Toro Nga Dezire na Tororani

1-3. Gini apai naasa Rago Pendekote si du kia, na wai du agu apai re adigisi gu sangbanebi Ziazia Kekeapai aima furaha tipaha? (Oni bi gu sura du ti tonatonaha.)

GI URU re angia Rago Poso wiso bara ti ndu uru ribua. Gi Rago Poso re adu ni kparakparaha fu agu aboro naaraka Yerusarema yo. Si angia uru pumbo; na ki kingia rago sabiti a. Zanga kapa, i aima fu gu motumo i anaafuhe na uru dunduko yekaru yo. Aboro aima du na bakere ngbarago wa gbiamotumo ambakada tiko tipa ka fu wowoti motumo nga ga akpakuto ue nga ga vovo nganu. (Pa Mot. 23:15-20) Gi motumo re angia tonatona regbo ke nganu. Gu garã gipai re aamanga rogoho angia 33 Fuo Batikayo Kristo, na si angia Rago Pendekote.

² Baraho agi apai re dunduko aamanga ni yekaru yo, si adu nga kura nyanyakipa pai aandu ka manga, ono angianga yekaru yo ya, ono rogo gu vurubambu naadu ariyo. Badona aKristano wa 120 naadungura tiyo ku rogo ba sa “nikpari kina ku bani sa kindi.” (Amo. 1:13-15) Gupai si adu nga si nika manga fuyo adu wakina gupai ga gbiamotumo mangaapai na aRago Pendekote dunduko aayugoho, na si aadigiso gu sangbanebi gu nebi nangia Yoere agumbaha agarã wa 800 kusayo mbata fu gu uru re. (Yoe. 2:28-32; Amo. 2:16-21) Ginipai du ngaha si adu nga si nika manga nga gu narengbe kadu na nyanyakipaha re?

³ Oni gedi Amokedi 2:2-4. Ga Mbori toro akusuko kurii gu badona nangia ga aKristano naadungura tiyo ku rogo gu vurubambu naadu ariyo re. (Amo. 1:8) I atona ka pepai ni sangbanebi, watadu ka manga dezirepai nibipa gu iˈiriwoapai i abihe na ki gihe. Gu mokedi nangia Petero asakipa nyaka gupai namangi rogo gu uru re fu gu bakere rimbasa aboro naadunguratiyo. Fuani, ko aya fu agu aboro re wẽ: ‘Oni sá gaoni berã i ki bapatizi roni dunduko ti rimo Yesu Kristo i di gaoni ingaapai ti roni; oni ki di gu ũgume nga Ziazia Toro.’ Bange agu aboro nadi gu yambahe re kugume angia 3,000, i azi bapatiza, na ki gbia ziazia toro.​—Amo. 2:37, 38, 41.

4. (a) Tipagine si aida ani du ti ni na nyemu gupai namangi Rago Pendekote? (b) Gini kura nyanyakipa pai si awira wa si amangi rogo kina gu bangisa uru re dungu agarã kusayo? (Oni bi gu rukutu kekeapai duti digidoho yo.)

⁴ Tipagine du gu Rago Pendekote naadu rogo 33 Fuo Batikayo Kristo na nyanyakipaha furani? Anga si tipa kina gupai naamangi rogo gu yekaru naadu Yerusarema yo te. Kuba gure, si na nyanyakipaha mbiko Yesu Kristo nga bakere Gbiamotumo, ko nadigisi gu sangbanebi re.^[1] Gbiamotumo afu motumo nga ga akpakuto ue fu Yekova rogo gu uru re nga gu naaru kuba kurapai kia. Gu motumo i afuhe nga ga gu kpakuto du na agbooro rogoho aarukuba gu mbedimbedi abawiriki nga aguyo i adi yo dagba aboro ingapai fu Mbori i da ni awiriko. Rogo gi gene re, gene aza fu bete agu aboro naadu “ni makawa” dagba arikaaboro yo niyangaraha tipa i ndu ku ngbangbaturũ yo tipa kadu rogo gu Kindo nga gu nika ye na bakere amaku fu aboro giasangba dunduko. (Yak. 1:18; 1 Pet. 2:9) Singia gaani maabangirise du nga ka raka ngbangbaturũ yo na Yesu watadu ka raka nyeanye kindi auru kpotosende, gupai namangi re na bakere sangbanaha kurii gaani raka!

GUPAI NAMANGA HO I AMBEDA BORO NI NA TORO

5. Wai du duhe nga anga mbedimbedi aKristano dunduko nagbia gayo yambahe kina ngba bangisa gene te?

⁵ Ka i ya mo adu dagba agu abawiriki he azoro kuriyo wa mirãwe, bangiro arengbanga ka go ti gupai re te. Wiri tikö arengbanga kadu riro yo nga mo ni mbedimbedi ro na ziazia toro te, gbe ka si dunga mo ima gbia gu iˈiriwo gamahe nga ga pe gu kura afugo aboro te. (Amo. 2:6-12) Ya mo agu aboro dunduko i ambeda yo na ziazia toro i nambeda yo kina ngba gu bangisa gene nangia ga gu bambata badona nangia ga agu abawiriki naadu 120 re? Oó. Agu kurayo naadu ti gu regbo re Yerusarema yo rogo gu uru re agbia gayo mbeda he tigayo ti regbo bapatiza. (Amo. 2:38) Mirãwe aadunga ho bariyo te. Kurigure, anga mbedimbedi aKristano dunduko i ambedi yo na ziazia toro ti regbo bapatiza te. I ambedi aboro Somorona na ziazia toro fuo zioyo bapatiza. (Amo. 8:14-17) Ono tipa Korunerio na gako aborokporo, i ambedi yo na ziazia toro mbata fu i zi bapatiza.​—Amo. 10:44-48.

6. Ginihe mbedimbedi aKristano dunduko agbiaha, na gini sangbanapai duhe na ni kuriyo?

⁶ Anga aboro dunduko i ambeda yo na ziazia toro kina ngba bangisa gene te. Gu kura aboro kinaho nagbia gayo yambahe gbarakagbaraka, agu akurayo ziazia toro naundo yeeye i rugutiyo na pa gayo yambahe fuo gbanga regbo. Ono tie, ka si vura du nga kina gini ngbatunga yambahe du boro agbiaha, boro na boro du na gupai gu mokedi nangia Pauro apehe nga: ‘Wa idi oni pase, i amoi dezire fu roni nga gu Ziazia Toro nga ga kidohe, Ziazia Toro tigako nga dezire gaani ũkumbo.’ (Ef. 1:13, 14) Gi kparakpara mangapai nga ga ziazia toro re wakina gu bambata marã i afuhe fu boro mbata fu ni tona sunge (watadu nyanyaki kidohe) tipa gupai i nika mangaha funi fuo gure. Gure nasa mbedimbedi Kristano ni idi pai mbiko gu dezirepai re nga ni ima gbia yambahe.​—Oni gedi 2 AKorindo 1:21, 22; 5:5.

7. Ginipai si aida mbedimbedi Kristano mangihe tipa ka dia gani mosoro ngbangbaturũ yo?

⁷ Ya mo gu Kristano gbia gi dezirepai re nayugo ho nga ni du wa ka ni ga ku ngbangbaturũ yo? Oó. Gu boro re ima inopai tipa gani yambahe. Singia ni agbia gani mosoro ngbangbaturũ yo watadu ni agbianga ha te, si naru kuriipa du ni niruru ni tipa gani yambahe. Petero asakipai tipa gupai re ki ya: ‘Wa du he were awirina, oni fú tironi nyanyaki pa yamba roni si da ti rengo na pa sia roni a, bambiko ka oni amanga agi apai re, oni atinga wa sa te; bambiko kina a wo i ka fu rimo wenengaĩ gbe fu roni ku rogo gu nyenye ngbi nga ga gaani Gbia, nga Batasirani Yesu Kristo.’ (2 Pet. 1:10, 11) Sidu tie, si naida mbedimbedi aKristano ni basasa mangi ome tipa ka nye niruru ni. Ka ni amanganga ha wo ya, pa gani yambahe dunga na sunge ti ni te.​—Eb. 3:1; Yugo. 2:10.

WAI DU RENGBE BORO KA INOHO?

8, 9. (a) Tipagine duhe ti ni ni kpakarakpakarapai fu aboro i rugutiyo na pa wai i ambeda aboro na ziazia toro? (b) Wai du boro ainoho nga ni ima gbia yambahe nga ga ngbangbaturũ?

⁸ Badungu ga Mbori amoyambu areme duhe fuyo ni kpakarakpakaraha tipa i rugutiyo na pa wai mbedimbedi aKristano agbia gayo yambahe. Si nga guhe i ainongo pai tipa wai si amanga ya. Ga Mbori bambata ringbisapai adu nga aboro raki nyeanye kindi auru kpotosende ane. (Bam. P. 1:28; Tam. 37:29) Anga gupai Mbori aaidaha ti tonatonaha nga ka sia aboro i ndu ku ngbangbaturũ yo kadu ni abakindo na ni aboromotumo te. Kparakpara mbakadapai du nga gipai re. Gi yambahe re na aria ga boro berãpai, bipai, na maabangirise ho i ambeda yo ni na ziazia toro.​—Oni gedi AEfeso 1:18.

⁹ Wai du rengbe boro ka ino singia ni gbia gu yambahe nga ga ngbangbaturũ, nga ni ima gbia dezirepai nirengo? Ani nabi karagapai kuti gipai re rogo afugo Pauro fu agu awirina naadu ni mbedimbedi yo na toro Roma yo i aayambayo nga “gako aboro.” Ko aya fuyo wẽ: ‘Oni adianga gu Toro kugume nga ga akanga ko berewe sa gunde te; oni di kina gu Toro kugume nga ga mbutiawirinyaure ko, ani nakpara mbiko ko ki ya “Aba!” “Buba!” Toro nga dezire ni tiko na tororani ya awiri Mbori nga ani.’ (Rom. 1:7; 8:15, 16) Ka pepai taata, vurube ziazia toro, Mbori nasa gu boro ko ayamba ni re ni da ni dikumbo rogo gu mbakadapai nga ga Kindo kumbatayo.​—1 Tesa. 2:12.

10. Ginipai 1 Yoane 2:27 aida ka gumbaha ho si ayani wẽ mbedimbedi Kristano aidanga na gu kura aboro yugupai funi te?

¹⁰ Agu aboro nagbia gu kparakpara yambahe be Mbori re, i aidanga na gu kura dezirepai be boro te. I aidanga na gu kura boro kia ni wisigi yo tipa ka ino ginipai du mangi fuyo te. Yekova asanga yo i du na kapa rogoyo yo te. Gu mokedi nangia Yoane afura tipa gu mbedimbedi aKristano re ki ya: “Ziazia ko mbedi roni, oni ki ini ahe dunduko.” Ko ape kurapai berewe nga: “Oni tigaoni, gu mbeda roni ko ambedi roni na ni si nye kpotoroni yo, ka zingo boro amanga nga roni ni yugu pai fu roni ya; ono wa gako mbeda nayugo pa ahe dunduko fu roni, du ni rengo, adu nga ni zire ya, wa si yugu he fu roni, kina wo nyé oni rogo ko yo.” (1 Yo. 2:20, 27) Agiyo re naida na gu rabahe nga ga toro kina wai duhe fu gu kura aboro a. I aidanga boro wisigi yo tipa ka ino singia i ni mbedimbedi yo na ziazia toro te. Gu nyanyakipa ome du rogo zegino dunduko ima sayo i idi kuti gupai re!

PA ‘VUNGA YO BEREWE’

11, 12. Ginipai rengbe mbedimbedi Kristano ka bakabangirini na ni, ono ginipai ni akapanga tipaha ya?

¹¹ Ho ziazia toro asa Kristano ni ni ini gupai nga i ima mbeda ni na ziazia toro, bakere ariapai namanga rogo gaani raka yo. Yesu afura tipa gu ariapai namanga rogo ni yo re nga si wa ‘i vungu ni berewe.’^[2] (Yo. 3:3, 5) Ko asakipai berewe nga: “Ka mo báki nga bangiro ti gu pai ya mi foro, ‘I ka vunga roni avunga berewe’ ya. Yuge naya kina ku ho si akpi nyemu ni, mo ki nigi woroho agia, ono mo naina nga ho si aye ni, na ho si andu ku ho ni te; wo du gu boro i nivungu ni be Toro.” (Yo. 3:7, 8) Si ziazia tie nga, si ima kpakara tipa ka sakapai tipa gi yambahe re fu agu aboro naagbianga ha ya.

¹² Agu aboro gbia gayo yambahe ngba gi gene re rengbe ka bakabangiriyo nga: ‘Tipagine i nasia re ti ni? Tipagine i asianga kura boro ki ti ni ya?’ I ima rengba ka bi tiyo nga i arẽnga te. Ono i akapanga pa siayo te. Kpotoyo yo ima hi be bakere ngbarago na tambuahe. I nabi tiyo kina wai Petero adu ti gu regbo ga Mbori toro adu kugiiko ko ya: “I táasi rimo Mbori, Ba gaani Gbia Yesu Kristo, wa du ko navungu rani berewe ni gako bakere inapai ku rogo ga unga maabangirise mbiko gu zingabekpio nga ga Yesu Kristo, ku rogo gu ũkumbo azirã nga ya, agberã nga ya, agbandaka nga a ya, du ni igiigi he fu roni ngbangbaturũ yo.” (1 Pet. 1:3, 4) Ho mbedimbedi aKristano ageda agi afugo re ni, i ima inoho zanga kapa nga gu Bayo du ngbangbaturũ yo du na fura na yo.

13. Wai du ga boro berãpai aˈaria tihe ho i ambeda ni ni na ziazia toro, na ginihe naye na gu ariapai re?

¹³ Mbata fu ga Mbori toro yambu agi aKristano re, i aduadu na ngbarago na gu maabangirise nga ga raka auru kpotosende ane. I aakpinyemu ka bi gu regbo Yekova nika giriso gi kpotosende re, na i aaida kadu dagba agu aboro nika gbia agu amaku re kumbatayo. Si nawira wa i anaabi tiyo abi wa i nikaa dia agu aboro kugume nika zingabekpio. I aangera kumbatayo tipa ka raka rogo agu akporo i nika duduaha na kini ri gu zuzu angua i nika rũko ho. (Yes. 65:21-23) Tipagine gayo berãpai aˈariatihe ti ni tie? Anga rago du nagberẽ tiyo na gu maabangirise re te. I aˈarianga berãyo mbiko du yo ni fudifudiyo berãyo yo watadu akpakarapai te. Anga pa raka auru kpotosende ane gberẽ ti yo mbiko i bi gupai nga ome aboro nika bata abata be raka nyeanye kindi auru kpotosende te; anga si gbua nga i naida ka ino wai du raka ngbangbaturũ yo a te. Kuba gure, i aˈaria berãyo mbiko gu mangapai nga ga ga Mbori ziazia toro nga gu nayambuyo na ki aria gayo berãpai gbiati maabangirise.

14. Gini bipai du mbedimbedi aKristano na ni tipa gu raka i arakaha auru kpotosende ane?

¹⁴ Ya mo si naida ani dakuti gu digisopai nga gi mbedimbedi aKristano re naida ka kpi? Ga Mbori toro adu kugii Pauro ko karagapai kuti gi sanahe re ki ya: ‘Bambiko agu rani du rogo gi boro re ani nauko, wa du ani na tindiro; anga mbiko ani nakpinyemu i uruhe ti rani te, ono ani nakpinyemu i ukadi rani ku auru he, ya gu nga kpikpi he du ni mbirimbiri he be unga.’ (2 Kor. 5:4) Anga nyemu gi raka re du gbandaka tiyo si kini sa gupai nga i idi ka kpi niˈipo te. Kuba gure, i na nyemu ka mangasunge fu Yekova na uru dunduko wa sa na awirinayo gbiati abakureayo. Ono tie, ka si vura du nga i namanga kina ginipai vurũ, i natingidapa gu maabangirise atingida napido yo kumbatayo.​—1 Kor. 15:53; 2 Pet. 1:4; 1 Yo. 3:2, 3; Yugo. 20:6.

YA MO I YAMBU RO?

15. Ginipai ayugongo gupai nga i mbedi boro na ziazia toro ya?

¹⁵ Si rengbe kadu nga mo nabaka bangiro singia mo ima gbia gu yambahe re. Ka mo aberãha nga mo ima gbiaha, si naida mo berẽkurii gi nyanyakipa asanahe re. Ya mo mo bihe nga gu nyemu sunge tungusapai du tiro ima susa ga kura aboro dunduko? Ya mo mo nga gu wene bawisigi Fugo Mbori na kpinyemu ka inopai tipa “gu dudungura apai nga ga Mbori”? (1 Kor. 2:10) Ya mo mo bingo Yekova ko nifu maku kurii gu tungusapai mo amangaha? Ya mo mo na kakaka nyemu ka manga gupai Yekova akpinyemuhe? Ya mo mo na bakere nyemu ka undo kura aboro rogo toro yo? Ya mo mo bingo gu gopai nayugo gupai nga Yekova namangapai amanga rogo gamo raka yo? Kangia ga mo karagapai kuti agi asanahe re nga ii, ya mo gure nayugo gupai awere nzunzu nga mo ima gbia gu yambahe nga ga ga ku ngbangbaturũ yo? Oó, wo duhe te. Tipagine? Mbiko anga kina agu aboro du na gu yambahe nga ga ga ku ngbangbaturũ yo sa du na ngbatunga bipai wa gure te. Ga Yekova toro namangasunge ngba rengberengbe gene na agu aboro dunduko du na maabangirise ka raka nyeanye kindi auru kpotosende. Nirengo, ka si du nga mo na bakabangiro abaka singia mo ima gbia gu yambahe nga ga ngbangbaturũ yo, gure nitihe nayugo gupai nga mo ata gbianga ha te. Agu aboro Yekova ayambayo i abakanga bangiriyo singia i gbia gu yambahe re watadu i ata gbianga ha te te. I ima inoho!

16. Wai du ini ani he nga anga agu aboro dunduko gbia ziazia toro i nayambuyo i ga ku ngbangbaturũ yo te?

¹⁶ Rogo Ziazia Kekeapai nabaha, dungu akpiapai ani abihe yo nga ga agu aboro naadu na idapase ziazia toro amangisunge na yo; ono wa si avura du wo, i aadunga na gu maabangirise nga ga ga ku ngbangbaturũ yo te. Yoane Bapatiza naadu dagbayo. Yesu aima tambua ko ni bakerehe ono ko ki ya Yoane adu nga dagba agu aboro nika du rogo gu Kindo nga ga ngbangbaturũ te. (Mt. 11:10, 11) Ga Mbori ziazia toro aima mangasunge na Davide a. (1 Sam. 16:13) Ko aima du na bakere dudunguro inohe tipa agu apai nga ga toro na ko ki ima ke papara Ziazia Kekeapai a. (Mk. 12:36) Wa si avura du wo, ti regbo Pendekote, Petero afura tipa Davide nga ko “andu nga ku angbangbaturũ yo te.” (Amo. 2:34) Ziazia toro aima mangasunge ni bakerehe na agi aboro re, ono si aafunga gu kparakpara dezirepai fuyo nga i ima siayo tipa i ga ku ngbangbaturũ yo te. Gere ayugongo ho nga i arẽnga ya te te. Gure nayugo gupai nga Yekova nika zingisa yo i raki rogo paradizo auru kpotosende ane.​—Yo. 5:28, 29; Amo. 24:15.

17, 18. (a) Gini mosoro dungu ga Mbori amoyambu angera kumbatayo tipaha areme? (b) Gini asanahe ani nika wisigopai tipaha rogo gu kekeapai ngbefuo gere

¹⁷ Badungu ga Mbori amoyambu areme na gu yambahe nga ga ngbangbaturũ te. I na kina gu maabangirise Davide na Yoane Bapatiza adu na ni, gbiati gu kura ruru amoyambu nga akumba na adee naadu mbata. Wakina Abarayama, i nangera kumbatayo ka raka ni azogo nga ga Kindo. (Eb. 11:10) Kina bete yangara agu aboro i nasia yo tipa raka ku ngbangbaturũ yo nye auru kpotosende rogo gi yangara arame re. (Yugo. 12:17) Gure nayugo gupai nga badungu agu aboro du bangeyo nga 144,000 du ni siasia yo ima kpi niruru yo.

¹⁸ Sidu tie, wai du si aida agu aboro du na gu maabangirise nga ga raka auru kpotosende ane bi agu aboro naya i na gu maabangirise nga ga ngbangbaturũ? Ka si du nga boro rogo gaoni dungurati tona ka ri kpakuto ti regbo Tingida Pakpio Yesu, si naida gaoni mangapai du wai? Ya mo si naida oni bakibangironi na pa nge bange agu aboro naya i naga ku ngbangbaturũ yo? Ani nika gbia karagapai kuti agi asanahe re rogo gu kekeapai ngbefuo gere.