Abarayama Angia Boro Umbasitise

Abarayama sungu tii gu gako bamburokoo nafu nzereme fuko be kere faa uru. Wa sungu ko kaa ngera tuturũu, ko ya ngere ki bi akumba biata i niye kurogo gu rago re.a Zanga keesa, ko oro nibasa ka dusia agi agino re, na ki zungodi yó i ye ka ongoda tooni kpuko yo na ki ngba be bete riahe. Ko gumba gupai fuyo nga ko naida ka fu “bete riahe” fuyo, ono ko ki mbakadi wene riahe fuyo nga kpakuto, nzeme momunya, momunya, gbiati bawene pasio wiri bagara. Wa Abarayama amaa gi riahe re kubarabangiri gako agino, ko ayugongo kina bakere nyemuse sa tipa dia aboro kugume te, a wa ani ka bihe, ko yugu ndikidi umbasitise a.—Bambata Pai 18:1-8.

GINE NGA UMBASITISE? Umbasitise nga zanga du na rukö watadu kiisopatise. Gu boro duna umbasitise, ní naida aida kuti gupai nga kura aboro kinaho niima inohe kisusi ní rogo kura apai yo. (AFiripoio 2:3) Ní nadegatuni adega kuti agu aberãpai nga ga kura aboro i a fuhe, na kini kpinyemu ka manga agu asunge du paha kusande tipa yó.

WAI GU ABARAYAMA AYUGU UMBASITISE? Abarayama aduna nyemu mangasunge fu kura aboro. A wa ani nifura tipaha ti tonatonaha, ho Abarayama abi agu agino naadu biata re ni, ko aguari nibasa tipa ka mbakada riahe fuyo. Diako nga Sara atona ka mbakada riahe nibasa. Oni kpariapa gu boro naamanga dungu asunge: Abarayama aoro ka dusia agino, ko asanayo tipa ka fu riahe fuyo i rihe, ko aoro kuba anya yo na ki sia nya tipa ka imo ru, na ko afu agu ahe dunduko si aidaha tipa agu agino re. Kuba gupai nga ko fu agu asunge re dunduko fu kina gako amoyambu, gi boro umbasitise re amangi agu apai dunduko si aida ko mangihe. Ko aabingo tiko nga pako ima nyaka tipa ka manga ngbatunga asunge wa gure te.

Abarayama anaadegatuko adega kuti agu aberãpai nangia ga agu aboro naadu tii gako pagbia. Ziazia Kekeapai fura gbua tooni tipa agu afugo naadu dagba Abarayama na Sara. Apai ue rogo Ziazia Kekeapai nayugo gupai nga Abarayama adegetuko adega kuti agu aberãpai nangia ga Sara na ki mangihe. (Bambata Pai 16:2; 21:8-14) Ti kura regbo sa, gari berãpai ‘agberẽ agberã ti Abarayama gbe.’ Ono ho Yekova afura ni fu Abarayama nga ko bi gari berãpai niwenehe, Abarayama adegetuko na ki mangipai kutini.

GINI APAI ANI AWIRIKAHA BE GA ABARAYAMA KPIAPAI? Ka ani duna umbasitise nirengo, ani duadu na ngbarago tipa ka mangapai fu kura aboro. Ani duadu a na ngbarago tipa ka manga gupai rengbe ani ka mangaha tipa ka sa gayo raka si du niwenehe.

Gu gene ani akaragapai ngbaha kuti agu aberãpai nga ga kura aboro, si a nga gu kura gene nayugopa gaani umbasitise. Kuba gupai nga ani ká gu berãpai nga ga kura aboro mbiko gupai gbua nga ani niberẽhe te, si naida ani degeturani adega kuti agu apai kura aboro apehe. (Asanza 15:22) Ngbatunga gu degatue re naundo agu aboro aundo du na pagbia kurii akurayo. Bangerekuriisunge sa nga John ayaa: “Gupai bi mi he nga wene bangerekuriisunge nambu agu aboro ní amangasunge naayo i naagumba agu apai du riyo yó.” Kura fugoko berewe nga: “Umbasitise rengbe ka sa bangerekuriisunge ní bi gupai nga agu aboro du kutii beni ima rengba ka inopai kisusi ní. Na berewe a, anga boro ho watadu bangerekuriisunge rengbe ka yawee ní ini apai dunduko te.”

Ka ani aawirika Abarayama nidega ani turani kuti agu aberãpai nga ga akuarani na kini mangi agu asunge du paha kusende, Yekova nika ida aida na ani. Nirengo, “Mbori naka fu aboro rekangose, ono ko nafu undahe fu agu yo naumbasi tiyo.”—1 Pet. 5:5.

[Footnote]