Gu Zingabekpio Nga ga Yesu, Ya mo si Amangi Nzunzu?

HERODOTA nangia gu bake apangbanga nga ga aGiriki ko naraki agarã wa 2,500 kusayo, ko ape pangbanga tipa agu aEzipeto naadu ti ragoko ki yaa: “Tingbafuo nyasa airakumuko ririahe nga ga nyemu, kumba akuru natindi kpia kangba rogo sanduki niwene kaikaihe, bagizoho adu wa mbiribe sa watadu mbiribe ue. Ko ayuguhe fu agu aboro naadu ho ki yaa, ‘Mo mbirihe na ki mangi rogatise bambiko ho mo ka kpi ni sunge adunga tiro te.’”

Ngbatunga gu bipai tipa raka na kpio re aadunga nivovopai fu aEzipeto te. Areme, agu afugo nga “Mo rihe, ki mbirihe, na ki mangi rogatise,” si nga gupai dungu aboro agumbaha. Ka si du nga raka ho fuo kpio te, tipagine ka mo agbianga ngbarago ti ni kina awere ya? Tipagine mo aˈasada ti ni kaa manga gupai du niruruhe? Ka si du nga raka ho berewe fuo kpio te, daada tie boro mangi yangara gaani kina awere kindi. Gu mokedi nangia Pauro aima fura tipa gipai re nibakerehe. Ko aafura tipa gu bipai du agu aboro nani aidanga kuti zingabekpio ya ki yaa: “Ka i azingisa nga kangba aboro ya, ‘ani rí he ki nimbiri he, bambiko gba ani akpí akpi.’”—1 AKorindo 15:32.

Rengo ngaha nga, Pauro aaidanga kuti gu bipai nga raka nadigo ho boro akpi ni te. Ko aima ida kuti gupai nga kpikpi aboro nika raka araka berewe nyeanye kindi zanga kpio. Gupai ko aidi kutini re, mburuhe adu rii nyanyaki gopai, nga gu rengo boro arengbanga ka tikangoho ya nga pa zingaa Kristo Yesu bekpio. Gu zingabekpio re nga gu bangisapai nanyakasi gu idapase nangia ga abawiriki.

Rogo ga Yesu zingabekpio nga ginihe furani? Waigu ani aino gupai nga zingabekpio aima manga nzunzu? Ani bingo wai Pauro afura tipa gipai re ho ko ake waraga ni fu agu aKristano naadu Korinda yo.

NA KA I AZINGISANGA KRISTO BEKPIO YA?

Dagba agu aKristano naadu Korinda yo, aguyo kinaho naaruganga tiyo naapa zingabekpio ya, na aguyo aidanga kutini a te. Rogo gako bambata waraga ko akehe fu agu aKristano naadu yo, ko afura tipa gu sangbanapai ka mangi ka si adunga zingabekpio aamanga nga te. Ko ayaa: ‘Ono si ngia zingabekpio dagba kangba aboro ho te, i azingisa nga Kristo tie te; na ka i azingisa nga Kristo ya, gaani tungusapai du tie gbua, gaoni idapase a si gbua. Ii, i ki bi rani ni adezire tipa Mbori. Gaoni idapase si gbua; oni kina rogo gaoni ingaapai kindi. Aguyo natiwi nirame rogo Kristo yo i aima kpi.’—1 AKorindo 15:13-18.

“He appeared to upward of five hundred brothers at one time . . . After that he appeared to James, then to all the apostles; but last of all he appeared also to me.”—1 Corinthians 15:6-8

Pauro atona afugo na gupai ka boro atinga kango nani ya nga: Ka si du nga i azingisanga kpikpi aboro te, Kristo nakpi, ka i azingisi nga ko ko raki te. Wa ka si adunga i azingisanga Kristo te, ka sangbanaha angia gine? Ka sunge dunga ti tungusa wene pangbanga te na ka si angia bakere ziree gbua. Gu zingabekpio nga ga Kristo angia gu banguapai aKristano amaa gayo idapase rihe, kodihe naapa gu bangua ayugopai nga Ziazia Kekeapai du tipa ga Mbori bakere pagbia, pa rimoko, gako Kindo, na pa gaani bata. Ka zingabekpio amanganga ya, gu pangbanga Pauro na kura amokedi aatungusaha ka si angia kungbo ziree gbua.

Gu kura sangbanapai kinaho ka mangi fuo gure. Ka i azingisanga Kristo bekpio ya, ka si adu nga aKristano naida kuti kungbo ziree gbua. Kurigure, anga kina ga Yesu zingabekpio sa ka aPauro na kura aboro ape ziree tipaha te, ono zavura gu boro nazingisi Yesu nga Yekova Mbori. Berewe a, kina ziree kadu nga Kristo “akpi tipa gaani ingaapai,” bambiko ka si adu nga Batasi nitiko abata nga bekpio te, wai ka ko aru ka batasa kura aboro? (1 AKorindo 15:3) Ka gure adu nga agu aKristano nakpi tipa tungusa wene pangbanga, i akpi na ziree maabangirise nga i nika zingisayo azingisa bekpio.

Pauro ada kuti gu digisopai nga: “Si ngia rogo kina gi unga re moi ani bangirani rogo Kristo, ani nga rungorungo aboro dagba aboro susi yo dunduko.” (1 AKorindo 15:19) Wakina gu kura aKristano, pa ga Pauro ahe agberẽ, ko ki gbiatiko na arungo, ki hi kpakarapai, na ki gbiatiko na kpio bambiko pa ida ko kuti zingabekpio na agu apai si arengbe ka mangaha. Nairiwo gu dogatise kangiaha ka si adu nga zingabekpio nga kungbo ziree gbua!

NDU GUPAI SI AIDA MO IDI TI NI KUTINI

Pauro aidanga kuti gu iraira bipai re nga rengo nangiaha te. Ko aima ino gupai nga i aima zingisa Yesu bekpio, na ko agurusi gipai re fu agu awirina naadu Korinda ki yaa, ‘wa Kristo akpi tipa gaani ingaapai, ku sangba Ziazia Kekeapai yo; na wai i akpisidi ko; na wa i azingisi ko ti biata uru ku sangba Ziazia Kekeapai yo. Na wa ko ayugu tiko fu Kefa; fuoho fu aguyo naanidu bawe na ue.’b Ko agbia kurapai kutini nga: ‘Ko ki yugu tiko fu agu awirina nasusi 500 ni ba sa, aguyo nye nidunguyo da ku awere, ono beteyo ti nirame. Ko ki yugu tiko tie fu Yakoba, fu amokedi dunduko tie. Ti yangara ha dunduko ko ayugu tiko fere.’—1 AKorindo 15:3-8.

Pauro atona fugo naakido nga Kristo akpi tipa gaani ingapai, i ki kpisidi ko, na i ki zingisi ko bekpio. Ginipai naasa Pauro ko duna kido wa gure? Ndupai sa angia, gu dungu adezire naabi gipai re. Fuo i zingisi Yesu, ko ayugu tiko fu dungu aboro (kodihe na Pauro nitiko), fu umba badona aboro, na fu dungu rimbasa aboro nga 500, nga aguyo naatinga kango kuti gupai abawiriki aatungusaha tipa zinga Yesu bekpio ya! (Ruka 24:1-11) Dungu agu aboro naabi gipai re adu kinaho ti rago Pauro na boro aima rengba ka sanayo tipa ka ino rengo gupai re ngbayo. (1 AKorindo 15:6) Boro ima rengba ka tikango kungba dezire sa watadu ue, ono angianga kungba adezire nga 500 ya.

Oni kparia gupai a nga, Pauro afura bara ue tipa kpio Yesu, pa kpisido ko, naapa zingisako bekpio ya si amangi “ku sangba Ziazia Kekeapai yo.” Agu agopai re nayugu gupai nga gu sangbaanebi du rogo Kuru Ndika tipa Masiya, si aima digiso tihe, na si ayugu gupai nga Yesu nangia gu Masiya i akido pako.

Wa si avura du nga dungu adezire nabi gipai re, gu kura aboro kinaho naatikango zinga Yesu bekpio ya. Agu akurayo anaaya gako abawiriki nadĩ kangbako na ki pe gu ziree nga i aima zingisako bekpio. Ono tie, gako abawiriki adunga na ome kurii agu abanzengere nangia ga aRomo yo i amoi yó i nibanda murö te. Agu akurayo ape gupai nga zingabekpio nga kungbo musumo gbua. Gupai natagbaga gi gayo pai re nga ko akuru fu dungu aboro na ti aregbo nibakiakia. Na berewe a, ya mo kungbo musumo arengbe ka pasa atĩo wagu ko amangihe Gariraya yo? (Yoane 21:9-14) Ya mo musumo du nasatihe niboro na ki yambu agu aboro nabihe tipa i ye ka zada kpotoho?—Ruka 24:36-39.

Berewe a, agu akurayo anaaya zingabekpio angia ziree gbua gako abawiriki arungbaha. Ono gini undo ka i agbiaha ti manga ngbatungapai wa gure? Tungusapa zingabekpio asa abawiriki i nisawia yó, i nirungosi yó, na ki moi yó ngba kpio. Tipagine ka i amoi gayo raka ti ni ngbapai tipa ka songoda kungbo ziree gbua? Kurigure, i amangi bambata dezirepai Yerusarema yo ku bangiri asogoyo nga agu aboro naima mbakadatiyo tipa ka zioyo tipa gu ziree ka i apehe.

Zingabekpio nga guhe naasa abawiriki i duna ngara tipa ka tungusapai tipa gayo Gbia si ki zavura du vurũ nga i agbiatiyo na kere arungosiro. Gu rengo du tipa zingabekpio ada nigu banguapai aKristano amoi gayo idapase riihe. Agu aKristano nadumbata amaanga gayo raka ngbapai tipa ka tungusapai tipa gu tatamanatatamana bayugupai aboro aimiko te. I amoi gayo raka ngbapai tipa ka tungusapai tipa ga Yesu zingabekpio bambiko ko nangia Kristo, Wiri Mbori, nga gu boro duna ome tiko, na undoyo na kini bandayo. Pa zingako bekpio ayugu gupai fuyo a nga i azinga azinga bekpio. Nirengo wa ka i azingisanga Yesu ya, ka gu pambori nga ga aKristano dunga ti ni te. Wa ka i azingisanga Yesu ya, ka ani aginga pako a te.

Ono tie, gini undo ani agbiaha areme tigu zingabekpio nangia ga Yesu?