Jehová nga Dios «ni jma rusiecheʼ naa»

1, 2. a) ¿Ximodo runi sentir stale binni? b) ¿Xi zadúʼyanu lu artículo riʼ?

CA DXI stinu riʼ stale binni runi guiráʼ ni nuu lu náʼ para chuʼ nayecheʼ. Peru neca zacá ti ratu si riuucabe nayecheʼ. Ne stale de laacaʼ guizáʼ riuucaʼ triste ne runi sentircaʼ casi ñaca cayaadxaʼ xiixa lu xquendanabánicaʼ. Ne zándaca laaca nuu xpinni Jehová ni runi sentir zacá. Cumu nabáninu «lu ca últimu dxi» naquiiñeʼ gudxíʼlunu ca cosa ni riguu xizaa ne ni runiná laanu purtiʼ nadipaʼ zaca para laanu guni huantarnu cani (2 Tim. 3:1).

² Lu artículo riʼ zadúʼyanu xi zanda gucaa laanu chuʼnu triste ne xi zanda gúninu para guibiguetaʼ chuʼnu nayecheʼ sti biaje. Peru primé zadúʼyanu tu laasi zanda gacané laanu guibáninu nayecheʼ.

TU LAASI ZANDA GACANÉ LAANU GUIBÁNINU NAYECHEʼ

3. Ora ridúʼyanu guiráʼ ni bizáʼ Jehová, ¿xi rusiidicani laanu de laabe? (Laaca zanda gúʼyaluʼ ca imagen ca).

³ Qué huasaana Jehová de chuʼ nayecheʼ ne laaca racaláʼdxibe chuʼnu nayecheʼ. Nga runi maʼ bíʼnibe stale cosa ni racané laanu chuʼnu nayecheʼ casi pabiáʼ sicarú bíʼnibe guidxilayú riʼ, randa ridúʼyanu gadxé gadxé color, maʼ bidiibe laanu stale guendaró nanixe ne bizaʼbe ca manihuiiniʼ ca, nuu de laacame rucaacame laanu guxídxinu ora maʼ cadúʼyanu caguítecame. Rihuinni dxíchica guizáʼ nadxii Jehová laanu ne racaláʼdxibe guibáninu nayecheʼ.

Elefantehuiiniʼ: Image © Romi Gamit/Shutterstock; pingüinohuiiniʼ: Vladimir Seliverstov/500px via Getty Images; chivuhuiiniʼ: Rita Kochmarjova/stock.adobe.com; chupa delfín: georgeclerk/E+ via Getty Images

4. a) ¿Xiñee qué rusaana Jehová de chuʼ nayecheʼ neca nánnabe pabiáʼ cayacaná binni? b) ¿Xi runi Jehová pur laanu? (Salmo 16:11).

⁴ Neca naca Jehová «ti Dios ni nayecheʼ», nanna dxíchibe pabiáʼ cayacaná binni(1 Tim. 1:11). Qué rudiibe lugar gucueezani laabe de chuʼbe nayecheʼ. Nánnabe ti tiempu si nga nuu guendanagana, ne maʼ gudíxhebe padxí gunduuxebe cani. Né stale paciencia cabézabe guedandá dxi para cueʼbe guiráʼ yuubaʼ ni runiná ne ni riguu laanu triste. Peru laga guedandá dxi ca, guizáʼ rizaaláʼdxibe modo runi sentirnu ne cayúnibe xiixa pur laanu: racanebe laanu chuʼnu nayecheʼ (biindaʼ Salmo 16:11). Guidúʼyanu ximodo gucané Jehová Jesús para cadi gusaana de chuʼ nayecheʼ.

5, 6. ¿Xiñee riuu Jesús nayecheʼ?

⁵ De guiráʼ ni bizáʼ Jehová, Jesús nga ni jma nayecheʼ. ¿Xiñee yaʼ? Ti razón nga naca Jesús «casi Dios ni qué ridúʼyanu» ne laasibe nga ni jma rusihuinni guiráʼ cualidad stiʼ Jehová, Bixhózebe (Col. 1:15; 1 Tim. 6:15). Guiropa razón nga purtiʼ laabe nga ni jma xadxí huayuube gaxha de Jehová, Dios ra ridá guendanayecheʼ.

⁶ Laaca riuu Jesús nayecheʼ purtiʼ rúnibe guiráʼ ni racalaʼdxiʼ Bixhózebe (Prov. 8:30, 31; Juan 8:29). Ne cumu ruzuubabe diidxaʼ la? rusiéchebe Jehová (Mat. 3:17).

7. ¿Xi caquiiñeʼ gúninu para chuʼnu nayecheʼ?

⁷ Laanu laaca zanda guni sentirnu nayecheʼ pa gúninu stipa chuʼnu gaxha de Jehová. Pa cueenu tiempu guizíʼdinu modo riníʼ ique Jehová ne modo runi sentir la? jma zinándanu ejemplu stibe ne jma nayecheʼ ziuʼnu. Ne laaca riuʼnu nayecheʼ purtiʼ rúninu ni nabe ne riechenebe laanu (Sal. 33:12).a Neca zacá, ziuu biaje zuni sentirnu triste. Peru ¿ñee riníʼ nga maʼ cadi cayechené Jehová laanu la? Coʼ. Nanna Jehová nácanu binni ruchee ne riuu biaje riuʼnu triste ne racananu (Sal. 103:14). Yanna guidúʼyanu xi zanda gucaa laanu chuʼnu triste ne xi zanda gúninu para guibiguetaʼ chuʼnu nayecheʼ sti biaje.

CADI GUDIʼNU LUGAR CHUʼ XIIXA NI CUʼ LAANU TRISTE

8. ¿Ximodo zanda guniná ca guendanagana ni nápanu laanu?

⁸ Primé cosa ni zanda cuʼ laanu triste: ca guendanagana ni nápanu. Zándaca cayacananu purtiʼ cucaalúcabe laanu, purtiʼ pobre laanu o cayácanu pur ti desastre natural, pur xiixa guendahuará o purtiʼ maʼ huaniisinu. Guiráʼ ca ni bizéʼtenu riʼ zanda cúʼcani laanu triste jmaruʼ si ora qué zanda gúninu xiixa para guchaʼnu modo nabáninu. Biblia ruzeeteʼ ora nuu binni xizaa la? riuu triste (Prov. 15:13). Guidúʼyanu ni bizaaca ti ancianu láʼ Babis, lu tapa si iza guti bíʼchibe, bixhózebe ne jñaabe. Laabe ruzeetebe modo biʼniʼ sentirbe dxi nabánirucaʼ: «Bineʼ sentir nuaaʼ stubeʼ ne guirutiʼ zanda gacané naa. Bidxaagaluáʼ stale cosa ni guizáʼ bininá ladxiduáʼ ne pur laacani qué ñanda ñuaaniáʼ laacabe biaʼ ñuuladxeʼ». Casi bidúʼyanu ca, ora rápanu guendanagana zanda guni huarácani laanu ne guninácani ladxidoʼno.

9. ¿Xi zanda gúninu para guibiguetaʼ chuʼnu nayecheʼ sti biaje? (Jeremías 29:4-7, 10).

⁹ ¿Xi zanda gúninu para guibiguetaʼ chuʼnu nayecheʼ sti biaje? Zanda chuʼnu nayecheʼ pa gánnanu nuu cosa ni qué zanda guchaʼnu lu xquendanabáninu ne gudiʼnu xquixe peʼ Dios pur ca cosa ni nápanu. Stale binni riníʼ para ganda guibáninu nayecheʼ naquiiñeʼ gápanu guiráʼ ni iquíʼñenu, peru cadi zacá diʼ ni. Guzéʼtenu ti ejemplu, gudxi Jehová ca judíu ni yenécabe de esclavu guidxi Babilonia, neca nagana gácani para laacaʼ peru naquiiñeʼ gudxiilucaʼ ni ne gúnicaʼ guiráʼ ni nuu lu nacaʼ para guibánicaʼ nayecheʼ (biindaʼ Jeremías 29:4-7, 10). ¿Xi zanda guiziidiluʼ de laani yaʼ? Gunna nuu cosa ni qué zanda guchaaluʼ lu xquendanabániluʼ, guyuu nayecheʼ né ca cosa ni nápaluʼ ne bidii xquixe peʼ Dios pur laacani. Ne cadi guiaandaʼ lii nuu Jehová gaxha de lii ne zacanebe lii (Sal. 63:7; 146:5). Ti hermana láʼ Efi, gúpabe ti accidente ne maʼ qué ñanda nizabe, sicaríʼ guniʼbe: «Guizáʼ gucané Jehová naa, laaca gucané familia stinneʼ naa ne zaqueca congregación. Pa naa guireeʼ gana la? zusihuinneʼ qué risaca ni bíʼnicabe pur naa. Nga runi runeʼ stipa para chuaaʼ nayecheʼ».

10. ¿Xiñee zanda chuʼnu nayecheʼ neca nápanu guendanagana?

¹⁰ Zanda guibáninu nayecheʼ neca cadídinu lu guendanagana o cadiʼdiʼ familia stinu lu guendanagana (Sal. 126:5).b ¿Xiñee yaʼ? Purtiʼ cadi pur modo nabáninu nga riuʼnu nayecheʼ. Ti precursora láʼ María guníʼ: «Ora ridídinu lu guendanagana qué rusaana de chuʼnu nayecheʼ purtiʼ rietenaláʼdxinu guiráʼ ni maʼ guníʼ Jehová. Nuu biaje zadúʼnanu o zuyúbinu guinínenu tuuxa de ni cayuni sentirnu peru nuuca Jehová listu para gacané laanu ti cadi gusaana de chuʼnu nayecheʼ neca guizaaca intiica cosa lu xquendanabáninu». Neca nagana modo nabáninu yanna riʼ cadi guiaandaʼ laanu nagasi nga nuu guiráʼ guendanagana stinu casi ti huella ni rusaana tuuxa ruaa nisadóʼ, ti ratu si ruxhiá nisa ni, zaqueca nga ca guendanagana stinu maʼ xcaadxi si cayaadxaʼ para guxhiá Jehová cani.

11. ¿Ximodo racané ejemplu stiʼ apóstol Pablo lii?

¹¹ ¿Laga pa guzulú guiníʼ íquenu nápanu guendanagana purtiʼ maʼ bisaana Jehová laanu yaʼ? Ti cosa ni zacané laanu nga guiníʼ íquenu ni biʼniʼ ca xpinni Jehová de dxiqué, ca ni bidxaagalú guendanagana nabé naroʼbaʼ. Guiníʼ íquenu ejemplu stiʼ apóstol Pablo. Jesús peʼ bisaanané laabe ti dxiiñaʼ nabé risaca: chebe chigusiidibe de laa «ndaaniʼ guiráʼ guidxi, cásica ca ra nuu rey ne ra nuu ca xiiñiʼ Israel» (Hech. 9:15). Peru ni dxandíʼ la? guizáʼ stale guendanagana bidxaagalú Pablo biaʼ dxi bibani (2 Cor. 11:23-27). ¿Ñee riníʼ nga maʼ bisaana Jehová laabe la? Coʼ, ¿njaʼ? Ra biʼniʼ huantar Pablo guiráʼ guendanagana bidxaagalú, bisihuinni ni nuu Jehová gaxha de laabe (Rom. 5:3-5). Yanna guníʼ ique ni cazaacaluʼ. Cumu cayuni huantarluʼ ne cadi cucheeneluʼ Jehová neca nápaluʼ stale guendanagana la? gunna dxichi nuu Jehová gaxha de lii.

12. ¿Ximodo runi sentirnu ora qué raca ni naguixhe íquenu gúninu?

¹² Guiropa cosa ni zanda cuʼ laanu triste: ora qué randa raca ni naguixhe íquenu gúninu (Prov. 13:12). Laanu, ca xpinni Jehová riguíxhenu ugaandanu xiixa meta para gusihuínninu nadxiinu ne rudiʼnu xquixe peʼ laabe. Peru galán quixhe íquenu ugaandanu xiixa meta pa rábinu zanda gúninu ni, purtiʼ pa qué zanda ugaandanu ni la? zaguuni laanu triste (Prov. 17:22). Ti precursora ni láʼ Holly guníʼ: «Gupaʼ gana ñaaʼ Escuela para Evangelizadores del Reino o ñaaʼ niguneʼ servir ndaaniʼ sti guidxi o ñaaʼ niguneʼ servir Ramapo. Peru bidxaa modo nabaneʼ ne guizáʼ guyuaaʼ triste purtiʼ maʼ qué nugaandaʼ nin tobi de ca meta ni gudixheʼ iqueʼ nugaandaʼ, guizáʼ feu modo bineʼ sentir purtiʼ gupaʼ gana ñuneʼ stale cosa peru nin tobi qué ñanda ñuneʼ». Zaca peʼ nga runi sentir stale hermanu.

13. Pa qué zanda gúninu biaʼ ñuuláʼdxinu ñúninu, ¿xi zanda quixhe íquenu gúninu?

¹³ ¿Xi zanda gúninu para guibiguetaʼ chuʼnu nayecheʼ sti biaje? Cadi guiaandaʼ laanu riene Jehová laanu ne qué rinábabe laanu xiixa ni qué zanda gúninu. Risácanu nezalú Jehová pur ca cualidad sicarú ni nápanu ne cadi pur ca dxiiñaʼ ni rúninu ndaaniʼ xquídxibe. Ni jma risaca para Jehová nga guiráʼ ca cosa galán ni nuu ndaaniʼ ladxidoʼno ne ni riníʼ íquenu ne cadi guiráʼ meta ni zanda ugaandanu ndaaniʼ xquídxibe. Ni racaláʼdxibe nga guiénenu nuu cosa ni qué zanda gúninu ne cadi guchéʼnenu laabe (Miq. 6:8; 1 Cor. 4:2). Yanna, ¿ñee galán nga gacaláʼdxinu gúninu jma de biaʼ canabaʼ Jehová laanu gúninu la?c Coʼ. Nga runi pa qué zanda gúniluʼ biaʼ ñuuláʼdxiluʼ ñúniluʼ, gudixhe ique gúniluʼ ni zanda si gúniluʼ. Guzéʼtenu ti ejemplu, ¿ñee zanda gaca xhamíguluʼ ti joven ni nuu ndaaniʼ congregación stiluʼ para gacaneluʼ laa guni progresar la? ¿Ñee zanda gacaneluʼ ca hermanu ni maʼ huaniisi ni caquiiñeʼ tu gacané laacaʼ la? ¿Ñee zanda quixhe íqueluʼ chigacaneluʼ tuuxa, guiníʼneluʼ laa pur teléfono o guseendaluʼ ti mensaje ra nuu para cuʼluʼ gana laa la? Pa guyúbiluʼ modo gacaneluʼ xcaadxi, zaguu Jehová ndaayaʼ guiráʼ stipa ni gúniluʼ. Guníʼ ique mayaca guibániluʼ ndaaniʼ guidxilayú cubi ca ne racá zanda gúniluʼ stale cosa pur Jehová dede ca cosa ni qué niníʼ íqueluʼ pa zúniluʼ. Holly, hermana ni bizéʼtenu lu párrafo gudiʼdiʼ que guníʼ: «Ora runeʼ sentir nuaaʼ triste, riníʼ iqueʼ ndaaniʼ guidxilayú cubi ca zugaandaʼ ca meta ni maʼ gudixheʼ iqueʼ purtiʼ zabaneʼ sin qué chuʼ dxi gateʼ ne zacané Jehová naa».

14. ¿Xi sti cosa zanda gucaa laanu chuʼnu triste?

¹⁴ Guionna cosa ni zanda cuʼ laanu triste: guicá íquenu gápanu guiráʼ ni riuuláʼdxinu. Stale binni riquiiñeʼ ca red social ca para gucaacaʼ xcaadxi guiníʼ ique zabánicaʼ nayecheʼ pa chizacaʼ sti ladu, pa sicaʼ stale cosa, gúnicaʼ ni riuuláʼdxicaʼ ne gápacaʼ guiráʼ ni racaláʼdxicaʼ. Cadi malu nga gápanu ca cosa ni riuuláʼdxinu purtiʼ Jehová peʼ bizáʼ laanu para guiechenenu guiráʼ ni bizaʼbe. Peru stale binni maʼ bidii cuenta que ñuucaʼ nayecheʼ neca gúpacaʼ ca cosa ni guníʼ íquecaʼ zusiecheʼ laacaʼ. Ti precursora ni láʼ Eva guníʼ: «Ora ti binni ruyubi puru para laasi ne runi ca cosa si ni riuulaʼdxiʼ, qué riuu nayecheʼ né ni maʼ napa, siempre ruyubi gapa jma». Pa gácanu zacá zucaani laanu chuʼnu triste ne guireʼnu gana.

15. ¿Xi rusiidiʼ ni bizaacaʼ rey Salomón laanu?

¹⁵ Guiníʼ íquenu ni bizaaca rey Salomón, biyúbibe chuʼbe nayecheʼ ra gudixhe íquebe gúnibe ni riuuláʼdxibe. Ngue runi gudixhe íquebe gobe guendaró de ni jma galán, gucaadiágabe música ne guziʼbe cosa risaca ni guyuu tiempu que. ¿Xi guleendube yaʼ? Qué ñuube nayecheʼ. Ne laapebe guniʼbe: «Qué ridxá guielú binni né ni ruuyaʼ ne laaca qué ridxá diʼ diaga binni ne ni runadiaga» (Ecl. 1:8; 2:1-11). Ca cosa ni ná binni zanda cuʼ laacaʼ nayecheʼ, zeeda gácacani casi ca billete falsu, ruluíʼ dxandícani peru qué risácacani.

16. ¿Xiñee ziuʼnu nayecheʼ pa gúninu xiixa pur xcaadxi? (Laaca zanda gúʼyaluʼ ca imagen ca).

¹⁶ ¿Xi zanda gúninu para guibiguetaʼ chuʼnu nayecheʼ sti biaje? Bisiidiʼ Jesús laanu «jma nayecheʼ riuu binni ora rudii que ora ricaa» (Hech. 20:35). Ti ancianu láʼ Alekos guníʼ: «Riguixheʼ iqueʼ guneʼ neca ti cosahuiiniʼ pur xcaadxi, ora riníʼ iqueʼ ximodo gacaniáʼ tuuxa, maʼ qué riníʼ iqueʼ ni racalaʼdxeʼ ne nga rusiecheʼ naa». ¿Gunáʼ nga ca cosa ni zanda gúniluʼ para gacaneluʼ xcaadxi yaʼ? Pa gánnaluʼ cadiʼdiʼ tuuxa lu xiixa guendanagana, gudixhe ique cuʼluʼ gana laa, zándaca qué zuni chaahuiluʼ guendanagana ni cadíʼdibe peru guizáʼ zacaneluʼ laabe pa gucaadiaga chaahuiluʼ ni cazaacabe, pa gusihuínniluʼ rialuʼ laabe ne pa gusietenaláʼdxiluʼ laabe zanda guxhélebe ladxidoʼbe nezalú Jehová (Sal. 55:22; 68:19). Laaca galán gábiluʼ laabe qué ziuu dxi gusaana Jehová laabe (Sal. 37:28; Is. 59:1). Zanda gúniluʼ xiixa guendaró para binni ca o guni invitarluʼ laabe chizatu paxaraa, biʼniʼ invitar laabe chiguni predicarneluʼ laabe, guizáʼ zaguuni gana laabe. Ra quixhe íqueluʼ gacaneluʼ xcaadxi ne cadi guiníʼ íqueluʼ puru si ni caquiiñeluʼ la? zaquiiñeʼ Jehová lii para gacaneluʼ xcaadxi ne dxandíʼ peʼ ziuuluʼ nayecheʼ (Prov. 11:25).

17. ¿Xi naquiiñeʼ gúninu pa racaláʼdxinu guibáninu nayecheʼ? (Salmo 43:4).

¹⁷ Zanda chuʼnu nayecheʼ pa guidxíñanu gaxha de Jehová, Bixhózenu ni nuu guibáʼ. Biblia cayabi laanu Jehová nga Dios ni jma rusiecheʼ laanu (biindaʼ Salmo 43:4). Nga runi intiica si guendanagana guidxaagalunu, cadi guidxíbinu. Quixhe íquenu guidxíñanu gaxha de Jehová ne laabe zacanebe laanu guibáninu nayecheʼ para siempre (Sal. 144:15).