Oni Gamu Ahe Dũ ki Kodi Gu Oni Aidaha Aida

“KA ONI vura ka yamba re ya bahõahe nga mi; si aimisanga re te, mbiko mi nasanahe tipa marã ni gamahe fu Yesu.” Agu afugo nga ga barumbatayo rogo gu pambori nga ga Apurusitanti re nayugopa gu kango aboro naatihe tipa gu dungura marã aboro apambori naadunguraha. Si nawira gupai nga, agu apambori i asigiraha, si namanga gaha sunge mbiko kina gu bakere mosoro aboro afuhe ka songodaha nani. Si naida marã duho i tumo gayo aborosunge nani, i meke abambu irisombori nani watadu ka mbakadaha nani, si naida i fu marã ka songoda gu tua nani nga ga tungusa wene pangbanga. Wai rengbe yo ka gbia gu marã rengbe tipa agi apai re?

Tipa dungu akanisa, i nagbia marã tipa agi apai re ti dungura sa-dagba-bawe be aboro.a Gu batungusi wene pangbanga du rimoko nga Norman Robertson ayaa: “Rogoda sa-dagba-bawe be aboro nga ga Mbori gene ka gbia marã tipa ka tumo nani tipa agu apai nabipa Gako Kindo auru kpotosende. . . . Si nga gu Gako gene Ko agbia mosoro ngbaha ka sa Wene Pangbanga i tungusihe.” Nizanga du Norman Robertson na ndundu ka tingida apefuo ko na pa gu sunge ko aida i mangihe, ko anyakasipai ki ya: ‘Anga boro nafu sa-dagba-bawe mbiko ni ima rẽ ka fuhe te. Ono si nga gu mangaapai nga ga giasangbaa. Pa zanga boro fu sa-dagba-bawe nga ziazia kuo ga Mbori andiko. Si kina sa wa gbarasa pa gako marã.’—Tithing—God’s Financial Plan.

Si nawira gupai gbe nga, oni ima ida ya pa fu agamahe du wa ka si du nipapara gu irisombori nga ga aKristano. Wa vura duhe wo, oni nabi gi kakaka sanahe tipa marã ti rimo pambori re ni gupai nafuda roni, watadu ni gupai angbanga ya? Gu bawisigipai tipa aida nga ga apambori nga boro Brazil du rimoko nga Inácio Strieder nakitangbaanga akanisa ya, i nadungura marã nirimo sa-dagba-bawe ka “tumo tipa agu apai nani du rogo gayo riigbu” na kini ya tipa gu gayo mangaapai re wee si “arunga te, si nigu mangapai angianga ga pambori ya.” Ko nafura tipa sangbana gi gayo mangaapai re ya, “agu aboro adunga tingba sunge marã ya, adekurugbo, agu aboro naraka tii abasura, na agu aboro arengbanga ka sakapai riyo yo wenengai ya, i nada kuti gu digisopai nga, Mbori ima gindigo yo na kurii gipai re ko kini idi i tumo marã fu ‘abatungusipai’ ki he gayo aborokporo i ra na gomoro.”

Oni vura nibakibangironi niyaa: ‘Ya mo agu akanisa narogoda sa-dagba-bawe be aboro re i namangasunge na Ziazia Kekeapai ngba ruru gene nzunzu? Watadu agu akanisa re nataba gunde Mbori ti aboro kini gburi gayo ahe? Ani penga rengo, ya mo Mbori naida ani gamu ahe dũ ki kodi gu ani aidaha aida, wa gu kura aboro agumbaha?’

[Gu rukutu kekeapai du bandu kpewaraga yo]