Oni Mangisunge na gu Tona Fugo Rẽarẽ

1. Ginipai rengbe ani ka wirikaha ti agu agene agu aKristano nadumbata anaatona fugo ngbaha na aboro?

¹ Agu aKristano nadumbata anaatungusa wene pangbanga fu agu aboro gayo asino mangaapai gbiati apambori adu nibakiakia. (Koro. 1:23) Wa si avura du nga i dunduko naafura tipa kina bangisa pangbanga sa, nga pa ga Mbori Kindo, gu gene i anaatona fugo ngbaha adu nibakiakia ringbisihe kuti agu aboro i anaafura naayo. Nikpiapai, ho Petero aafura ni fu agu aYudo naadu na bakere irisa tipa Ziazia Kekeapai, ko atonaha nigumbako sangba gu nebi nangia Yoere. (Amo. 2:14-17) Ono tipa Pauro tigako, oni kparianga gu gene ko asakipai na aGiriki ngbaha a wa duhe nikekehe rogo Amokedi 17:22-31. Areme, badungu aboro du na irisa tipa Ziazia Kekeapai, ani rengbe arengba kaa gedaha fuyo ho ani atungusapai ni nitanga nani ti akporo. Ono tie, kura aregbo kinaho si aida ani du na rubangirise ho ani afura ni na agu aboro adunga na nyemu Ziazia Kekeapai watadu pambori tiyo ya.

2. Wai gu rengbe ani ka mangasunge na abuku ka undo agu aboro du na nyemu Ziazia Kekeapai tiyo na aguyo adunga nyemuhe tiyo ya?

² Oni Mangisunge Wenengai na gu Buku Oni Afuhe: I nikaa saka agu abuku ani kaa fuhe rogo gi garã nga ga sunge re tifuo adiwi ue na si nikaa fura tipa amagazini, atrakte, gbiati aburosua. Ka si vura du vurũ nga badungu aboro rogo gaani dagbarago na nyemu Ziazia Kekeapai tiyo te, ani aduadu na rengba berani ka fura naayo tipa agu apai du yó na nyemuhe. Si rengbe kadu nga ani gbia boro ti bambata regbo ka gene adunga wa ka ani gedi veresi funi ya, ono ka si du nga ní na nyemupai, ani rengbe ka karaga tirani fuoni na gu sásá nga ga undo ní ní du na idapase kuti Bakusiahe gbiati gu Fugoko gako toro adu kugiipa kehe. Ono ka si du nga ani natungusapai rogo gu dagbarago du aboro adu rogoho na nyemu Ziazia Kekeapai, ani rengbe ka mangasunge na buku ringbisihe kuti gayo nyemupai. Ani rengbe ka fu gu buku nga Ziazia Kekeapai Ayugoho watadu gu burosua nga Oni Degeturoni fu Mbori watadu Oni Degeturoni fu Mbori Tipa ka Raka Nyeanye Kindi ka si vura du nga si nga gu waraga du tipa fuhe fu aboro rogo gu diwi re te. Gupai nyakipaha gbe nga ka mangasunge na gu tona fugo rẽarẽ.

3. Wai gu du ngbadu agu aboro yo du rogo gaani adagbarago wakina sende?

³ Oni Mbakadi Sende: Ngbadu aboro yo wakina sende. (Rk. 8:15) Gu kura ngbadu aboro yo naida i mbakadihe ambakada wenengai tipa tarã rengo rimi wenengai. Agu abatungusi wene pangbanga naadu rogo bambata sa kama agarã arũ tarã rengo rogo dungu asende na ki gbia bakere ngbarago. (Amo. 13:48, 52) Ani rengbe ka gbia ngbatunga gu ngbarago re ka ani gbe berãrani kuti gu gene ani atona fugo ngbaha na aboro.