Oni Diberã Tipa “Nyemu Awirina Nye Dagbaroni”!

1, 2. Tipagine Pauro ake waraga ti ni fu agu aKristano nangia aEbere?

GU GARÃ re angia 61 Fuo Batikayo Kristo. Agu adungurati nga ga aKristano rogo ringara Yisaraere dunduko adu rogo bete zereda. Wa vura duhe nga gu mokedi nangia Pauro adu bambukiso yo, ko amaabangiriko nga i nika kusako barambeda. I akusi gako badiasunge nangia Timoteo bambukiso yo barambeda, na i aambakada tiyo ka ndu ka bi awirinayo aKristano Yuda yo. (Eb. 13:23) Ono tie, si adu nga fuo garã bisue, Yerusarema nika du “nikisi [kisi]he kirikiri na aboro vura” kina wai Yesu afura tipaha ku mbatayo. Si aaida agu aKristano naadu Yuda yo na gbe aguyo naaraka Yerusarema yo diberã niˈipo. Yesu aima fu zahe fuyo nga si nika ida i oro niˈipo ho i nika bi agi apai re ni si ni tona ka manga.​—Rk. 21:20-24.

² Rogo gu 28 agarã wa Yesu agumba gu sangbanebi re, gu ruru aYudo nangia aKristano naaraka Yisaraere yo aima gbiatiyo na badungu asogote gbiati arungosi na i ki ima du na diabese. (Eb. 10:32-34) Wa si avura duwo, Pauro aima inoho nga i aima mbeda ka gbiatiyo na kere asada nga ga gayo idapase. (Mt. 24:20, 21; Eb. 12:4) Ko aaida i mbakaditiyo tipa gupai narengbe ka mangayo. Si aaida i du na bakere hipai na gu nyanyaki idapase narengbe ka batasa ungayo. (Oni gedi AEbere 10:36-39.) Sidu, ga Mbori toro afõ Pauro ko ke gu waraga fu agu awirina re nga gu naadu tipa kina boro gayo zingo. Rimo gu waraga re nga gu kitabu nga aEbere.

3. Tipagine si aida ani du ti ni na nyemu gu kitabu nga aEbere?

³ Ani dunduko areme si aida ani du na nyemu gupai Pauro akehe fu agu aKristano nangia aEbere rogo bambata sa kama agarã re. Tipagine? Bambiko ani kina rogo gu ngisapai i adu rogoho re. Rogo gi “kusa rago [du ni] gbegberẽ” he re, ga Yekova aboro ima gbiatiyo na ngbatunga asogote na arungosiro dũ. (2 Tim. 3:1, 12) Ani ima yugoho zanga kapa nga gaani idapase na futise fu Mbori ni nyanyakihe. Wa vura duhe wo, dungu rani naraka awere ti gu regbo du na wiri bete zereda rogoho zanga na kere arungosi. Ono tie, wakina agu aKristano naadu ti rago Pauro, boro ho si aida bangirini go ti gu nyanyakipa pai nga barambeda, ani nika gbiatirani na gu kere asada tipa gaani idapase!​—Oni gedi Ruka 21:34-36.

4. Gu veresi nga ga gu garã nga 2016 nga gine, na tipagine rẽhe arẽ ti ni?

⁴ Ginihe nika undo rani ani mbakaditirani tipa gupai du mbembedi furani ku mbatayo re? Rogo gu kitabu nga aEbere, Pauro furayo tipa dungu apai nga gu rengbe ka undo rani ani nyakasi gaani idapase. I nyakasipai yo tipa nyanyakipai sa rogo gu bambata veresi nga ga gu yangada kapita nga ga gu waraga re. I sia gu veresi re ni gu veresi nga ga gu garã nga 2016. Si nazungodi rani nga: “Nyemu awirina nye dagba roni.”​—Eb. 13:1.

GINE NGA DU NA NYEMU AWIRINA?

5. Ginihe nga du na nyemu awirina?

⁵ Ginipai si ayugoho furani kadu na nyemu awirina? Gu pa-Giriki Pauro amangisunge na ni nga phi·la·del·phiˈa, rogo yo nzunzu nga “ka kpinyemu wirina.” Du na nyemu awirina nakoda gu ngbatunga nyemuse du ni nyanyakihe, ni dawedawe he, na nakoda aboro, wa gu du dagba aborokporo watadu mbembedi abakure. (Yo. 11:36) Ani ananganga aboro i bi rani nga ani nga awirina te, ono ani nga awirina nzunzu. (Mt. 23:8) I fura tipa gu nyanyaki nyemuse du dagbarani na agi afugo re nga: “Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.” (Rom. 12:10) Ho i akoda gi nyemuse re ni na gu nyemuse du mburuhe rii arugute nga a·gaˈpe, si nasonosa wene pagume dagba ga Mbori aboro.

6. Wai du ndikidi aKristano agiarogo gupai yo nga ka kpinyemu awirina?

⁶ Ringbisihe kuti wene bawirikipai sa, “‘Nyemu awirina,’” “nga gu fugo i amanganga sunge na ni gbe ya rogo agu awaraga angianga ga aKristano ya.” Rogo gu pambori nga ga aYudo, gu fugo nga “wirina” akodanga kina agu aboro nga agume sa te, wa vura duhe wo, aYudo anaamangasunge na ni gbe kina tipa tiyo zanga koda agu aboro nangia aGendiria. Ono tie, aKristano anaadia ngbatunga aboro dunduko kugume. (Rom. 10:12) Wangia ani awirina, Yekova nayugopai furani ani kpinyemu awirinarani. (1 Tesa. 4:9) Ono tipagine du duhe ti ni ni nyanyakipa pai ani nikpinyemu awirinarani akpi kindi?

TIPAGINE NYAKIPA GUPAI TI NI NGA ANI KPINYEMU AWIRINA AKPI KINDI?

7. (a) Gini nyanyaki ndupai ani ayugo nyemuse ti ni fu awirinarani? (b) Oni funga kura ndupai duhe ti ni ni nyanyakipa pai tipa ani kpinyemu akuarani nyanyaki.

⁷ Gu taata karagapai duho nga Yekova naida ani yugu nyemuse fu awirinarani. Ani arengbanga ka ya ani nakpinyemu Mbori ono ani kini ká ka kpinyemu awirinarani te. (1 Yo. 4:7, 20, 21) Kurigure, ani naida aida na akuarani. Gipai re nga rengo gbe ti regbo kpakaraapai. Pauro aima inoho nga agu aKristano nangia aEbere ko ake waraga fuyo re, i aima mbeda ka mbu akpuyo na gayo ahe nga ga borose. Yesu aima fura tipa wai si adu nga gu regbo re nika du ni kpakarakpakaraha. (Mk. 13:14-18; Rk. 21:21-23) Sidu, si aaida agu aKristano re kpinyemu akurayo nyanyaki susi wai si adu mbata.​—Rom. 12:9.

8. Ginipai si aida ani mangihe awere mbata fu bakere gberãngbi tona?

⁸ Barambeda, i nika zabee ti gu kere wege nagbarasa ahe nga bakere gberãngbi. (Mk. 13:19; Yugo. 7:1-3) Fuani tie, si adu ni wenepai ani degeturani kuti gu rugute ga Mbori toro adu kugiipa kehe nga: “Oni yé, gimi aboro, oni rími ku rogo gaoni abambu, ki kisi gaoni angbadimo fuo roni, oni óko tironi ngbutuko toni daho pa imisiri ngbaduse ka susa ni.” (Yes. 26:20) Agi “abambu” re rengbe kadu nga adungurati. Yo du ani adunguratirani kuhoni nga awirina tipa ka iriso Yekova. Ono anga kina kodatirani dedede sa nga gupai si aidaha te. Pauro atingidi agu aKristano nangia aEbere nga i mangisunge na gu regbo re tipa ka nyakasa akurayo ‘kuti nyemuse na wene mangaapai.’ (Eb. 10:24, 25) Si naida ani sonosi nyemuse tipa awirinarani awere, mbiko si nika undo rani ti regbo gu asada rengbe ani ka gbiatirani na ni ku mbatayo.

9. (a) Gini momu du berani tipa ka yugo nyemuse fu awirinarani areme? (b) Oni funga gu kpiapai nayugo wai ga Yekova aboro ayugo nyemuse fu awirinayo.

⁹ Zavura awere mbata fu bakere gberãngbi tona, si naida ani kpinyemu awirinarani nyanyaki. Badungu awirinarani apai naima rungosiyo wa bazigizo, hihi ime mai, bakere bavugumo, sungburosungburo ime watadu kura agberãngo nga gu naye be ome zegino. Gu kura awirina nambu be asogote na arungosiro. (Mt. 24:6-9) Kurapai berewe nga gu kere zingo marã ani agbiatirani na ni na aˈuru dunduko ni sangbana raka rogo gi gbegberẽ zegino re. (Yugo. 6:5, 6) Wa gu ngbatunga kpakaraapai re akio kina ku mbatayo, kinawo a si afu momu furani tipa ani yugu bakio gaani nyemuse tipa awirinarani. Wa vura duhe nga “gu nyemuse du ti agu [aboro] ni dungu yo si azéra azera,” si naida ani yuguhe nga ani nikaa kpinyemu awirinarani akpi kindi.​—Mt. 24:12.^[1]

WAI DU RENGBE ANI KAA KPINYEMU AWIRINARANI AKPI KINDI?

10. Ginipai ani ka wisigopai tipaha awere?

¹⁰ Wa vura duhe nga ani nagbiatirani na dungu akpakarapai, wai du rengbe ani kaa kpinyemu awirinarani akpi kindi? Ngba gini agene du rengbe ani ka yugoho nga ani na gi ngbatunga nyemuse re tipa awirinarani? Tingbafuo gu mokedi nangia Pauro ya, “nyemu awirina nye dagbaroni,” ko apeke pa dungu agene nga gu rengbe aKristano ka manga gipai re ngbaha. Ani wisigingo pai tipa agu sita awere.

11, 12. Rogo gupai yo nga gine nga ka yugo nyemuse fu agu aboro naye koyo du oni ni? (Oni bi gu sura duti tonatonaha.)

¹¹ “Ka bangironi gó nga tipa yugo nyemuse fu agu aboro naye koyo du oni ni ya.” (Oni gedi AEbere 13:2.) Gu fugo nzunzu sa yo ho nga “yugo nyemuse fu agu aboro naye koyo du oni ni,” rogoyo nga “ka manga wenepai fu gu boro oni ainongo ni ya.” Gi fugo re rengbe ka tingida rani na gu kpiapai nga ga Abarayama na Roto. Agi akumba re dunduko ayugu weneringise fu agu aboro naye koyo du yo ni i ainongo yo ya. Si aye ka kura kusa nga agi aboro naye re angia amaraika. (Bam. P. 18:2-5; 19:1-3) Pauro afura tipa gi kpiapai re tipa ka ngarasa agu awirina nangia aEbere i du na nyemu awirinayo ni dia yo kugume.

¹² Ya mo ani nayugo nyemuse fu kura aboro ni dia ani yo kugume ku kpuraniyo tipa riahe watadu tipa i ye ka sungo na ani tipa ngarasaro? Anga si naida ani ngbeke kina agu ahe du na genoho kuari tipa gupai nga si du nga ani na nyemuse watadu ani nadia aboro kugume te; na si aidanga ani yambu kina agu aboro ku kpurani yo naima rengba ka karaga he furani ngba kura gene te. (Rk. 10:42; 14:12-14) Si naida gaani sasa du nga ka fu ngarasaro angianga ka ba iriwo rani ti aboro ya! Wa vura duhe nga ani arengbanga ka ino babi rimbasa na diani wenengai te, ya mo ani na nyemu ka dia yo kugume? (3 Yo. 5-8) Wa vura duhe nga oni na dungu apai tironi oni amangaha gbiati gu bakabangirise nga ga raka, si ni nyanyakipa pai nga “ka bangironi gó nga tipa yugo nyemuse fu agu aboro naye koyo du oni ni ya”!

13, 14. Wai du rengbe ani ka ‘tingida pa aguyo du ni vodivodi’ yo bambukiso yo?

¹³ “Oni tíngidi pa agi yo du [bambukiso yo] ni vodivodi yo.” (Oni gedi AEbere 13:3.) Anga Pauro aafura ane tipa agu aboro dunduko du bambukiso yo te. Ko aafura tipa agu awirina naadu bambukiso yo mbiko gayo idapase. Zavura Pauro a ko aima du bambukiso tipa agarã wa biama ti gu regbo ko ake agu afugo re fu agu aKristano nangia aEbere. (Frp. 1:12-14) Ko afu tambuahe fu agu awirina “nunga agu yo amangi [yo] nadu ni zizi yo” bambukiso yo. (Eb. 10:34) Agu awirina nangia aEbere re aadunga wa agu aboro naaundo Pauro bambukiso yo te mbiko i adu tuturũ tiko. Sidu tie, wai du ka i arengbe kaa berãpa ko aberã kindi? I arengbe ka mangaha wo ni mangayo kparakpee kakaka tipa ko.​—Eb. 13:18, 19.

¹⁴ Areme a, ani arengbanga kadu sa na agu awirinarani i nabayo ku bambukiso te. Ani arengbanga a ka undoyo wa gu wirina naraka mbembedi na bambukiso te. Ono ani ima rengba ka yugo gaani nunga na nyemuse ni tingida ani pa gu ruru awirinarani re dedede rogo gaani akparakpee, kini zungodi Yekova tipa yo. Ni kpiapai, ya mo ani natingidapa gu dungu awirinarani kodihe na rukutu agude i abafa yo ku bambukiso yo Eritrea yo, kodihe na agu awirinarani biata nga Paulos Eyassu, Isaac Mogos, na Negede Teklemariam nga aguyo naima dia agarã awere nga 20 ku bambukiso yo?

15. Wai du rengbe ani ka yugo irisa tipa gaani rogatise?

¹⁵ “Rogatise du ni irisiirisi pai dagba roni dunduko.” (Oni gedi AEbere 13:4.) Ani ima rengba ka yugo nyemuse fu awirinarani a ni nye ani gigiri rogo mangaapai yo. (1 Tim. 5:1, 2) Ka boro “yári . . . ri ndika ka manga gbegberẽ” fu wirina ni manga ni kodaba na ni watadu na gani borokporo, si ima rengba ka gbarasapa gu kido du nga mburu nyemuse tipa awirina. (1 Tesa. 4:3-8) Kurigure, oni berẽnga pa wai rengbe diakumba kadu ka si du nga ri kurubara gupai nga kumbari namangapai nibiriki nibiko kpia kundiri aboro. Ya mo ngbatunga mangaapai wa gure rengbe ka yugo nyemuse na irisa tipa gayo rogatise?​—Mt. 5:28.

16. Wai du rengba kina be agu ahe du berani aundo rani tipa ani du na nyemu awirinarani?

¹⁶ “Agu ahe du be roni si ki rengbe bangironi.” (Oni gedi AEbere 13:5.) Kido kuti Yekova nasarani ani rengbe kina be agu ahe du berani. Si nasarani ani du na ruru bipai tipa aũborose. (1 Tim. 6:6-8) Si naundo rani ani tingidi gupai nga gaani pagume na Yekova gbiati awirinarani nga aKristano nyakipaha kisusi guhe rengbe marã ka ngbehe. Gu boro rengbe kina be guhe du beni akpakananga he watadu ka bisirapai te; ni ambunga tiní a fu gu sino nga ga gbangbati na ngbaduse te mbiko si rengbe ka gbarasapa gu nyemuse nga ga awirina. Kuba gure, rengba kina be guhe du berani nasonosa gu toro nga ga gamahe.​—1 Tim. 6:17-19.

17. Wai du du padu ani na “aerã” wenengaĩ aundo rani tipa ani kpinyemu awirinarani?

¹⁷ ‘Ani erẽ aerã wenengaĩ.’ (Oni gedi AEbere 13:6.) Gaani kido kuti Yekova nafu wingbaduse furani, ka si vura du nga ani gbiatirani na kina gini kpakaraapai vurũ. Gu wingbaduse re tigaha nasarani ani du na wene bipai. Gaani nyemuse tipa awirinarani kodihe na wene bipai nika sarani ani nyakasi akuarani aidipase na ki ngarasiyo. (1 Tesa. 5:14, 15) Zavura ho i nika mbeda ka gbarasa gi zegino ni re ti regbo bakere gberãngbi, ani nika du na rengba berani ki “ngére ku ari yo, ki tumba” rirani, ni inihe ya pa batasa rani ima mbeda.​—Rk. 21:25-28.

18. Wai du rengbe ani ka yugo nyemuse fu abaakumba?

¹⁸ “Oni tíngidi pa agu yo [a du] ni abazogoroni.” (Oni gedi AEbere 13:7, 17.) Ho ani atingidapa gu nyanyaki sunge ni gaani abaakumba amangaha tipa rani zanga na i tumo marã fuyo, si nanyakasa gaani nyemuse na tambuahe tipa yo. Ani aidanga i zanga gayo ngbarago watadu i ni ũko aũko be gupai ani amangaha te. Kuba gure, ani nagiasangba yo na kini ra ni gorani fuyo, “niirisi yo bakere gbe ni nyemuse mbiko gayo sunge.”​—1 Tesa. 5:13.

ONI MANGIHE AMANGA BAKERE GBE

19, 20. Wai du rengbe ani ka yugo gu nyemuse nga ga awirinarani ni bakerehe?

¹⁹ Kango ti ni te nga badungu aboro ima ino ga Yekova aboro mbiko gayo nyemuse tipa awirinayo. Pauro aima inopai tipa gipai re a ti ragoko. Ono ko andu ku mbatayo ka ngarasa aboro dunduko “ya [i] susi asusa na ni kindi.” (1 Tesa. 4:9, 10) Ani ima rengba ka manga sonakumbatayo!

²⁰ Aa ani kaa bi gaani veresi nga ga garã vuru gu garã re naabaha, si naida ani berẽkurii agi asanahe re a: Ya mo mi rengbe ka dia aboro gbe kugume? Wai du rengbe mi ka tingidapa agu awirinarani du bambukiso yo? Ya mo mi nayugo ndikidi irisa tipa ga Mbori mbakadapai nga ga rogatise? Ginihe nika undo re mi rengbe kina be agu ahe du bere? Wai du rengbe mi ka nyakasa gimi kido kuti Yekova? Wai du rengbe mi ka kodabee wenengai na agu awirina nangbe ku mbatayo? Ka ani mangipai kuti agi apai bi anihe sita re, gaani veresi nga ga garã dunga gbua nga kungbo kekepai ti vuro gaani Bambu Kindo te. Si nikaa tingida rani ani gi gu rugute nga: “Nyemu awirina nye dagbaroni.”​—Eb. 13:1.