Ani Nga Ga Yekova Aboro Mbiko Gako Weneringise

“Ani . . . ni ga Gbia [Aboro].”—ROM. 14:8.

1, 2. (a) Tipagine duhe ti ni nimomu kadu niga Yekova boro? (b) Gini asanahe ani nika wisigopai tipaha?

NAIRIWO gu bawene momu Yekova afuhe fu awiri aYisaraere ho ko aya fuyó ni wee: “Oni adú ni gimi wene ũkumuko dagba kura rika aboro zegino dunduko.” (Gate 19:5) Areme, agu aboro du rogo gu dungurati nga ga aKristano, i na gu momu beyo nga kadu niga Yekova aboro. (1 Pet. 2:9; Yugo. 7:9, 14, 15) Si nga gu momu rengbe ani dunduko ka gbia undo behe nyeanye kindi.

² Anga padu ani niga Yekova aboro nga kina kungbo momu gbua te, ono si naye aye na tindiro furani. Kura aboro rengbe ka bakabangiriyo nga: ‘Ya mo mi arengba ka manga gupai Yekova akpinyemuhe bere? Ka mi mangi ingapai, ko do re ado kusayo? Ya mo padu mi niga Yekova boro nasa gupai nga ka mi dunga na ranirii ya?’ Si daada boro sana tiní na ngbatunga agi asanahe re. Gu nyanyakipa sanahe si aida boro berẽkuriihe nga: Gini aundo rengbe mi ka gbiaha ka mi du niga Yekova boro?

Padu Ani Niga Yekova Aboro Naye na Ngbarago

3. Wai ga Raba diaberã tipa ka mangasunge fu Mbori aye na undo furi?

³ Ya mo agu aboro nga ga Yekova yó i na ngbarago? Ani makianga gupai nadu tipa Raba nangia gu de-bäri nanaaraka Yereo yo. Zanga kapa, i asonosiri ri nairiso agu ambori nangia ga aKanano yó. Wa si avura duwo, ho ri agi pa agu adiabese ni Yekova asa aYisaraere i du nani kurii avurayo, ri aini gupai nga, ko nga ndikidi Mbori. Ri amoi gari raka ngbapai tipa ka batasa ga Mbori siasia aboro, si kini mo ka sa gupai nga ri mbu gari raka kubeyo. Ziazia Kekeapai nayaa: “Ati kina wo a i asapu ngbanga fu Raba nangia degbua mbiko mangaapai bambiko ri adi asunge ku gume, ki kedi yo ku zegi yo ngba kura gene akia?” (Yak. 2:25) Oni berẽnga pa gu wene aundo ri agbiaha ho ri adani ku dagba ga Mbori gigiri aboro, nga agu aboro ko anaayugopai fuyó tipa nyemuse na tipa ruru sarangbanga. Nairiwo wai rago angba ti ri ka bi gupai nga ri aima mbu gu gbegberẽ raka ri anaarakaha mbata! Ri adi kumba dagba awiri aYisaraere na ki vungu wiriri nangia Boaza aboro ainiko nigu ga Mbori kumba pako akii gbe.—Yos. 6:25; Ruta 2:4-12; Mt. 1:5, 6.

4. Wai Ruta agbia undo be gari diaberã kaa iriso Yekova?

⁴ Gu boro Moaba nangia Ruta adiberã tipa kaa iriso Yekova. Si nawira ho ri aduni nigude, ri anaairisa gu mbori nga Kemose na gu kura ambori nga ga aMoabo yó, ono fuo sona ri, ri aini gu ndikidi Mbori nga Yekova, na ki di kumba dagba aYisaraere nga guko naye kurogo gari ringara be gu ngbongi nadu rogo gako ringara. (Oni gedi Ruta 1:​1-6.) Kusa, ho aRuta na dekurugbo tame kumbaari nangia Orupa aguari ni wa sa na nakumbaayo nangia Naomi ka ndu ku Betereme yo, Naomi aya fuyó wee si naida i karagatiyo fuo agumeyo, mbiko raka adunga fuyó taata ringara aYisaraere yo te. Nirengo, Orupa aima ‘karaga tiri koyo gari aboro aduni, na koyo gari ambori aduni a,’ ono Ruta aakaraganga tiri te. Ri amangipai ringbisihe kuti gari idapase na ki ini da si aaida ri ra funi. Ri aya fu Naomi wee: “Ka mo zúngadi nga re mi mbú ro, ki karaga re tipa peka fuo ro ya. Bambiko ho mo ka ndu ku ho ni, mi andú kina ku ho a, ho mo ka anye ni, mi anyé kina ho a. Gamo aboro nikangia kina gimi aboro, ga Mbori ki ngia kina gi Mbori a.” (Ruta 1:15, 16) Gu siapai Ruta amangihe tipa kaa iriso Yekova re, si asari ri gbia undo be gu ga Mbori andiko nadu tipa adekurugbo, tipa airarungo na tipa agu aboro naadunga na rago beyo ya. Ri agbia ngbarago na kidu nibandabanda ri tiibe Yekova.

5. Ginipai oni nakparianga ha tipa agu aboro nanye niruruyo kuti iriso Yekova?

⁵ Isoke, si rengbe kadu nga oni ima ino bete agu aboro naanye niruruyo fu Yekova fuo kparayo gayó raka fuko. Oni sananga yó tipa agu aundo gbiayo ho be irisoko. Wa vura duhe nga aboro dunduko ninaagbiatiyo na akpakarapai, badungu agopai duho nasa rani ani idi kuti gupai Bake apapara Atambuahe akehe ki yaa: “Rago nangba ti agu aboro du gayo Mbori nga Yekova!”—Tam. 144:15.

Yekova Naho Kina Gupai Rẽ na Omerani

6. Tipagine si aidanga ti ni ani bakibangirani nga, ani arengbanga ka manga gupai Yekova akpinyemuhe berani ya te?

⁶ Isoke, oni avura baka bangironi singia oni rengbe ka manga gupai Yekova akpinyemuhe beroni ke. Si nitaatapai tipa boro naabaka bangirini tipa padu ní niga Mbori moyambu, pa raka ní kuti gako andiko, naapa fura ní tipa rimoko. Nikpiapai, Moize abi tiko nga ko arẽnga na gu sunge Mbori afuhe fuko nga ka ndu ka fura fu awiri aYisaraere na fu bakindo Ezipeta te. Ono Mbori asananga ko ko mangi gupai naarẽnga na ome ko ya te. Mbori aima ‘yugo gupai fuko’ si aaida ko mangihe. (Oni gedi Gate 3:​11; 4:​1, 10, 13-​15.) Mbiko wa Moize aidi na gu undo i afuhe fuko, ko agbia bakere ngbarago fuo nyasako gu sunge Mbori afuhe fuko. A wa Yekova asana Moize ko mangi kina gupai narẽ na omeko, kinawo a duhe areme tipa rani. Ko ima inoho nga kpakpa aboro du nga ani, sidu, ko kini idi ka undo rani. (Tam. 103:14) Mangasunge fu Mbori ni apefuo Yesu naye na ngbarago kuba bakabangirise, mbiko ngbatunga gu sunge re nafu undo fu aboro na kini sa ngbarago ti Yekova. Yesu ayaa: “Oni yé fuo re, . . . mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni.”—Mt. 11:28, 29.

7. Tipagine rengbe ani kadu ti ni na gu kido nga Yekova nika undo rani aundo tipa ani mangi gupai ko akpinyemuhe berani?

⁷ Ka ani aakido kuti ga Yekova ome, ko ngarasi rani angarasa ti aregbo dũ. Nikpiapai, Yeremaya adu nigu boro nanaafura na kina gunde. Sidu, ho Yekova asiako ni ko du nigako nebi, ko ayaa: “Ako Gbia Mbori! Mo ngére, mi aina nga waĩ ka fura te, bambiko mi nga kina paranga.” Fuo bete regbo, ko aya berewe wee: ‘Mi agumbanga pai berewe ti rimo Yekova te.’ (Yere. 1:6; 20:9) Wa si avura duwo, Yekova angarasiko ko ki tungusi gu pangbanga tipa agarã 40 aboro anaaidanga ka giaha ya. Yekova anaanyakasako ti aregbo dũ niyaa: “Mi du na mo, ka batasa ro.”—Yere. 1:8, 19; 15:20.

8. Wai ani ayugo gaani kido kuti Yekova?

⁸ A wa Yekova anyakasi aMoize na Yeremaya, ko rengbe arengba a ka ngarasa rani nga aKristano areme ani mangi agu apai ko aidaha berani. Gu nyanyakipa pai si aida ani mangihe nga ka kido kutiko. Ziazia Kekeapai nayaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” (Snz. 3:5, 6) Ani nayugo gaani kido kuti Yekova nimanga ani sunge na agu aundo ko afuhe furani rogo Fugoko nga Ziazia Kekeapai na rogo dungurati. Ka ani mbu Yekova ko ngbe furani mbatayo, he ho ka sa gupai nga ka ani dunga niruru rani fuko ya te.

Yekova Nangerafuo Gako Aboro Nibasasa

9, 10. Gini ngbatunga bandahe Atambuahe namba 91 akidohe tipaha?

⁹ Ho gu kura aboro naaberã ni kuriipa kpara gayó raka fu Yekova, i naabaka kina bangiriyo tipa gupai rengbe ka gbiayo ka i mangi ingapai, watadu ka i mangi gupai nika sa yó i du nigbegberẽ aboro bangiriko. Si nipa ngbarago nga, Yekova aima fu agu arugute dunduko furani rengbe ka undo rani ani banda gaani pagume naako. Ani makianga wai Atambuahe namba 91 afura tipaha.

¹⁰ Bake papara Atambuahe ayaa: ‘Gu boro nanye rogo gu barondo nga ga guko nga Bahe kisusi, ní nga gu boro sungu tii kirima guko duna tandu apai dũ. Ní aya fu Yekova, “Mo nga gi bagbuko nga gi gbata; gi Mbori, nga guko mi naakido kutiko.” Bambiko ko abátasaro wa zire nibati be gu gbina nga ga baimiru.’ (Tam. 91:1 -3) Oni kparia gupai nga, agu aboro nakpinyemu Mbori na kini kido kutiko, i nga agu aboro ko nakidohe ka banda yó. (Oni gedi Atambuahe 91:​9, 14.) Gini ngbatunga bandahe ko afura tipaha? Nirengo, Yekova abanda gu gako amoyambu abanda nadumbata tipa wa ka gu gene ngbatunga si adu nga Masiya nika ye rogoho du nibandabandaha. Ono tie, badungu kura gako ruru amoyambu kinaho i aziyo ku bambukiso yo, kini taki aguyo, na ki imi aguyo ngba gbegberẽ gene tipa ka i nyenga niruruyo fuko ya. (Eb. 11:34-39) Yekova angarasi yó i duna wingbaduse tipa ka hi agu apai i aagbiatiyo nani na tipa ka banda yó be gu kereapai ka rengbe ka gbarasayo rogo toro yo. Sidu tie, ani rengbe ka giarogo Atambuahe namba 91 nigu kidohe du tipa banda rani rogo toro yo.

11. Gine nga “gu barondo nga ga gu Ko nga Bahe ki susi,” na ada Mbori abanda yó rogoho?

¹¹ “Gu barondo nga ga gu Ko nga Bahe ki susi” bake papara Atambuahe afura tipaha re, si nga fugo masaku narukuba gu bandahe nga ga toro. Agu aboro naraka rogo gu gako barondo re nigako agino, i nibandabandayo be agu apai naida ka sayo i mbu gu idapase du yó nani kutiko na be gu boro naida ka sa yó i mbu kpinyemuko. (Tam. 15:1, 2; 121:5) Si nga barondo mbiko agu aboro adunga na idapase ya, i arengbanga ka inopai tipaha te. Herẽ, Yekova nabanda agu aboro naya fuko: ‘Mo nga gimi Mbori nga guko mi akido kutiko.’ Ka ani nye rogo gu bagbuko re, ani adunga na bakabangirise mbiko gupai nga ani zanga ga Mbori weneringise mbikopa ti ani kurogo ga Satana gbina nga ‘baimi azire’ te.

12. Gini kereapai naʹasada ka gberesapa gaani pagume na Mbori?

¹² Gini kerepai rengbe ka gbarasa gaani wene pagume na Mbori? Bake papara Atambuahe afura tipa badungu kereapai, du gu dagbaha yo nga, ‘gu ngbongi ninaata rogo bitimo, na gu gbarasa apai ninaamanga bebere uru.’ (Tam. 91:5, 6) Gu ‘baimi azire’ re aima zio dungu aboro ti gu gako gbina nga ga nyemu duna ranirii. (2 Kor. 11:3) Ngbaduse, rukö, gbiati nyemu aũzegino nga gu kura gene ko azio kura aboro ngbaha. Berewe a, ko nananga kura aboro rogo gu gene nga i niikpinyemu gayó ringara kisusi, na rogo gu yugopai nga ahe akuru nisaha gbiati zire pambori. (Koro. 2:8) Na badungu aboro aima ti kurogo gu gako gbina nga ga wasiwasi kodaba. Gi mangaapai re wakina ngbongi na si aima sa dungu amirioni aboro i mbu gu gayó nyemuse i adu nani mbata tipa Mbori.​—Oni gedi Atambuahe 91:​7-​10; Mt. 24:12.

Oni Banda Gaoni Nyemuse

13. Wai Yekova abanda rani be gu kereapai rengbe ka gbarasa parani rogo toro yo?

¹³ Wai Yekova abanda gako aboro be gi kereapai naida ka gbarasayo rogo toro yo re? Bake papara Atambuahe ayaa: “Ko arúga gako amaraika tipa ro, ka banda ro ngba gamo agene dunduko.” (Tam. 91:11) Amaraika nangbe furani kumbatayo na kini banda rani tipa ani tungusi wene pangbanga. (Yugo. 14:6) Kupati gu undo nga ga amaraika, agu aKristano nga abaakumba, i namangasunge na Ziazia Kekeapai wenengai tipa ka yugopai furani tipa ani du nibandabanda rani be zire ayugopai. I rengbe ka undo agu aboro namanga ome tipa ka diabe gu sino mangaapai nga ga zegino. (Tito 1:9; 1 Pet. 5:2) Na berewe a, gu riko nga ga ‘ruru kangara moyambu,’ si nafu gu riahe furani nga ga toro tipa si banda rani be gu zire yugopai nga ahe akuru nisaha, na be agu ahe naye na nyemu wasiwasi kodaba ti aboro, be merafuo aũzegino gbiati be orafuo worimo, na gu kura dungu nyemu gbegberẽ apai. (Mt. 24:45) Ginipai naundo roni oni sovura kuti gu kereapai re?

14. Wai rengbe ani ka mangasunge na gu bandahe Yekova afuhe?

¹⁴ Ginipai rengbe ani ka mangaha tipa ka nye rogo gu ga Mbori “barondo” nga ga bandahe? A wa ani naabanda tirani be kereapai, ngbatunga gu duwa béno, kuondiko watadu kaza, kinawo a si aida ani naabandatirani be gu kereapai rengbe ka gbarasa parani rogo toro yo. Sidu, si naida ani naamangasunge dedede na gu bandahe Yekova afuhe furani rogo agu awaraga kangara moyambu akusaha na rogo agu adunguratise nga ga dungurati na kikindigi adunguratise a. Si naida ani gbata undo agbata be abaakumba. Ya mo ani agbianga undo be gu wene asino du ti awirinarani nibasasa tee? Nirengo, gaani kodatise na awirina rogo dungurati naundo rani ani du ni airatatamana.—Snz. 13:20; oni gedi 1 Petero 4:10.

15. Tipagine si aida ti ni ani duna kido nga Yekova nika banda rani abanda be agu apai rengbe ka sa gupai nga ka ko idinga na gaani pai ya?

¹⁵ Ani na kido kuti Yekova nga ko arengbanga ka mbu rani pai mangi rani nga gu rengbe ka sako ko mbu rani te. (Rom. 8:38, 39) Ko nabanda dungurati be agu abarumbatayo nga ga pambori yó na be agu avurarani nga aboro-birĩ-zogarago, nga agu aboro aidanga aida ka imo rani ya, ono naida ka kpara rani kusayo ti gaani ziazia Mbori. Ga Yekova akidohe aima da nirengo nga: “Gu ũvura i ka mbakada ha kuti ro si adía nga be ro wa sa te.”—Yes. 54:17.

Da Nafu Ranirii Furani?

16. Tipagine zegino arengbanga ti ni ka fu ranirii fu aboro ya?

¹⁶ Ya mo padu ani niga Yekova aboro nika sa gupai nga ka ani dunga na ranirii ya? Oó, padu ani niga zegino aboro rengbe ka sa gupai nga ka ani dunga na ranirii ya. Gi zegino re nikparakparaha kusayo ti Yekova, na gu boro nazogaha nga kere gbegberẽ sino mbori na ko aima sa dungu aboro nigako akanga. (Yo. 14:30) Nikpiapai, agu ahe Satana amangasunge nani tipa ka dia aboro kusayo ti gayó ranirii nga zingo mosoro. (Oni ringbisinga ha na Yugoti 13:16, 17.) Ingapai a na ome ti ni si ananga aboro nani ka sa yó ni akanga. (Yo. 8:34; Eb. 3:13) Wa vura duhe nga azanga idapase nayawee i na ranirii beyo baraho i amanga gu gbegberẽ apai ni natagbagatihe na ga Yekova yugopai, anga i na ranirii beyo nirengo te. Sidu, agu aboro nadegatuyo fuyó, i nika da ada ni akanga fu ingapai na fu gu gbegberẽ mangaapai i amangaha.—Rom. 1:24-32.

17. Gini ngbatunga ranirii Yekova afuhe furani?

¹⁷ Ono tipa Yekova tigako, ko nika kusa gorani akusa kusayo be gu gbegberẽpai rengbe ka gbia rani ka ani fu tirani fuko. Ka pepai ngba kura gene, gaani raka wakina ga gu borokaza fuu gani raka fu gu munganga duna inohe tipa ní husi ní. Gu ingapai ani adihe ti avungurani, si nambusa rani dunduko. Ka ani fu tirani fu Yekova riimburu gu motumo tumorii nga ga Kristo, ani rengbe arengba kadu naa kido nga ani nika bata abata be sangbana gu ingapai re nyeanye kindi. (Yo. 3:36) A wa gaani kido kuti munganga nitona ka sona fuo dogoda ani na gaani kaza fuo ní bara dunguhe, kinawo a si aida gaani kido kuti Yekova niisono wa ani nikaa wirikipai tipa ko. Sidu, ka ani awirika fugo Mbori nitatamana, si nika undo rani ani kpinyemuko na ki di gunde tirani kusayo mbiko wa du ani nigako aboro.—1 Yo. 4:18.

18. Ginipai nika manga fu agu aboro du niga Yekova yó?

¹⁸ Yekova nafu ranirii fu aboro i sia gupai i aida ka mangaha nitiyo. Fugoko nayaa: ‘Oni sía unga, oni ki nye niungaroni, oni na awironi a, kaa kpinyemu Yekova gaoni Mbori.’ (Pa Rug. 30:19, 20) Ko naida ani yugu gaani nyemuse fuko nidia ani berã nitirani tipa ka mangasunge fuko. Anga padu ani niga Mbori aboro nika sa gupai nga ani zanga ranirii te. Kuba gure, si nika sa rani ani duna ngbarago nyeanye kindi.

19. Tipagine du padu ani niga Yekova aboro ti ni nigu weneringise arẽnga ani tipaha ya?

¹⁹ Nidu ani ni aboro ingapai, ani aarẽnga ani du niga Mbori aboro te, nga gu boro du nirengberengbeko. Ono ga Mbori weneringise arẽnga aboro tipaha ya zaki genehe furani. (2 Tim. 1:9) Sidu, Pauro akepai ki yaa: “Wa du ani ni ungarani, ani ni ungarani fu Gbia; wa ani nikpi, ani nikpi fu kina Gbia; watadu ani ni ungarani tie na ni kurugborani ani ni ga Gbia rani.” (Rom. 14:8) Nirengo, ani abiranga tirani mbiko gupai nga ani idi kadu niga Yekova aboro te.

Gaoni Karagapai Nga Gine?

• Gini aundo ani agbiaha be padu ani niga Yekova aboro?

• Tipagine rẽ ani arẽ ti ni ka manga gupai Yekova aidaha berani?

• Wai Yekova afu bandahe fu gako amoyambu?

[Gu kpiahe du ti kpewaraga 15]

Ani sana kura aboro tipa ka ino gu undo i agbiaha mbiko padu yó niga Yekova aboro

[Gu kpiahe du ti kpewaraga 16]

Gini bete agene duho Yekova abanda gako aboro ngbaha?