatal jach santoil u kʼaabaʼ Jéeoba. Tuláakal le baʼax tsʼoʼok u beetik Jesús, yéetel tuláakal le baʼax ken u beet yoʼolal u kʼaabaʼ Jéeobaoʼ ku yeʼesik jach u yaabiltmaj u Taata.

² Le ka taal Jesús way Luʼumeʼ taal tu kʼaabaʼ Jéeoba (Juan 5:43; 12:13). Tu tsʼáaj xan u kʼaj óolt u discípuloʼob u kʼaabaʼ Dios (Juan 17:​6, 26). Le baʼaxoʼob tu kaʼansaj yéetel le milagroʼob tu beetoʼ tu beetaj tu kʼaabaʼ Jéeoba (Juan 10:25). Tsʼoʼoleʼ tiʼ junpʼéel oración tu beeteʼ, le ka tu chʼaʼchiʼitaj u discípuloʼobeʼ tu yaʼalaj tiʼ u Taata: «Kanáantoʼob yoʼolal a kʼaabaʼ» (Juan 17:11). Jeʼex k-ilkoʼ Jesúseʼ jach importante u yilik u kʼaabaʼ Jéeoba. Juntúul máak maʼ u yojel bix u kʼaabaʼ Dios yéetel maʼatech u chʼaʼchiʼitikeʼ, ¿jeʼel wa u páajtal u yaʼalikuba cristianoeʼ?

3. ¿Baʼax ken k-il teʼ xookaʼ?

³ Toʼoneʼ k-ilik k-seguertik u ejemplo Jesús, le oʼolal jach importante k-ilik xan u kʼaabaʼ Jéeoba (1 Ped. 2:21). Teʼ xookaʼ yaan k-ilkeʼ le máaxoʼob bisik u kʼaabaʼ Diosoʼ letiʼe máaxoʼob tsikbaltik «le baʼaloʼob maʼalobtak ken u beet le Reinooʼ» (Mat. 24:14). Yaan xan k-ilik baʼaxten cada juntúul tiʼ toʼoneʼ kʼaʼabéet u yilik importante u kʼaabaʼ Jéeoba.

«JUNPʼÉEL KAAJ BISIK U KʼAABAʼ»

4. 1) ¿Baʼax tu yaʼalaj Jesús tiʼ u discípuloʼob le taʼaytak u suut teʼ kaʼanoʼ? 2) ¿Baʼax preguntail ken k-núuke?

⁴ Le taʼaytak u suut Jesús teʼ kaʼanoʼ tu yaʼalaj tiʼ u discípuloʼob: «Yaan a kʼamkeʼex páajtalil kéen kʼuchuk le espíritu santo ta wóokʼoleʼexoʼ, yéetel yaan a tʼaaneʼex tin woʼolal tu kaajil Jerusalén, tiʼ tuláakal u luʼumil Judea, tu luʼumil Samaria bey xan tak tu maas náachil le luʼumaʼ» (Hech. 1:8). Jeʼex k-ilkoʼ maʼ chéen Israel kun tsikbaltbil le maʼalob noticiaʼoboʼ, baʼaxeʼ yaan u tsikbaltaʼal tiʼ le máaxoʼob kajaʼanoʼob tiʼ tuláakal yóokʼol kaab utiaʼal ka u beetubaʼob u discípuloʼob Jesúsoʼ (Mat. 28:​19, 20). Le ka tu yaʼalaj Jesús «yaan a tʼaaneʼex tin woʼolaloʼ», ¿táan wa kaʼach u yaʼalikeʼ le túumben discípuloʼoboʼ yaan u tʼaanoʼob chéen tiʼ Jesús, wa tak tiʼ Jéeoba? Hechos capítulo 15, ku núukik le preguntaaʼ.

5. Le apóstoloʼob yéetel u ancianoiloʼob Jerusaléneʼ, ¿bix tu yeʼesiloʼob u kʼaʼanaʼanil u kʼaj óoltaʼal u kʼaabaʼ Jéeoba? (Ilawil xan le dibujooʼ).

⁵ Teʼ año 49, le apóstoloʼob yéetel u ancianoiloʼob Jerusaléneʼ tu muchʼubaʼob utiaʼal u chʼaʼtuklikoʼob baʼax unaj u beetik le máaxoʼob maʼ judíoʼob utiaʼal ka u beetubaʼob cristianoʼoboʼ. Tu tsʼoʼokbal le reuniónoʼ, Santiago, u majan íitsʼin Jesúseʼ, tu yaʼalaj: «Symeóneʼ [Pedro] tsʼoʼok u jach tsolik bix káajik u chʼaʼabal en cuenta le j-táanxel luʼumiloʼob tumen Diosoʼ. Dioseʼ tu beetaj lelaʼ utiaʼal ka u jóoʼs junpʼéel kaaj bisik u kʼaabaʼ». ¿U kʼaabaʼ máax ken u bis le kaajaʼ? Santiagoeʼ tu chʼaʼchiʼitaj le baʼax tu yaʼalaj profeta Amósoʼ: «Le máaxoʼob kun pʼáatloʼoboʼ ka u jach tsʼáa u yóoloʼob u kaxtoʼob Jéeoba junmúuchʼ yéetel tuláakal le j-táanxel luʼumiloʼoboʼ, le máaxoʼob ku biskoʼob in kʼaabaʼoʼ. Lelaʼ Jéeoba aʼalik» (Hech. 15:​14-18). Le baʼax tu yaʼaloʼ ku yeʼesikeʼ le túumben discípuloʼoboʼ maʼ chéen yaan u kaanbaloʼob tiʼ Jéeobaiʼ, baʼaxeʼ yaan xan u kʼaj óoltaʼaloʼob yéetel u kʼaabaʼ Dios. Lelaʼ u kʼáat u yaʼaleʼ yaan u kaʼanskoʼob tiʼ u maasil u kʼaabaʼ Jéeoba yéetel yaan xan u representarkoʼob.

6, 7. 1) ¿Baʼax oʼolal taal Jesús way Luʼumeʼ? 2) Tiʼ tuláakal le baʼax taal u beet Jesúsoʼ, ¿máakalmáak maas importanteiʼ?

⁶ Kʼaʼajaktoʼoneʼ u kʼaabaʼ Jesúseʼ u kʼáat u yaʼal: «Jéeoba Salvartik Máak». Lelaʼ jach bey úuchikoʼ tumen tiʼ Jéeobaeʼ meyajnaj Jesús utiaʼal u salvartik tuláakal le máaxoʼob yaan u fejoʼoboʼ. Le oʼolal Jesúseʼ taal way Luʼum utiaʼal u tsʼáaik u kuxtal tu yoʼolal wíinikeʼ (Mat. 20:28). Yoʼolal le u kuxtal Jesús tu kʼuboʼ ku páajtal u perdonartaʼal u kʼeban wíinik yéetel u yantaltiʼ kuxtal minaʼan u xuul (Juan 3:16).

⁷ ¿Baʼaxten túun kʼaʼabéet u salvartaʼal wíinik? Yoʼolal le baʼax úuch tu jardínil Edénoʼ. Jeʼex t-ilil teʼ xook máanikoʼ Adán yéetel Evaeʼ tu tsʼáajubaʼob tu contra Jéeoba, le oʼolal tu perdertoʼob le kuxtal minaʼan u xuuloʼ (Gén. 3:​6, 24). Pero Jesúseʼ maʼ chéen taal way Luʼum utiaʼal u salvartik wíinikeʼ, letiʼeʼ taal utiaʼal junpʼéel baʼal maas importante: tsʼoʼok kaʼach u pʼaʼatal kʼaasil u kʼaabaʼ Jéeoba (Gén. 3:​4, 5). Le beetkeʼ kex kʼaʼabéet kaʼach u salvartaʼal u paalal Adán yéetel Evaeʼ, maases kʼaʼabéet kaʼach u santificartaʼal u kʼaabaʼ Jéeoba. Jesúseʼ letiʼe máax maas áantajnaj utiaʼal u santificartaʼal u kʼaabaʼ Jéeobaoʼ tumen jach maʼalob tu representartil le ka taal way Luʼumeʼ.

8. Le máaxoʼob ku beetkubaʼob u discípuloʼob Jesúsoʼ, ¿baʼax kʼaʼabéet kaʼach u naʼatkoʼob yéetel u kʼamkoʼob?

⁸ Tuláakal le máax tu beetuba u discípulo Jesúsoʼ, kex judío wa maʼeʼ, kʼaʼabéet kaʼach u kʼamik chéen ku páajtal u salvarkuba yoʼolal Jéeoba (Juan 17:3). Jeʼex Jesúseʼ letiʼob xaneʼ yaan u kʼaj óoltaʼaloʼob bey u representanteʼob Dioseʼ. Uláakʼ baʼax kʼaʼabéet kaʼach u naʼatkoʼobeʼ es ke jach importante u santificartaʼal u kʼaabaʼ Jéeoba. Tumen chéen tu yoʼolal leloʼ jeʼel u páajtal u salvarkubaʼobeʼ (Hech. 2:​21, 22). Lelaʼ ku yeʼesikeʼ tuláakal u discípuloʼob Jesúseʼ kʼaʼabéet kaʼach u kaanbaloʼob tiʼ Jéeoba bey xan tiʼ Jesús. Tu tsʼoʼokbal le oración tu beetaj Jesús ku chíikpajal teʼ Juan capítulo 17, tu yaʼalaj: «Teneʼ tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil, utiaʼal ka u yeʼesoʼob yaabilaj jeʼex le yaabilaj ta weʼesajtenoʼ bey xan utiaʼal ka yanaken junmúuchʼ tu yéeteloʼob» (Juan 17:26).

«TEʼEXEʼ IN TESTIGOʼEX»

9. Le jaajil cristianoʼoboʼ, ¿bix unaj u yilkoʼob u kʼaabaʼ Jéeoba?

⁹ Jeʼex tsʼoʼok k-ilkoʼ utiaʼal le jaajil cristianoʼoboʼ jach importante u santificartaʼal u kʼaabaʼ Jéeoba (Mat. 6:​9, 10). Toʼon xaneʼ jach importante k-ilik le kʼaabaʼoʼ, lelaʼ k-eʼesik yéetel le baʼaxoʼob k-beetkoʼ. ¿Bix jeʼel k-áantaj utiaʼal u santificartaʼal u kʼaabaʼ Jéeoba yéetel ka k-eʼes maʼ jaaj le baʼax tu yaʼalaj Satanás tu contraoʼ?

10. ¿Tiʼ baʼax juicioil ku tʼaan Isaías capítulo 42 tak 44? (Isaías 43:9; 44:​7-9; ilawil xan le fotooʼ).

¹⁰ Teʼ Isaías capítulo 42 tak 44, ku yaʼalik baʼax jeʼel u páajtal k-beetik utiaʼal ka páajchajak k-santificartik u kʼaabaʼ Jéeobaeʼ. Teʼeloʼ ku tʼaan tiʼ junpʼéel juicio utiaʼal u yilaʼal máax le u jaajil Diosoʼ. Teʼ juiciooʼ Jéeobaeʼ ku yaʼalik tiʼ le uláakʼ diosoʼoboʼ ka u taas u testigoʼob utiaʼal u probarkoʼob jach jaaj le baʼax ku yaʼalikoʼoboʼ. Chéen baʼaleʼ mix máak máan tʼaan tu favoroʼob (xok Isaías 43:9; 44:​7-9).

11. Jeʼex u yaʼalik Isaías 43:​10-12, ¿baʼax ku yaʼalik Jéeoba tiʼ le máaxoʼob meyajtikoʼ?

¹¹ (Xok Isaías 43:​10-12). Jéeobaeʼ ku yaʼalik tiʼ le máaxoʼob meyajtikoʼ: «Teʼexeʼ in testigoʼex yéetel teen u jaajil Dios». Tsʼoʼoleʼ ku yaʼaliktiʼob ka u núukoʼob le preguntaaʼ: «¿Yaan wa uláakʼ Dios aparte tiʼ teen?» (Isa. 44:8). Toʼoneʼ yaantoʼon u jatsʼuts privilegioil k-núukik le preguntaaʼ. Yéetel le baʼaxoʼob k-aʼalik bey xan yéetel le baʼaxoʼob k-beetkoʼ jeʼel u páajtal k-eʼesik Jéeoba letiʼe jaajil Diosoʼ yéetel u kʼaabaʼeʼ letiʼe maas importanteoʼ. Yéetel k-kuxtal xaneʼ k-eʼesik k-yaabiltmaj Jéeoba yéetel tuláakal k-puksiʼikʼal, kex jeʼel baʼaxak pruebail ka u tsʼáatoʼon Satanáseʼ yaan u chúukpajal k-óol tiʼ Jéeoba. Wa k-beetik beyoʼ yaan k-santificartik u kʼaabaʼ Dios.

12. ¿Bix béeychajik u profecíail Isaías 40:​3, 5?

¹² Isaíaseʼ tu yaʼaleʼ yaan máax kun preparartik wa kun maʼalobkíintik «u beel Jéeoba» (Isa. 40:3). ¿Bix béeychajik le profecíaaʼ? Juan Bautistaeʼ tu preparartaj le bej tuʼux máan Jesúsoʼ, kʼaʼajaktoʼoneʼ Jesúseʼ tu representartaj Jéeoba yéetel tʼaanaj tu kʼaabaʼ (Mat. 3:3; Mar. 1:​2-4; Luc. 3:​3-6). Isaíaseʼ tu yaʼalaj xan le profecíaaʼ: «Yaan u yeʼesaʼal u kiʼichkelmil Jéeoba» (Isa. 40:5). ¿Bix béeychajik le baʼax tu yaʼalaj Isaíasoʼ? Béeychaj le ka taal Jesús way Luʼumeʼ, letiʼeʼ jach maʼalob tu representartil Jéeoba, jeʼel u páajtal u yaʼalaʼaleʼ bey Jéeoba taal way Luʼumeʼ (Juan 12:45).

13. ¿Bix jeʼel k-seguertik u ejemplo Jesúseʼ?

¹³ Toʼoneʼ k-beetik jeʼex Jesús le kéen k-santificart u kʼaabaʼ Jéeoba bey xan le kéen k-eʼes maʼ jaaj le baʼax ku yaʼalaʼal tu yoʼolaloʼ. Toʼon xaneʼ u testigoʼon Jéeoba tumen k-bisik u kʼaabaʼ yéetel k-tsikbaltik tiʼ u maasil le baʼaxoʼob jatsʼutstak u beetmoʼ. Pero utiaʼal ka k-beet maʼalob le meyajaʼ kʼaʼabéet k-tsikbaltik xan tiʼ u maasil tuláakal le baʼaxoʼob tu beetaj Jesús utiaʼal u santificartik u kʼaabaʼ Jéeobaoʼ yéetel le baʼaxoʼob ken u beet maas táaniloʼ (Hech. 1:8). Jesúseʼ letiʼe Testigo maas importanteoʼ yéetel toʼoneʼ k-seguertik u ejemplo (Apo. 1:5). ¿Bix túun unaj k-ilik u kʼaabaʼ Jéeoba?

BIX UNAJ K-ILIK U KʼAABAʼ JÉEOBA

14. Jeʼex u yaʼalik Salmo 105:​3, ¿baʼax k-beetik tumen jach k-yaabiltmaj u kʼaabaʼ Jéeoba?

¹⁴ K-alabartik u kʼaabaʼ Jéeoba (xok Salmo 105:3). Jéeobaeʼ jach uts tu tʼaan ka k-alabart u kʼaabaʼ yéetel ka k-nojbaʼalkúuntba tu yoʼolal letiʼ (Jer. 9:​23, 24; 1 Cor. 1:31; 2 Cor. 10:17). Le máax ku nojbaʼalkúuntkuba yoʼolal Jéeobaeʼ u kʼáat u yaʼaleʼ kiʼimak u yóol ikil u adorartik. Toʼoneʼ junpʼéel nojoch privilegio k-ilik k-alabartik u kʼaabaʼ Jéeoba yéetel k-eʼesik maʼ jaaj le baʼax ku yaʼalaʼal tu contraoʼ. Jeʼel tuʼuxak ka yanakoʼoneʼ maʼ unaj k-suʼlaktal k-aʼal u testigoʼon Jéeobaiʼ, teʼ tuʼux k-meyajoʼ, teʼ escuelaoʼ wa teʼ tuʼux kajaʼanoʼonoʼ. Le Kʼaasilbaʼaloʼ u kʼáat ka xuʼuluk k-tsʼáaik kʼaj óoltbil u kʼaabaʼ Jéeoba (Jer. 11:21; Apo. 12:17). Satanás yéetel le j-maʼ jaajil profetaʼoboʼ u kʼáatoʼob ka tuʼubsaʼak u kʼaabaʼ Jéeoba tumen tuláakal máak (Jer. 23:​26, 27). Pero toʼoneʼ jach k-yaabiltmaj u kʼaabaʼ Dios, le oʼolal «bul kʼiin» taak k-alabartik (Sal. 5:11; 89:16).

15. ¿Baʼax táakaʼan ichil u chʼaʼchiʼitaʼal u kʼaabaʼ Jéeoba?

¹⁵ K-chʼaʼchiʼitik u kʼaabaʼ Jéeoba (Joel 2:32; Rom. 10:​13, 14). ¿Baʼax táakaʼan ichil u chʼaʼchiʼitaʼal u kʼaabaʼ Jéeoba? Maʼ chéen yaan k-ojéeltik u kʼaabaʼ yéetel k-aʼalikiʼ, baʼaxeʼ kʼaʼabéet k-kʼaj óoltik jach tu jaajil bix letiʼ, k-confiar tiʼ, k-kʼáatik u yáantaj bey xan u nuʼuktaj (Sal. 20:7; 99:6; 116:4; 145:18). Táakaʼan xan k-kaʼansik tiʼ u maasil bix u kʼaabaʼ Dios yéetel u jatsʼuts modos. Tsʼoʼoleʼ wa letiʼob taak u lúubloʼob utsil tiʼ Dioseʼ, kʼaʼabéet k-aʼaliktiʼob unaj u arrepentiroʼob yéetel unaj u kuxtaloʼob jeʼex uts tu tʼaan Jéeobaeʼ (Isa. 12:4; Hech. 2:​21, 38).

16. ¿Bix jeʼel k-eʼesik chéen táan u tuus Satanáseʼ?

¹⁶ Yoʼolal u kʼaabaʼ Jéeobaeʼ jeʼel tak k-muʼyajeʼ (Sant. 5:​10, 11). Wa ku chúukpajal k-óol le kéen sufrirnakoʼoneʼ k-eʼesikeʼ Satanáseʼ táan u tuus. Tu kʼiiniloʼob Jobeʼ, Satanáseʼ tu yaʼalaj tu contra le máaxoʼob meyajtik Jéeobaoʼ: «Wa ka u yil máak jach nukaʼaj kíimileʼ jeʼel u tsʼáaik tuláakal baʼax yaantiʼ utiaʼal u salvartik u kuxtaleʼ» (Job 2:4). Letiʼeʼ tu tsʼáaj naʼatbileʼ máakeʼ chéen ku meyajtik Dios le kéen xiʼik maʼalobil tiʼ, pero le kéen xiʼik kʼaasil tiʼeʼ yaan u xúumpʼattik. Pero Jobeʼ chúukpaj u yóol, bey tu yeʼesil maʼ jaaj le baʼax ku yaʼalaʼaloʼ. Toʼon xaneʼ k-kʼáat pʼáatal tu tséel Jéeoba kex jeʼel baʼaxak ka u beet Satanás t-contraeʼ. Seguroʼon de ke Jéeobaeʼ yaan u kanáantkoʼon mantatsʼ yoʼolal u kiʼichkelem kʼaabaʼ (Juan 17:11).

17. Jeʼex u yaʼalik 1 Pedro 2:​12, ¿bix uláakʼ jeʼel k-alabartik u kʼaabaʼ Jéeobaeʼ?

¹⁷ K-respetartik u kʼaabaʼ Jéeoba (Pro. 30:9; Jer. 7:​8-11). Toʼoneʼ k-bisik u kʼaabaʼ Jéeoba yéetel k-representartik, le oʼolal yéetel le baʼaxoʼob k-beetkoʼ jeʼel k-beetik u alabartaʼaleʼ wa jeʼel k-beetik u yúuchul tʼaan kʼaas tiʼ letiʼeʼ (xok 1 Pedro 2:12). Toʼoneʼ taak k-alabartik Jéeoba yéetel baʼax k-aʼalik bey xan yéetel baʼax k-beetik. Jeʼex k-ilkoʼ kex kʼeban máakoʼoneʼ jeʼel k-beetik u alabartaʼal u kʼaabaʼ Jéeoba tumen u maasileʼ.

18. ¿Bix uláakʼ jeʼel k-eʼesik jach importante k-ilik u kʼaabaʼ Jéeobaeʼ? (Ilawil xan le notaoʼ).

¹⁸ Maas importante k-ilik u kʼaabaʼ Jéeoba ke le baʼax ku yaʼalaʼal t-oʼolaloʼ (Sal. 138:2). ¿Baʼaxten k-aʼalik leloʼ? Tumen yaan kʼiineʼ le máakoʼoboʼ ku burlarkoʼon yéetel ku criticarkoʼon ikil k-beetik baʼax uts tu tʼaan Jéeoba yéetel ikil k-yaabiltik.a Por ejemplo Jesúseʼ utiaʼal ka alabartaʼak u kʼaabaʼ Jéeobaeʼ tu yóotaj kíimil bey juntúul kʼasaʼan máak le ka chʼuykíintaʼab tiʼ junpʼéel cheʼoʼ. Hebreos 12:​2-4, ku yaʼalikeʼ Jesúseʼ «maʼ tu beetaj u cuentail wa suʼtsil le baʼax beetaʼabtiʼoʼ», lelaʼ u kʼáat u yaʼaleʼ letiʼeʼ maʼ chʼíik u tukult le baʼax ku yaʼalik u maasil tu yoʼolaloʼ. Le baʼax maas importante utiaʼal Jesúsoʼ letiʼe u beetik baʼax u kʼáat Diosoʼ (Mat. 26:39).

19. ¿Bix a wilik u kʼaabaʼ Jéeoba, yéetel baʼaxten?

¹⁹ Toʼoneʼ jach k-yaabiltmaj u kʼaabaʼ Jéeoba, le oʼolal junpʼéel nojoch privilegio k-ilik k-kʼaj óoltaʼal bey u testigoʼon Jéeobaeʼ. Le beetkeʼ kex ka burlartaʼakoʼon yéetel ka aʼalaʼaktoʼon baʼaleʼ, toʼoneʼ maas importante k-ilik u kʼaabaʼ Jéeoba ke le baʼax ku yaʼalaʼal t-oʼolaloʼ. Tsʼoʼok k-chʼaʼtuklik k-alabartik Jéeoba kex jeʼel baʼaxak ka u beet Satanás t-contraeʼ. Toʼoneʼ taak k-beetik jeʼex Jesúseʼ, k-kʼáat k-eʼes jach importante k-ilik u kʼaabaʼ Jéeoba.