Octubre

Qué zanda gánnanu xi nuu ndaaniʼ ladxidóʼ binni, peru zanda gúninu stipa pur guiénenu ni runi sentircaʼ ne ni caquiiñecaʼ (2 Cor. 11:29). Cadi casi binni guidxilayú laanu, purtiʼ ruyúbicaʼ puru si para laacaʼ, sínuque rúninu stipa pur chinándanu ca diidxaʼ ni guníʼ Pablo: «Cadi sti si tu ma cá ique tu, sínuque laucaa ique ni caquiiñe stobi» (Filip. 2:4). Ca ancianu de congregación nga ca ni jma caquiiñeʼ guni sentir ni runi sentir xcaadxi. Nánnacabe zabidxi Dios cuenta laacabe pur modo guni tratárcabe ca dendxuhuiiniʼ stiʼ ni maʼ bisaana lu nácabe (Heb. 13:17). Ne para gacanécabe ca hermanu la? caquiiñeʼ guiénecabe laacaʼ. ¿Ximodo rusihuínnicabe ni yaʼ? Ca ancianu ni riene xcaadxi nga ca ni ribee tiempu para ca hermanu stiʼ. Rinabadiidxacabe laacaʼ, rucaadiaga chaahuicabe ne rápacabe paciencia laacaʼ. Ne nabé risaca gúnicabe ndiʼ, purtiʼ zacá zanda gabi ti dendxuhuiiniʼ stiʼ Jiobá laacabe xi cayaca (Prov. 20:5). Nga runi, ora nuu ca ancianu ca dispuestu cueecaʼ tiempu para gacanecaʼ ca hermanu la? riuucaʼ tobi si, rápacaʼ jma confianza, rannaxhiisaacaʼ ne rápacaʼ ti amistad jma galán (Hech. 20:37). w19.03 17 párr. 14-17

Gaca ti binni agradecidu zeeda gaca ni casi ti guendaró nanixe, ne jma nanixe ni ora ridóʼnenu ni xcaadxi binni. Nga runi ora runi sentirnu naca xcaadxi binni agradecidu né laanu riuʼnu nayecheʼ. Peru ora rusihuínninu nácanu agradecidu racané ni para chuʼ xcaadxi binni nayecheʼ. ¿Xiñee yaʼ? Purtiʼ rudiicabe cuenta racanécabe laanu ora rudiicabe o rúnicabe xiixa pur laanu. Ne pur nga jma riguiidxi amistad stinu né laacabe. Nabé risaca gudiʼnu xquíxepeʼ binni casi riete ni lu textu ni cadúʼndanu yannadxí. Nabé sicarú nihuinni ti manzana de oro pa ñuni adornarnu ni né plata ne nabé nisaca ni. ¿Cadi dxandíʼ ñéchenu pa nudiicabe laanu ti regalu zacá la? Zacaca nga ora rábinu tuuxa caadxi diidxaʼ para gudiʼnu xquíxepeʼ laa, zeeda gaca ni ti cosa nabé risaca, casi ora nudiʼnu laa ti manzana de oro. Ne cásica ñapa dxiichiʼ tuuxa ti manzana de oro stale tiempu la? zacaca zapa dxiichiʼ tuuxa ca diidxaʼ ni gábinu laa guidubi xquendanabani ora gudiʼnu xquíxepeʼ laa. w19.02 15 párr. 5, 6

Ora gudó Adán ne Eva cuananaxhi stiʼ yaga stiʼ guendananna ni jneza ne ni cadi jneza, bisihuínnicaʼ qué gápacaʼ confianza Jiobá nin ca ley stibe. Ne maʼ laacaʼ gudíxhecaʼ xii nga ni jneza ne ni cadi jneza. Peru, ¿xi bizaaca pur decisión ni gucuaacabe que yaʼ? Biníticabe amistad stícabe nápacabe né Jiobá ne laaca biníticabe oportunidad de nibánicabe sin qué ñuu dxi ñáticabe. Ne bitiidicabe pecadu ne guendaguti ca descendiente stícabe (Rom. 5:12). Gadxé si ni biʼniʼ Adán ne Eva de ni biʼniʼ eunuco etíope que dxi biʼniʼ predicar Felipe laa. Cumu biʼniʼ agradecer hombre riʼ ni biʼniʼ Jiobá ne Jesús pur laa la? oraqueca guyuunisa (Hech. 8:34-38). Yanna laanu ora rudiʼnu guendanabani stinu Jiobá, ne riúʼnisanu cásica biʼniʼ etíope que la? rusihuínninu runi agradecernu Jiobá ne Jesús pur ca ni maʼ bíʼnicaʼ pur laanu. Ne laaca rusihuínninu nápanu confianza Jiobá ne nanna dxíchinu laasibe nánnabe xii nga ni jneza ne xii nga ni cadi jneza. w19.03 2 párr. 1, 2

Gaca tuuxa ti binni íntegro nga gannaxhii Jiobá ne qué chuʼ dxi gusaana de guni adorar laabe ne guni ni riuuláʼdxibe siempre. Lu Biblia, diidxaʼ hebreu ni raca traducir «integridad» riquiiñeʼ ni ora caníʼcabe de ti cosa completu, enteru o nazaaca. Guzéʼtenu ti ejemplu. Ora rudii binni maniʼ casi sacrificiu para Jiobá dxiqué la? naquiiñeʼ gudiicaʼ tobi ni nazaaca (Lev. 22:21, 22). Qué zanda diʼ gudii ca xpinni Dios que ti maniʼ ni cayaadxaʼ ti chú ñee, ti diaga, ti guielú, o tobi ni huará. Para Jiobá la? nabé risaca gaca maniʼ que completu ne nazaaca (Mal. 1:6-9). ¿Xiñee racalaʼdxiʼ Jiobá gaca guiráʼ ni gudiʼnu laa completu yaʼ? Guzéʼtenu ti ejemplu ni zacané laanu guiénenu ni. Ora rizinu ti cuananaxhi, qué racaláʼdxinu guicaanu tobi ni maʼ napa huecu o ni cayaadxaʼ ti pedazu. Racaláʼdxinu guicaanu tobi enteru ne nazaaca. Zacaca nga rizaaca né guendarannaxhii ne lealtad ni nápanu Jiobá. Racaláʼdxibe gaca ni completu o íntegro. w19.02 2 párr. 3

Para gápanu ladxidoʼno la? naquiiñeʼ gudiʼnu lugar chuʼ cosa ni dxandíʼ zacané laanu ndaaniʼ ni ne cadi naquiiñeʼ gudiʼnu lugar chuʼ cosa malu. Ndaaniʼ ca guidxi ni napa muru para cadi chuʼ ca enemigu. Ca hombre rapa ra puertaʼ que ruseeguʼ cani para cadi chuʼ ca enemigu sticaʼ. Peru nuu ora ruxhélecabe ca puertaʼ que para chuʼ guendaró o xcaadxi cosa ni caquiiñecaʼ. Pa qué gúnicabe ni la? zati binni xquídxicabe de hambre. Zacaca naquiiñeʼ gúninu né ladxidoʼno, caquiiñeʼ guxhélenu ni gatigá para chuʼ ca cosa galán ni rusiidiʼ Jiobá laanu. Lu Biblia si zanda guizíʼdinu ximodo riníʼ ique Dios. Nga runi, ora ridúʼndanu ni, rudiʼnu lugar gacané modo riníʼ ique Dios laanu lu ni riníʼ íquenu, ni runi sentirnu ne ni rúninu. Para cueendunu stale cosa galán ora guidúʼndanu Biblia, caquiiñeʼ gúninu chupa cosa. Primé, nabé risaca guni orarnu, purtiʼ racaneni laanu guʼyaʼ chaahuinu “ca cosa sicarú” zeeda lu Stiidxabe (Sal. 119:18). Guiropa, caquiiñeʼ guni meditarnu lu ni ridúʼndanu. Ora rúninu ndiʼ la? rindá Stiidxaʼ Dios dede ndaaniʼ ladxidoʼno ne rannaxhiinu modo riníʼ ique Jiobá (Prov. 4:20-22). w19.01 18 párr. 14, 15

Nanna Jiobá gadxé gadxé capacidad ne circunstancia napa cada tobi de laanu ne guizáʼ rusisácabe ca sacrificiu ni rúninu. Guiníʼ íquenu ca tipu sacrificiu gucuaabe stiʼ ca israelita. Ca ni napa bueltu bidiicaʼ laabe ti dendxuʼ o ti chiva. Peru ca binni pobre la? zanda gudiicaʼ chupa guuguhuiiniʼ o chupa pichón. Ne pa nuu tu laa qué gapa nin para gudii chupa manihuiiniʼ la? ricaa Jiobá jma de chupa litru harina de ni jma galán (Lev. 5:7, 11). Neca huaxiéʼ risaca harina que la? nabé bisisaca Jiobá sacrificiu que, peru naquiiñeʼ gaca ni harina de ni jma galán. Zacaca riníʼ ique Dios stinu dede yanna. Riénebe laanu ora runi comentarnu ne qué ribézabe guininu galán cásica guníʼ Apolos o chuʼnu seguru ora maʼ caninu cásica guníʼ Pablo (Hech. 18:24; 26:28). Ni rinábabe laanu nga gudiʼnu de ni jma galán nápanu. Guietenaláʼdxinu xa viuda pobre ni bisaba chupa monedahuiiniʼ ndaaniʼ caja ra riaba bueltu que. Guyuulaʼdxiʼ Jiobá ni bíʼnibe purtiʼ bidiibe guiráʼ ni nápabe (Luc. 21:1-4). w19.01 8, 9 párr. 3, 5

Cadi guiaandaʼ laanu zacananalaʼdxiʼ binni laanu. Ne Jesús peʼ gudxi ca discípulo stiʼ guizáʼ zazanándacabe laacaʼ lu ca últimu dxi (Mat. 24:9; Juan 15:20). Cayabi profecía stiʼ Isaías laanu cadi zacananalaʼdxiʼ si ca enemigu stinu laanu sínuque zuyúbicaʼ modo guninacaʼ laanu. Zándaca zusiguii ca enemigu stinu para gusihuínnicaʼ dxandíʼ ni caniʼcaʼ, zaniʼcaʼ xiixa ni cadi dxandíʼ ne zazanándacaʼ laanu dede guninacaʼ laanu (Mat. 5:11). Qué zucueeza diʼ Jiobá ca enemigu stinu para cadi gucaalucaʼ laanu (Efes. 6:12; Apoc. 12:17). Peru cadi naquiiñeʼ guidxíbinu. Maʼ guníʼ Jiobá intiica guiibaʼ iquiiñeʼ ca enemigu para gucaalucaʼ laanu, «qué zabeendunedícabe ni gastiʼ» (Is. 54:17). Purtiʼ cásica rapa ti barda ti binni ora cundubi ti bi nadipaʼ la? zacaca rapa Jiobá laanu «ora rucaalú ca binni malu» laanu (Is. 25:4, 5). Ne zedandá dxi ra maʼ qué zuniná ca enemigu stinu laanu (Is. 65:17). Guiráʼ ca enemigu stiʼ xquidxi Dios «qué zuni ganarcaʼ ne zanitilucaʼ» (Is. 41:11, 12). w19.01 6, 7 párr. 13-16

Joven caʼ, riuulaʼdxiʼ Jiobá gaca binni libre, nga runi bizaʼbe laanu para chuuláʼdxinu gácanu libre. Peru laaca racaláʼdxibe iquiiñenu libertad ca jneza, purtiʼ zápani laanu. Zándaca runibiaʼluʼ xcaadxi ni ruuyaʼ pornografía, rapa relación sexual, runi practicar xiixa deporte peligroso, raca drogar o rixudxi. Zándaca ora cayúnicabe ca cosa ni bizéʼtenu riʼ riuucabe nayecheʼ o runi sentírcabe placer ti ratu si. Peru guizáʼ naná riguixhecabe ni purtiʼ rápacabe viciu, raca huarácabe ne dede ráticabe (Gál. 6:7, 8). Riníʼ íquecabe nácacabe libre peru caguítecabe laca laacabe (Tito 3:3). Peru pa gúninu ni ná Jiobá la? zabeendunu ni galán para laanu, ziuʼnu nazaaca ne dxandipeʼ zácanu libre (Sal. 19:7-11). Riquiiñenu libertad stinu jneza ora rinándanu ni ná ca principiu ne ca ley ni rudii Dios laanu lu ca ni gúninu. Pa gúniluʼ ni la? zuluiʼluʼ Jiobá, bixhózeluʼ ne jñaaluʼ zándaruʼ gudiicaʼ libertad lii (Rom. 8:21). w18.12 22, 23 párr. 16, 17

Pur bichee Adán la? bichaa stale cosa. Tobi de laani nga guyuu guendaguti, ne zuniná ni ca guendaxheelaʼ. Ne apóstol Pablo bisiene de laani dxi gúdxibe ca xpinni Cristu de primé siglu cadi chinándacaʼ Ley stiʼ Moisés. Laaca gúdxibe laacaʼ ora gati xheelaʼ binni nga riluxe guendaxheelaʼ sticaʼ, ne hombre o gunaa ni nabani ca nuu libre para guichaganáʼ sti biaje (Rom. 7:1-3). Lu Ley bidii Dios guidxi Israel zeeda caadxi cosa ni cusiene de guendaxheelaʼ. Guidúʼyanu tobi de laacani. Lu Ley que ná zanda gapa ti hombre jma de ti xheelaʼ, práctica riʼ runibiáʼcabe ni casi poligamia, ne maca runi practicar binni ni dede ante gudii Jiobá ca Ley que ca israelita. Peru gucané Ley que ca gunaa ne ca baʼduhuiiniʼ para cadi guniná ca hombre laacaʼ. Guzéʼtenu ti ejemplu, pa guichaganáʼ ti hombre israelita ti esclava ne despué gápabe sti xheelabe la? caquiiñeruʼ gudiibe guiráʼ ni iquiiñeʼ primé xheelabe cásica bíʼnibe ni ante, tantu en sentidu material, emocional ne sexual. Dios gudxi ca hombre que gápacaʼ ca gunaa (Éx. 21:9, 10). Maʼ qué rinándanu Ley bidii Dios ca israelita, peru racá ridúʼyanu pabiáʼ rusisacaʼ Dios guendaxheelaʼ. Ne ndiʼ racané laanu guni respetarnu guendaxheelaʼ. w18.12 10 párr. 3; 11 párr. 5, 6

Bisaana Habacuc guiráʼ ni riguu xizaa laa lu náʼ Jiobá. Peru zándaca gunabadiidxabe xi zándaca guicabi Jiobá laabe. Cumu naca Jiobá casi ti padre ni riene ne riuu lugar stiʼ ca xiiñiʼ la? qué ñuni castigarbe Habacuc pur ni guníʼ. Gúnnabe guníʼ Habacuc zacá purtiʼ guizáʼ cayacaná. Ca diidxaʼ ni gudxi Jiobá laabe zándaca guníʼ ni pur ni chiguizaaca ca israelita ni qué nuzuubaʼ diidxaʼ. Ne zándaca Habacuc nga primé binni ni gudxi Jiobá laa zanitilú ca binni malu de tiempu que. Bisiene Jiobá Habacuc maʼ nuu listu para guni xiixa, ngue runi maʼ cadi candaa zuni castigarbe ca binni malu que. Ora guníʼ Jiobá «ca dxi nabánitu», caniʼbe zedanebe juiciu stibe luguiáʼ ca binni ni nabani ca dxi stiʼ Habacuc. Peru ¿ñee ndiʼ nga respuesta ni cabeza Habacuc gudii Jiobá laa la? Coʼ. Ca diidxaʼ ni guníʼ Jiobá riʼ riníʼ ni jmaruʼ si zacaná guidubi guidxi Judá. w18.11 15 párr. 7, 8

¿Ximodo ridúʼyanu ca binni ni qué runibiáʼ Jiobá yaʼ? Nánnanu guyé apóstol Pablo ndaaniʼ ca sinagoga que yeyubi ca binni ni maca nanna xiixa de Dios. Peru cadi biʼniʼ predicársibe ca judíu, sínuque né ca binni ni runi adorar xcaadxi Dios. Guzéʼtenu ti ejemplu, primé viaje guyé Pablo de misioneru, guníʼ ique ca binni ni nuu lu región stiʼ Licaonia laabe ne Bernabé nga dios Zeus ne Hermes. ¿Ñee guyuulaʼdxiʼ Pablo ne Bernabé gusisácacabe laacaʼ zaqué la? ¿Ñee guníʼ íquecabe ngue nga oportunidad ni nápacabe para guiziiláʼdxicabe purtiʼ ndaaniʼ guiropa guidxi ni guyécabe ante guzananda binni laacabe la? ¿Ñee guníʼ íquecabe pa gusisaca binni laacabe zacané ni para guni predicárcabe jma la? Coʼ, purtiʼ oraqueca guchézacabe xhábacabe ne gúdxicabe ca binni que: «¿Xiñee cayúnitu ca cosa riʼ pue? Laca binni casi laatu nga laadu ne laca runi sufrirdu cásica laatu» (Hech. 14:8-15, TNM). w18.09 5 párr. 8, 9

Pa racaláʼdxinu guizíʼdinu ni dxandíʼ ne guibáninu modo ná Dios la? caquiiñeʼ chuʼnu dispuestu guchaʼnu modo riníʼ íquenu ne ni rúninu. Para ganda gúninu ni la? zanda chinándanu conseju ni bidii Pedro: «Lagaca casi baʼdu ni ruzuuba diidxaʼ, ne ma cadi guni tu ni na ique tu casi biʼni tu dxi caʼru gunibiáʼ tu Dios». Ne laaca guniʼbe: «Lu guiráʼ ni gúnitu la? lagusihuinni nácatu santo, cásica naca Dios ni gulí laatu Santo» (1 Ped. 1:14, 15, TNM). Guzéʼtenu ti ejemplu, ndaaniʼ guidxi Corinto, ti lugar ra biʼniʼ binni puru cosa malu bizulú biziidiʼ binni cani dxandíʼ rusiidiʼ Stiidxaʼ Dios ne bichaacaʼ modo nabánicaʼ. Zacaca tiempu nabáninu riʼ, stale binni maʼ bichaa modo laa para ganda guiziidiʼ cani dxandíʼ rusiidiʼ Biblia. Laaca gudxi Pedro ca primé xpinni Cristu ca diidxaʼ riʼ: «Ma biaʼ cati de guni tu irá ni runi cani qué runibiáʼ Dios. Chiqué uyuu né tu laacabe tobi si lu irá viciu. Ucuá ique tu ni cadi jneza, uxudxi tu, biʼni tu saa para xhudxi si tu, ne yenanda tu ca bidóʼ, neca nexhe cadi chi nanda tu laacaʼ» (1 Ped. 4:3). w18.11 6 párr. 13

¿Ximodo zanda guidxélanu ca binni ni «maʼ nuu para guicaa guendanabani ni qué zaluxe» yaʼ? Ti modo zanda gúninu ni nga guni predicarnu cásica bíʼnicabe ni lu primé siglu. Nga runi caquiiñeʼ chinándanu mandatu ni bidii Jesús laanu riʼ: «Intiica guidxi o guidxihuiiniʼ chuʼtu, laguyubi tu laa runi merecer guicaa ca diidxaʼ zinetu» (Mat. 10:11, TNM). Nanna dxíchinu qué zaná ca binni ni cadi nayá ladxidóʼ, ca orgulloso ne cani qué riuulaʼdxiʼ guiziidiʼ de Dios guicaacaʼ mensaje ni zinenu. Nga runi ruyúbinu ca binni humilde, cani nayá ladxidóʼ, ne cani canayubi guiziidiʼ ni dxandíʼ. Guzéʼtenu ti ejemplu. Dxi biʼniʼ Jesús dxiiñaʼ de carpinteru la? nuunu seguru ruyúbibe yaga ni zanda iquiiñebe para ganda guzaʼbe mueble, puertaʼ ne ayubu. Ne ora maʼ bidxélabe ni la? riquiiñebe ca herramienta ni nápabe para guzaʼbe ca cosa riʼ. Zacagá nga naquiiñeʼ gúninu: primeru naquiiñeʼ guyúbinu binni ni nachaʼhuiʼ ladxidóʼ ne ora maʼ bidxélanu laacabe la? iquiiñenu ca herramienta ni nápanu para gacanenu laacabe gácacabe discípulo stiʼ Cristu (Mat. 28:19, 20). w18.10 12 párr. 3, 4

Yanna guininu de ejemplu stiʼ Felipe, xa evangelizador que, laa bisaana ti ejemplu galán para laanu purtiʼ bisihuínnibe zanda gúninu jma lu xhiiñaʼ Dios neca guchaa xquendanabáninu. Gupa Felipe ti responsabilidad ndaaniʼ congregación ni guyuu Jerusalén (Hech. 6:1-6). Ne despué de biiticabe Esteban bizulú guzanándacabe ca xpinni Cristu. Ora biʼyaʼ Felipe cuxooñeʼ caadxi xpinni Cristu de Jerusalén la? qué niguiidxinabe. Yeguni predicarbe ndaaniʼ guidxi Samaria, ti guidxi ra deruʼ careeche mensaje stiʼ Reinu (Mat. 10:5; Hech. 8:1). Guyuu Felipe dispuestu cheʼ ratiica chiné espíritu stiʼ Dios laa. Ngue runi biquiiñeʼ Jiobá laabe para guni predicarbe xcaadxi lugar ra qué huayunadiaga binni stiidxaʼ Dios. Ca dxi que la? runi ca judíu menu ca samaritanu. Peru cumu galán biʼniʼ tratar Felipe ca samaritanu la? nuunu seguru galán biʼniʼ sentírcabe. Nga runi que ridxagayaanu xiñee bicaadiaga ca binni que laabe (Hech. 8:6-8). Qué nusaana Felipe de ñuni jma lu xhiiñaʼ Dios, ne pur nga la? guizáʼ guluu Jiobá ndaayaʼ laabe ne familia stibe (Hech. 21:8, 9). w18.10 30 párr. 14-16

Ti biaje dxi nuu Jesús lu región stiʼ Decápolis «bedané cabe ti hombre nacuaata diaga ne napaapa ruaa ra nuu be» (Mar. 7:31-35). Óraque gucuaabe hombre que «yené be laa ti ladu» ne bisiándabe laa. ¿Xiñee qué nusianda Jesús hombre riʼ nezalú guiráʼ ca binni que yaʼ? Zándaca purtiʼ bidiibe cuenta zatuilú hombre riʼ purtiʼ qué runadiaga. Laanu qué zanda gúninu milagru, peru caquiiñeʼ ne naquiiñeʼ guiduʼyaʼ chaahuinu necesidad ne cani runi sentir ca hermanu stinu. Ne ngapeʼ nga ni biʼniʼ Jesús, biénebe hombre ni qué runadiaga que. Laanu laaca caquiiñeʼ guiénenu ca hermanu ni maʼ huaniisi ne cani huará. Ca hermanu ni nuu ra congregación rúnicaʼ stipa pur gúnicaʼ jma lu xhiiñaʼ Dios, peru ni jma risaca para laanu nga gannaxhiisaanu (Juan 13:34, 35). Pa nadxiinu ca hermanu ni maʼ huaniisi ne cani huará la? zucaa ni laanu gacanenu laacabe para ganda chécabe reunión ne guni predicárcabe. Ne racanenu laacabe neca maʼ qué zanda gúnicabe biaʼ ñacaláʼdxicabe (Mat. 13:23). w18.09 29, 30 párr. 7, 8

Para Jiobá la? nabé risaca guiráʼ ca xpinni. Ne laaca risácacabe para Jesús, purtiʼ laa bidii xquendanabani pur laacabe (Gál. 2:20, TNM). Nadxiinu ca hermanu stinu ne racaláʼdxinu gápanu laacaʼ né stale cariñu. Para ganda quixhedxinu ladxidóʼ xcaadxi la? naquiiñeʼ «gúninu biaʼ gándatiʼ para chuʼnu en paz né binni ne para gacanésaanu» (Rom. 14:19, TNM). Guizáʼ maʼ racaláʼdxinu guibáninu ndaaniʼ Paraísu ra guirutiʼ zaca desanimar. Maʼ qué ziuu guendahuará, guerra, guendaguti, guirutiʼ zazananda laanu, maʼ qué zapa binni problema ndaaniʼ familia stiʼ ne guirutiʼ ziuu triste pur qué gaca xiixa ni cabeza. Tidiʼ si ti mil iza ca, guiráʼ binni guidxilayú zaca perfectu. Ca binni guidxilayú ni tidiʼ lu prueba final, zácacaʼ xiiñiʼ Dios ne zácacaʼ libre casi ca xiiñiʼ Dios (Rom. 8:21). Nga runi, cadi gusaana de gannaxhiinu ne cuʼnu gana ca hermanu stinu, purtiʼ pa gúninu ni la? zacanenu laacaʼ chuʼcaʼ ndaaniʼ guidxilayú cubi ni maʼ biʼniʼ prometer Dios laanu. w18.09 14 párr. 10; 16 párr. 18

¿Ñee cayuni estudiarnu nga ora ridúʼndanu ti luguiáʼ si ne runi subrayarnu respuesta stiʼ xiixa pregunta la? Coʼ, cadi nga diʼ nga guni estudiarnu. Ora runi estudiarnu la? riduʼya chaahuinu xi cusiidiʼ información ca laanu de Jiobá, modo riníʼ íquebe ne xi guiráʼ rúnibe. Rúninu stipa pur guiénenu xiñee rinábabe laanu gúninu xiixa cosa ne xiñee qué riuuláʼdxibe xcaadxi cosa. Ne laaca riníʼ íquenu xi caquiiñeʼ guchaʼnu lu xquendanabáninu ne modo riníʼ íquenu. Ne zándaca qué zanda diʼ gúninu cani bizéʼtenu riʼ cada biaje guni estudiarnu. Peru galán nga cueenu tiempu para guni meditarnu ni ná información ni cadúʼndanu ca, ne zanda iquiiñenu biá galaa de tiempu ni runi estudiarnu para guni meditarnu (1 Tim. 4:15). Pa guni meditarnu ni ná Stiidxaʼ Dios la? zudiʼnu cuenta pabiáʼ jneza modo riníʼ ique Jiobá, ne ziénenu ximodo ruuyabe guiráʼ ca cosa ca ne laaca zacaca zadúʼyanu cani. Ne zacané ni laanu guchaʼnu modo laanu, modo riníʼ íquenu, ne chaahuiʼ chaahuiʼ ziénenu modo riníʼ ique Jiobá (Rom. 12:2). w18.11 24 párr. 5, 6

Lu primé siglu que, guníʼ apóstol Pablo laa ne xcaadxi xpinni Cristu bíʼninecaʼ «Dios dxiiñaʼ» purtiʼ bidxiibacaʼ ne bizeecaʼ ca biidxiʼ ni zeeda gaca stiidxaʼ Reinu (1 Cor. 3:6, 9). Laanu laaca zanda guninenu «Dios dxiiñaʼ». ¿Ximodo yaʼ? Ra gudiʼnu de tiempu stinu, stipa stinu ne ni nápanu para gúninu dxiiñaʼ ni bisaanané Dios laanu. ¡Ti privilegiu guizáʼ sicarú nga guninenu Dios dxiiñaʼ! Laaca guizáʼ riéchenu ora runi predicarnu, purtiʼ cudiʼnu tiempu ne stipa stinu para gacanenu xcaadxi. Stale hermanu ni riquiiñeʼ tiempu stiʼ para gusiidiʼ binni de lu Biblia riniʼcaʼ ndiʼ nga dxiiñaʼ ni racané laacaʼ chuʼcaʼ nayecheʼ. Guizáʼ riéchenu ora ridúʼyanu maʼ cayene tuuxa binni cani rusiidiʼ Biblia, ora jma maʼ ziyápabe fe ne ora guchaabe xquendanabánibe ne guiníʼnebe xcaadxi binni ni caziidibe. Guizáʼ biecheʼ Jesús ora biʼyaʼ «nabé nayeche bigueta» ca 70 discípulo stiʼ dxi yeguni predicarcaʼ purtiʼ guleenducaʼ stale cosa galán (Luc. 10:17-21). w18.08 20 párr. 11, 12

Zanda guiábanu lu ti trampa pa gápanu confianza laca laanu. Ne zándaca guiníʼ íquenu ziénenu xiixa neca qué gánnanu xipeʼ bizaaca. Nga runi, pa huaxiéʼ riéʼgunu tuuxa hermanu la? zaca nagana para laanu guidúʼyanu xipeʼ bizaaca. Pa jma guicá íquenu problema ni nápanu né laabe la? zucaa ni laanu guiníʼ íquenu mal de laabe. Ne zándaca ora gunadiáganu xiixa cosa ni cadi galán de laabe nagueendaca zuni crenu ni. Ndiʼ rusiidiʼ laanu pa gápanu xiana tuuxa hermanu zándaca guiníʼ íquenu mal de laa (1 Tim. 6:4, 5). Para cadi gúninu ni bizéʼtenu riʼ la? cadi naquiiñeʼ gudiʼnu lugar chuʼ envidia nin xiana ndaaniʼ ladxidoʼno (Col. 3:12-14). w18.08 6 párr. 15; 7 párr. 18

Cumu Jiobá bizáʼ binni la? laaca stibe laanu (Sal. 100:3; Apoc. 4:11). Peru lu ca iza ni maʼ gudiʼdiʼ ca maʼ gulí Jiobá caadxi binni para gácacaʼ ti guidxi risaca para laa. Guzéʼtenu ti ejemplu, lu Salmo 135 ná guca ca israelita ni bizuubaʼ stiidxabe «ti guidxi risaca para laabe» (Sal. 135:4). Ne lu libru stiʼ Oseas riete zeeda gaca binni ni cadi naca de guidxi Israel xpinni Jiobá (Os. 2:23). Guca cumplir profecía riʼ dxi gulí Dios binni ni cadi judíu para guni mandarné Jesús guibáʼ (Hech. 10:45; Rom. 9:23-26). Ca binni ni bibí né espíritu riʼ riete lu Biblia nácacaʼ ti guidxi nayá, ti guidxi ni guleechú Jiobá para laa (1 Ped. 2:9, 10). Ne stale de ca xpinni Cristu ni nabani tiempu riʼ, ni cabeza guibani lu Guidxilayú, laaca ruuyaʼ Dios laacabe casi xquidxi ni gulí (Is. 65:22). w18.07 22 párr. 1, 2

Guiranu rinándanu ejemplu stiʼ Cristu, purtiʼ laa bisihuinni ximodo caquiiñeʼ gudiʼnu de ni nápanu (Mat. 20:28). Galán guinabadiidxanu laca laanu: «¿Ñee zanda chinandaʼ ejemplu stiʼ Jesús jma galán de biaʼ cayuneʼ ni yanna riʼ la?» (1 Ped. 2:21). Pa chinándanu ejemplu stiʼ Jiobá ne Jesús la? ziuulaʼdxiʼ Jiobá ni rúninu. Para chuuláʼdxibe ni rúninu la? naquiiñeʼ guizaaláʼdxinu xcaadxi binni ne gacanenu laacaʼ lu guiráʼ ni iquiiñecaʼ. Lu parábola ni guníʼ Jesús de samaritanu nachaʼhuiʼ que, bisiénebe pabiáʼ risaca guni ca discípulo stibe ni nuu lu nacaʼ para gacanecaʼ binni, ne naquiiñeʼ gacanécabe guiráʼ clase binni (Luc. 10:29-37). Cadi guiaandaʼ laanu guníʼ Jesús parábola riʼ, purtiʼ sicaríʼ gunabadiidxaʼ ti judíu laabe: «Tuu nga stobi [o prójimo] ni riete lu ley ca naquiiñe ganaxhiee yaʼ». Ni bicabi Jesús hombre riʼ rusiidiʼ ni laanu naquiiñeʼ chuʼnu dispuestu gudiʼnu de ni nápanu cásica biʼniʼ samaritanu que, ti chuulaʼdxiʼ Dios ni rúninu. w18.08 19 párr. 5, 6

¿Ñee bisisácaruʼ Jiobá María pur gupa ne bisiniisi Xiiñibe la? Bisisácabe pue. Purtiʼ gucuá cani biʼniʼ ne cani guníʼ María ndaaniʼ Biblia. Peru zándaca qué ninándabe Jesús lu chonna iza arondaʼ ni biʼniʼ predicar. ¿Ñee biaanabe Nazaret purtiʼ viuda laabe la? Zándaca. Nga runi, qué nicaabe xcaadxi ndaayaʼ casi gucuaa xcaadxi binni. Peru guyuube gaxha de Jesús dxi gutiʼ (Juan 19:26). Ne laaca guyuube Jerusalén né ca discípulo que caadxi dxi ante gaca saa Pentecostés iza 33, dxi biaba espíritu santu luguiáʼ ca discípulo stiʼ Jesús (Hech. 1:13, 14). Zándaca juntu guca ungir María né ca discípulo que. Pa zacá ni la? gucuaabe oportunidad chebe guibáʼ ne chuʼbe gaxha de Jesús para siempre. ¡Guizáʼ galán ni bidii Dios laabe pur bíʼnibe xhiiñaʼ ne bizuubabe stiidxaʼ! w18.07 9 párr. 11; 10 párr. 14

Dxi biʼniʼ predicar Jesús lu Guidxilayú riʼ, biquiiñebe caadxi principiu para gusiidibe ca discípulo stibe ne gúdxibe laacaʼ cadi naquiiñeʼ guiaandaʼ laacaʼ guiráʼ ni gúnicaʼ zapa ni consecuencia. Guzéʼtenu ti ejemplu, gúdxibe laacaʼ ora rapa tuuxa xiana ndaaniʼ ladxidóʼ rucaa ni laa tinde ne pur cani guiníʼ ique tuuxa la? zanda gucaa ni laa guni cometer adulterio (Mat. 5:21, 22, 27, 28, TNM). Pa gúninu ni ná ca principiu stiʼ Dios, zusíʼdinu conciencia stinu ne zacaanu decisión jneza ni gusisaca Dios. ¿Ñee ti decisión si naquiiñeʼ guicaa de guiranu la? Coʼ. Neca maʼ bisiidiʼ ca xpinni Cristu conciencia sticaʼ modo ná Biblia la? ziuu ora gadxé gadxé decisión zacaacaʼ ora gúnicaʼ xiixa cosa. Guzéʼtenu ti ejemplu, ora reʼ tuuxa xiixa ni napa alcohol. Biblia rusiidiʼ cadi naquiiñeʼ xhudxi binni, peru qué rini diʼ ni qué zanda gueʼ tuuxa neca caadxi (Prov. 20:1; 1 Tim. 3:8). Yanna ora guicaanu decisión pa zadeʼnu o pa coʼ, ¿ñee purtiʼ si zanda guideʼnu neca caadxi guiníʼ íquenu zanda gúninu ni la? Coʼ. Purtiʼ cadi naquiiñeʼ si guicaanu en cuenta conciencia stinu, sínuque laaca naquiiñeʼ guicaanu en cuenta conciencia stiʼ xcaadxi hermanu. w18.06 18 párr. 10, 11

Gudixhená Jesús ca discípulo stiʼ para cadi chinándacaʼ ni rusiidiʼ ca fariseu, ca saduceu ne ca xpinni Herodes, ca ni zeeda gaca casi «levadura» (Mat. 16:6, 12). Dxi gudxi Jesús ca diidxaʼ riʼ ca discípulo stiʼ cadi xadxí de gucalaʼdxiʼ ca galileu ñúnicaʼ laabe rey. Ora riuu religión lu política la? jma nagueenda ridinde binni. Nga runi, bisiidiʼ Jesús ca discípulo stiʼ cadi chuʼcaʼ lu política. Ne pur nga gudixhe ique ca sacerdote ne ca fariseu guuticaʼ Jesús. Purtiʼ biiyacabe Jesús casi ti enemigu stícabe. Laacabe guníʼcabe: «Pa usaana nu laabe zacasi la? irá binni zuni cre laabe. Ne zeeda ca romanu zeda unitilú ca yuʼdu ro stinu ne xquidxi nu» (Juan 11:48). Nga runi, biyubi sumo sacerdote ni láʼ Caifás modo guuti Jesús (Juan 11:49-53; 18:14). w18.06 6, 7 párr. 12, 13

Ti trampa ni nabé rudii resultadu Binidxabaʼ nga ora ruyubi binni ganna jma de ca cosa ni zeeda de espiritismo. Rucaabe binni gapa curiosidad de ca demonio ca, ne qué riquiiñesibe ca religión ni cadi dxandíʼ, sínuque laaca riquiiñebe entretenimientu. Riquiiñebe película ne juegu electrónicu ne xcaadxi cosa para gucaabe binni chuulaʼdxiʼ ganna jma de espiritismo. ¿Xi caquiiñeʼ gúninu para cadi guiábanu lu trampa stibe yaʼ? Cadi cuézanu cuee organización ti publicación ni gusiene gunáʼ nga entretenimientu jneza ne ni cadi jneza. Cada tobi naquiiñeʼ gusiidiʼ chaahuiʼ xquendabiaaniʼ ti guni ni ná ca norma stiʼ Jiobá (Heb. 5:14). Zacaanu decisión jneza pa chinándanu conseju ni bidii apóstol Pablo. Nga runi galán guiníʼ íquenu ndiʼ: «Pa ñuuyaʼ ti estudiante o ti binni ni rigannaʼ xi runeʼ para gacaʼ divertir, ¿ñee niníʼ íquebe cayuneʼ ni rusiideʼ la? o niníʼ íquebe nacaʼ ti hipócrita?». Pa gúninu ni rusíʼdinu la? cadi casi ziuunu ziábanu lu trampa stiʼ Binidxabaʼ (1 Juan 3:18). w18.05 25 párr. 13

¿Ximodo zanda chinándanu ejemplu stiʼ Pablo yaʼ? Primé, gúninu stipa pur guidxélanu binni ni nuu para guicaa guendanabani ni qué zaluxe. Guiropa, guinábanu Jiobá guxheleʼ ladxidóʼ ca binni nachaʼhuiʼ (Hech. 13:48; 16:14). Silvana, ti hermana ni maʼ napa treinta iza de naca precursora, guníʼ: «Ante guxhidxenaʼyaʼ ra puertaʼ stiʼ tuuxa la? rinabaʼ Jiobá gacané naa guiníʼ iqueʼ zucaadiágacabe naa». Guinábanu Dios iquiiñeʼ ca ángel stiʼ para chiné laanu ra nuu ca binni nachaʼhuiʼ (Mat. 10:11-13; Apoc. 14:6). Robert, ti hermanu ni napa jma de treinta iza de naca precursor, guníʼ: «Guizáʼ galán gúninu dxiiñaʼ né ca ángel, purtiʼ laacaʼ nánnacaʼ xi rizaaca lu xquendanabani binni». Ne guionna, gúninu stipa gúʼyanu ca cosa galán napa cada binni. Ti ancianu láʼ Carl guníʼ: «Ruuyaʼ xiixa ni gusihuinni ximódopeʼ nga ti binni, neca ti cosahuiiniʼ casi pa cuxídxibe, pa rihuinni nacháʼhuibe o pa dxandíʼ racaláʼdxibe gánnabe xiixa ni gunabadiidxabe». Pa gúninu cani bizéʼtenu riʼ la? qué zusaana de guni predicarnu, cásica biʼniʼ Pablo. w18.05 15 párr. 13; 16 párr. 15

Ti cosa ni rusiecheʼ laanu nga gánnanu dede yanna cayúniruʼ ca binni ni gucanenu dxiqué ni ná Jiobá. Sicaríʼ bicaa apóstol Juan: «Gasti ru ni rusieche naa jma que ganna zinanda ca xiiñe ni dxandíʼ» (3 Juan 4). Stale precursor riníʼ nabé riecheʼ ora ganna cadi cusaana ca binni ni biindanecaʼ de lu Biblia de gúnicaʼ ni ná Jiobá o maʼ nácacaʼ precursor. Nga runi, pa gusietenaláʼdxinu ca precursor ni maʼ caree gana guiráʼ ni maʼ biʼniʼ pur xcaadxi binni la? zacané ni laacabe guni sentírcabe galán. Stale superintendente de circuito riníʼ galán runi sentircaʼ ne xheelacaʼ ora rudii tuuxa hermanu laacabe ti notahuiiniʼ ra cudiicaʼ xquíxepeʼ laacabe pur yegánnacabe congregación sticaʼ. Zacaca runi sentir ca ancianu, ca misioneru, ca precursor, ne ca betelita ni cadi cusaanaʼ de guzuubaʼ stiidxaʼ Dios neca cadxagalucaʼ guendanagana. w18.04 23 párr. 14, 15

Qué nuzuubaʼ Salomón stiidxaʼ Dios ne bichaganáʼ 700 gunaa ne gúpabe 300 concubina (1 Rey. 11:3). Stale de ca gunaa que cadi israelita laacaʼ ne biʼniʼ adorarcaʼ stale dios falsu. Nga runi maʼ qué ñuni rey Salomón ni ná Ley stiʼ Dios ra ná cadi naquiiñeʼ guichaganáʼ ca israelita que gunaa de sti guidxi (Deut. 7:3, 4). Chaahuiʼ chaahuiʼ bisaana de gannaxhii Salomón ca Ley stiʼ Dios ne bizulú biʼniʼ cosa malu. Bizaʼbe ti altar para ti diosa ni láʼ Astoret ne para dios ni láʼ Kemós. Raqué biʼniʼ adorarnebe ca xheelabe ca dios falsu que. Dede bizaʼbe ca altar que lu ti dani ni nuu frente de guidxi Jerusalén, ra bizaʼbe templu stiʼ Jiobá (1 Rey. 11:5-8; 2 Rey. 23:13). Cumu cayúnirube sacrificiu ndaaniʼ templu que la? guníʼ íquebe zuni perdonar Dios laabe neca maʼ cadi cuzuubabe diidxaʼ, peru gudxítebe laca laabe, purtiʼ ruuyaʼ Jiobá ora rucheené tuuxa laa. w18.07 18, 19 párr. 7-9

Caadxi de ca «flecha ni cá gui» ni zanda gundaa Binidxabaʼ lii nga gusiguii ne guiníʼ mal de Jiobá, zándaca gucaabe lii guiníʼ íqueluʼ qué rizaalaʼdxiʼ Jiobá lii ne cadi nadxii lii. Ti baʼdudxaapaʼ de 19 iza láʼ Ida guníʼ: «Nabé guníʼ iqueʼ zitu nuu Jiobá de naa ne qué naʼ gaca xhamiguaʼ laa». ¿Xi rúnibe para cadi guiníʼ íquebe zacá yaʼ? Laca laabe guniʼbe: «Ca reunión ca zeeda gaca cani casi ti inyección ni racané fe stinneʼ chuʼ naguidxi. Dxiqué la? qué rinaʼyaʼ guindisanaʼyaʼ para guneʼ comentar. Guníʼ iqueʼ guirutiʼ qué zusisaca ca comentariu stinneʼ. Peru yanna, maʼ racaʼ preparar ne runeʼ stipa pur guneʼ comentar chupa chonna biaje». Ni bizaaca Ida riʼ, rusiidini laanu ti cosa nabé risaca. Escudu biquiiñeʼ ca soldadu romanu que, ti medida si guca cani ne qué zanda guiroobaʼ cani o guihuiiniʼ cani jma, peru escudu o fe stinu, zanda gácani jma naroʼbaʼ o jma nahuiiniʼ. Lu nanu nuu pa guiroobaʼ fe stinu o coʼ (Mat. 14:31; 2 Tes. 1:3). Nga runi nabé risaca guidúʼyanu ximodo gaca fe stinu naguidxi. w18.05 29, 30 párr. 12-14

Despué de guca xu que bichaa hombre ni rapa ra cárcel que ne gunabaʼ gacanécabe laa (Hech. 16:25-34). Zaqueca nga rizaaca yanna, stale binni ni qué niná nucaadiaga stiidxaʼ Dios dxiqué, zándaca guchaacaʼ ora guizaaca xiixa ni guchaa xquendanabánicaʼ ne guinábacaʼ gacané tuuxa laacaʼ. Stale binni riuu triste ora guniti dxiiñaʼ stiʼ, ora guilaa xquendaxheelaʼ, ora gábicabe laa napa ti guendahuará malu o gatiʼ ti binni ni nadxii. Ora rizaaca binni ca cosa ni bizéʼtenu riʼ, nuu tu rinabadiidxaʼ xi pur nabani. Zándaca dede guinabadiidxacaʼ cásica gunabadiidxaʼ hombre ni rapa ra cárcel que: «Xi gune para ilaʼyaʼ». Ora rinínenu clase binni riʼ lu predicación, zándaca chuuláʼdxicaʼ gucaadiágacaʼ ca diidxaʼ de esperanza ni zinenu ra nuucaʼ. Nga runi, pa qué gusaana de guni predicarnu la? zanda quixhedxinu ladxidóʼ ca binni ni racalaʼdxiʼ gucaadiaga stiidxaʼ Dios (Is. 61:1). w18.05 19, 20 párr. 10-12

Ca dxi stinu riʼ, casi guiráʼ binni nuseeguʼ Binidxabaʼ lucaʼ ne nácacaʼ esclavu stiʼ sistema religioso, económico ne social (2 Cor. 4:4). Nápanu privilegiu de chinándanu ejemplu stiʼ Jesús ne gacanenu laacabe gunibiáʼcabe ne gúnicabe ni ná Jiobá, Dios ni rudii libertad (Mat. 28:19, 20). Cadi casi ziuunu zanda gúninu ni, zadxaagalunu guendanagana. Nuu guidxi, zeʼ dxi jma qué riuulaʼdxiʼ binni gucaadiaga stiidxaʼ Dios ne rucaalucaʼ laanu. Ni naquiiñeʼ guinabadiidxanu nga pa zanda iquiiñenu libertad stinu para gúninu jma lu xhiiñaʼ Reinu. Stale xpinni Jiobá ni maʼ biene nabáninu lu ca últimu dxi, maʼ gudixhe íquecaʼ guibánicaʼ ne huaxiéʼ cosa para ganda gúnicaʼ jma lu xhiiñaʼ Jiobá de tiempu completu, ora ridúʼyanu ni cayúnicabe riʼ guizáʼ riguu ni gana laanu (1 Cor. 9:19, 23). Stale tu laa runi servir ndaaniʼ congregación stiʼ, peru nuu tu laa rindeza sti lugar ra jma caquiiñeʼ tu guni predicar para gacané. ¡Guizáʼ galán ni ribeendú binni ora riquiiñeʼ libertad stiʼ para guni ni ná Jiobá! (Sal. 110:3). w18.04 11, 12 párr. 13, 14