Ada Namanga Gupai Yekova Akpinyemuhe Areme?
1. Ti gini regbo ani ka tona wisigo gu burosua nga Ada Namanga Gupai Yekova Akpinyemuhe Areme? na wai si nika undo rani?
1 Tona rogo gu poso nga ga Wegebe 10, ani nikaa wisigo gu burosua nga Ada Namanga Gupai Yekova Akpinyemuhe Areme? ti regbo Gu Wisigo Ziazia Kekeapai Nga ga Dungurati. Gi vovo burosua re, i akusihe ti regbo gu bakere dunguratise riihe adu nga “Mo Nibánda Kpotoro Yo!” I ambakadihe tipa si undo agu aboro ani awirika Ziazia Kekeapai na yó i ye ku rogo ga Yekova riigbu. Anga gupai gbua wisigo gi burosua re nika mangaha furani nga ka sarani ani du na tambuahe wangia ani papara ga Yekova riigbu te, ono si nika undo rani a ani inidi tirani na gi burosua re wa ani kaa mangasunge na ni gene tungusapai yo.—Tam. 48:13.
2. Wai i nikaa wisigo gu burosua re rogo dungurati?
2 Wai I Nika Wisigo gi Burosua Re?: Gu boro nikaa nungusaha du nika ino wai ní nika ringbisa regbo tipa i wisigi wirikapai sa dunduko vuru gu regbo du tipaha. Ko nika tona agu awirikapai du ti baraha dunduko 28 re nigeda ko gu sanahe du bariihe yo. Fuo gure, bagedipai ki gedi bambata genewaraga. Fuo geda yó bambata genewaraga, banungusi he ki sana agu aboro du pati dunguratise na gu sanahe ko aima mbakadaha tipa gu bambata genewaraga re. Fuo gure, i ki tona kaa geda agu apaparaha natona na gu kekeapai du nibibirihe na nikikindigihe na kini sakipai tipaha nibasasa dunduko nibakiakia. Fuo i nyasi geda paparaha, gu boro nanungusaha ki sana agu aboro du pati dunguratise i fura tipa wai si akaragapai kuti gu sanahe du barii gu wirikapai re. Gu burosua re a na badungu akpiapai rogoho nga gu rengbe aboro ka karagapai tipaha. Si naida i gedi gu bangua averesi ageda du ho ringbisihe kuti gu regbo du ho. Mbata fu ndu oni kurogo gu kura wirikapai, gu boro nanungusaha nika manga fugöpai nisana ko agu asanahe du ti mburu kpewaraga yo. Ka si du nga gu sanduki nga “Mo Asadi ka Ino Kura Apai” kinaho, bagedipai gedihe, gu boro nanungusaha ki sana agu aboro du pati dunguratise i gumba pa wai rengbe agu aberãpai du yo ka undo gu boro nawirika Ziazia Kekeapai. Ka regbo du ti digidoho yo, ko rengbe ka mangasunge na agu asanahe du bariihe yo tipa fugöpai. Anga si nga kina boro wai i napekehe kuari re abatungusipai nikaa mangasunge na gu burosua re ho i awisigo Ziazia Kekeapai na boro te.
3. Ginipai si nika ida ani mangihe tipa ka gbia undo ti gi burosua re wenengai?
3 Tipa ka gbia bakere undo ti gi burosua re, si naida boro mbakadi tiní ambakada wenengai mbata fu ní ye tipa dunguratise. Ki mangi ome tipa ka karagapai. Ti gu regbo i awisigoho, mo berẽkurii ndu gupai du gupai oni awisigoho re ti ni na nyanyakipaha fu agu aboro nawirika Ziazia Kekeapai. Wa ani kaa wisigo gi burosua re, si funga gu inohe afu furani rengbe ka sarani ani undo kura aboro tipa i ye ani mangi gupai Mbori akpinyemuhe na yó wa sa, na i kidu a na gu maabangirise nga ka raka nyeanye kindi.—1 Yo. 2:17.