Septiembre

Dxi gutiʼ Lázaro la? biʼniʼ sentir Jesús ni cayuni sentir Marta ne María, ca bizaʼnaʼ Lázaro. Ngue runi «biina Jesús» ora biʼyaʼ cayacanácabe (Juan 11:32-35). Biinabe cadi pur maʼ qué zuuyabe xhamígube. Purtiʼ nánnabe zusibánibe laa, sínuque biinabe ora bíʼyabe pabiáʼ cayacaná ca xhamígabe. Cadi casi Jesús laanu purtiʼ perfectu laa. Peru rizíʼdinu stale de laabe ora ridúʼyanu biʼniʼ sentirbe ni runi sentir binni. Ne nadxiinu laabe pur modo biʼniʼ tratarbe binni. Guizáʼ riéchenu gánnanu maʼ nácabe Rey lu Reinu stiʼ Dios ne maʼ cadi candaa zabeebe guiráʼ ca yuubaʼ nuu ndaaniʼ Guidxilayú riʼ. Ne cumu bibánibe ndaaniʼ Guidxilayú riʼ la? nga runi laasibe nga zanda cueebe ca yuubaʼ nápanu pur gobiernu stiʼ Binidxabaʼ. Guizáʼ nayecheʼ runi sentirnu purtiʼ nápanu ti Rey ni riá laanu (Heb. 2:17, 18; 4:15, 16). w19.03 17 párr. 12, 13

Racanenu binni gunibiáʼ Jiobá, peru caquiiñeʼ guiénenu cadi laanu nga ni jma risaca lu dxiiñaʼ riʼ (1 Cor. 3:6, 7). ¿Xiñee yaʼ? Purtiʼ Jiobá nga cuchiña binni ra nuu. Ne cada binni napa xidé guni decidir pa zuni aceptar mensaje stiʼ Dios o coʼ según ni nuu ndaaniʼ ladxidóʼ (Mat. 13:4-8). Neca guca Jesús maestru ni jma nanna gusiidiʼ ni guyuu ndaaniʼ Guidxilayú riʼ, cadi guiráʼ binni gucuaa mensaje stibe. Nga runi cadi gaca desanimarnu pa qué naʼ binni gucaadiaga laanu ora runi predicarnu. Zápanu stale beneficiu pa gusihuínninu runi sentirnu ni runi sentir binni ora runi predicarnu. Jma ziuuláʼdxinu guni predicarnu, ziéchenu ne zuyúbinu modo gacanenu «cani ma nexhe icaa enda nabani ni qué zaluxe» guni aceptarcaʼ mensaje stiʼ Reinu (Hech. 13:48). Nga runi, «ora tiica ganda acané nu binni la? guni nu ni» (Gál. 6:10). Óraca ziuʼnu nayecheʼ purtiʼ cusisácanu Jiobá, Bixhózenu ni nuu guibáʼ (Mat. 5:16). w19.03 25 párr. 18, 19

Rey David bicaa: «Nandxóʼ Jiobá ne naquiiñeʼ gusisácanu laa» (Sal. 145:3). Gunnaxhiibe Jiobá, ne guendarannaxhii ca bicaa ni laabe gusisácabe laa «ndaaniʼ congregación» (1 Cró. 29:10-13; Sal. 40:5). Ti modo rusisácanu Jiobá nga ora runi comentarnu ra reunión. Guiranu riuuláʼdxinu gunadiáganu gadxé gadxé tipu comentariu ra reunión. Guzéʼtenu ti ejemplu, guizáʼ riuuláʼdxinu gunadiáganu ora runi comentar ti baʼduhuiiniʼ de guidubi ladxidóʼ neca né huaxiéʼ si diidxaʼ. Riéchenu ora rusiene tuuxa xiixa cosa nacubi ni deruʼ biziidiʼ de lu Biblia né stale gana. Ne rusisácanu stipa stiʼ ca hermanu ni rudii ti comentariu neca natuicaʼ o deruʼ caziidicaʼ idioma stinu (1 Tes. 2:2). ¿Ximodo zanda gusihuínninu rusisácanu stipa rúnicabe yaʼ? Ti modo zanda gúninu ni nga gudiʼnu xquíxepeʼ laacabe despué de reunión ne gábinu laacabe guizáʼ guluu comentariu stícabe gana laanu. Ne laaca rusihuínninu ni ora runi comentarnu. Pa gúninu ca ni maʼ bizéʼtenu riʼ la? qué zaguusícabe gana laanu, sínuque laaca zaguʼnu gana xcaadxi (Rom. 1:11, 12). w19.01 8 párr. 1, 2; 9 párr. 6

Maʼ qué guidxela chii hombre napa lepra xi gúnicaʼ. Binadiágacaʼ zanda gusianda Jesús, Maestru ni jma nanna gusiidiʼ binni ni napa intiica guendahuará. Nga runi, ora bíʼyacaʼ laabe de zitu, bicaacaʼ ridxi laabe ne nacaʼ: «Jesús, Maistru, biá laadu». Bíʼnibe ni canábacaʼ laabe ne bisiándabe de guiracaʼ. Nuunu seguru guizáʼ guyuucabe agradecidu pur ni biʼniʼ Jesús pur laacabe. Peru tobi si de ca hombre ni bisianda Jesús que bisihuinni nuu agradecidu pur ca diidxaʼ ni gudxi laabe. Samaritanu hombre que, ne bisisácabe Dios en voz alta (Luc. 17:12-19). Cásica samaritanu que, laanu laaca racaláʼdxinu gusihuínninu nácanu agradecidu né ca binni ni runi cosa galán pur laanu. Naca Jiobá ti ejemplu galán para laanu purtiʼ rusihuinni agradecidu laa. Rúnibe ni ora riguu ndaayabe ca xpínnibe ni runi ca cosa ni riuuláʼdxibe (2 Sam. 22:21; Sal. 13:6; Mat. 10:40, 41). Ne Biblia ná: «Ma xiiñi Dios laatu ne nadxii laatu. Yanna laucaalaʼdxi gaca tu casi laa» (Efes. 5:1). Nga runi, tobi de ca razón nabe risaca para gusihuínninu nácanu agradecidu nga purtiʼ racaláʼdxinu gácanu casi Jiobá. w19.02 14 párr. 1, 2; 15 párr. 4

Bixuiʼlú cani chiguzéʼtenu riʼ. Nuu ti baʼdudxaapaʼ ra scuela ne canabaʼ maestru stiʼ laa guni participar lu ti celebración ni nanna qué riuulaʼdxiʼ Dios. Nga runi né respetu rábibe maestru stibe qué zuni participarbe. Canayuni predicar ti joven ni nabé natuí ne cuxhidxináʼ ra puertaʼ stiʼ ti compañeru de clase ni runi burla ca testigu stiʼ Jiobá. Nuu ti padre de familia ra dxiiñaʼ ne canabaʼ jefe stiʼ laa guni ti cosa ni ná ley cadi jneza. Neca nánnabe zanda gunítibe dxiiñaʼ stibe, rusiénebe jefe stibe honradu laabe ne rúnibe ni ná ley purtiʼ nga nga ni ribeza Dios guni ca xpinni (Rom. 13:1-4; Heb. 13:18). ¿Xi cualidad zanda guininu rusihuinni guionnaʼ Testigu ni cuzéʼtenu lu ejemplu riʼ yaʼ? Ñándaca nuzéʼtenu caadxi, casi valor ne honradez. Peru nuu tobi ni jma rihuinni ne rucaa ni laacabe gúnicabe ni cayúnicabe, laani nga integridad. Guirácabe rúnicabe stipa para cadi gucheenécabe Jiobá ne gúnicabe ni ná ca norma stiʼ. Nuunu seguru riecheʼ ladxidóʼ Jiobá ora rúnicabe ni ná. w19.02 2 párr. 1, 2

Biʼniʼ proteger Ley que ca binni ni qué gapa tu gacané laa, casi ca viuda, ca huérfanu ne ca binni ni zeeda de sti guidxi. Naquiiñeʼ chinanda guiráʼ ca juez israelita que ni ná ley riʼ: «Cadi gácaluʼ injusto ora guni juzgarluʼ cani zeeda de sti guidxi o ca huérfanu, ne cadi naquiiñeʼ guiaananeluʼ lari stiʼ ti viuda ora quiʼñeʼ lii xiixa» (Deut. 24:17). Dxandipeʼ rizaalaʼdxiʼ Jiobá ca binni ni qué gapa tu gacané laa, ne gunábabe cuenta ca binni ni runi maltratar laacaʼ (Éx. 22:22-24). Racalaʼdxiʼ Jiobá guizaalaʼdxiʼ cani napa autoridad guiráʼ hermanu. Nanaláʼdxibe ca delito sexual ne racaláʼdxibe guni tratar binni ca xpínnibe jneza, jmaruʼ si cani qué gapa tu gacané laa (Lev. 18:6-30). Ora nuunu seguru runi tratar Jiobá laanu jneza la? jma rannaxhiinu laa. Ne ora rannaxhiinu Dios ne ca norma stiʼ, jma rannaxhiinu xcaadxi binni ne runi tratarnu laacaʼ jneza. w19.02 24, 25 párr. 22-26

Guzéʼtenu ti modo zanda gápanu ladxidoʼno de cani runi Binidxabaʼ. Rusiidiʼ Jiobá laanu cadi lica naquiiñeʼ chuʼ nin ti clase inmoralidad sexual ne nin ti cosa yuudxuʼ ládenu (Efes. 5:3). Yanna, ¿xi gúninu pa guzulú cani rúninenu dxiiñaʼ o cani rinenu scuela guiniʼcaʼ de cosa dxabaʼ yaʼ? ¿Xi gúninu pa gabi conciencia stinu laanu nuunu lu peligru yaʼ? (Rom. 2:15). ¿Ñee zulábinu conciencia stinu ni zeeda gaca casi ti centinela ne qué zudiʼnu lugar guni biidiʼ Binidxabaʼ ladxidoʼno la? Zándaca guquiinde laanu guidúʼyanu o gucaʼdiáganu ni cayuuyacabe o ni cucaadiágacabe. Peru ni naquiiñeʼ gúninu nga guchaʼnu de diidxaʼ o guireʼnu de ra nuucabe. Naquiiñeʼ gápanu valor para gucáʼnanu presión stiʼ ca compañeru stinu ora gucaacabe laanu gúninu cosa malu o guiníʼ íquenu casi riníʼ íquecaʼ. Nánnanu ruuyaʼ Jiobá stipa rúninu pur gucáʼnanu guiráʼ ca cosa ni zeeda de Binidxabaʼ ne zudiibe laanu stipa ne guendabiaaniʼ ni caquiiñenu para ganda gucáʼnanu cani (2 Crón. 16:9; Is. 40:29; Sant. 1:5). w19.01 17, 18 párr. 12, 13

Guizáʼ ricu guca Salomón ne gupa poder, ne stale cosa galán para guʼyaʼ ximodo zié ni laa (Ecl. 2:1-10). Bicuibe yoo, bíʼnibe jardín ne bíʼnibe guiráʼ ni gucaláʼdxibe. Peru ¿ñee guyuube nayecheʼ pur guiráʼ ni bíʼnibe la? Laabe bizeetebe ni lu textu ni cadúʼndanu yannadxí riʼ. ¿Ñee zúniluʼ stipa pur guiziidiluʼ xiixa de ni bizaaca Salomón la? Nuu binni riziidiʼ guni ni jneza dede ora maʼ biʼniʼ cometer ti error ne ora maʼ gucaná. Qué racalaʼdxiʼ Jiobá gacanaluʼ. Racaláʼdxibe gucaadiágaluʼ laabe ne guzuubaluʼ diidxaʼ. Peru para gúniluʼ ni la? caquiiñeʼ gápaluʼ fe, ne qué ziuu dxi gaca arrepentirluʼ pur ca decisión ni guicaaluʼ para gaca fe stiluʼ naguidxi. Ne laaca qué ziuu dxi gusiaandaʼ Jiobá guiráʼ ni huayúniluʼ pur laa, purtiʼ nadxiiluʼ laa (Heb. 6:10). Nga runi, biʼniʼ stipa para gaca fe stiluʼ naguidxi. Pa gúniluʼ ni la? zudiiluʼ cuenta para bien stiluʼ nga guiráʼ ni rinabaʼ Jiobá lii (Sal. 32:8). w18.12 22 párr. 14, 15

Ti binni espiritual napa fe Dios ne runi stipa pur guʼyaʼ ca cosa ca modo ruuyaʼ Dios ni. Rinabaʼ tu gacané laa ne nuu dispuestu chinanda ni (1 Cor. 2:12, 13). Zaca guca David. Ti biaje ora caniʼbe de amistad ni nápabe né Jiobá lu ti canción la? guniʼbe laani nga tobi de ca cosa ni rudii Jiobá laabe (Sal. 16:5). Rudiibe xquíxepeʼ pur nácabe xhamigu Jiobá Dios ne riuube gaxha de laa (Sal. 16:1). Pur nga bicaabe nabé nuube nayecheʼ. Ne zaca ni purtiʼ amistad ni gúpabe né Jiobá nga ni jma bisiecheʼ laabe (Sal. 16:9, 11). Ca ni nabani para si guiechené ni napa o guni ganar stale bueltu la? qué zanda guibánicaʼ nayecheʼ cásica bibani David (1 Tim. 6:9, 10). Pa nápaluʼ ti fe nadipaʼ Jiobá ne gúniluʼ ni nabe la? zapa xquendanabániluʼ sentidu ne zabániluʼ galán. Para gápaluʼ jma fe la? caquiiñeʼ cueeluʼ tiempu para Jiobá. ¿Ximodo zanda gúniluʼ ni yaʼ? Ra gúʼndaluʼ Stiidxabe, gúʼyaluʼ guiráʼ ni bizaʼbe ne guiníʼ íqueluʼ ca cualidad stibe, ne tobi de laani nga guendarannaxhii ni runi sentirbe pur lii (Rom. 1:20). w18.12 25 párr. 7, 8

Né ca diidxaʼ riʼ cadi caníʼ si Pablo xi caquiiñeʼ guni ca guendaxheelaʼ ca, sínuque cayábibe ca xpinni Cristu gusisácacaʼ guendaxheelaʼ. Peru ¿ñee zacá ridúʼyanu xquendaxheelanu ne xquendaxheelaʼ xcaadxi la? Pa rusisácanu guendaxheelaʼ ne runi respetarnu ni la? zusihuínninu zinándanu ejemplu stiʼ Jesús. Purtiʼ dxi gunabadiidxaʼ ca fariseu laabe pa jneza gaca divorciar binni la? guniʼbe ca diidxaʼ gudxi Jiobá primé guendaxheelaʼ guyuu ndaaniʼ Guidxilayú riʼ: «Pur nga runi zusaana hombre bixhoze ne jñaa ne zadxaaga xheelaʼ. Ne zacá zeda gaca cabe tobi si». Ne laaca guniʼbe: «Cadi indaa binni ni ma bichaaga Dios» (Mar. 10:2-12; Gén. 2:24). Nga runi, gunna dxichi Jesús Dios nga gudixe guichaganáʼ binni ne guníʼ naquiiñeʼ guibánicabe juntu para siempre. Qué ñabi diʼ Jiobá Adán ne Eva zanda gaca divorciarcaʼ para guiluxe xquendaxheelacaʼ, sínuque ni gucaláʼdxibe nga nibani Adán ne Eva juntu para siempre. w18.12 10, 11 párr. 2-4

Ora rizíʼdinu cani dxandíʼ rusiidiʼ Biblia, riénenu xiñee nabé risaca nga chinándanu cani rizíʼdinu de Dios. Peru ora maʼ ziniisinu en sentidu espiritual la? rizíʼdinu ximodo riníʼ ique Dios, casi xi riuuláʼdxibe ne xi qué riuuláʼdxibe ne ximodo ruuyabe caadxi cosa. Ne ora rizíʼdinu guiníʼ íquenu casi riníʼ ique Jiobá rudiʼnu lugar gacané modo riníʼ íquebe laanu lu guiráʼ ni gúninu. Neca riuuláʼdxinu guizíʼdinu guiníʼ íquenu casi riníʼ íquebe la? nuu biaje raca ni nagana para laanu purtiʼ imperfectu laanu. Guzéʼtenu ti ejemplu, zándaca raca nagana para laanu guiénenu ximodo ruuyaʼ Dios guni practicar binni inmoralidad sexual, gachelú gapa bueltu, guni predicar ne modo iquiiñeʼ rini. ¿Xi naquiiñeʼ gúninu para cadi gusaana de guiníʼ íquenu casi riníʼ ique Dios yaʼ? Naquiiñeʼ guni estudiarnu Biblia, guni meditarnu ni ná ni ne gúninu stipa pur guiníʼ íquenu modo riníʼ ique Jiobá. w18.11 23, 24 párr. 2-4

Nabé nagana ca dxi bibani Habacuc. Guyuube triste purtiʼ guizáʼ malu guca ca binni que. ¿Ñee ziuu dxi gusaana ca binni que de gúnicaʼ cosa malu la? ¿Xiñee qué huayuni Jiobá gastiʼ yaʼ? Biiyaʼ profeta riʼ guiráʼ injusticia biʼniʼ ca israelita ne laaca biiyabe modo ruquichinacaʼ binni, nga runi biʼniʼ sentirbe qué zanda gúnibe gastiʼ. Órapeʼ cadiʼdiʼ Habacuc lu guendanagana riʼ gunábabe Jiobá guni xiixa. Zándaca bizulú guníʼ íquebe qué rizaalaʼdxiʼ Jiobá ni cazaaca que ne candaa para guni xiixa. ¿Ñee huayuni sentirnu casi biʼniʼ sentir profeta stiʼ Dios riʼ la? ¿Ñee náparuʼ Habacuc confianza Jiobá ne guiráʼ ca promesa stiʼ la? Napa pue. ¿Xiñee nánnanu ni yaʼ? Purtiʼ qué ñebe ra nuu sti binni para gacané laabe, sínuque Jiobá nga gúdxibe guiráʼ ni riguu xizaa laabe ne nga rusihuinni qué ñaca desesperarbe. Neca guyuube xizaa purtiʼ caʼruʼ guiénebe xiñee qué huayuni Jiobá xiixa ne xiiñeʼ cudii lugar gacanabe. w18.11 14 párr. 4, 5

Dxi biʼniʼ invitar Jesús Pedro ne Andrés para guyúbicaʼ binni cásica ruyúbicaʼ benda la? nagueendaca bisaanacaʼ tarraya sticaʼ ne zinándacaʼ laabe (Mat. 4:18-20). Peru cadi guiráʼ binni ni guiziidiʼ cani dxandíʼ rusiidiʼ Biblia caquiiñeʼ gusaanacaʼ dxiiñaʼ sticaʼ, purtiʼ caquiiñeʼ gúnicaʼ dxiiñaʼ para gudiicaʼ ni caquiiñeʼ familia sticaʼ (1 Tim. 5:8). Peru ora riziidiʼ tuuxa ni dxandíʼ zándaca guchaa modo ruuyaʼ ca cosa material ne gudii cuenta xii nga jma risaca lu xquendanabani. Guizáʼ riuulaʼdxiʼ María quiteʼ golf, ne gupa meta gaca ti jugadora profesional ne guni ganar stale bueltu. Peru ti tiempu despué de bireebe de universidad la? bizulú biʼniʼ estudiarbe Biblia. Nabé riuuláʼdxibe ni caziidibe que ne pabiáʼ racané ni laabe lu xquendanabánibe. Biénebe qué zanda gápabe cosa espiritual ne gápacabe cosa material (Mat. 6:24). Ngue runi bisaanabe ni cá íquebe gúnibe que, gácabe ti golfista profesional. Tiempu riʼ precursora María ne guniʼbe jma nayecheʼ nabánibe ne maʼ napa xquendanabánibe sentidu. w18.11 5 párr. 9, 10

Dxi napa Jesús 30 iza, bisaana dxiiñaʼ de carpinteru para guni predicar stiidxaʼ Reinu. Gúnnabe ngue nga dxiiñaʼ ni jma risaca naquiiñeʼ gúnibe, ngue runi guniʼbe biseendaʼ Dios laabe lu Guidxilayú riʼ para gúnibe dxiiñaʼ riʼ (Mat. 20:28; Luc. 3:23; 4:43). Ni jma gucuá íquebe gúnibe lu xquendanabánibe nga guni predicarbe Stiidxaʼ Dios ne gucaláʼdxibe laaca zaqueca ñuni xcaadxi binni (Mat. 9:35-38). Cadi carpinteru guiranu, peru nácanu ministru ni rusiidiʼ stiidxaʼ Dios. Guizáʼ risaca dxiiñaʼ riʼ, dede Dios runi ni. Ne Biblia peʼ ná tobi si rúninenu Dios dxiiñaʼ (1 Cor. 3:9; 2 Cor. 6:4). Nánnanu dxandíʼ guiráʼ ni rusiidiʼ stiidxaʼ Dios (Sal. 119:159, 160). Nga runi caquiiñeʼ guizíʼdinu iquiiñenu stiidxabe jneza ora guni predicarnu (2 Tim. 2:15). Cumu Biblia nga herramienta jma risaca ni riquiiñenu para gusíʼdinu ni dxandíʼ de Jiobá, Jesús ne de Reinu la? caquiiñeʼ guiziidiʼ chaahuinu iquiiñenu ni jma jneza. w18.10 11 párr. 1, 2

Ora rinanda ti hermanu ni maʼ bichaganáʼ ejemplu stiʼ xaíque stiʼ, Jesucristu la? racané ni para gapa xheelaʼ stale respetu laa (Efes. 5:22-25, 33). Ora runi ti hermanu ndiʼ la? riene xheelabe laabe. Ora rienesaa ti hombre ne ti gunaa ni maʼ bichaganáʼ la? reeda gácacaʼ ti ejemplu galán para xiiñicaʼ. Peru laaca nápacabe responsabilidad de gusiidicabe xiiñicabe guiénecaʼ xcaadxi. Ti cosa ni zanda gúnicabe nga gábicabe laacaʼ cadi guxooñecaʼ ndaaniʼ Yoo stiʼ Reinu ne ora gaca ti reunión social la? caquiiñeʼ gudiicaʼ lugar guicaa ca hermanu ni maʼ huaniisi guendaró primeru. Pa ti hombrehuiiniʼ guni xiixa pur laanu, casi pa bixhélebe puertaʼ para tídinu caquiiñeʼ guni felicitarnu laabe. Pa gúninu ni la? zacané ni laabe ne qué ziuu dxi guiaandaʼ laabe «jma nayeche ni rudii que ni rica». w18.09 29 párr. 5, 6

Modo cayuni dirigir Rey Jesucristu laanu tiempu riʼ, zacané ni laanu yanna ne lu ca dxi ni zeeda ca. Nga runi riéchenu stale ora riníʼ íquenu xi guiráʼ ribeendunu ora rinándanu ca cambiu ni maʼ guyuu ndaaniʼ xquidxi Dios. ¿Xiñee qué gúninu ndiʼ? Lu stiʼ adoración en familia ni gápanu, guzéʼtenu xi guirá cambiu maʼ guca lu ca reunión stinu, modo runi predicarnu ne guininu ximodo huayacané cani laanu. Pa gúninu ni la? zaguu ni gana laanu. Pa gudiʼnu cuenta zabeendunu stale cosa galán ra chinándanu ni gabi organización stiʼ Jiobá laanu la? zuzúʼbanu diidxaʼ ne zúninu ni né guendanayecheʼ. Guzéʼtenu ti ejemplu, nuunu nayecheʼ yanna riʼ purtiʼ cayuni ahorrar organización stiʼ Jiobá stale bueltu purtiʼ maʼ qué raca imprimir stale publicación. Ne pur riquiiñecabe ca tecnología jma nacubi nuu yanna riʼ la? jma randa rindá stiidxaʼ Dios ra nuu stale binni. Nga runi iquiiñenu ca publicación ni nuu lu formatu electrónicu ne iquiiñenu ca archivu multimedia. Pa gúninu ndiʼ la? zinándanu ejemplu stiʼ Jesús purtiʼ laa jneza modo riquiiñeʼ ca recursu ni napa organización. Pa gúninu ni gabi Cristu laanu de guidubi ladxidoʼno la? zaguidxi fe stinu ne ziuʼnu tobi si né ca hermanu stinu. w18.10 25, 26 párr. 17-19

Pa gápanu cariñu ca hermanu stinu cásica runi Jiobá ni la? zanda iquiiñeʼ Jiobá laanu para guicabi oración stiʼ tuuxa ni cayacaná (2 Cor. 1:3-6). Peru cadi cuézanu gaca ca hermanu stinu perfectu. Pa cuézanu gaca ca hermanu stinu perfectu ne cadi gucheecaʼ la? zándaca guniná ni laanu (Ecl. 7:21, 22). Cadi guiaandaʼ laanu riene Jiobá laanu. Pa chinándanu ejemplu stibe la? ziuʼnu listu para guni huantarnu ni guni xcaadxi laanu purtiʼ imperfectu laacaʼ (Efes. 4:2, 32). Cadi guininu xiixa ni gucaa ca hermanu guiníʼ íquecaʼ qué risaca ni rúnicaʼ o guchaaganu ni rúnicaʼ né ni runi xcaadxi purtiʼ zaguu ni laacabe triste. Lugar de nga la? guni felicitarnu laacabe pur ni rúnicabe. Pa gúninu ni la? zaguu ni gana laacabe ne zacané ni laacabe gúnicabe ni ná Jiobá né guendanayecheʼ (Gál. 6:4). w18.09 16 párr. 16, 17

Casi bisiene Jesús, ora ruzúʼbanu stiidxaʼ Dios la? cadoʼno guendaró espiritual. ¿Ximodo yaʼ? Ora guidoʼno ti guendaró nanixe la? ridxátipa ladxidoʼno ne runi sentirnu nayecheʼ. Zacaca nga ora rúninu ni ná Jiobá, raca fe stinu jma naguidxi ne ridxátipa ladxidoʼno. Ora rúninu ni rusiidiʼ Jiobá laanu la? racané ni laanu gácanu ti binni nuu xpiaaniʼ (Sant. 3:13). Ne stale ni zabeendunu pa gúninu ni. Biblia ná gastiʼ qué zanda guchaaganu guendanuuxpiaaniʼ purtiʼ laani «zeeda gaca ni casi ti yaga ni rudii guendanabani cani napa ni, ne ca binni ni qué rundaa ni ribánicaʼ nayecheʼ» (Prov. 3:13-18). Ti biaje gudxi Jesús ca discípulo stiʼ: «Pa nánnatu ca cosa riʼ ne gúnitu cani la? ziuutu nayecheʼ» (Juan 13:17, TNM). Para guibani ca apóstol que nayecheʼ la? caquiiñeʼ guzuubacaʼ stiidxaʼ Jesús. Ne zaqué bíʼnicabe ni. Yenándacabe ejemplu stiʼ Jesús ne bíʼnicabe stipa gúnicabe guiráʼ ni biʼniʼ mandar laacabe lu xquendanabánicabe. w18.09 4 párr. 4, 5

Neca Adán ne Eva si nga guyuu ndaaniʼ jardín de Edén que la? ni biʼniʼ mandar Jiobá laacabe gúnicabe que naquiiñeʼ nucaa ni laacabe niníʼ íquecabe xii nga jma galán para ca binni ni gueeda despué. Guluu Dios ndaayaʼ laacabe ne gudxi laacabe guidálecabe, ne guchácabe Guidxilayú riʼ de xiiñicabe ne gápacabe ni (Gén. 1:28). Cásica rizaalaʼdxiʼ Jiobá guiráʼ ni bizáʼ la? laacabe laaca naquiiñeʼ nizaaláʼdxicabe ñacanécabe para nibani ca binni ni gueeda despué nayecheʼ. Para nibani guirácabe nayecheʼ la? naquiiñeʼ ñúnicabe guidubi Guidxilayú riʼ ti paraísu. Ne para ñanda ñaca ni la? naquiiñeʼ ñúnicabe dxiiñaʼ juntu casi ti familia. Ra ñuni guiráʼ binni perfectu que guidubi Guidxilayú riʼ ti paraísu la? ñacanécabe para ñaca ni naguixhe ique Jiobá ne zacá ñuucabe lu guendariziilaʼdxiʼ stiʼ (Heb. 4:11). ¿Ñee ruxuíʼlunu pabiáʼ nayecheʼ nibánicabe la? Guizáʼ niguu Jiobá ndaayaʼ laacabe, purtiʼ zacá nusihuínnicabe riuuláʼdxicabe gudiicabe de ni nápacabe ne rizaaláʼdxicabe xcaadxi binni. w18.08 18 párr. 2; 19, 20 párr. 8, 9

¿Xi zanda gúninu pa ugaanicabe donda íquenu de xiixa cosa ni cadi dxandíʼ yaʼ? Ngapeʼ nga ni bizaaca Jesús ne Juan Bautista (Mat. 11:18, 19). ¿Xi biʼniʼ Jesús yaʼ? Lugar de niquiiñebe stale tiempu para nusiénebe cadi dxandíʼ guiráʼ ni caníʼcabe de laabe la? guluube gana ca binni que gúʼyacaʼ ni rúnibe ne ni rusiidibe. Ne guniʼbe, «pur ni runi binni rihuinni tu laa» (Mat. 11:19). Ni biʼniʼ Jesús riʼ, rusiidiʼ ni laanu ti cosa nabé risaca. Zándaca ziuu ora zaníʼ binni cosa ni cadi dxandíʼ de laanu ne pur nga guiaananu mal. ¿Xi zanda gúninu yaʼ? Ni jma galán gúninu nga guibáninu jneza ne zacá qué zuni cré xcaadxi pa guiníʼcabe mal de laanu. Casi bidúʼyanu ca, ejemplu stiʼ Jesús rusiidiʼ ni laanu pa guibáninu casi naquiiñeʼ guibani ti xpinni Cristu, guirutiʼ zuni cré pa guiníʼcabe xiixa ni cadi dxandíʼ de laanu. w18.08 6 párr. 11-13

Ca relatu ni zeeda lu Biblia ni caníʼ qué nuzuubaʼ Caín, Salomón ne ca israelita diidxaʼ ruzeeteʼ ni nuu ti cosa ni ñanda ñúnicabe. Gúpacabe oportunidad de ñaca arrepentírcabe ne nuchaacabe modo laacabe (Hech. 3:19). Ndiʼ rusihuinni ribeza Jiobá guchaa binni ni maʼ bichee ne guni adorar laabe sti biaje. Cadi guiaandaʼ laanu biʼniʼ perdonarbe Aarón. Tiempu riʼ, riquiiñeʼ Jiobá ca relatu ni zeeda lu Biblia, ca publicación o conseju ni gudii tuuxa hermanu laanu para quixhená laanu. Pa gucaʼdiáganu ora quixhená Jiobá laanu la? zanda chuʼnu seguru ziabe laanu. Nachaʼhuiʼ Jiobá ne pur nga racané laanu (2 Cor. 6:1). Rudiibe lugar «usaana nu irá ni bini nu dxi caʼru gunibiáʼ nu laabe, ne irá ni riulaʼdxi binni guidxilayú guni» (Tito 2:11, 12). Mientra nuunu ndaaniʼ guidxilayú malu riʼ, zadxaagalunu stale guendanagana ni zusihuinni pa dxandíʼ zuni adorarnu Dios si. Nga runi, gúninu stipa pur chuʼnu pur Jiobá, purtiʼ laasibe nga naquiiñeʼ guidxíbinu, laabe nga naquiiñeʼ gúninu ni ná ne cadi naquiiñeʼ guixélenu de laabe. w18.07 21 párr. 20, 21

¿Xi zacané laanu gúninu ni riuulaʼdxiʼ Jiobá ne cadi ni riuulaʼdxiʼ binni yaʼ? Ni zacané laanu nga cadi gusiándanu guiropaʼ cosa nabé risaca ni chiguzéʼtenu riʼ. Primé, qué rusaana Jiobá de gusisaca ca xpinni ni ruzuubaʼ diidxaʼ ( Heb. 6:10; 11:6). Rusisácabe cada tobi de ca xpínnibe, purtiʼ para laabe cadi jneza nga gusiaandabe ca xpínnibe. Rapa Jiobá ca binni ni runi jneza ne nánnabe ximodo gulabe laacaʼ de ca prueba ni cadíʼdicaʼ (Sal. 1:6; 2 Ped. 2:9). Guiropa, cadi guiaandaʼ laanu Jiobá peʼ zanda gusisaca laanu dede nuu biaje nin qué ruxuíʼlunu ximodo gúnibe ni. Qué zaguu Jiobá ndaayaʼ ca binni ni racané xcaadxi para si guʼyaʼ sti binni laa. ¿Xiñee yaʼ? Purtiʼ Jesús guníʼ ora rusisaca binni laacabe la? ngue nga premiu stícabe (Mat. 6:1-5). Peru laaca guniʼbe rusisaca Bixhózebe ni runi ca binni ni racané xcaadxi neca nuu tu laa qué rusisaca ni rúnicabe. w18.07 9 párr. 8, 10

Qué nidxela Pedro xi ñuni ne qué ñenegá xii ngue guníʼ voz que. Oraquepeʼ bedandá ca hombre ni biseendaʼ Cornelio, ne yené Pedro laacabe ra lidxi Cornelio casi gudxi espíritu santu ni laa. Ca judíu que, qué lica riuucaʼ ra lidxi ca binni ni cadi judíu. Ngue runi pa niníʼ ique Pedro cadi judíu Cornelio la? qué lica ñebe ra lidxi. Peru ¿xiñee guyebe ra lidxi Cornelio yaʼ? Pur ni bíʼyabe lu visión que ne pur ni gudxi espíritu santu laabe. Bicaadiaga si Pedro guiráʼ ni gudxi Cornelio laa la? biabe hombre riʼ ne sicaríʼ guniʼbe casi gudxi espíritu santu ni laabe: «Yanna ma nanna biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hech. 10:34, 35). Né ni bizaaca riʼ, bisiidiʼ Jiobá Pedro ti cosa nacubi. w18.08 9 párr. 3, 4

Guiranu rucáʼnanu ca cosa ni nanalaʼdxiʼ Dios. Peru nuu biaje qué ruzeeteʼ Biblia xipeʼ naquiiñeʼ gúninu ora chicaanu ti decisión. Yanna, ¿ximodo zanda gánnanu xi racalaʼdxiʼ Jiobá gúninu yaʼ? Pa gusiidiʼ chaahuinu conciencia stinu ne ni rusiidiʼ Biblia zacané ni laanu guicaanu ti decisión jneza. Nadxii Jiobá laanu, nga runi rudiibe laanu principiu para gacané conciencia stinu ora chicaanu ti decisión. Laapebe cayabibe laanu ca diidxaʼ riʼ: «Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ» (Is. 48:17, 18). Ora guiníʼ íquenu ni ná ca principiu ni zeeda lu Biblia ne gudiʼnu lugar chindá cani ndaaniʼ ladxidoʼno la? cusíʼdinu conciencia stinu ne zuchaʼnu modo riníʼ íquenu. Ne ra gúninu ni zacané ni laanu guicaanu decisión jneza. Ti principiu nga xiixa ni racané laanu guiníʼ íquenu jneza ne racané ni laanu guicaanu decisión jneza. Pa guiénenu ni ná ca principiu ca zacané cani laanu guiníʼ íquenu casi riníʼ ique Jiobá ne ziénenu xiñee riguíxhebe ley. w18.06 17 5; 18 párr. 8-10

Biquiiñeʼ «ca judíu ni nuu pur Herodes» ti trampa para gusábacaʼ Jesús. Pa niniʼbe mal de impuestu ni riguixe binni la? ñándaca niníʼcabe cucaalube Imperiu stiʼ Roma, peru pa niniʼbe caquiiñeʼ quixe binni impuestu la? ñándaca nusaana ca xpínnibe laabe. Para gusihuinni Jesús naca neutral la? guníʼ ique ximodo guicabi laacabe. Nanna Jesús stale de cani ruquixe impuestu que ribáʼnacaʼ stiʼ binni. Peru qué nudiibe lugar nucaa cani laabe nusiaandabe Reinu stiʼ Dios nga ni zuni chaahuiʼ ca guendanagana que. Laanu laaca naquiiñeʼ chinándanu ejemplu bisaana Jesús. Neca ruluíʼ jneza ni cayuni xiixa partidu políticu la? cadi naquiiñeʼ guni opinarnu de laani. Lugar de guininu jneza o cadi jneza cayuni ti gobiernu o guininu mal de laacaʼ la? rúninu ni ná Reinu stiʼ Dios ne rúninu ni jneza casi rinábabe laanu (Mat. 6:33). Stale testigu stiʼ Jiobá maʼ bichaacaʼ modo laacaʼ ne maʼ qué riníʼcabe mal de ca gobiernu. w18.06 6 párr. 9-11

Cadi inmoralidad si nga biquiiñeʼ Binidxabaʼ casi trampa para bisaba ca ángel stiʼ Dios, sínuque laaca bidii stiidxabe laacaʼ zuni mandarcaʼ binni guidxilayú. Zándaca ni gucaláʼdxibe nga nucueezabe para cadi ñeeda «descendencia» ni chigueeda de «gunaa» ni biʼniʼ prometer Jiobá (Gén. 3:15). Peru bisaba Jiobá nisaguié naroʼbaʼ que ne pur ngue la? maʼ qué ñanda ñaca cani gudixhe ique Binidxabaʼ ñuni né ca demonio stiʼ. Nga runi, inmoralidad ne guyubi tobi puru para laasi la? naca ni ti trampa para laanu. Stale iza biʼniʼ ca ángel riʼ ni ná Dios ante guieegucaʼ Binidxabaʼ. Neca ti lugar galán nga ra guyuucabe, stale ángel bidiicaʼ lugar guicaa xcu deseu malu ndaaniʼ ladxidoʼcaʼ. Zaqueca nga zanda guizaacanu yanna, zándaca maʼ nápanu stale iza de cayúninu ni ná Dios ndaaniʼ organización stiʼ. Peru neca naca ni ti lugar nabé sicarú la? zanda guicaa xcu xiixa deseu malu ndaaniʼ ladxidoʼno pa qué gápanu laanu (1 Cor. 10:12). Nabé risaca guidúʼyanu xi nuu ndaaniʼ ladxidoʼno. Pa guidúʼyanu rudxíʼbanu laca laanu ne riníʼ íquenu cosa ni cadi jneza la? nagueendaca naquiiñeʼ cueenu cani (Gál. 5:26; Col. 3:5). w18.05 25 párr. 11, 12

Neca qué nucaadiaga stale de ca judíu mensaje stiʼ Reinu, qué niree Pablo gana. Gudiʼdiʼ si ti tiempu, bicaabe ti carta ra nuu ca hermanu de Roma ne bisiénebe laacaʼ ni runi sentirbe pur ca judíu, laabe guniʼbe: «De guidubi ladxiduáʼ runeʼ desear guilá ca binni Israel ne rinabaʼ Dios guni ni. Purtiʼ ruuyaʼ cayúnicabe xhiiñaʼ Dios né stale gana, peru cadi cásipeʼ modo biziidicabe ni» (Rom. 10:1, 2, TNM). Guniʼbe bíʼnibe ni de guidubi ladxidoʼbe purtiʼ dxandipeʼ biʼniʼ desearbe nilá neca caadxi de ca judíu (Rom. 11:13, 14). Laaca gunábabe Dios gacané xcaadxi judíu guicaa mensaje stiʼ Reinu. Ne bíʼnibe xhiiñaʼ Dios né stale gana. Biiyaʼ Pablo ca cosa galán napa cada binni. Laapebe biénebe ora ricá ique tobi guni xhiiñaʼ Dios de guidubi ladxidóʼ la? zucaa ni laa guni xhiiñaʼ Dios né stale gana. w18.05 13 párr. 4; 15, 16 párr. 13, 14

Guiranu naquiiñeʼ guizaaláʼdxinu ca hermanu stinu ne guidúʼyanu xi caquiiñecaʼ. Gudxi Pablo ca xpinni Cristu hebreu ca diidxaʼ riʼ: «Lacuu stipa ná tu ne ñee tu, ne lasá jneza sin iree chu tu, purti zacá zacané tu uzuhuaa chaahui stobi ni ruluíʼ chi guiaba» (Heb. 12:12, 13). Dede ca joven zanda guiniʼcaʼ diidxaʼ ni cuʼ gana ca hermanu. Laaca bidii Pablo conseju riʼ: «Pa rusieche Cristu laatu ne nuu dxí ladxidóʼ to purti nadxii laatu, ne nuu né Espíritu [...] laatu, ne nanna tu ganaxhii tu ne ilaselaʼdxi tu stobi la? lauchá ladxiduáʼ de enda nayecheʼ. Lachuu tobi si ne laganaxhii saa, lagaca tobi si lu ni quixhe tu guni tu, ne tobi si icá ique tu. Cadi guni tu xiixa para si tidi tu lú stobi, nin para chuʼ tu udxiiba laatu, sínuque cada tobi gaca nadóʼ ne usisaca stobi, ne cadi laca laa. Cadi sti si tu ma cá ique tu, sínuque laucaa ique ni caquiiñe stobi» (Filip. 2:1-4). w18.04 22 párr. 10; 23 párr. 12

Biquiiñeʼ Jiobá Jesús para cuee laanu de lu náʼ pecadu ne guendaguti para ganda iquiiñenu xquendanabáninu para gúninu ni ná Jiobá. ¿Xi caquiiñeʼ gúninu para iquiiñenu libertad ni nápanu jneza ti cadi guiábanu lu náʼ pecadu sti biaje ne gúninu guiráʼ ni cadi jneza runi binni guidxilayú yaʼ? Caquiiñeʼ quixhe íquenu gúninu jma lu xhiiñaʼ Dios (Gál. 5:16). Guidúʼyanu ejemplu stiʼ Noé ne familia stiʼ. Neca gulézacabe lade binni ni runi cosa dxabaʼ ne ni ridinde, qué nudiicabe lugar nicá xpiaʼ ne ni runi ca binni que laacabe. ¿Ximodo bíʼnicabe ni yaʼ? Jma gucuá íquecabe gúnicabe ni biʼniʼ mandar Jiobá laacabe: guzáʼcabe ti arca, guchácabe guendaró ndaaniʼ ni para laacabe ne para ca maniʼ que ne chitídxicabe ca binni que mayaca gunitilú Dios ca binni malu que. Biblia ná: «Biʼniʼ Noé iráʼ ni biʼniʼ mandar Dios laa guni. Bíʼnibe cani zaqué zaquepeʼ» (Gén. 6:22). Pur ni biʼniʼ Noé ne familia stiʼ bilacaʼ (Heb. 11:7). w18.04 10 párr. 8; 11 párr. 11, 12

Para quiteʼ Binidxabaʼ ne ca demonio «irá binni» la? cadi riquiiñesibe ca gobiernu ca, sínuque laaca riquiiñebe religión ni cadi dxandíʼ ne sistema comercial (Apoc. 12:9). Riquiiñeʼ Binidxabaʼ religión ni cadi dxandíʼ para guiníʼ cosa ni cadi dxandíʼ de Jiobá. Ni racaláʼdxibe nga pa ñanda si guiráʼ binni nucaabe nusiaandaʼ láʼ Dios (Jer. 23:26, 27). Nga runi, stale binni riníʼ runi adorar Dios, peru qué gánnacabe pa ca demonio ca nga runi adorárcabe (1 Cor. 10:20; 2 Cor. 11:13-15). Laaca riquiiñebe sistema comercial para guiniʼbe xcaadxi cosa ni cadi dxandíʼ de Jiobá. Guzéʼtenu ti ejemplu, rucaabe binni guni cré zabánicaʼ nayecheʼ pa gápacaʼ stale bueltu ne stale cosa material (Prov. 18:11). Ca binni ni runi cré ca diidxaʼ ca la? riquiiñecaʼ xquendanabánicaʼ para si gápacaʼ «bidxichi» lugar de ñúnicaʼ ni ná Jiobá (Mat. 6:24). Neca rannaxhiicabe Dios, peru cumu jma rannaxhiicabe ca cosa material ca la? rusaanacabe de gannaxhiicabe Dios (Mat. 13:22; 1 Juan 2:15, 16). w18.05 23 párr. 6, 7