Oni Mangisunge na Atrakte Tipa ka Gbandaka Wene Pangbanga
1. Wai gu ga Yekova aboro amangisunge na atrakte?
1 Ga Yekova aboro aima digo nimangisunge na agu atrakte du mburuhe rii Ziazia Kekeapai tipa ka gbandaka wene pangbanga. Rogo gu garã nangia 1880, C. T. Russell na akurako atona kaa kusa agu atrakte i aayambaha nga Bible Students’ Tracts, na kini fuhe fu agu aboro nanaageda Ngbaõbambu Sinziri tipa i naakparakaha fu aboro. Atrakte adu na nyanyakipaha gbe, ti gu regbo C. T. Russell ake rimo riigbu nigu riigbu irangbii naidi paha amanganga sunge tipa marã ya tipa ka sonosa gu sunge nga ga Kindo, i amangisunge na gu fugo nga “trakte” rogo gu rimo i ayambuhe nga Zion’s Watch Tower Tract Society, i ayambaha awere nga Watch Tower Bible and Tract Society of Pennsylvania. Da ti gu garã nangia 1918, agu aboro naawirika Ziazia Kekeapai aima kparaka atrakte bangehe ki da ti amirioni 300. Zavura areme a, atrakte naye kindi na wene sangbanapai.
2. Tipagine du atrakte ti ni nigu gu ũsunge duna wene sangbanaha?
2 Ndu Gupai Atrakte Aye ti ni na Wene Sangbanapai: Atrakte nagbeberã aboro nikina boro ipo. Gu guru pangbanga du rogoho, si nafura tipa kina banguapai na boro nagedaha si ki ngba tiní nibasa. Si gu ngbaangba ti agu airakporo adunga regbo beyo ka gida bakere buku watadu magazini ya. Atrakte taata tipa ka fuhe, zavura fu vovo abatungusipai na rukutu agude. Kurigure, atrakte niwiri toonihe nga gu rengbe ani arengba ka zada ha berani.
3. Oni gumbanga gu pangbanga namangi furoni watadu gu du nikekehe nga gu nayugo pa nyaka atrakte.
3 Badungu aboro nagia pa rengo nibambataha vurube atrakte. Nikpiapai, dee sa rogo gu ringara nga Haiti abi gaani trakte sande bangiri gene. Ri ki dihe, ki gedihe, na ki gumba gupai nga “Mi ima gbia rengo!” Tifuo gure, ri andu ku Bambu Kindo yo, ki tona wisigo Ziazia Kekeapai, na ki zi bapatiza. Agi apai re amangi wa gure dunduko mbiko gu ome Fugo Mbori nga gu naadu rogo trakte.
4. Gaani sásá nga gine ho duhe ni nga atrakte du ani afuhe rogo diwi?
4 Tungusapai na Atrakte Nitanga na Ni ti Akporo: Wa duhe nga mangasunge na atrakte naye na wene sangbanapai, si ani kaa mangasunge nani dedede tipa manga dezirepai tona rogo Ngbangba. Anga gaani sásá gbua nga ka fu trakte fu aboro te, ono ka mangasunge nani tipa ka tona fugo. Ka boro yugu nyemupai ti gu bambata regbo oni nagbia ní watadu ho oni akaraga tironi ni fuoni, oni rengbe ka yugokpia wai funi ani naawisigo Ziazia Kekeapai na aboro rogo gu buku nga Ziazia Kekeapai Ayugoho watadu gu kura waraga kadu. Wai gu rengbe ani ka mangasunge na atrakte ho ani atungusapai ni nitanga nani ti akporo? Atrakte dunduko nibakiakia, sidu, si naida ani inidi tirani na agu ani afukaha dunduko.
5. Wai gu rengbe ani ka fu atrakte ho ani atungusapai ni nitanga nani ti akporo?
5 Gu trakte ani afuhe na gu gene ani afuhe ngaha, si naida si rẽarẽ na gu dagbarago ani afuhe rogoho. Ani rengbe ka tona fugo na boro nifu ani trakte funi. Gu wene asura du ti kpoto gu trakte re ima rengba ka zingisa nyemupai rogo ní yo. Watadu ani rengbe ka yugo dungu atrakte funi ki mbu ní tipa ní sia gu ngba tiní. Ho ani amangasunge ni rogo gu dagbarago aboro adindiko adindiko rogoho ka zaka gayo ngbadimo furani, ani rengbe ka ya gu trakte funi ngba gu gene ní ka bihe abi, watadu ani rengbe ka gumba gupai funi nga he gu du ho ani arimisoho funi tii gani ngbadimo nga gu ani aida ka ino gani bipai tipaha. Ka si du nga gu kekepai du ti kpoto gu trakte re nga sanahe, ani rengbe ka sana ní tipa ní gumba gani bipai tipa gu sanahe re. Watadu ani rengbe ka kusa sanahe ki sana ní nani nga gu nika sa gupai nga ani sakipai na ní. Fuo gure, ani rengbe ka geda papara gu trakte re na ní wa sa, kini ongodi ho du asanahe ni na kini sana ní tipa gani bipai. Ani rengbe ka geda gu bangua averesi du rogoho kina rogo Ziazia Kekeapai. Fuo ani sakipai tipaha nibetehe, ani ki digisihe na ki mangi mbakadapai tipa ka karaga tirani fuoni. Ho adunga aboro ni tiikporo ya, ka si du nga gaoni dungurati nidu adu na gu mbakadapai nga kaa mbu awaraga fu agu aboro adunga tiikporo ya, oni rengbe arengba ka mbu trakte fu agu aboro adunga tiikporo ya.
6. Wai gu rengbe ani ka mangasunge na atrakte ho ani amanga dezirepai ni bangiri gene?
6 Manga Dezirepai Bangiri Gene: Ya mo oni amangingo sunge na atrakte ho oni amanga dezirepai ni bangiri gene? Gu kura aboro kinaho nga aguyo nandu ngba gayo gene aidanga ka ru tipa ka fura na ani ya. Si rengbe ka kpakara akpakara tipa ka ino gayo nyemupai. Kuba gupai nga ani fu gaani vovo amagazini fuyo zanga inoho singia i agedaha nzunzu, si angba gbe ka ani fu kina trakte fuyo. Bambiko gupai nga kpotoho nibawenehe na gupai du rogoho nikina wiri guruhe, kura aboro ima rengba kadu na nyemu ka ino gupai du rogoho na ki di bete aminiti ka gedaha. Ka si du tie a nga regbo gu duadu beyo, ani rengbe arengba ka sakapai naayo wenengai tipa gupai du rogo gu trakte re.
7. Oni gumbanga apangbanga nga gu nayugo wai rengbe oni ka mangasunge na trakte ho oni amanga dezirepai ni angianga kuti asino mangaha ya.
7 Manga Dezirepai Angianga Kuti Asino Mangaha Ya: Si nitaatapai ka manga dezirepai na atrakte ho ani atungusapai ni angianga kuti asino mangaha ya. Gupai wirina sa ninaamanga ha nga kaa maa bete atrakte ku mangu ko yo ho ko aguari ni kporo. Ho ko agbia boro ni, nikpiapai gu boro nabagaahe bambu bagaahe yo, ko nagumba gupai gbua funi nga he gu duho ko aida ka fuhe ní ní gedihe na ko ki fu trakte funi. Ho kura arogotise sa aandu ni kurogo gu gbata du Amerika yo nga New York City tipa ka bi rago, i abi gupai nga i ima rengba ka gbia agu aboro yó naye rogo dungu aringara. I adi gu wiri tooni buku naayo nga Good News for People of All Nations gbiati dungu atrakte rogo dungu afugo. Ho i ani gi fugo boro ni ní nifura rogo gu kura fugo kia babagaahe yo watadu rogo agu aba i asungo rogoho watadu mataamu yo, i anifu trakte funi rogo fugo ní yo.
8. Wai gu du atrakte wakina tunga?
8 “Mo Rũ ga Tunga”: Ani rengbe ka ringbisa atrakte kuti tunga. Bamitunga nami gani tunga nidunguhe bambiko ní ainongo gu nika kura te. Batungusipai 11:6 nagumba gupai nga: “Mo rũ ga tunga wiso, ka mo mbú nga rũ he nyemu ya; bambiko mo aina nga pa gini gu nikaida te, watadu ga wiso watadu ga nyemu, watadu si ue nikaida aida dũ.” Sidu, ani ‘nigbandakanga inahe’ agbandaka wenengai nimanga ani sunge na gi wene ũsunge manga dezirepai re.—Snz. 15:7.
[Blurb on page 3]
Wa duhe nga mangasunge na atrakte naye na wene sangbanapai, si ani kaa mangasunge nani dedede tipa manga dezirepai tona rogo Ngbangba