Ndaa ra rinabadiidxaʼ
◼ Xi guiráʼ naquiiñeʼ guni cani racalaʼdxiʼ guichaganáʼ ndaaniʼ Yoo stiʼ Reinu.
Ora gaca ti guendaxheelaʼ modo na ca conseju zeeda lu Biblia la? rusisácani Jiobá, ne jmaruʼ si ora chigácani ndaaniʼ Yoo stiʼ Reinu. Guiráʼ ni ruuyaʼ binni raca ndaaniʼ Yoo stiʼ Reinu rusihuínnicani ximódopeʼ nga xquidxi Jiobá. Nga runi, ca binnigola ca naquiiñeʼ gúʼyacaʼ xi chigaca ora guinabaʼ tuuxa Yoo stiʼ Reinu para guichaganáʼ, ne zacá gaca ca cosa ca jneza (1 Cor. 14:40).
Ca novio ca naquiiñeʼ gúnicaʼ ti guiʼchiʼ ra guicá racaláʼdxicaʼ iquiiñecaʼ Yoo stiʼ Reinu para guichaganacaʼ, ne naquiiñeʼ gúnicabe ni ne stale tiempu. Guiʼchiʼ ca naquiiñeʼ guseendacabe ni ra nuu grupu ni ruuyaʼ dxiiñaʼ stiʼ ca binni ridagulisaa ni nuu ra chigácani ca, ne zucaacabe padxí ne pora nga cá íquecabe iquiiñecabe ni. Naquiiñeʼ gánnacabe qué zuchaa diʼ ca binnigola ca ora raca ca guendaridagulisaa sticaʼ para gaca guendaxheelaʼ ca. Ne laaca naquiiñeʼ guihuinni runi ca novio ca ni jneza ne nabánicabe modo na ca conseju ne ca ley stiʼ Jiobá ni zeeda lu Biblia.
Para gaca guendaxheelaʼ ca modo na Dios la? cani chiguichaganáʼ ca naquiiñeʼ gábicaʼ grupu ni ruuyaʼ dxiiñaʼ stiʼ ca binni ridagulisaa xii nga cá íquecaʼ gúnicaʼ lu guendaxheelaʼ ca ante guiniʼcaʼ maʼ nuuni listu. Ca binnigola ca qué zaniʼcaʼ gácani modo riuuláʼdxicaʼ, peru pa gúʼyacabe nuu xiixa ni cadi jneza la? zábicabe ni ca novio ca, ne laacaʼ naquiiñeʼ guchaacaʼ ni chigúnicaʼ. Casi, pa racaláʼdxicabe xhidxi xiixa saa la? zanda iquiiñecabe cani zeeda si lu discu Kingdom Melodies ne cani zeeda lu libru ra cá ca diidxaʼ riuundaʼ stinu. Laaca naquiiñeʼ gúʼyacaʼ ximodo chigaca chaahuiʼ raqué ne modo chiguzuhuaa banguʼ. Pa zie tu cuee foto o chuʼ videu la? naquiiñeʼ ganna ca binni ca ximodo gúnicaʼ ni ti guihuinni cayuni respetarcaʼ ni cayaca racá. Zanda chécabe ra Yoo stiʼ Reinu ca ante para gúʼyacabe modo chiguiaana guirani, peru gúnicabe ni ora cadi cayaca nin ti guendaridagulisaa. Ne qué zacá diʼ nin ti guiʼchiʼ lu tableru ni caníʼ de guendaxheelaʼ ca, peru zanda guieeteʼ ni lu Guendaridagulisaa stiʼ Dxiiñaʼ Stinu para gánnacabe de guendaxheelaʼ ni chigaca ra Yoo stiʼ Reinu ca.
Pa chinécabe dama ne chambelán la? zanda iquiiñecabe binni ni caʼruʼ chúʼnisa; peru, ni cadi galán nga chuʼ tuuxa ládecabe ni cadi cayuni ni jneza o tuuxa ni gucaa binni guiníʼ laa pur xpiaʼ. Libana stiʼ guendaxheelaʼ ca naquiiñeʼ gudii ti binnigola ni, pa nuu, purtiʼ laacabe nga jma riénecabe Stiidxaʼ Dios ne jma jneza zudiicabe conseju de lu Biblia para gacané guendaxheelaʼ ca (1 Tim. 3:2).
Cumu nabé risaca nga dxiiñaʼ stiʼ binnigola ni gutiidiʼ libana stiʼ guendaxheelaʼ ca la? nga runi, naquiiñeʼ gánnabe xi guiráʼ nga naguixhe ique ca novio ca gúnicaʼ. Binnigola ca zanabadiidxaʼ laacabe ximodo guca xpiáʼcabe tiempu gúcacabe novio, ne galán nga guiníʼcabe ni dxandíʼ sin gucaachicabe gastiʼ. Pa tobi de laacabe maca bichaganáʼ ante la? naquiiñeʼ gusihuinni maʼ zanda guichaganáʼ sti biaje, modo na Stiidxaʼ Dios ne modo na ley (Mat. 19:9). Zúnibe ni ra guluiʼbe binnigola ca copia stiʼ guiʼchiʼ ra cá maʼ guca divorciarbe.
Ora guiniʼné ca novio riʼ ca binnigola ne chinándacaʼ ca conseju stícabe la? zaca xquendaxheelacaʼ sicarú ne nayecheʼ ziuu guiráʼ binni cheʼ racá (Pro. 15:22; Heb. 13:17).