Ga Yesu Zingabekpio Nga Unga Fu Aboro!

ANGA ga Yesu zingabekpio nga gu kungbopai gbua namangi bakuru kusayo adunga na undo ti ni furani ya te. Gu mokedi nangia Pauro agumbapa nyakaha ho ko akepai ni ki yaa: ‘I azingisi Kristo dagba kangba aboro, nimakawa aguyo nara ara. Bambiko wa kpio aye be boro, a wo zinga kangba aboro bekpio aye be boro. Bambiko wa aboro nakpi akpi dunduko rogo Adama yo, a wo rogo Kristo yo i adu adu niungayo dunduko.’—1 AKorindo 15:20-22.

I azingisi Yesu rogo Nisana 16, 33 F.B.K., si nangia gu uru aYudo anaaye na makawa gayo bambata aũati fu Yekova Mbori ku yekaru yo rogo kparakpara ba Yerusarema yo. Pa yamba Pauro Yesu nga bambata makawa ayugu gupai nga i azingisa kura aboro azingisa bekpio.

Agu afugo Pauro ngbefuo gure nasakarogo gupai yo ga Yesu zingabekpio amangihe. Ko ayaa: “Bambiko wa kpio aye be boro, a wo zinga kangba aboro be kpio aye be boro.” Bambiko gu ingapai na zangarengba ani adihe ti Adamu, ani dunduko nakpi akpi. Ono tie, pa fu Yesu ungako nimotumo nazaki gene fu aboro i kuru tii sunge kanga nga ga ingapai na kpio vurube zingabekpio. Pauro ape gipai re wenengai rogo ARomo 6:23 ki yaa: “Mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.”

Yesu nitiko aima saka pa gu undo ani agbiaha ti kpioko na ti gako zingabekpio. Ko aya tipa tiko wee: “‘Wiri boro ka du adu ni tumbatumba ko ku ari, ya gu ni ka idi pa ko, nyenye unga du adu be ni.’ Bambiko Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”—Yoane 3:14-16.

Mo moingo kpia gupai ku berãro yo nga—ka raka nyeanye kindi zanga ima, zanga rungo, watadu gberarago! (Yugoti 21:3, 4) Nairiwo gu bawene maabangirise re! Wene bawirikipai sa aya tipa gipai re wee: “Baraho duhe ni nga amurö rengbe ka tingida aboro naapa wai du raka niwiri guruhe, zingabekpio natingida aboro naapa wai du kpio niguruhe.” Si tie ziazia nga, ga Yesu zingabekpio nga unga fu aboro!