Abarayama Angia Boro Nyemuse

Gene be Abarayama tipa ko hi gu gberarago du ko nani te. Diako nga Sara ima kpi. Gu gbinza bakumba re natingida gu dungu weneapai i anaamangaha na diako wa ko abi ri i nindu ka kpisido ri. Aume tona ka ga bangiriko yo be gu gberarago du ko nani kpotokoyo yo. (Bambata Pai 23:1, 2) Agi aume re ayugongo gupai nga mumungo boro nga ko te, ono ami nayugo gu bawene sino du tiko nga nyemuse.

GINE NGA NYEMUSE? Nyemuse nga gu dawedawe ngbanya navo boro kuti kurani watadu nasa boro ní naaberãpa kurani bakere gbe. Gu boro du na nyemuse, ní nayugo wai ní aberãpa agu aboro ní akpinyemu yó rogo gani mangapai yo, ní rengbe arengba a ka mbupa kura gani apai tipa yó.

WAI GU ABARAYAMA AYUGU NYEMUSE? Abarayama ayugu gupai ko ima kpinyemu gako aborokporo. Zanga kapa, Abarayama angia gu boro nanaamangasunge amanga. Ono wa si avura duwo, ko azanganga ngerafuo gako aboro rogo nunga yo na rogo toro yo te. Nirengo, Yekova nitiko aima bi Abarayama ko ningbembatayo fu gako aborokporo rogo irisombori yo. (Bambata Pai 18:19) Kurigure, Yekova nitiko aima fura tipa ga Abarayama nyemuse. Yekova afura tipa Abarayama ho ko afura ni tipa Yisaka ki ya ko nga gu ‘wiri Abarayama nga guko ko akpinyemuko gbe.’—Bambata Pai 22:2.

Ani rengbe ka bi ga Abarayama nyemuse a rogo gu gene ko akpari diako ngbaha nangia Sara. Abarayama aima kpara tipa ri. Wa ko avurangia nyanyaki kumba, zee aamanganga ko tipa ka kpara diako te. Abarayama aima yugo gu nunga ko adu nani ho ko akpari diako ni.

Abarayama ayugu gupai nga ko ima kpinyemu Mbori. Gako raka naabaha aayugopa gu nyemuse ko adu nani tipa Mbori. Rogo gini gene? Ani natingida gupai atingida Ziazia Kekeapai agumbaha rogo 1 Yoane 5:3 niyaa: “Gi nga du na nyemu Mbori re, nga ka ani kuti gako rugute. Gako rugute asusa nga omerani te.” Nibi gupai Ziazia Kekeapai agumbaha re, si nayugo gupai nga, Abarayama angia wene kpiapai tipa kpinyemu Mbori.

Dedede, ho Yekova anaazinahe ni fu Abarayama tipa ko mangipai, ko anaagia sangbako nibasa. (Bambata Pai 12:4; 17:22, 23; 21:12-14; 22:1-3) Singia gu zinahe Yekova anifuhe fuko re anidu nitaataha watadu nikpakarakpakaraha, ko anaabingo ho nipai te, ka si vura du vurũ nga ko aaruganga tiko nandu gupai Yekova aaida ko mangihe ti ni te. Ngbatunga agu apai re aanyakanga bangiri Abarayama te. Kangia gako Mbori anaaida ko mangipai, ko anaaida aida ka manga gupai re. Abarayama anaabi agu azinahe re nimomu tipa ka yugo gako nyemuse fu Yekova.

GINI APAI ANI AWIRIKAHA BE GA ABARAYAMA KPIAPAI? Ani rengbe ka wirika Abarayama niyugo ani nyemuse fu kura aboro, gbe fu gaani aborokporo. Si aidanga ani mbu agu apai du rogo gi zegino re si di gu regbo si aida ani naafuhe fu gaani aborokporo te.

Si naida ani sonosi gaani nyemuse a tipa Yekova. Ngbatunga gu nyemuse re rengbe arengba ka undo gaani raka. Nikpiapai, si rengbe ka fõngbaduraniyo ani mangi ariapai rogo asino rani, afugo rani, gbiati gaani mangapai tipa ka sa ngbarago ti Mbori.—1 Petero 1:14-16.

Nirengo, taatapai ngaha dedede tipa ka giasangba Yekova te. Ono ani rengbe ka du naa kido nga, gu Boro naundo Abarayama nga gu boro nayambu ko nga “wene badiare,” ní nika undo rani aundo. (Yesaya 41:8) Fugoko nga Ziazia Kekeapai nakidohe nga, ko nika ‘nyakasa rani, na ki ngarasi rani.’ (1 Petero 5:10) Nangba gu bawene kido Bakurea Abarayama nakido rani nani re!

[Box on page 11]

Ya Mo Pamungo Du Nga Kumba Kpari?

Badungu aboro rengbe ka karagapai kuti gi sanahe re ki ya ii. Kina iriworago kati tiyo tigaha ka ino gupai nga anga kina Abarayama sa nakpari te, Ziazia Kekeapai fura tipa dungu ruru akumba nga aguyo nakpari ti regbo fudifudiapai. Agu akura akumba nakpari ti regbo fudifudipai nakoda Yosefa, Davide, gu mokedi nangia Petero, agu abaakumba naadu rogo gu dungurati naadu Efesa yo, na zavura Yesu a. (Bambata Pai 50:1; 2 Samuere 18:33; Ruka 22:61, 62; Yoane 11:35; Amokedi 20:36-38) Si tie ziazia nga, Ziazia Kekeapai ayugongo gupai nga irairapai ngaha ka kumba kpari te.