Ya Mo Oni Aasadinga ka Tona Wirikapai na Boro ti Kina gu Bambata Regbo Oni ni Bi Ní?

Ho ani naasana kura aboro ni tipa ka wisigo Ziazia Kekeapai naayó, aguyo nape gupai nga nyemuhe tiyo te watadu i nayawee i naawisigo Ziazia Kekeapai awisigo rogo gayó akanisa. Wa duhe nga i ainongo gupai nga gaani gene wisigo Ziazia Kekeapai na aboro kia ti gu kura apambori te, i arengbanga ka inopa gu inohe gbiati ngbarago rengbehe ka ye nani fuyó te. Sidu tie, kuba gupai nga ani sana boro tipa ka wisigo Ziazia Kekeapai na ní, si angba angba ka ani di regbo ka yugokpia wai funi ani naawisigo Ziazia Kekeapai na boro ti gu bambata regbo bi ani ní. Nikpiapai: Si aidanga ani fura gbua na ní riipa wisigo Ziazia Kekeapai te, ono si naida ani yugukpia wai ayugo ani naamangaha. Gi kpiapai naye re nayugo wai rengbe oni ka mangaha vuru umba regbo yo, mburuhe rii gu berãpai du rogo Gaani Sunge Nga ga Kindo nga ga Ngi 2006 ti kpewaraga 6:

“Ya mo oni aberẽnga gupai nga, uru adu kinaho agi afugo re nika ringbisa tihe ni te? [Oni gedi Yesaya 33:24, na ki mbu ní tipa ní karagapai.] Pai gu du rogo gi buku re nafura tipa gupai re.” Oni fu gu buku nga Bible Teach funi ki gbe berãni kuti kpewaraga 36 genewaraga 22. Oni gedi gu sanahe nga ga genewaraga 22, na ki sana gu boro re tipa ní gbata karagapai kuti gu sanahe wa oni kaa gedaha. Fuani, oni ki sana ní berewe na gu sanahe re, na ki degeturoni kuti gani karagapai. Oni gedi gu kura averesi na ní wasa. Oni sana gu sanahe oni ka karagapai kutini ho oni ka karagatironi ni berewe ka bi ní, na ki mbakadipai tipa ka karaga tironi berewe. Ka oni mangihe wo, gure nga oni ima tona wisigo Ziazia Kekeapai na boro!