Noviembre

Pa ñaca qué gánnanu xi peʼ nga bizaaca Jonás, ñándaca niníʼ íquenu nácabe ti binni ni qué zanda gápacabe confianza o tuuxa ni qué ruzuubaʼ diidxaʼ. Biʼniʼ mandar Jehová Jonás chitidxi ca binni de Nínive zusabanabe laacaʼ. Peru lugar de nuzuubaʼ Jonás diidxaʼ, gudxiʼbaʼ lu ti barcu ne guyé sti ladu, zitu de Jehová (Jon. 1:1-3). Ñándaca maʼ qué nudiʼnu lugar ñebe sti biaje. Peru Jehová biiyaʼ zándaruʼ chebe (Jon. 3:1, 2). Zanda gánnanu ximodo peʼ guca Jonás ora guidúʼndanu oración ni bíʼnibe dxi nuube ndaaniʼ benda que (Jon. 2:1, 2, 9). Nanna dxíchinu biʼniʼ orar Jonás stale biaje. Tobi de ca oración ni bíʼnibe racaneni laanu guiénenu gúcabe ti hombre nachaʼhuiʼ. Neca primeru qué ñúnibe ni gudxi Jehová laabe, bisihuinni oración stibe humilde laabe, rudiibe xquixe peʼ Jehová ne racaláʼdxibe guzuubabe stiidxaʼ. Nga runi qué ñuuyaʼ Jehová ra bicheesibe, sínuque bicaadiaga oración stibe ne biquiiñeruʼ laabe casi profeta. Nga runi, nabé risaca nga «gucaadiaga» chaahuiʼ ca ancianu ante gudiicaʼ conseju tuuxa. w20.04 15 párr. 4-6

Ca primé xpinni Cristu que gucuaacaʼ ca noticia galán, ne biyúbicaʼ gacané espíritu santu laacaʼ para guiénecaʼ Stiidxaʼ Dios. Ne biindaʼ chaahuicabe Stiidxaʼ Dios para gúʼyacabe dxandíʼ guiráʼ ni caziidicabe (Hech. 17:11, 12; Heb. 5:14). Cadi pur ni runi sentírcabe ne ca emoción stícabe nga guca fe stícabe naguidxi, ne qué ñúnicabe ni ná Jehová purtiʼ si riuuláʼdxicabe chúʼcabe gaxha de ca xpinni Cristu. Gúpacabe fe purtiʼ biziidiʼ chaahuicabe ni rusiidiʼ Stiidxaʼ Dios (Col. 1:9, 10). Qué ziuu dxi guchaa ni dxandíʼ rusiidiʼ Stiidxaʼ Dios (Sal. 119:160). Guzéʼtenu ti ejemplu, qué ruchaa ni ora runi ti hermanu laanu xiixa ne ora runi cometerbe ti pecadu grave. Laaca qué ruchaa ni ora nápanu guendanagana. Nga runi, caquiiñeʼ gunibiáʼ chaahuinu ca ni rusiidiʼ Stiidxaʼ Dios ne chuʼnu seguru dxandíʼ cani. Cásica racané ti ancla ti barcu para cadi guiaaziʼ ora nuu ti tormenta, zacaca nga zacané fe ni nápanu lu ca ni rusiidiʼ Biblia laanu ora tídinu lu guendanagana. w20.07 9 párr. 6, 7

Para Jesús la? ni gúninu pur ca bíʼchibe ni naca ungidu casi ñaca cayúninu ni para laabe (Mat. 25:34-40). Ti modo zanda gacanenu laacabe nga ora rúninu dxiiñaʼ ni bisaanané Jesús ca xpinni ne gacanenu binni gaca discípulo (Mat. 28:19, 20). Nabé risaca dxiiñaʼ ni runi ca «xcaadxi dendxuʼ» purtiʼ racanecaʼ ca biʼchiʼ Cristu para guni tendercaʼ dxiiñaʼ de gaca predicar stiidxaʼ Dios tiempu riʼ (Juan 10:16). Pa nácanu de ca xcaadxi dendxuʼ, cada biaje gúninu dxiiñaʼ riʼ rusihuínninu nadxiinu ca ungidu ne laaca nadxiinu Jesús. Laaca raca xhamígunu Jehová ne Jesús ora riquiiñenu bueltu stinu para gacanenu gaca dxiiñaʼ sticaʼ (Luc. 16:9). Guzéʼtenu ti ejemplu, zanda gudiʼnu bueltu para gaca predicar ca lugar jma zitu, para cuí ne gudiicabe mantenimientu ca lugar ra runi adorarnu Jehová, ne para gacanécabe ca hermanu ra bizaaca ti desastre. Laaca zanda gusábanu donación ndaaniʼ ca caja huiiniʼ ni nuu ra Yoo stiʼ Reinu ne zanda gacanenu ca hermanu ni caquiiñeʼ tu gacané laacaʼ (Prov. 19:17). w20.04 24 párr. 12, 13

Casi ná profecía riʼ, ¿ximodo nga qué ñuni respetar rey del norte «Dios stiʼ» bixhoze ne jñaa? Gucalaʼdxiʼ Unión Soviética nucueeza poder ni napa ca organización religiosa para gunduuxeʼ guiráʼ xixé religión. Nga runi, lu iza 1918 maca biʼniʼ mandar gobiernu soviético gusiidicabe ra scuela cadi guni cré binni Dios. Peru ¿ximodo bisisácabe «dios ni rapa ca muru» yaʼ? Biquiiñebe stale bueltu stibe para gúnibe ejércitu stibe jma nadipaʼ ne bíʼnibe stale bomba nuclear para gunibiáʼ jma gobiernu laabe. Ra gudiʼdiʼ tiempu, gupa rey del norte ne rey del sur stale guiibaʼ para ganda guuticabe stale millón de binni. Maʼ huayuni rey del norte ne rey del sur dxiiñaʼ para uguucaʼ ti «cosa yuudxuʼ ne ni runitilú», laani nga Organización de las Naciones Unidas (Dan. 11:31). w20.05 6, 7 párr. 16, 17

¿Tuu nga ca ni zanda gacané para guidxela ca hermanu ni nuu inactivu yaʼ? Guiráʼ ca hermanu de congregación, familia stícabe, ca ancianu, ca precursor ne ca publicador. ¿Ñee nápanu ti xhamígunu o ti familia stinu ni nuu inactivu la? ¿Ñee huadxélanu tuuxa hermanu inactivu ora cayuni predicarnu de yoo pur yoo o ra ridiʼdiʼ stale binni la? Pa gusiguéndabe gudiibe laanu ca datu stibe ne pa nuuni permitidu lugar ra nabézanu la? zanda gudiʼnu información stibe ca ancianu de congregación ra riuunu. Sicaríʼ guníʼ ti ancianu ni láʼ Thomas: «Primé la? rinabadiidxaʼ ca hermanu de congregación pa nánnacaʼ paraa nabeza ca ni nuu inactivu. O rinabadiidxaʼ ca publicador pa runibiaʼcaʼ tuuxa hermanu ni maʼ qué rié reunión. Despué, ora rigannaʼ ti hermanu o ti hermana inactivu, rinabadiidxaʼ laacabe de ca xiiñicabe o familia stícabe. Purtiʼ caadxi de ca inactivu yenecaʼ xiiñicaʼ reunión dxiqué, ne zándaca laaca gúcacaʼ publicador. Laaca zanda gacanenu laacabe guibiguétacabe ra nuu Jehová». w20.06 24 párr. 1; 25 párr. 6, 7

De guiráʼ ni nabani ndaaniʼ Guidxilayú riʼ, binni si nga guyáʼ para ganda guiziidiʼ de ca cosa ni bizaaca dxiqué. Ora guietenaláʼdxinu ne guiníʼ íquenu ni bizaacanu dxiqué, racané ni laanu guchaʼnu modo riníʼ íquenu ne guibáninu modo riuulaʼdxiʼ Dios (1 Cor. 6:9-11; Col. 3:9, 10). Laaca zanda gusíʼdinu conciencia stinu para ganna xii nga ni jneza ne ni cadi jneza (Heb. 5:14). Zanda guizíʼdinu gannaxhiinu, gápanu misericordia binni, ne laaca zanda guyúbinu gúninu ni jneza. Ti modo rusihuínninu rudiʼnu xquixe peʼ Jehová pur maʼ bidii laanu memoria nga gúninu stipa guietenaláʼdxinu guiráʼ biaje maʼ gucanebe laanu ne maʼ gudixhedxibe ladxidoʼno. Pa gúninu ni la? jma zápanu confianza zacanebe laanu despué (Sal. 77:12; 78:4, 7). Sti modo zanda gusihuínninu rusisácanu regalu riʼ nga ora rietenaláʼdxinu guiráʼ ca cosa galán ni runi xcaadxi pur laanu ne gudiʼnu xquixe peʼ laacaʼ. Ne ca investigador ca nacaʼ ribani binni jma nayecheʼ ora rudiicaʼ xquixe peʼ. w20.05 23, 24 párr. 12, 13

Guiníʼ íquenu ximodo biʼniʼ sentir Moisés dxi dopacuuxhuʼ cueʼ ti guié lu dani Horeb ne cayuuyaʼ lu ti visión zidiʼdiʼ gloria stiʼ Jehová nezalú. Libru Perspicacia para comprender las Escrituras cusiene «zándaca ndiʼ nga tobi de ca cosa ni bizaaca lu xquendanabani Moisés ni jma bidxagayaa ne ni qué ñuu dxi ñuuyaʼ ninruʼ sti binni ante gueeda Jesucristu». Binadiaga Moisés ca diidxaʼ riʼ: «Jehová, Jehová, ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa, qué rusaana de gannaxhiibe stale mil binni, runi perdonarbe ca ni ruchee ne ca ni qué ruzuubaʼ diidxaʼ» (Éx. 33:17-23; 34:5-7). Zándaca ora guníʼ Moisés lá Jehová casi zeeda lu textu stiʼ yannadxí, bietenalaʼdxiʼ ni bizaaca que. Ora guiníʼ íquenu lá Jehová la? laaca galán guni meditarnu tu clase de binni laabe. Caquiiñeʼ guietenaláʼdxinu ca cualidad stibe, chupa chonna de laacani nga poder, guendanuuxpiaaniʼ, justicia ne guendarannaxhii. Pa guiníʼ íquenu guiráʼ ndiʼ ne xcaadxi cualidad ni nápabe la? jmaruʼ si zuni respetarnu laabe (Sal. 77:11-15). w20.06 8, 9 párr. 3, 4

Jesús guníʼ zanna binni tuu nga ca discípulo stiʼ pur guendarannaxhii ni nápacaʼ (Juan 13:34, 35). Peru pa racaláʼdxinu gaca fe stinu naguidxi la? caquiiñeruʼ gúninu xiixa. Cadi caquiiñeʼ si gápanu fe Dios purtiʼ si ridúʼyanu nadxiisaa ca xpinni Cristu. ¿Xiñee yaʼ? Guxuíʼlunu pa ti ancianu o ti precursor guni cometer ti pecadu grave, o guniná laanu o gaca apóstata ne niníʼ qué rusíʼdinu ni dxandíʼ. ¿Xi ñúninu pa nizaaca ndiʼ yaʼ? ¿Ñee pur laani nixélenu de Jehová la? Ndiʼ rusiidiʼ laanu, pa racaláʼdxinu gaca fe stinu naguidxi la? naquiiñeʼ gaca xhamígunu Jehová, ne cadi naquiiñeʼ gápanu fe Dios pur ni runi xcaadxi binni. Peru fe stinu zeeda gaca casi ti yoo, cadi naquiiñeʼ si gucuinu ni né material «ni naguudxi», o ca sentimientu ne ca emoción stinu, sínuque laaca risaca iquiiñenu material «ni naguidxi», laacani nga guidúʼndanu Biblia, guiénenu ni cazíʼdinu ne chuʼnu seguru ni cazíʼdinu nga ni dxandíʼ (Rom. 12:2). w20.07 8 párr. 2, 3

Nuu stale experiencia ni rusihuinni racané ca ángel ca para guidxela ca hermanu ni nuu inactivu ni racalaʼdxiʼ guibiguetaʼ ra nuu Jehová (Apoc. 14:6). Ti ejemplu nga ni biʼniʼ Silvio, ti hermanu de Ecuador, gunábabe Jehová gacané laabe guibiguétabe ra nuu. Laga cayuni orarbe la? bixhidxináʼ chupa ancianu ra puertaʼ stibe. Ne oraqueca gucanecaʼ laabe de guidubi ladxidoʼcaʼ, ni peʼ caquiiñebe óraque. Pa gacanenu ca hermanu ni nuu débil guibiguétacaʼ ra nuu Jehová la? ziuʼnu nayecheʼ. Guidúʼyanu xi guníʼ Salvador, ti precursor ni nabé runi stipa gacané ca ni nuu inactivu: «Nuu tiru dede ruunaʼ tantu cayecheʼ. Riecheʼ stale ora riníʼ iqueʼ maʼ gucané Jehová ti dendxuʼ stiʼ guiree de ndaaniʼ guidxilayú stiʼ Binidxabaʼ ne gupaʼ privilegiu de gacaniáʼ laabe». Pa maʼ bixéleluʼ de xquidxi Jehová, gunna dxichi nadxiirube lii ne racaláʼdxibe guibiguétaluʼ. Cabeza Jehová guibiguétaluʼ ra nuu familia stiʼ, ne zadxaagalube lii né stale guendanayecheʼ. w20.06 29 párr. 16-18

Cumu Jehová nga maestru ni jma nanna gusiidiʼ la? cusiidibe laanu né caadxi ejemplu ni zeeda lu Stiidxabe (Is. 30:21). Zanda guiníʼ íquenu ni bizaaca ca binni ni bibani dxi gucuá Biblia ca ni bisihuinni ca cualidad ni riuulaʼdxiʼ Dios ne xcaadxi ni qué nusihuinni cani (Sal. 37:37; 1 Cor. 10:11). Guiníʼ íquenu ni bizaaca rey Saúl. Dxi joven laabe, gúnnabe nuu cosa ni qué zanda gúnibe ne biʼniʼ sentirbe guirutiʼ nácabe dede guca nagana para laabe guicaabe jma dxiiñaʼ (1 Sam. 9:21; 10:20-22). Peru dxi maʼ nácabe rey, gúcabe orgulloso ne bíʼnibe cosa ni qué gápabe derechu gúnibe. Ti biaje, birá paciencia stibe laga cabézabe profeta Samuel ne bíʼnibe sacrificiu neca cadi laabe naquiiñeʼ gúnibe ni. Ne pur ngue, maʼ qué ñuulaʼdxiʼ Jehová ni rúnibe ne despué gulee laabe de gácabe rey (1 Sam. 13:8-14). Guizíʼdinu de ni bizaaca rey riʼ ne gánnanu nuu cosa ni cadi laanu caquiiñeʼ gúninu. w20.08 10 párr. 10, 11

Maʼ biquiiñeʼ Jehová Cristu para cuí «hombre ni napa gadxé gadxé gracia», ni zeeda gaca casi regalu, para guni dirigir congregación (Efes. 4:8). Ládecabe nuu Grupu ni Zániru ne ca ni racané laacaʼ, ca ni nuu lu Comité de Sucursal, superintendente de circuito, ca instructor stiʼ ca scuela ca, ca ancianu de congregación ne ca siervu ministerial. Pur espíritu santu guca nombrar ca hermanu riʼ para gacanecaʼ ca dendxuʼ risaca ni napa Jehová ne para uguucaʼ gana congregación (1 Ped. 5:2, 3). Raca nombrar ca hermanu riʼ pur espíritu santu para guni tendercaʼ dxiiñaʼ ni raca ndaaniʼ congregación. Cásica racané nanu, ñeenu ne xcaadxi parte de cuerpu stinu para guni cani dxiiñaʼ la? zacaca nga ca hermanu ni guca nombrar pur espíritu santu, rúnicaʼ dxiiñaʼ nadipaʼ para gacanecaʼ congregación. Lugar de guyúbicaʼ gusisaca xcaadxi laacaʼ, rúnicaʼ stipa pur uguucaʼ gana ne gacanecaʼ ca hermanu (1 Tes. 2:6-8). Rudiʼnu xquixe peʼ Jehová pur ca hermanu riʼ, purtiʼ cayacanecaʼ xcaadxi lugar de guyúbicaʼ para laasicaʼ. w20.08 21 párr. 5, 6

Tobi de ca razón pur runi predicarnu nga purtiʼ guizáʼ maʼ gucaná binni, «nuucaʼ stúbicaʼ» ne caquiiñeʼ guiziidicabe ni dxandíʼ de Reinu stiʼ Dios nagueenda (Mat. 9:36). Racalaʼdxiʼ Jehová guiziidiʼ chaahuiʼ guiráʼ xixé binni ni dxandíʼ ne guilacaʼ (1 Tim. 2:4). Ti cosa ni zucaa lii guni predicarluʼ nga guiníʼ íqueluʼ pabiáʼ racané dxiiñaʼ riʼ binni. Zanda gacanenu guilá binni (Rom. 10:13-15; 1 Tim. 4:16). Caquiiñeʼ gapa ca pescador herramienta ni caquiiñecaʼ ne gánnacaʼ iquiiñeʼ cani. Ngueca nga laanu. Gudxi Jesús ca discípulo stiʼ xi naquiiñeʼ gúnicaʼ para gácacaʼ pescador de binni. Gúdxibe laacaʼ xi naquiiñeʼ chinecaʼ, paraa guni predicarcaʼ ne xi guiniʼcaʼ (Mat. 10:5-7; Luc. 10:1-11). Tiempu riʼ, maʼ bidii organización stiʼ Jehová laanu kit de enseñanza ra zeeda caadxi herramienta nabé galán ne rusiidiʼ ni laanu ximodo iquiiñenu cani. Racané organización stiʼ Dios laanu para cadi guidxíbinu ne gápanu habilidad ti gúninu dxiiñaʼ riʼ jma jneza (2 Tim. 2:15). w20.09 4 párr. 6, 7, 10

¿Ñee ruxuíʼlunu pabiáʼ biecheʼ apóstol Juan ora gunna cayúniruʼ ca xpinni Cristu ni gucanebe ni ná Jehová la? Para Juan, beeda gaca ca hermanu riʼ casi xiiñibe. Cumu gúpacabe stale guendanagana la? biʼniʼ apóstol riʼ stipa para gacané laacabe iguidxi fe stícabe. Laanu, laaca riéchenu ora riguixhe ique ca xiiñinu ne ca binni ni rudiʼnu estudiu gúnicaʼ ni ná Jehová ne cadi gusaanacaʼ laabe (3 Juan 3). Lu iza 98, gucané espíritu santu stiʼ Jehová apóstol Juan para gucaa chonna carta. Ne bicaabe cani para cuʼbe gana ca xpinni Cristu ti cadi guirá fe sticaʼ ne cadi gusaanacaʼ de sacaʼ lu ni dxandíʼ. Nabé guyuu Juan xizaa purtiʼ cusiidiʼ ca maestru falsu que ni cadi dxandíʼ ne cucaacaʼ ni ca hermanu de congregación (1 Juan 2:18, 19, 26). Guníʼ ca apóstata riʼ runibiaʼcaʼ Dios, peru qué runi respetarcaʼ ni nabe. w20.07 20 párr. 1-3

Cumu runi crenu mensaje ni runi predicarnu la? racaláʼdxinu gucaadiaga guiráʼ binni ni. Nápanu confianza ca promesa ni zeeda lu Stiidxaʼ Dios (Sal. 119:42; Is. 40:8). Maʼ bidúʼyanu maʼ guca cumplir caadxi de profecía ni zeeda lu Biblia ca dxi stinu riʼ. Laaca maʼ bidúʼyanu ximodo ruchaa xquendanabani binni ora rúnicaʼ ni rusiidiʼ Biblia laacaʼ. Guiráʼ ni bizéʼtenu riʼ rucaani laanu guni predicarnu ca noticia galán stiʼ Reinu de guiráʼ binni. Laaca nápanu fe Jehová, Dios stiʼ mensaje ni runi predicarnu, ne laaca nápanu fe Jesús, ni maʼ gulibe para gaca Rey lu Reinu stibe. Intiica guizaaca, ra nuu Jehová nga zanda guilanu ne rudii stipa laanu (Sal. 46:1-3). Laaca nuunu seguru Jesús nga cayuni dirigir predicación riʼ dede guibáʼ né poder ne autoridad ni maʼ bidii Jehová laa (Mat. 28:18-20). Pur fe ni nápanu Dios, nanna dxíchinu zaguu Jehová ndaayaʼ stipa ni cayúninu. w20.09 12 párr. 15-17

Ziuu ora caquiiñeʼ tu guni defender ne gacané ca hermana stinu (Is. 1:17). Guzéʼtenu ti ejemplu, ti hermana viuda o divorciada zándaca caquiiñeʼ tu gacané laa né caadxi de ca dxiiñaʼ ni biʼniʼ xheelaʼ. Ti hermana maʼ huaniisi zándaca caquiiñeʼ tu gacané laa para guiniʼné ti doctor. Ne ti precursora ni racané organización de xcaadxi modo zándaca caquiiñeʼ tu guni defender laa ora guiníʼ tuuxa qué runi predicarbe biaʼ runi xcaadxi precursor. Naquiiñeʼ chinándanu ejemplu stiʼ Jesús. Laa biʼniʼ defender ca hermana stiʼ ora guníʼ binni cadi jneza ni cayúnicaʼ. Ti biaje biʼniʼ defenderbe María dxi biʼniʼ criticar Marta laa (Luc. 10:38-42). Laaca biʼniʼ defenderbe laa ora guníʼ binni bíʼnibe ti cosa ni cadi jneza (Mar. 14:3-9). Nanna Jesús xi pur biʼniʼ María ni. Ne laaca biʼniʼ profetizarbe: «Lu guidubi guidxilayú, intiica lugar gaca predicar ca noticia galán, laaca zaníʼcabe ni biʼniʼ gunaa riʼ». w20.09 24 párr. 15, 16

Ti pastor chaʼhuiʼ maca nanna zándaca gueeda guiniti ca dendxuʼ stiʼ. Nga runi, pa gueeda guiníticame la? qué runi tratarbe laacame mal. Guidúʼyanu xi biʼniʼ Jehová dxi maʼ qué ñuni caadxi de ca xpínnibe ni cabézabe ñúnicaʼ. Bixooñelú profeta Jonás para cadi guni cumplir asignación gucuaa. Peru cadi casi zeʼ diʼ Jehová guníʼ ique maʼ qué zuni Jonás ni nabe, sínuque cásica runi ti pastor chaʼhuiʼ, yeyubi Jehová laabe ne bidii stipa laabe para ganda guni cumplirbe né asignación stibe (Jon. 2:7; 3:1, 2). Despué biquiiñeʼ ti lubáʼ guitu para gusiidiʼ laabe pabiáʼ risaca xquendanabani cada binni (Jon. 4:10, 11). ¿Xi rizíʼdinu de ni bizaaca riʼ yaʼ? Rizíʼdinu cadi nagueendaca naquiiñeʼ guiníʼ ique ca ancianu maʼ qué zanda guni ca inactivu ni ná Jehová sti biaje. Ni naquiiñeʼ gúnicabe nga guiénecabe xiñee maʼ bixélecaʼ de xcaadxi dendxuʼ stiʼ Dios. Ne ora guibiguetaʼ ca dendxuʼ riʼ ra nuu Jehová la? naquiiñeʼ guni tratárcabe laacaʼ né cariñu ne guizaaláʼdxicabe laacaʼ. w20.06 20, 21 párr. 10-12

Dxi biaba Unión Soviética lu iza 1991, gucané ni xquidxi Dios para gápacaʼ caadxi libertad. Ne pur ndiʼ maʼ gunda biʼniʼ predicárcabe sin chuʼ tu gucueeza laacabe, ne qué nindaa guyuu gayuaa mil publicador ndaaniʼ ca guidxi ra biʼniʼ mandar Unión Soviética. Peru chaahuiʼ chaahuiʼ, beeda gaca Rusia ne ca xpinni rey del norte. Para gueeda gaca ti gobiernu rey del norte o rey del sur, caquiiñeʼ guni chonna cosa: primé, sananda xquidxi Dios; guiropa, gusihuinni pur ni guni naca enemigu stiʼ Jehová ne ca xpinni, ne guionna, tindesaa guiropaʼ rey riʼ. Rusia ne ca xpinni cucaalucaʼ xquidxi Dios ne cayuni prohibircaʼ predicación stinu ne canazanándacaʼ gayuaa mil de ca hermanu ne hermana. Pur ni cayúnicabe cusihuínnicabe nanaláʼdxicabe Jehová ne ca xpinni. Ne huadindenécabe rey del sur, Gran Bretaña ne Estados Unidos, guiropaʼ país ni naca ti potencia mundial. w20.05 12, 13 párr. 3, 4

Cumu naquiiñeʼ gusíʼdinu binni para gaca discípulo stiʼ Cristu la? naquiiñeʼ gúninu ni galán. Guiráʼ semana rusíʼdinu millón binni ca ni dxandíʼ rusiidiʼ Biblia. Guiranu riuuláʼdxinu gusíʼdinu ni ná Stiidxaʼ Dios. Nga runi zándaca qué riaanadxinu de guininu de laani. Peru ora guni conducirnu estudiu stiʼ Torre stiʼ ni rapa, gutíʼdinu reunión ra riuundaʼ Biblia ne ora gudiʼnu estudiu, cadi naquiiñeʼ guininu stale. Gudiʼnu lugar gusiidiʼ Biblia. Para nga la? naquiiñeʼ gucueeza maestru ca laca laa ne cadi gacalaʼdxiʼ gusiene guiráʼ ni nanna de tema o versículo ca (Juan 16:12). Guníʼ ique pabiáʼ nánnaluʼ de Biblia yanna ne pabiáʼ nánnaluʼ dxi guyuunísaluʼ. Zándaca caadxi si cosa de lu Biblia nánnaluʼ dxiqué (Heb. 6:1). Pa gudiʼdiʼ stale iza para biziidiluʼ ca ni nánnaluʼ yanna, cadi gacaláʼdxiluʼ gusiidiluʼ guiráʼ ni nánnaluʼ estudiante stiluʼ de jalón. w20.10 14, 15 párr. 2-4

Gulí Jehová José ne María para gácacaʼ bixhozeʼ ne jñaa Jesús purtiʼ nacháʼhuicaʼ (Mat. 1:18-23; Luc. 1:26-38). Ca diidxaʼ ni guníʼ María ni zeeda lu Biblia rusihuínnicani pabiáʼ nadxiibe Jehová ne Stiidxaʼ (Luc. 1:46-55). Laaca bisihuinni José nadxii Jehová ne racalaʼdxiʼ guni ni nabe ora bizuubaʼ stiidxabe (Mat. 1:24). Casi ridúʼyanu, qué nibí Jehová binni ricu para gaca bixhoze ne jñaa Jesús. Sacrificiu ni biʼniʼ José ne María despué de gule Jesús rusihuínnini pobre laacaʼ (Luc. 2:24). Zándaca huaxiéʼ cosa gúpacabe para guibaninécabe purtiʼ gúpacabe biaʼ gadxe xiiñicabe (Mat. 13:55, 56). Gupa Jehová Xiiñiʼ de caadxi peligru, peru bidii lugar tiidibe lu caadxi guendanagana (Mat. 2:13-15). Tobi de laani nga qué ñuni cré caadxi de ca familia stiʼ Jesús laa. Qué ñuni cré ga caadxi de ca familia stibe pa laabe nga Mesías (Mar. 3:21; Juan 7:5). Laaca zándaca gucaná Jesús dxi gutiʼ José. w20.10 26, 27 párr. 4-6

¿Ñee huayuni sentirnu stúbinu ne riníʼ íquenu guirutiʼ zanda gacané laanu la? Cadi laasinu huayuni sentirnu zacá. Laaca zacaca biʼniʼ sentir caadxi xpinni Jehová de dxiqué (1 Rey. 19:14). Ora guni sentirnu casi bizéʼtenu riʼ, guietenaláʼdxinu promesa stiʼ Jehová: «Qué zusaanaʼ lii ne qué ziaanadxieeʼ de gacaniaʼ lii». Nga runi zanda guininu né stale confianza «Jehová nga racané naa. Qué zadxibeʼ diaʼ» (Heb. 13:5, 6). Bicaa apóstol Pablo ca diidxaʼ riʼ para ca xpinni Cristu ni bibani lu iza 61. Ni guniʼbe ca rusihuínnini ngaca biʼniʼ sentir hombre ni bicaa Salmo 118:5-7. Cásica hombre ni bicaa salmo riʼ, laaca gunna dxichi Pablo nuu Jehová para gacané laa. Guzéʼtenu ti ejemplu, jma de chupa iza ante gucaabe carta para ca cristianu hebreu, biʼniʼ viajarbe lu barcu ne bidxaagalúcabe ti tormenta naroʼbaʼ (Hech. 27:4, 15, 20). Lu viaje riʼ ne lu xcaadxi iza que gucané Jehová laabe de gadxé gadxé modo. w20.11 12 párr. 1, 2

¿Xiñee cadi jneza siempre guiníʼ íquenu jma galán modo bibáninu dxiqué? Purtiʼ zándaca ca cosa galán si zietenaláʼdxinu ne qué zietenaláʼdxinu ca guendanagana gúpanu. Guiníʼ íquenu ni bizaaca ca israelita: nin cadi xadxí de bireecaʼ de Egipto bisiaandacaʼ pabiáʼ nagana modo bibánicaʼ raqué ne ni bietenaláʼdxisicaʼ nga guiráʼ ca guendaró nanixe ni gudocaʼ raqué, sicaríʼ guniʼcaʼ: «¡Nabé ribánanu ca benda ni gudoʼdo Egipto sin niguíxhedu, ne ca pepinu, ca xandié, ca cebolla guixi, ca cebolla ne ca aju que!» (Núm. 11:5). Peru ¿dxandíʼ nga qué niguíxhecabe gastiʼ la? Coʼ. Guizáʼ caru gudíxhecabe ni gudócabe purtiʼ gúcacabe esclavu Egipto (Éx. 1:13, 14; 3:6-9). Nin qué nindaa, bisiaandaʼ ca israelita guiráʼ ca guendanagana gúpacaʼ ne bibánacaʼ caadxi cosa gúpacaʼ Egipto. Lugar de nicá íquecabe guiráʼ ni biʼniʼ Jehová pur laacabe la? laga bietenaláʼdxicabe guiráʼ ni gúpacabe dxiqué. Guizáʼ bidxiichi Jehová pur ni bíʼnicabe que (Núm. 11:10). w20.11 25 párr. 5, 6

Nuu biaje rireʼnu gana ora riníʼ íquenu «huaxiéʼ dxi ribani» binni «ne rixhacalaʼdxiʼ guiráʼ guendanagana ni rapa» (Job 14:1). Zacaca biʼniʼ sentir stale xpinni Jehová de dxiqué. Dede guyuu tu laa gunabaʼ gatiʼ (1 Rey. 19:2-4; Job 3:1-3, 11; 7:15, 16). Peru Dios Jehová, ni nápacabe confianza, siempre gucané ne gudixhedxí ladxidóʼcabe. Ne laaca bidii lugar guicá ni bizaaca ca xpinni lu Biblia para quixhedxí ladxidoʼno ne gusiidiʼ laanu (Rom. 15:4). Casi ni bizaaca José, xiiñiʼ Jacob, ti dxi sti dxi si guca José esclavu stiʼ ti hombre ni qué runi adorar Jehová ne maʼ qué ñuu ra nuu bixhoze ni nadxii laa (Gén. 37:3, 4, 21-28; 39:1). Ne laaca guníʼ xheelaʼ Potifar gucalaʼdxiʼ José nilaxoo laa neca cadi dxandíʼ ni. Qué nuyubi Potifar ñanna pa dxandíʼ ni caníʼ gunaa que, sínuque guluu José cárcel ne raqué bindiibicabe laabe né cadena (Gén. 39:14-20; Sal. 105:17, 18). Rihuinni dxichi gupa José stale razón para niree gana. w20.12 16, 17 párr. 1-4

Tobi de ca cosa ni jma risaca guníʼ Jesús naquiiñeʼ guinábanu lu ca oración stinu nga «gaca santificar» lá Dios (Mat. 6:9). ¿Xi riníʼ gaca santificar xiixa yaʼ? Riniʼni gaca ni santo o nayá. Peru zándaca chuʼ tu guinabadiidxaʼ: «¿Cadi xa santo o nayá lá Jehová? ¿Xiñee caquiiñeʼ gaca santificarni yaʼ?». Para gánnanu ni la? caquiiñeʼ guiníʼ íquenu xi guiráʼ cosa rugaanda ora riníʼcabe lá tuuxa. Cadi lú guiʼchiʼ si nga ricá lá binni ne cadi para guiníʼ si tuuxa ni. Sicaríʼ ná Biblia: «Mejor nga guiníʼcabe ni galán de tuuxa que gapa stale cosa risaca» (Prov. 22:1; Ecl. 7:1). ¿Xiñee nabé risaca ni yaʼ? Purtiʼ ora riníʼcabe lá tuuxa la? maca nánnanu ximodo naca binni ca. Nga runi ni jma risaca nga cadi modo ricá diʼ lá tuuxa o modo riníʼ binni ni, sínuque ni riníʼ ique binni ora guʼyaʼ ni ne ora gunadiaga ni. Ora riníʼ binni xiixa ni cadi dxandíʼ de Jehová la? cayuni atacarcaʼ o cayuni biidicaʼ labe. w20.06 2, 3 párr. 5-7

Ora riuu xhaatanu xizaa pur ca problema ni nápanu dede maʼ qué zanda guiníʼ íquenu sti cosa. Zándaca chuʼ xhaatanu xizaa qué gudii bueltu ni runi ganarnu para gápanu ni iquiiñenu, o gaca huaranu ne maʼ qué ganda gúninu dxiiñaʼ hasta gunítinu ni. Laaca zándaca chuʼnu xizaa guchéʼnenu Dios ora tídinu xiixa prueba o dede guiníʼ íquenu xi gúninu ora gucaalú ca xpinni Binidxabaʼ xquidxi Dios. Zándaca guinabadiidxanu: «¿Ñee malu nga chuaaʼ xhaataʼ xizaa pur ca cosa riʼ la?». Sicaríʼ gudxi Jesús ca discípulo stiʼ: «Cadi chuʼtu xizaa» (Mat. 6:25). ¿Ñee caniʼbe qué lica ziuʼnu xizaa la? Coʼ. Guyuu caadxi xpinni Jehová dxiqué laaca guyuucaʼ xizaa ne cadi pur nga maʼ qué ñuulaʼdxiʼ Jehová ni bíʼnicaʼ (1 Rey. 19:4). Ni nuu Jesús guiníʼ né ca diidxaʼ riʼ nga pa chuʼ xhaatanu xizaa zándaca gucaani laanu gusaana de gúninu ni ná Dios. w21.01 3 párr. 4, 5

Zabidxi Jehová ne Jesús cuenta ti hombre pur modo guni tratar familia stiʼ (1 Ped. 3:7). Napa Jehová familia stiʼ guibáʼ ne lu Guidxilayú ne laa nga Xaíque stícabe, nga runi nápabe autoridad para quíxhebe xi guni ca xiiñibe ne gúʼyabe guni cumplircaʼ ni (Is. 33:22). Jesús nga xaíque ndaaniʼ congregación ne laaca napa derechu quixheʼ xi gúninu ne guʼyaʼ gaca cumplir ni (Gál. 6:2; Col. 1:18-20). Cásica Jehová ne Jesús la? ti xpinni Cristu ni naca xaíque stiʼ ti familia naquiiñeʼ guicaa decisión pur familia stiʼ (Rom. 7:2; Efes. 6:4). Peru laaca maca nexheʼ padé rindá autoridad stibe. Ne ora quíxhebe xi gaca ndaaniʼ familia stibe, naquiiñeʼ chinándabe ca principiu ni zeeda lu Biblia (Prov. 3:5, 6). Laaca naquiiñeʼ ganna xaíque stiʼ ti familia qué gapa autoridad para quixheʼ xi guni binni ni cadi naca familia stiʼ (Rom. 14:4). Ne ora riniisi ca xiiñibe ne rireecaʼ de ra lídxibe, maʼ cadi laabe nga autoridad sticaʼ, peru qué rusaana de guni respetarcaʼ laabe (Mat. 19:5). w21.02 2, 3 párr. 3-5

Zusihuinni ti binni ni naca xaíque de ti familia nadxii familia stiʼ ora gudii ni caquiiñecabe. Peru cadi naquiiñeʼ guiaandaʼ laabe ni jma risaca nga gacanebe familia stibe chuʼcaʼ jma gaxha de Jehová (Mat. 5:3). Guidúʼyanu ejemplu stiʼ Jesús. Dxi cabe lu yaga ra chigátibe ne cayacanabe, gúdxibe Juan gapa jñaabe (Juan 19:26, 27). Ca ni naca xaíque de familia zándaca laaca nápacaʼ stale dxiiñaʼ risaca. Peru naquiiñeʼ gúnicabe xhiiñacabe jneza para guiníʼ binni bien de Jehová (Efes. 6:5, 6; Tito 2:9, 10). Ne laaca zándaca nápacabe xcaadxi responsabilidad ndaaniʼ congregación, casi gúnicabe visita de pastoreu ne gácacabe ti ejemplu galán purtiʼ guizáʼ runi predicárcabe. Laaca risaca guni estudiárcabe Biblia guiráʼ dxi né xheelacabe ne ca xiiñicabe. Zudii familia stícabe xquixe peʼ laacabe, purtiʼ cudiicabe ni caquiiñecaʼ ne cayacanécabe laacaʼ para chuʼcaʼ nayecheʼ ne chuʼcaʼ jma gaxha de Jehová (Efes. 5:28, 29; 6:4). w21.01 12 párr. 15, 17

Stiidxaʼ Dios ruzeeteʼ ruuyaʼ ti gunaa nuu xpiaaniʼ cadi guiaadxaʼ gastiʼ ra lidxi, rizíʼ ne rutoo layú ne runi negocio (Prov. 31:15, 16, 18). Cadi ti criada ni qué gapa derechu guiníʼ nga laabe, sínuque napa xheelabe confianza laabe, rinabadiidxaʼ ne rucaadiaga laabe (Prov. 31:11, 26). Ora runi respetar ti hombre xheelaʼ, dede riuulaʼdxiʼ xheelaʼ guzuubaʼ stiidxabe. Neca maʼ biʼniʼ Jesús stale cosa, runi respetar autoridad stiʼ Jehová ne cadi pur nga riníʼ ique qué risaca (1 Cor. 15:28; Filip. 2:5, 6). Nga ca nga runi ti gunaa nuu xpiaaniʼ, runi respetar xheelaʼ ne cadi pur nga riníʼ ique qué risaca. Racanebe xheelabe purtiʼ nadxiibe laa, ne ni jma risaca nga rúnibe ni purtiʼ nadxiibe ne runi respetarbe Jehová. Peru qué zuzuubaʼ ti hermana stiidxaʼ xheelaʼ pa canabaʼ laabe gúnibe xiixa ni qué riuulaʼdxiʼ Jehová. w21.02 11 párr. 14, 15; 12 párr. 19

Cumu nadxiinu Jehová la? huayacaneni laanu guni huantarnu ora sananda binni laanu. ¿Xi biʼniʼ ca apóstol dxi biʼniʼ mandar Sanedrín gusaana de guni predicarcaʼ yaʼ? Cumu nadxiicaʼ Jehová la? guniʼcaʼ: «Jma naquiiñeʼ guzúʼbadu stiidxaʼ Dios casi gobernante que guzúʼbadu stiidxaʼ hombre» (Hech. 5:29; 1 Juan 5:3). Casi ca apóstol que, tiempu riʼ laaca canazananda gobiernu ca hermanu stinu peru cayuni huantarcaʼ purtiʼ nadxiicaʼ Jehová. Ora raca nanalaʼdxiʼ binni laanu qué riuʼnu triste, sínuque riéchenu (Hech. 5:41; Rom. 5:4, 5). Zándaca naquiiñeʼ guni huantarnu ora gucaalú familia stinu laanu. Ora guʼyaʼ familia stinu maʼ cayúninu ni ná Jehová zándaca gábicaʼ laanu caguite ca hermanu laanu o guiniʼcaʼ maʼ zeʼ xpiaaninu (bichaaga ni né Marcos 3:21). O zándaca dede gácacabe naduxhuʼ né laanu. Peru cadi guidxagayaanu purtiʼ Jesús guníʼ: «Laaca ndaaniʼ lidxi binni nga guiree ca enemigu stiʼ» (Mat. 10:36). w21.03 21 párr. 6, 7

Ora guni invitar ti publicador laanu chinenu laa estudiu stiʼ, naquiiñeʼ gucaʼdiáganu laabe ne estudiante ca. Zacá ziuʼnu listu para gacanenu. Laaca naquiiñeʼ gápanu cuidadu cadi guininu stale, cadi gucueezanu maestru ca ora caníʼ o guchaʼnu de diidxaʼ. Peru zanda gudiʼnu xiixa comentariu, guzéʼtenu ti ejemplu o gúninu ti pregunta ni gacané estudiante ca guiene chaahuiʼ ni caziidiʼ. Nuu tiru zudiʼnu cuenta cadi naquiiñeʼ peʼ guininu stale. Peru pa guni felicitarnu ne guizaaláʼdxinu estudiante ca, zacaneni laa guni progresar. Guzéʼtenu xiixa experiencia stinu. Zanda guinínenu estudiante ca ximodo bizíʼdinu de Jehová, ximodo bidxíʼlunu xiixa guendanagana o ximodo huayacané Jehová laanu (Sal. 78:4, 7). Zándaca ndiʼ nga ni caquiiñeʼ estudiante ca. w21.03 10 párr. 9, 10

¿Tu laa nga naquiiñeʼ guisaca ora ribeendunu ni galán lu predicación? Bicabi Pablo pregunta riʼ ora bicaa ca diidxaʼ riʼ ra nuu ca hermanu de Corinto: «Naa bidxiibaʼ, Apolos bizee, peru Dios bisiniisi ni, nga runi, nin ni rudxiibaʼ ne nin ni ruzee guirutiʼ naca, sínuque Dios nga naquiiñeʼ guisaca purtiʼ laa nga rusiniisi ni» (1 Cor. 3:6, 7). Cada biaje cueendunu ni galán ora guni predicarnu, naquiiñeʼ gusisácanu Jehová, cásica biʼniʼ apóstol Pablo. ¿Ximodo zanda gusihuínninu rudiʼnu xquixe peʼ pur privilegiu ni nápanu de guninenu Jehová, Jesús ne ca ángel dxiiñaʼ yaʼ? (2 Cor. 6:1). Ora rúninu biaʼ gándatiʼ pur guinínenu binni de ca noticia galán stiʼ Dios. Cadi naquiiñeʼ si gudxíʼbanu bidxi stiʼ Reinu, sínuque laaca naquiiñeʼ guzeʼnu cani. Ora riuulaʼdxiʼ ti binni mensaje ni zinenu, rúninu stipa pur chuuláʼdxibe guiziidibe jma para guzulú guni estudiárnenu laabe. Ora ridúʼyanu cayuni progresar ti binni para gaca ti discípulo stiʼ Cristu la? riéchenu ora ridúʼyanu cayacané Jehová laabe para guchaabe modo riníʼ íquebe ne ni runi sentirbe. w20.05 30 párr. 14, 16-18