“Come Be My Follower [Mo Ye Kini Peke Re]”
1. Gini momu Gu Wisigo Ziazia Kekeapai Nga ga Dungurati nika fuhe furani rogo agu adiwi naye?
1 Agu Akitabu Wene Pangbanga du biama nayugo badungu futufutuapai furani tipa Wiri Mbori. Wadu he nga si naida aKristano ‘naapeka fuoko,’ ngbaha angba tie ani mbakaditirani tipa ka degaturani wenengai wa ani kaa wisigo gu buku nga “Come Be My Follower” ti regbo gaani Wisigo Ziazia Kekeapai Nga ga Dungurati tona rogo gu bambata poso nga ga Marungu. (1 Pet. 2:21; Mk. 10:21) Gupai si aida ani moiberã rani fuani gbe nga ka inopai wenengai tipa gu ga Yesu raka rengbe ka ngarasa rani tingba gaani sunge tungusapai.
2. Wai rengbe ga Yesu kpiapai nga ga hipai ka undo rani?
2 Gu Kpiapai Yesu Amoihe Furani: Ya mo oni agbianga tironi na gbegberẽ karagapai gene tungusapai yo? Ho ani agbiatirani ni na ngbatunga agu akparakapai duwa gure, ani nitingidi gu fugo Yesu du rogo Yoane 15:20 nayaa: “Si ngia i arungosi re arungosi, i arúngosi roni arungosi a.” Nirengo, anga gu gbegberẽ akaragapai dunduko ani agbiatirani nani gene tungusapai yo nga kina arungosiro te. Ono tie, Yesu ahi ngbatunga arungosi gbiati aʹasada dunduko mbiko gu ngbarago naapido ko kumbatayo. Kina gu bangisapai re a si aida ani mangihe nga ka sa Yekova ko idi na gaani pai na ki fu mosoro furani tipa padu ani niruru rani. Gipai re nika undo rani ka ani dunga na ‘mbugo na ki rungbura rogo gaani aberã’ yo ya. (Eb. 12:2, 3; Snz. 27:11) Ka ani kpatagara kuti gaani sunge tungusapai, ani duadu naa kido nga, Yesu Kristo nika undo rani aundo.—Mt. 28:20.
3. Wai rengbe ani ka wirika gu bipai Yesu adu nani tipa gako sunge tungusapai?
3 “Bambiko Si du I Akedi Re Tipa Ha”: Sunge tungusapa Kindo nangia bambatapai rogo ga Yesu raka. (Ruka 4:43) Ko afu tiko kakaka sa gako sunge tungusapai. Ko abihe nigu sunge si aida ko mangihe niʹipiʹipihe, na kini gbata amomu dedede tipa ka fura na aboro tipa gu Kindo re. Wangia ani apefuo Yesu, ya mo ani napekafuo gako kpiapai? Wa ani naadogoda ku gene gaani apai yo, ya mo ani naagbianga tirani na agu aboro rengbe ani ka fura naayó tipa wene pangbanga te? Nyemu Kristo sosodinga rani asosoda ani tungusi wene pangbanga wenengai sirisiri!—2 Kor. 5:14.
4. Gini gene rengbe ani ka mbakada gaani agene tungusapai ngbaha?
4 “Boro Agumba Nga Pai Mbata Wo Te”: Ga Yesu yugopai anaairiwo airiwo ti agu aboro nanaadegatuyo fuko. (Yo. 7:46; Mt. 7:28, 29) Ginihe nasako ko du kia ti gu kura abayugupai? Gupai nasako ko du kia angia ko akpinyemu gu rengo ko anaayugoho fu aboro, na ko aima kpinyemu agu aboro ko anaayugopai fuyó, na kini tungusipai ngba dungu agene. Ka ani awirika gu Bakere Bayugupai re, si rengbe ka sa rani ani mbakadi gaani agene tungusapai wengai.—Ruka 6:40.
5. Gini sásá si aida oni moihe wa oni nika wirika gu buku nga “Come Be My Follower”?
5 Gere nga gu bete apai rengbe ani ka wirikaha rogo gu raka nangia ga Yesu. Gini kura apai rengbe ani ka wirikaha berewe? Wa oni kaa wisigopa ga Kristo raka ti regbo gaoni Wisigo Ziazia Kekeapai Nga ga Dungurati, si naida oni moihe nigaoni sásá ka ‘ruga tironi naapa ga Kristo nyemuse’ na kini wiriki afugoko gbiati gako mangapai.—Ef. 3:18.