Gu Fugo Nga “Kristano” Rogoyo Nainga?

ROGO gupai yo nga ka duni Kristano nga gine? Waigu rengbe oni ka karagapai? I asana aboro nga aguyo i asia yo bau rogo aringara nibakiakia na gu sanahe re, sidu bete siakasiaka gayo akaragapai gi du re:

“Si nayugo gupai nga ka pefuo Yesu na kini mangipai wa ko.”

“Si nayugo gupai nga ka duni wene sino boro na kini gamu ahe fu kura aboro.”

“Si nayugo gupai nga ka idapa Kristo ni Gbia na ni Batasi aboro.”

“Si nayugo gupai nga ka ndu ku pati Misa yo, kini gedi Arozaria, na kini di Ziazia Komonio.”

“Mi aberãngaha ya si naida boro ndu mbata ku kanisa yo tipa ka duni Kristano te.”

Zavura agu abuku nasakarogo afugoyo nafu kina vunduvundu sakarogoapaiyo. Nirengo, kura buku sa na asakarogopaiyo rogoyo bawe tii gu fugo nga “Kristano,” nga agu asakarogopaiyo duni bakiakia tona ti gu rogoyo nga ka “ida kuti gu pambori nga ga Yesu Kristo watadu ka du rogoyo” da ti gu nga “ka duni iriiri boro nga guni idi aboro nani.” Si airiwonga ka ino gupai nga badungu aboro nabihe ni kpakarakpakarapai tipa ka sakarogo gupai yo si ayugoho ka duni Kristano te.

Gu Sino nga ga Mbu Aboro I Nimangipai wa I Akpinyemuhe

Areme, dagba agu aboro nga aKristano ti kina rimo gbua—zavura dagba agu aboro ninaasungo rii abasungo sa kanisa yo—boro rengbe ka bi bakere kparakakparaka aberã tipa ngbatunga riiapai wa gu nga padu Mbori kugii pa ke Baibiri, gu berã nga ahe akuru nisaha, pa rimiso kanisa tihe kurogo birĩ zogarago, na pa fura boro tipa gani idapase fu kura aboro. Agu apai nabipa ruru sino mangaapai, ngbatunga gu du tipa riiapai wa ngbatunga gu nga pa bagude vuseyo, pa kodaba dagba kumba na kurani, na gupai du tipa agu aboro naraka wa kumba na dee zanga rogatise, si nada dedede ni mburu kere akango. Gupai naye nani nga gu sino nga ga mbu aboro i nimangipai wa i akpinyemuhe.

Ni kpiapai, kura bapengbanga sa nga ga gu kanisa nga ga aPurusitanti abawaraga bambeda tipa ka bandapa gu rengo nga ga kanisa “ka sia kumba sa nga guko ninaakodaba na akurako ni bakumba kurogo gaha rondo rugapai,” wogu gu waraga pangbanga nga Christian Century agumbaha. Gu kura abawisigipai tipa aida nga ga apambori afu gu berã a nga ida pa Yesu na nyanyakipaha tipa gbia bata te. I naida gupai nga aYuda, aMasarami, na gu kura aboro pambori “rengbe arengba a ka rimo ku ngbangbaturũ yo [wa kina aKristano],” wogu tingidapai sa agumbaha rogo gu waraga pangbanga nga The New York Times.

Ka oni rengbe ka mangaha, oni berẽnga pa gu boro nasongoda pa gu zogarago kina irangbii angera kurii pa amosoro ni nisongodi pa gu zogarago nga gu irangbii angeranga kurii pa amosoro ya, watadu gu boro nasongoda gu zogarago nga ga aboro nga gu du gaha andika ngbayo ni nisongodi pa gu zogarago nazoga aboro ngbaome, watadu gu boro nasongoda pa banda rago ni nisongodi pa de abere kusayo. Oni rengbe ka yaa, “gu boro re arengbanga ka duni gu boro nasongoda pa gu zogarago kina irangbii angera kurii pa amosoro watadu ni gu boro nasongoda gu zogarago nga ga aboro nga gu du gaha andika ngbayo watadu ni gu boro nasongoda pa banda rago te”—sidu gaoni pai ru aru. Si ki vura du wo, ho oni aberãpa gu kparakakparakaapai ni du ti gu bipai nga gu du agu aboro nani areme nga aKristano ti kina rimo gbua, oni nabi agu aida nga gu duni batuturũhe gbe ti akuraha na nga gu natagbagatihe dedede na gupai Baenge gu pambori nga ga aKristano, nga Yesu Kristo, anayugoho. Gu kparakakparaka aberã re nayugo ginipai tipa gayo ngbatunga pambori nga ga aKristano?—1 AKorindo 1:10.

Pa ida gupai nga i aria agu ayugopai nga ga aKristano tipa si rengbe na kura sino nga gu du ti gu regbo aboro araka rogo ningia gupai du pangbangaha ni gbangaha, a wa ani ka bihe. Ginipai Mbori na Yesu Kristo aberãha tipa ngbatunga gu ariaapai re? Ya mo agu aboro akanisa nga aguyo nasongoda agu ayugopai adunga tarãha rogo Kristo yo ya rengbe ka yamba tiyo niruruhe nga aKristano? Ani awisigo agi asanahe re rogo gu paparaha naye fuo gere.